ပီႈၼွင်ႉတႆး ၸိူဝ်းယူႇသဝ်းၼႂ်းၸႄႈဝဵင်းမၢၼ်ႈၸေႊ၊ မၢၼ်ႈမေႃႈ လႄႈ မိူင်းမွၵ်ႇ ၼႂ်းၸႄႈမိူင်းၶၢင် ႁူပ်ႉၽေးပၢင်တိုၵ်းသိုၵ်းမၢၼ်ႈ တင်း သိုၵ်းၶၢင် ယိုဝ်းၵၼ်ႁၢဝ်ႈႁႅင်းသေ ငိူင်ႉပၢႆႈဢွၵ်ႇဝၢၼ်ႈမႃးသွၼ်ႈယူႇဝႆႉ ၼႂ်းပိုၼ်ႉတီႈလွႆၸေႊ ဝၢၼ်ႈၵွင်းမိူင်းဝၼ်း လႅၼ်လိၼ် မိူင်းၶၢင်-မိူင်းၶႄႇယူႇၼၼ်ႉ လူဝ်ႇတၢင်းၵမ်ႉၸွႆႈ ယႃႈယႃ လႄႈ ၶူဝ်းၶွင်ၵိၼ် ၵူႈလွင်ႈလွင်ႈ ဝႃႈၼႆ။
တီႈဢွင်ႈသဝ်း ၵူၼ်းပၢႆႈၽေး တီႈတိၼ်လွႆၵွင်းမူးလွႆႁူဝ်ၵႆႇ မီးၵူၼ်းပၢႆႈၽေးသိုၵ်း ယူႇသဝ်းဝႆႉ တႃႇ 103 မုင်ႉႁေႃႁိူၼ်း ႁူဝ်ၼပ်ႉၵူၼ်း 334 ၵေႃႉ၊ တီႈထမ်ႇမႃႇယူင်ႇ ၽၢႆႇ (1) မီး 15 မုင်ႉ ႁေႃႁိူၼ်း ႁူဝ်ၼပ်ႉၵူၼ်း 57 ၵေႃႉ လႄႈ တီႈသုၼ်ပၢႆႈၽေးဝၢၼ်ႈ ၵုင်းသႃႇသမ်ႉ ယူႇသဝ်းဝႆႉ 121 မုင်ႉႁေႃႁိူၼ်း ႁူဝ်ၼပ်ႉၵူၼ်း 465 ၵေႃႉ ႁူမ်ႈသဵၼ်ႈ သၢမ်ဢွင်ႈတီႈၼႆႉ ၵူၼ်းပၢႆႈၽေး မီး 239 မုင်ႉႁေႃႁိူၼ်း ႁူဝ်ၼပ်ႉၵူၼ်းလဵၵ်ႉယႂ်ႇၼုမ်ႇထဝ်ႈ သၢမ်ပၢၼ်ၸဵတ်းသႅၼ်း မီး 856 ၵေႃႉ ၼႆယဝ်ႉ။
ၵူၼ်းမိူင်းပိုၼ်ႉတီႈၵေႃႉၸွႆႈထႅမ်တူၺ်းလူပၼ် ပီႈၼွင်ႉတႆးၼႂ်းမိူင်းၶၢင် ၸိူဝ်းလႆႈပၢႆႈၽေးပၢင်တိုၵ်းယူႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “သဵၼ်ႈမၢႆၸိူဝ်းၼႆႉ ပဵၼ်ဢၼ်တွမ်ၵၼ်ယူႇဝႆႉ ၼႂ်းဢွင်ႈပၢင်သဝ်းၵူၼ်းပၢႆႈၽေး Camp ၵူၺ်း။ ၸိူဝ်းဢၼ်ၵႂႃႇသွၼ်ႈယူႇၼႂ်းဝၢၼ်ႈ တီႈႁိူၼ်းပီႈၼွင်ႉၽႂ်မၼ်းၼၼ်ႉၵေႃႈ မီးတင်းၼမ်ဢေႃႈ။ ဢမ်ႇပႆႇၸၢင်ႈၵဵပ်းသဵၼ်ႈမၢႆမၼ်းတင်းသဵင်ႈ။ ယၢမ်းလဵဝ် ဢၼ်ၵူၼ်းပၢႆႈၽေးၶဝ် ယၢပ်ႇၽိုတ်ႇႁႅင်းလိူဝ်ပိူၼ်ႈၼႆႉ မၢႆ 1 တႄႉ ပဵၼ်ၼမ်ႉၸိုၼ်ႈသႂ်၊ မၢႆ 2 တႄႉ ပဵၼ်ၼမ်ႉမီႇၼမ်ႉမၼ်း ၵိူဝ်ၽွင်ဝၢၼ် ၊ မၢႆ 3 တႄႉ ပဵၼ်ယႃႈယႃ ဢေႃႈ။ ပေႃးဢမ်ႇယူႇလီမႃး ဢမ်ႇမီးၽႂ်တူၺ်းပၼ် ဢဝ်တူဝ်ၽႂ်မၼ်းၵႂႃႇယႃတီႈႁူင်းယႃဢွၼ်ႇၼႂ်းလွႆၸေႊ လႄႈ ၸိူဝ်းႁိမ်းႁွမ်းၵူၺ်း။ လႆႈဢဝ် သူဝ် (ငိုၼ်း) ၸဝ်ႈၵဝ်ႇ ဢၼ်လႆႈၵႂႃႇ ႁဵတ်းၵၢၼ်ၸဝ်ႉၵိၼ်ၶမ်ႈၼၼ်ႉမႃးယႃ။ မိူဝ်ႈလဵဝ် သိုၵ်းၶၢင် (KIA) ၶဝ်သမ်ႉ ပႂ်ႉၸွမ်းႁူဝ်တၢင်းႁၢင်တၢင်းႁႄ ၺွပ်းဢဝ်ၼုမ်ႇယိင်းၼုမ်ႇၸၢႆး ၸိူဝ်းမီးမႃႇႁႅင်းတဵမ်ၵႂႃႇၾိုၵ်းၵၢၼ်သိုၵ်းယူႇတိၵ်းတိၵ်းလႄႈ ယၢပ်ႇၽိုတ်ႇတႃႇဢွၵ်ႇၵႂႃႇႁႃႁဵတ်းၵၢၼ်” ဝႃႈၼႆ။
ၼႂ်းလိူၼ်ဢေႃးၵၢတ်ႉသ်ၼႆႉၵူၺ်း သိုၵ်းၶၢင် (KIA) တီႉၺွပ်းဢဝ်ပီႈၼွင်ႉတႆးၼႂ်းမိူင်းၶၢင် ၸိူဝ်းပၢႆႈၽေးပၢင်တိုၵ်း မႃးသွၼ်ႈယူႇဝႆႉၼႂ်းထုင်ႉဝၢၼ်ႈၵွင်းမိူင်းဝၼ်း ၵႂႃႇၾိုၵ်းၵၢၼ်သိုၵ်း မွၵ်ႈ 10 ၵေႃႉ။ ၶၢဝ်းတၢင်းၼိုင်ႈဝူင်ႈၼႆႉ ပႂ်ႉၸွမ်းသဵၼ်ႈတၢင်းၶဝ်ႈဢွၵ်ႇ သုၼ်ပၢႆႈၽေးသိုၵ်းသေ တီႉၺွပ်းထပ်းၵၼ် လုၵ်ႈႁဵၼ်းယိင်းၵေႃႈ ၺႃးတီႉၺွပ်းၼႆ ၵူၼ်းမိူင်းပိုၼ်ႉတီႈလၢတ်ႈ ၼင်ႇၼႆ။
ၵူၼ်းမိူင်းပၢႆႈၽေးပၢင်တိုၵ်း ၸိူဝ်းၺႃးသိုၵ်းၶၢင် KIA/KIO တီႉၵႂႃႇၾိုၵ်းၵၢၼ်သိုၵ်းၼၼ်ႉ သင်ၽူႈၵဵဝ်ႇၶွင်ႈ ၵႂႃႇယွၼ်းတၢင်းၸွႆႈထႅမ်လၢတ်ႈႁႂ်ႈပွႆႇတူဝ်ပၼ်ၶိုၼ်းၸိုင် ၼိုင်ႈၵေႃႉလႂ် လႆႈပၼ်ငိုၼ်းၶႄႇ ဢေႇသုတ်း 1000 ထိုင် 10000 ယႂၼ်ႊ။ မၢင်ၸိူဝ်းၵႂႃႇၾိုၵ်းၵၢၼ်သိုၵ်းယင်းပႆႇတၼ်းမေႃသင် သမ်ႉပေႃးလႆႈဢွၵ်ႇၼႃႈသိုၵ်း ၵမ်းသိုဝ်ႈ ၼႆယဝ်ႉ။
ၵူၼ်းမိူင်းၸိူဝ်းလႆႈပၢႆႈၽေးပၢင်တိုၵ်း ၼႂ်းမိူင်းၶၢင်သေ ငိူင်ႉဢွၵ်ႇမႃးသေႃႉယူႇတီႈထုင်ႉဝၢၼ်ႈၵွင်း မိူင်းဝၼ်း လႅၼ်လိၼ်မိူင်းၶႄႇ-မိူင်းၶၢင်ဝႆႉ တႄႇၸဵမ်မိူဝ်ႈ ဝၼ်းတီႈ 23/5/2024 ႁိုင် ၼၢၼ်းၶၢဝ်းတၢင်းသွင်ပီပၢႆ ႁၢၼ်ႉ တေႃႇထိုင်ယၢမ်းလဵဝ် ပီ 2026 ၵေႃႈ ပႆႇၸၢင်ႈပွၵ်ႈၶိုၼ်းႁိူၼ်းသေၵေႃႉ။ ယွၼ်ႉၸုမ်းသိုၵ်း ယိပ်းၵွင်ႈၵၢင်ႇ ယူႇ သဝ်းဝႆႉၼႂ်းဝၢၼ်ႈသေ ၵူၼ်းဝၢၼ်ႈ မၢင်ၸိူဝ်းလႆႈပွၵ်ႈမိူဝ်းဢဝ်ၶိုၼ်းၶူဝ်းလဵင်းယူႇသေတႃႉ မၢင်ၸိူဝ်းတႄႉ ဢမ်ႇမီးသုၼ်ႇၶဝ်ႈလႆႈၼႂ်းဝၢၼ်ႈၸဝ်ႈၵဝ်ႇၶိုၼ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ