ဝၼ်းတီႈ 22/08/2026 ၸွမ်ၽွင်းလူင်ၸိုင်ႈတႆး ဢူးၸၢႆးထဵင်ႇၸူဝ်း ဢွၼ်ၸုမ်းလူင်ပွင်ၸိုင်ႈမိူင်းတႂ်ႈသိုၵ်းမၢၼ်ႈ ၵႂႃႇလဵပ်ႈတူၺ်းမိူင်ႁႄႈၶၢင် (ဢႅၼ်ႊတီႊမူဝ်ႊၼီႊ/ၶၼွၵ်ႉၸဵင်း) ”လၢႆႉႁၢမ်းၼျႃး” ဢၼ်မီးၼႂ်း ဢိူင်ႇပွင်းလိၼ်း ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း။
ၼႂ်းမိူင်းတႆးၼႆႉ ႁႄႈၶၢင်ၼႆႉ ပျီႇတူႉၸိတ်ႉႁူမ်ႈတင်းၸဝ်ႈပၢႆးမၢၵ်ႈမီးသေ ၶုတ်းယူႇၼႂ်းၸႄႈဝဵင်းမိူင်းတူၼ် မိူင်းပဵင်း မိူင်းသၢတ်ႇ ၼမ်ႉၸၢင် လွႆလႅမ် ႁူဝ်ပူင်း ၵုၼ်ႁဵင် ၵၢတ်ႇလေႃႉ လႃႈသဵဝ်ႈ သႅၼ်ဝီ တၢင်ႉယၢၼ်းၸိူဝ်းၼႆႉသေ သူင်ႇၶၢႆပၼ်ၶႄႇ။
ႁႄႈၶၢင်ၼႆႉပေႃးထတ်းထွင်ယဝ်ႉ ၸၢင်ႈၸႂ်ႉလႆႈတီႈဢဝ်ႁဵတ်းယၢမ်းတႃႇပွႆႇမၢၵ်ႇ၊ တႃႇႁဵတ်းမၢၵ်ႇၵွင်ႈ၊ ပဵၼ်ၶိူင်ႈလေႃးၼႂ်းမေႃႈၾႆးပႅတ်ႊထရီႊ (Alloys)၊ ၶိူင်ႈၶူဝ်းဢၼ်ၾႆးဢမ်ႇၸၢင်ႈမႆႈ (Flame Retardants)၊ တႃႇႁဵတ်းၶိူင်ႈမႄႈလႄႈ ၵႅဝ်ႈ၊ ၶိူင်ႈၸႂ်ႉၼႂ်းၾႆးၾႃႉ ၸိူဝ်းၼႆႉ။
ႁႄႈၶၢင်ၼႆႉ ပေႃးႁုင်ထွင်ယဝ်ႉၼႆ လႆႈၵႃႈၶၼ်ယႂ်ႇ ။ 1 တၼ်ႊၵႃႈၶၼ်မီးယူႇမွၵ်ႈ 6 မိုၼ်ၻေႃႊလႃႊ။ ၵူၺ်းၵႃႈ ႁႄႈၶၢင်မိူင်းတႆးၼႆႉ ၸုမ်းယိပ်းၵွင်ႈၵၢင်ႇလႄႈၸဝ်ႈငိုၼ်းသႃး ဢဝ်ၵႂႃႇၶၢႆၵိၼ်တီႈမိူင်းၶႄႇ ၵႃႈထုၵ်ႇၵႃႈပေႃး။ ၼိုင်ႈတၼ်ႊမွၵ်ႈႁိမ်းႁွမ်း 7000 – 8000 ၻေႃႊလႃႊ ၸိူဝ်းၼႆႉၵူၺ်း ၼႆ ၸဝ်ႈပၢႆးမၢၵ်ႈမီးႁဵတ်းၵၢၼ်ႁႄႈ ၼႂ်းမိူင်းတႆးပွတ်းဢွၵ်ႇၵေႃႉၼိုင်ႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ