ၵူၼ်းပၢႆႈၽေးသိုၵ်း တီႈၸႄႈဝဵင်းၵျွၵ့်မႄး ၸိုင်ႈတႆးပွတ်းႁွင်ႇၸပ်းတၢင်းပဵၼ်ၶူဝ်ႊဝိတ့် 19 မွၵ်ႈ 200 ၵေႃ့ ဝႃႈၼႆ။
မိူဝ်ႈၼႆ့ ဝၼ်းတီႈ 17/9/2021 ၵူတ်ႇထတ်းပၢႆးယူႇလီပၼ် ၵူၼ်းပၢႆႈၽေးသိုၵ်း ၼႂ်းဢိူင်ႇမိူင်းတၢင်ႈ ၼႂ်းၸႄႈဝဵင်းၵျွၵ်ႉမႄး၊ တီႈပၢင်သဝ်းဝၢၼ်ႈပဵင်းၶႃး ထူပ်းႁၼ်ၵူၼ်းၸပ်းၶူဝ်ႊဝိတ်ႉ 29 ၵေႃ့၊ ဝၢၼ်ႈ ၼႃးမူၼ်းႁၼ် 5 ၵေႃ့ ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵျွၵ့်မႄး ၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆ့ ၵူတ်ႇထတ်းႁၼ် ၵူၼ်းပၢႆႈၽေး တိတ်းၸပ်း တၢင်းပဵၼ်ၶူဝ်ႊဝိတ့် 19 ထႅင်ႈ တီႈပဵင်းၶႃး ႁူဝ်ၵူၼ်း 29 ၵေႃ့၊ တီႈၼႃးမူၼ်းသမ့် 5 ၵေႃ့ ႁူမ်ႈၵၼ် တင်းမူတ်း 34 ၵေႃ့ၶႃႈ။ ၵူၼ်းပၢႆႈၽေး သိုၵ်းတီႈၼမ့်ၸေႃ့ ဢၼ်တိတ်းၸပ်း 24 ၵေႃ့ၼၼ့်တႄ့ ဢမ်ႇႁိုင်သင် တေလႆႈလူင်းႁူင်းယႃယဝ့် ”- ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း တီႈၸႄႈဝဵင်းၵျွၵ့်မႄး ဢၼ်တိတ်းၸပ်း တၢင်းပဵၼ်ၶူဝ်ႊဝိတ့် 19 မီးမွၵ်ႈ 200 ၵေႃႉ ။ ပဵၼ်တီႈ ဝတ့်တႃႈလူင် မိူင်းငေႃ့ 12 ၵေႃ့ (တီႈၼၼ်ႉ လူ့တၢႆ 1 ၵေႃ့) တီႈၵျွင်းမၢၼ်ႈၶႃႇ 120 ပၢႆ၊ တီႈၼမ့်ၸေႃ့ 24 ၵေႃ့၊ တီႈပဵင်းၶႃး 29 ၵေႃ့လႄႈ ၼႃးမူၼ်း 5 ၵေႃ့ ၼႆယဝ့်။
လုင်းၸၢႆးလႅင်းႁၢၼ် ႁူဝ်ပဝ်ႈ ၵေႃလိၵ်ႈလၢႆး ၸႄႈဝဵင်းၵျွၵ့်မႄး လၢတ်ႈတီႈၽူႈတွႆႇႁွၵ်ႈဝႃႈ -“ယၢမ်းလဵဝ် ၸွမ်းၼင်ႇႁဝ်းၶႃႈလႆႈသဵၼ်ႈမၢႆဝႆ့ ၵူၼ်းပၢႆႈၽေးသိုၵ်းတီႈၵျွၵ်ႉမႄးၼႆ့မီး ဢမ်ႇယွမ်း 2,500 ၵေႃ့ ၶႃႈ ။ ဢၼ်ပၢႆႈမႃးသွၼ်ႈယူႇဝႆ့တီႈႁိူၼ်းယေး ပီႈၼွင့်ၽႂ်မၼ်းၵေႃႈ မီးထႅင်ႈတင်းၼမ်။ ၼႂ်း ၵူၼ်းပၢႆႈၽေး 2,500 လိူဝ်ၼႆ့ ဢၼ်တိတ်းၸပ်းတၢင်းပဵၼ် ဢမ်ႇယွမ်း 200 ပေႃးဢဝ် % ဝႃႈၼႆၸိုင် တေမီးမွၵ်ႈ 10 % ”- ဝႃႈၼႆ။
ၵူၼ်းပၢႆႈၽေးသိုၵ်းဢၼ်တိတ်းၸပ်းတၢင်းပဵၼ် ၵမ်ႈၽွင်ႈလႆႈၵႂႃႇၵၵ်းတူဝ်ယူႇသဝ်းတီႈသုၼ်ၵၵ်းတူဝ်ဢၼ်ၾၢႆႇၸွႆႈထႅမ်ၶိုင်ဝႆႉပၼ်၊ ၵမ်ႈၽွင်ႈလႆႈၶဝ်ႈႁူင်းယႃသေယူတ်းယႃတူဝ်။
ၵူၼ်းပၢႆႈၽေးသိုၵ်း တီႈၸႄႈဝဵင်းၵျွၵ့်မႄး 2,500 ပၢႆၼႆ့ လႆႈပၢႆႈၽေးပၢင်တိုၵ်းၼႂ်းၵႄႈ RCSS တင်း TNLA, SSPP ပိုတ်းယိုဝ်းၵၼ် ၼႂ်းၶၢဝ်းတၢင်း 7 လိူၼ်ပၢႆ ၵမ်ႈၽွင်ႈၵမ်ႈၼမ် ဢမ်ႇၸၢင်ႈပွၵ်ႈယူႇၶိုၼ်းႁိူၼ်းယေး ။ တိုၵ်ႉလႆႈသွၼ်ႈယူႇႁူမ်ႈၵၼ်တီႈဝတ်ႉဝႃးၽႃသိူဝ်ႇ၊ ႁိူၼ်းယေးပီႈၼွင်ႉလႄႈ ယူႇၸွမ်းဝၢၼ်ႈ ၸွမ်းသူၼ်တီႈဢၼ်ဢမ်ႇမီးပၢင်တိုၵ်း ။ ၵွပ်ႈၼႆလႄႈ ယင်းတိုၵ်ႉၸၢင်ႈတိတ်းၸပ်းလၢမ်းၽႄႈၸူးၵၼ်ထႅင်ႈယူႇ ၵူၼ်းၼုမ်ႇၸိူဝ်းၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ