ၵူၼ်းဝၢၼ်ႈ မိၼ်းပလွင်ႈ ၸႄႈဝဵင်းဝၢၼ်ႈငႂ်ႈ မိူင်းတႆးပွတ်းၸၢၼ်း ဢၼ်လႆႈပၢႆႈၽေးသိုၵ်းသိူဝ်ဝႆႉ 2 ပီၼၼ်ႉ ယၢမ်းလဵဝ်ပွၵ်ႈၶိုၼ်းယူႇတီႈဝၢၼ်ႈၵဝ်ႇယဝ်ႉဝႃႈၼႆသေတႃႉ ႁိူၼ်းယေးၼႂ်းဝၢၼ်ႈ ၺႃးၽဝ်ဝႆႉမူတ်းယဝ်ႉလႄႈ ဢမ်ႇမီးတီႈယူႇ ၊ လႆႈဢဝ်ၽႃႈယၢင်မုင်း/ၵင်ႈသေ ယူႇဝႆႉႁင်းၽႂ်မၼ်းၵူၺ်းဝႃႈၼႆ။
ၵူၼ်းဝၢၼ်ႈမိၼ်းပလွင်ႇႁူဝ်ၼပ်ႉၵူၼ်းမွၵ်ႈ 500 လႆႈဢွၵ်ႇပၢႆႈယၢၼ်ႁိူၼ်းယေး ယွၼ်ႉသိုၵ်းမၢၼ်ႈၶဝ်ႈဝၢၼ်ႈ ၸဵမ်မိူဝ်ႈလိူၼ်ၻီႊသႅမ်ႊပိူဝ်ႊ 2024 ပုၼ်ႉ။ ဝၢႆးလင်ၵူၼ်းဝၢၼ်ႈဢွၵ်ႇပၢႆႈယဝ်ႉ သိုၵ်းမၢၼ်ႈၵေႃႈၽဝ်ႁိူၼ်းယေးၵူၼ်းဝၢၼ်ႈပႅတ်ႈ။
ႁိုင်ၼၢၼ်းၶၢဝ်းတၢင်းၸမ် 2 ပီ လိူၼ်မၢတ်ႉၶျ် ပီ 2026 ၼႆႉ ၵူၼ်းဝၢၼ်ႈၸင်ႇဢွၼ်ၵၼ်ပွၵ်ႈယူႇၶိုၼ်းတီႈႁိူၼ်းတီႈယေး။
ၼၢင်းယိင်းၵူၼ်းဝၢၼ်ႈမိၼ်းပလွင်ႇလၢတ်ႈတီႈၽူႈတွႆႇႁွၵ်ႈဝႃႈ- “ပၢႆႈၽေးသိုၵ်းၵေႃႈဢမ်ႇငၢႆႈ။ ပေႃးၵႂႃႇယူႇႁိူၼ်းပိူၼ်ႈၼႆၵေႃႈ လႆႈတူၺ်းၼႃႈၸဝ်ႈႁိူၼ်းၼႃႇ။ ပၢႆႈၽေးသိုၵ်းၵႂႃႇယူႇၼႂ်းထိူၼ်ႇၵေႃႈ ယၢပ်ႇၽိုတ်ႇတၢင်းၵိၼ်တၢင်းယမ်ႉ။ ၵွပ်ႈၼႆ ဢွၼ်ၵၼ်ပွၵ်ႈမႃးယူႇၶိုၼ်းႁိူၼ်းယေး တီႈဝၢၼ်ႈၵဝ်ႇ။ၵူၺ်းၵႃႈ ပႆႇၸၢင်ႈႁဵတ်းႁိူၼ်းယူႇၶိုၼ်းလႄႈ လႆႈႁဵတ်းသုမ်ႉသွင်းဢွၼ်ႇလဵၵ်ႉလဵၵ်ႉ မုင်းၽႃႈယၢင်သေယူႇဝႆႉၵူၺ်းဢေႃႈ”- ဝႃႈၼႆ။
ယၢမ်းလဵဝ် ၵႃႈၶၼ်ၶူဝ်းၵုၼ်ႇၵေႃႈၶိုၼ်ႈၵူႈမဵဝ်း၊ ၵႃႈၼမ်ႉမၼ်းၸၢၵ်ႈၼမ်ႉမၼ်းၵႃးၵေႃႈသုင် ၵွပ်ႈၼႆ ဢမ်ႇၸၢင်ႈသၢင်ႈႁိူၼ်းယေးၶိုၼ်း။ သင်ဝႃႈ ၶိၼ်သေသၢင်ႈယူႇၵေႃႈတေတေႃႉတႄႉလႆႈယူႇ ၵူၺ်းၵႃႈ ၵူဝ်သိုၵ်းမၢၼ်ႈမႃးၽဝ်ထႅင်ႈၵမ်းၼိုင်ႈ – ၼႆၵူၼ်းဝၢၼ်ႈမိၼ်းပလွင်ႇလၢတ်ႈထႅင်ႈၼင်ႇၼႆ။
ၾၢႆႇၼိုင်ႈသိုၵ်းမၢၼ်ႈၼႆႉ ထႅမ်ႁႅင်းသိုၵ်းၶဝ်ႈၸူးတၢင်းဢိူင်ႇယၼႄးသေ ႁွင်ႉၵူၼ်းဝၢၼ်ႈမႃးၶွၼ်ႈၵၼ်တီႈဝတ်ႉဝႃးၽႃသိူဝ်ႇၼႂ်းဢိူင်ႇၼႂ်းဝၢၼ်ႈယဝ်ႉ ၶဝ်ႈၵူတ်ႇထတ်းၵူၼ်းၼႂ်းဝတ်ႉၼၼ်ႉဝႃႈၼႆ။
ယွၼ်ႉပိူဝ်ႈငဝ်းလၢႆးၵၢၼ်သိုၵ်းၸိူင်ႉၼႆသေ ၵူၼ်းဝၢၼ်ႈယၼႄး မိၼ်းပလွင်ႇၸိူဝ်းၼႆႉဢမ်ႇၸၢင်ႈၵႂႃႇမႃးႁႃၵၼ်ငၢႆႈငၢႆႈ။ ၾူၼ်တူၵ်း ယုင်းလိူင်ႇၵေႃႈဢမ်ႇမီးဢၼ်ႁႄႉဢၼ်ၵင်ႈလႄႈ ဢွၼ်ၵၼ်ပဵၼ်တၢင်းပဵၼ် ၶူမ်းၵၢႆး တွင်ႉၵႂႃႇၸိူဝ်းၼႆႉ။ လူဝ်ႇတၢင်းၸွႆႈထႅမ်ယႃႈယႃလႄႈၶူဝ်းၸႂ်ႉတိုဝ်း ဢိၵ်ႇၶူဝ်းၶွင်ၵိၼ်ယမ်ႉ ဝႃႈၼႆ။
“ တၢင်းပဵၼ်ၶူမ်းၵၢႆးၵေႃႈၸပ်းၵၼ်ဢေႃႈ။ မေႃယႃၶဝ် မေႃလုမ်းလႃးၵူၼ်းပဵၼ်ၶဝ် ၶူးသွၼ်မေႃသွၼ်ၶဝ်ၵေႃႈပိူၼ်ႈဢမ်ႇႁတ်းမႃးၶႃႈၼႃႇ ယွၼ်ႉပိူဝ်ႈငဝ်းလၢႆးဢမ်ႇလီလူး။ ၵွပ်ႈၼႆ ယႃႈယႃသင်ၵေႃႈဢမ်ႇမီး ယႃၵိၼ် ယႃတႃး ဢမ်ႇမီးသင်ၶႃႈ ။ ၵွပ်ႈၼႆပေႃးမီးၸဝ်ႈတႃႇၼတႄႉၶႂ်ႈလႆႈယႃႈယႃဢေႃႈ” – ၼၢင်းယိင်းၵူၼ်းပိုၼ်ႉတီႈ လၢတ်ႈၼင်ႇၼႆ။
ယၢမ်းလဵဝ်သိုၵ်းမၢၼ်ႈၼႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈ ၼႂ်းၸႄႈဝဵင်းယႂႃႇငၢၼ်ႇ ၵူႈဝၼ်း။ မၢင်တီႈၶဝ်ၵႂႃႇပၵ်းတပ်ႉယူႇဝႆႉလႄႈ ပဵၼ်ပၢင်တိုၵ်းၵၼ်တင်းၸုမ်းသိုၵ်းထၼူႉ DPLA ႁဵတ်းႁႂ်ႈၵူၼ်းမိူင်းတူၵ်းၸႂ်ၵူဝ်ႁႄ။ ဝၼ်းတီႈ 2 လိူၼ်ဢေႃႊၵတ်ႉသ်ၼႆႉသိုၵ်းမၢၼ်ႈတီႉၵူၼ်းဝၢၼ်ႈၵႂႃႇ 10 ၵေႃႉပၢႆ သူင်ႇၼႃႈသိုၵ်းၵမ်းသိုဝ်ႈ။ ၸိူဝ်းၼႆႉ ပဵၼ်ဢၼ်လွၵ်ႇငိုတ်ႈၵူၼ်းမိူင်းႁဵတ်းႁႂ်ႈၵူၼ်းမိူင်းယူႇၵေႃႈဢမ်ႇမီးလွင်ႈႁူမ်ႇလူမ်ႈ။
တႅမ်ႈ- ၼၢင်းၶမ်းၵူႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ