တႄႇၼႂ်းႁၢင်လိူၼ်ဢေႃးၵၢတ်ႉသ်ၼႆႉမႃး ပျီႇတူႉၸိတ်ႉပဢူဝ်း PNO ဢၼ်ယူႇတႂ်ႈသိုၵ်းမၢၼ်ႈယိုတ်းမိူင်း ဢဝ်ၶေႃႈဢၢင်ႈလၢႆဢၼ်သေ လႄႇလမ်းႁႃ တီႉၺွပ်းၵူၼ်းမိူင်း လွၵ်ႇငိုတ်ႇယွၼ်းၵိၼ်ငိုၼ်း ၼပ်ႉႁူဝ်ပၢၵ်ႇသႅၼ်ပျႃး ၊ ႁဵတ်းႁႂ်ႈၵူၼ်းမိူင်း ထူပ်းတၢင်းယၢပ်ႇၽိုတ်ႇႁႅင်း ဝႃႈၼႆ။

မိူဝ်ႈဝၼ်းတီႈ 20 လိူၼ်ဢေႃးၵၢတ်ႉသ် ယၢမ်းၵၢင်ၼႂ် 9 မူင်း ၵူၼ်းၸၢႆး 2ၵေႃႉ ပဵၼ်ၵူၼ်းႁဵတ်းၵၢၼ်ၵေႃႇသၢင်ႈႁိူၼ်း ၺႃးၸုမ်းသိုၵ်းပဢူဝ်း ႁႄႉၵူတ်ႇထတ်း တီႈတၢင်းၶဝ်ႈဝၢၼ်ႈ သလႄး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။

ပျီႇတူႉၸိတ်ႉ PNO ၼႄၶေႃႈဢၢင်ႈဝႃႈ ၼႂ်းၾူၼ်းၶႃသွင်ၵေႃႉ ထူပ်းႁၼ် ၵဵမ်းဢွၼ်ႊလၢႆႊ ၼႆသေ တီႉၺွပ်း ယွၼ်းငိုၼ်း 30 သႅၼ်ပျႃး။ သင်ဢမ်ႇပၼ်လႆႈ တေသူင်ႇၵႂႃႇၾိုၵ်းၵၢၼ်သိုၵ်းၼႆသေ လွၵ်ႇငိုတ်ႈပႃးထႅင်ႈ။

မိူၼ်ၼင်ႇၼႆ ၼႂ်းဝၼ်းတီႈ17 လိူၼ်ဢေႃးၵၢၼ်ႇသ် ၼႆႉၵူၺ်းၼင်ႇၵဝ် ပျီႇတူႉၸိတ်ႉ PNO တီႉၺွပ်းၵူၼ်းတိတ်းယႃႈမဝ်းၵမ် ၵူၼ်းဝၢၼ်ႈၼမ်ႉၵုတ်ႇ ထုင်ႉပူင်း  ၼႆယဝ်ႉ ။

ၵူၼ်းၸၢႆးၼႂ်းၸႄႈဝဵင်းသီႇသႅင်လၢတ်ႈၽူႈတွႆႇႁွၵ်ႈဝႃႈ -“ၸူဝ်ႈဝူင်ႈၼႆႉ PNOလမ်းတီႉၵူၼ်းၵိၼ်ယႃႈ ႁၢဝ်ႈႁႅင်း ၊  ၶဝ်တီႉၵႂႃႇၵူၼ်းၵိၼ်ယႃႈ 4 ၵေႃႉ ၊ တၢမ်ငိုၼ်းၼႆႉ 100 သႅၼ်ပျႃးၼႆ ၊ ပေႃးတီႉလႆႈၵူၼ်းၶၢႆမၼ်း ဝႃႈတေဢဝ်တူၵ်းၶွၵ်ႈၼႆဢမ်ႇတူၵ်း ပေႃးပၼ်ငိုၼ်းလႆႈၼႆပွႆႇၶိုၼ်းၵူၺ်း ”- ဝႃႈၼႆ ။

ယၢမ်းလဵဝ် ၵူၼ်းၵိၼ်ယႃႈ 4 ၵေႃႉၼၼ်ႉ တေလႆႈပၼ်တၢမ်ႇငိုၼ်းတီႈ 100 သႅၼ်ပျႃးသေ ၊ ၵႃႈတတ်းယႃႈ ၼိုင်ႈလိူၼ်ၼႆႉ တေလႆႈပၼ်ထႅင်ႈ 10 သႅၼ်ပျႃး- ၵူၼ်းပိုၼ်ႉတီႈလၢတ်ႈ ။

ၵွၼ်ၼႃႈၼႆႉၵေႃႈ ၼႂ်းထုင်ႉပူင်းၼႆႉ သင်ထူပ်းႁၼ် ယႃႈၼိုင်ႈမဵတ်ႉ ယွၼ်းငိုၼ်း 20 သႅၼ်ပျႃး ၊ သင်ဢမ်ႇပၼ်လႆႈငိုၼ်းတေတီႉၺွပ်း သူင်ႇၽိုၵ်းၵၢၼ်သိုၵ်းၼႆ လွၵ်ႇငိုတ်ႈပႃးထႅင်ႈၼင်ႇၼႆ ။

ၵဵဝ်ၵပ်းလွင်ႈၼႆႉ ၵူၼ်းပိုၼ်ႉတီႈတူၼ်ႈတီးၵေႃႉၼိုင်ႈတႄႉ ထတ်းသၢင်လၢတ်ႈဝႃႈ – “ မိူဝ်ႈလဵဝ်ၼႆႉ ပဵၼ်လွင်ႈ တင်ႈၸႂ်ၶႂ်ႈယွၼ်းၵိၼ်ငိုၼ်းၵူၼ်းမိူင်းၵူၺ်း ၊ ၸုမ်းၶဝ် (PNO) ၶၢႆ ၊ ၸုမ်းၶဝ်တီႉ ၊ ၶဝ်ၼင်ႇၵၼ်တီႉၵၼ်ယူႇၸိူင်ႉၼၼ် ၊ ပေႃးတီႉလႆႈၵူၼ်းၶၢႆ ပၼ်ငိုၼ်းပွႆႇၶိုၼ်းၸိူင်ႉၼၼ်ၵူၺ်း”- ဝႃႈၼႆ ။ 

ၵူၺ်းၵႃႈ ၽူႈတွႆႇႁွၵ်ႈ ၶတ်းၸႂ်တိတ်းတေႃႇၸူး ၸုမ်းပျီႇတူႉၸိတ်ႉပဢူဝ်းယူႇၵေႃႈ ၵပ်းသိုပ်ႇဢမ်ႇလႆႈ။

မိူၼ်ၼင်ႇၼႆ ယၢမ်းလဵဝ် ၼႂ်းၸႄႈဝဵင်းပၢင်လႃႈ၊ ၵၢတ်ႇလေႃႉ၊ ဢွင်ႇပၢၼ်း၊ ယွင်ႁူၺ်ႈ၊ သူၺ်ႇၺွင်ႇ လႄႈ ဢေးတႃႇယႃႇ တူၼ်ႈတီးၸိူဝ်းၼႆႉ ပလိၵ်ႈသိုၵ်းမၢၼ်ႈ တေၵႆႉၵူတ်ႇထတ်း ၵူၼ်းလဵၼ်ႈၵဵမ်းဢွၼ်ႊလၢႆႊ (သလေႃႉၵဵမ်း) လႄႈ လႅၼ်းယႃႈၾႆးၾႃႉ၊ သင်ထူပ်းႁၼ်ၼႆ ၺႃးတီႉၺွပ်းဢဝ်လိူင်ႈထႅင်ႈဝႆႉၼႆယဝ်ႉ ။  

ၵူၺ်းၵႃႈ ၼႂ်းတူင်ႇဝူင်း လုၵ်ႈႁဵၼ်း လုၵ်ႈဢွၼ်ႇ ၸဵမ်ယိင်း ၸဵမ်ၸၢႆး ၵဵမ်းဢွၼ်ႊလၢႆႊလႄႈ လႅၼ်းယႃႈၾႆးၾႃႉၸိူဝ်းၼႆႉ ၸွတ်ႇၽႄႈၼမ်လိူင်ႇႁႅင်း၊ လွင်ႈၼၼ်ႉသမ်ႉ ပလိၵ်ႈမၢၼ်ႈ ဢမ်ႇၵႄႈလိတ်ႈလႆႈ ႁႂ်ႈထိုင်တီႈ။

ဝၢႆးလင် သိုၵ်းမၢၼ်ႈယိုတ်းမိူင်းမႃးၼႂ်းၶၢဝ်းတၢင်း 5 ပီၼႆႉ ပျီႇတူႉၸိတ်ႉပဢူဝ်း PNO ၶဝ်ၵဵပ်းၵူၼ်းၼႂ်းၸႄႈဝဵင်းသီႇသႅင်ႇ ၊ ပၢင်လွင်း ၊ ႁူဝ်ပူင်း သူင်ႇၾိုၵ်းၵၢၼ်သိုၵ်း သူင်ႇၼႃႈသိုၵ်း ၼႆယဝ်ႉ ၊ လိူဝ်ၼၼ်ႉ လႆႈတိုဝ်ႉတၢင်းၶဝ်ႈဢဝ်တီႈယူႇၼႂ်းဝၢၼ်ႈသေ ၵဵပ်းၵူၼ်းဝၢၼ်ႈ သူင်ႇၾိုၵ်းၵၢၼ်သိုၵ်းယဝ်ႉ ၼႄၶေႃႈဢၢင်ႈလွင်ႈၼိုင်ႈယဝ်ႉ လွင်ႈၼိုင်ႈ ၵဵပ်းၶွၼ်ႇၵူၼ်းမိူင်း မႃးၶိူဝ်းယႂ်း။