ၵၢင်ႉၵႄႇတႂ်ႈတပ်ႉသိုၵ်းမၢၼ်ႈ ဢၼ်ၸတ်းၵၢၼ်ၽွင်းငမ်းဝႆႉ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ယၢမ်းလဵဝ်  တဵၵ်းၸႂ်ႉၵူၼ်းပၢႆႈၽေးသိုၵ်း တၢင်းမိူင်းယၢင်းလႅင် ပွၵ်ႈမိူဝ်းၶိုၼ်းႁိူၼ်းယေးတီႈယူႇၽႂ်မၼ်းဝႆႉၼႆယဝ်ႉ ။

သိုၵ်းမၢၼ်ႈလွၵ်ႇငိုတ်ႈပႃးဝႃႈ သင်ဢမ်ႇပွၵ်ႈမိူဝ်း တေယိုတ်းဢဝ်ႁိူၼ်းယေးလႄႈ တိူၵ်ႇသူၼ်လွၵ်းၼႃး ဝႃႈၼႆ။

မိူဝ်ႈႁၢင်ပီ 2023 ပူၼ်ႉမႃးၼၼ်ႉ တပ်ႉသိုၵ်းမၢၼ်ႈ တင်း ၸုမ်းႁူမ်ႈႁွမ်းသိုၵ်းယၢင်းလႅင် ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းမိူင်းယၢင်းလႅင် လႄႈ တီႈလႅၼ်လိၼ် တႆး-ယၢင်းလႅင်။ ၽွင်းၼၼ်ႉ ၵူၼ်းမိူင်း ၼပ်ႉႁူဝ်ႁဵင်ႁူဝ်မိုၼ်ႇ လႆႈငိူင်ႉပၢႆႈဢွၵ်ႇဝၢၼ်ႈ။ ၵူၼ်းမိူင်းဝဵင်း ၾၢႆၶုၼ်၊ မိူင်းပၢႆး၊ တီႈမူၵ်းသိူဝ် ၸိူဝ်းၼႆႉ ပၢႆႈမႃးသေႃႉယူႇဝႆႉ ၼႂ်းၸႄႈဝဵင်းတူၼ်ႈတီး။ ယၢမ်းလဵဝ် ပလိၵ်ႈမၢၼ်ႈသိုၵ်းမၢၼ်ႈ ပၼ်ႁႅင်းဢီးလၢတ်ႈဝႃႈ ႁႂ်ႈၵူၼ်းပၢႆႈၽေးသိုၵ်း ပွၵ်ႈမိူဝ်းယူႇႁိူၼ်းၶိုၼ်း။

ၼၢင်းယိင်း ၵူၼ်းပၢႆႈၽေးသိုၵ်းမိူင်းယၢင်းလႅင် ဢၼ်မႃးယူႇသဝ်းဝႆႉ ၼႂ်းဝဵင်းတူၼ်ႈတီးၵေႃႉၼိုင်ႈ လၢတ်ႈဝႃႈ – သင်ပွၵ်ႈမိူဝ်းၵေႃႈ တေလႆႈမိူဝ်းယူႇဝႆႉ တီႈဝတ်ႉတီႈၵျွင်းၵူၺ်း။ ယွၼ်ႉပိူဝ်ႈ ႁိူၼ်းယေးတီႈယူႇ လူႉၵွႆၵႂႃႇ ၼႂ်းၵႄႈပၢင်တိုၵ်း၊ သင်ဢမ်ႇမိူဝ်းၵေႃႈ ၵူဝ်ၶဝ်ယိုတ်းဢဝ်တီႈလိၼ်ပႅတ်ႈ၊ သင်မိူဝ်းၶိုၼ်းသမ်ႉ လႆႈမႆႈၸႂ်ပႃး လွင်ႈႁူမ်ႇလူမ်ႈ“-ဝႃႈၼႆ။

ယူႇတီႈၵူၼ်းပၢႆႈၽေးသိုၵ်းၸိူဝ်းၶၢတ်ႈႁွင်ႈၶၢတ်ႈႁိူၼ်းယူႇၼၼ်ႉလႆႈတၢင်ႇသဵၼ်ႈမၢႆၶႅၵ်ႇ ၼိုင်ႈဝူင်ႈၼိုင်ႈပွၵ်ႈ ၼိုင်ႈၵေႃႉၼႆႉ 3000 ပျႃး ၵူႈဝူင်ႈ ။ လိူဝ်ၼၼ်ႉ ၵၢင်ႉၵႄႇ ၵဵပ်းငိုၼ်းတႃႇၵမ်ႉထႅမ်ၵူၼ်းၵႂႃႇႁၢပ်ႇၵၢၼ်သိုၵ်း ။  ၵူၼ်းပၢႆႈၽေးသိုၵ်းၼႂ်းဝဵင်းတူၼ်ႈတီးလႆႈသႂ်ႇငိုၼ်းပၼ် ၼိုင်ႈလိူၼ်ၼိုင်ႈပွၵ်ႈ ၼိုင်ႈပွၵ်ႈၼႆႉ 3 မိုၼ်ႇပျႃးထိုင် 1 သႅၼ်ပျႃးဝႃႈၼႆ  ။

လိူဝ်ၼၼ်ႉ ၵႃႈၶၢတ်ႈၶႃႈႁိူၼ်းယူႇၵႃႈၶၼ်သုင်မႃးထႅင်ႈလႄႈ ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉဝႆႉ ၼႆယဝ်ႉ ။ ယၢမ်းလဵဝ် ၵႃႈၶၢတ်ႈႁိူၼ်း ၊ ၶၢတ်ႈႁွင်ႈ ဝဵင်းတူၼ်ႈတီးမီး 5-7 သႅၼ်ပျႃး – ၵူၼ်းပိုၼ်ႉတီႈလၢတ်ႈ ။  

ၵူၼ်းပၢႆႈၽေးသိုၵ်းယူႇဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ တလဵဝ်ၼႆႉလႆႈႁႃၵိၼ်လဵင်ႉတွင်ႉဝၼ်းလႂ်ဝၼ်းၼၼ်ႉၵူၺ်း ၊ ၼိုင်ႈဝၼ်းၼႆႉ လႆႈၶိုင်ႈၼိုင်ႈၵူၼ်းၼႂ်းပိုၼ်ႉတီႈၼႆႉၵူၺ်း ၊ လႆႈပၼ်ၵႃႈႁၢပ်ႇၵၢၼ်သိုၵ်း ၊ လႆႈတၢင်ႇသဵၼ်ႈမၢႆၶႅၵ်ႇ ၊ ၵႃႈၶၢတ်ႈႁိူၼ်း ၊ လႆႈပၼ်ၵူႈမဵဝ်း တႃႇႁႃၵိၼ်လဵင်ႉတွင်ႉၵေႃႈ ယၢပ်ႇၽိုတ်ႇၼႃႇ”- ဝႃႈၼႆ ။ 

ၼႂ်းမိူင်းယၢင်းလႅင်မၢင်တီႈ တိုၵ်ႉပဵၼ်ပၢင်တိုၵ်းသိုၵ်းသိူဝ်ၵၼ်ဝႆႉ။ မိူၼ်ၼင်ႇ တီႈလႅၼ်လိၼ် တႆး – ယၢင်းလႅင်ၼႆႉ တပ်ႉသိုၵ်းမၢၼ်ႈ တင်း ၸုမ်းလုၵ်ႉၽိုၼ်ႉ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ ႁၢၼ်ႉတေႃႇထိုင်ယၢမ်းလဵဝ်လႄႈ ၵူၼ်းပၢႆႈၽေးသိုၵ်းတႃႇတေပွၵ်ႈယူႇႁိူၼ်းၼၼ်ႉ မီးလွင်ႈယၢပ်ႇၽိုတ်ႇဝႆႉလၢႆလွင်ႈ ၼႆယဝ်ႉ ။