တႄႇႁၢင်လိူၼ် ၵျူႊလၢႆႊ ၼႆႉမႃး ပျီႇတူႉၸိတ်ႉ PNO လမ်းတီႉၺွပ်း ၵူၼ်းၵိၼ်ၸႂ်ႉယႃႈမဝ်းၵမ် ၼႂ်းၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ယဝ်ႉ မႂ်ၵိၼ်ငိုၼ်းၵူၺ်း ဢမ်ႇမီးလွင်ႈပူၵ်းပၼ်သင် ။
ယၢမ်းလဵဝ် ပျီႇတူႉၸိတ်ႉPNO လႄႇလမ်းႁႃတီႉၺွပ်း ၵူၼ်းၵိၼ်လဝ်ႈၵိၼ်ယႃႈ ၸွမ်းတႃႈ ၸွမ်းတၢင်းလႄႈ ၶဝ်ႈတႄႇတီႉၺွပ်းပႃးၼႂ်းႁိူၼ်း တၢင်းဝၢၼ်ႈ ၼွင်ပွႆး ၊ ၼမ်ႉၵုတ်ႇ ၊ ၽၢႆၵွမ်း ၸႄႈဝဵင်းသီႇသႅင်ႇ ။ ၼႂ်းၶၢဝ်းတၢင်း 10 ဝၼ်းပၢႆၵူၺ်း ပျီႇတူႉၸိတ်ႉ PNO တီႉၺွပ်းၵူၼ်းမိူင်း 7 – 8 ၵေႃႉ ယဝ်ႉ ။
သင်ထူပ်းႁၼ် တီႉလႆႈၼႆၸိုင် ယႃႈၼိုင်ႈမဵတ်ႉ ယွၼ်းငိုၼ်း 20 သႅၼ်ပျႃး ၊ သင်ဢမ်ႇပၼ်လႆႈငိုၼ်းတေတီႉၺွပ်း သူင်ႇၽိုၵ်းၵၢၼ်သိုၵ်းၼႆ လွၵ်ႇငိုတ်ႈပႃးထႅင်ႈၼင်ႇၼႆ ။
ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပေႃးႁၼ်ၼႆႉ ၼိုင်ႈမဵတ်ႉ 20 သႅၼ် ၊ ဝူင်ႈပူၼ်ႉမႃးၼႆႉ ႁၼ်တီႈ ၵူၼ်းဝၢၼ်ႈၼမ်ႉၵုတ်ႇၵေႃႉၼိုင်ႈ ႁၼ် 5 မဵတ်ႉ လႆႈပၼ် 120 သႅၼ် ၊ ဢမ်ႇမီးငိုၼ်းၼႆလႄႈလႆႈၶၢႆၵႃးပၼ်ဢဝ် ၊ ပေႃးဢမ်ႇပၼ်လႆႈငိုၼ်းၼႆ ၶဝ်လွၵ်ႇဝႃႈ တေၺွပ်းၵႂႃႇႁဵတ်းသိုၵ်းၼႆဢေႃႈ ၊ ၵူၼ်းၶၢႆသမ်ႉဢမ်ႇတီႉ ႁႃလမ်းတီႉၵူၼ်းၵိၼ်မၼ်းၵူၺ်း”- ဝႃႈၼႆ ။
ယွၼ်ႉပလိၵ်ႈသိုၵ်းမၢၼ်ႈလႄႇလမ်းႁႃတီႉၺွပ်းၵူၼ်းၵိၼ်မၼ်း ၊ ဢမ်ႇတီႉၺွပ်းၵူၼ်းၶၢႆမၼ်းလႄႈ ယႃႈမဝ်းၵမ်ၸင်ႇလၢမ်းၽႄႈမႃးတိၵ်းတိၵ်း၊ တီႉၵူၼ်းၵိၼ်ယဝ်ႉသမ်ႉဢမ်ႇတတ်းပၼ် ဢမ်ႇပူၵ်းပွင်ပၼ်သင် ၼႆ ၵူၼ်းပိုၼ်ႉတီႈလၢတ်ႈ ၼင်ႇၼႆ ။
ယၢမ်းလဵဝ် ယႃႈမဝ်းၵမ် ၼႂ်းပိုၼ်ႉတီႈ ၵႃႈၶၼ်ထုၵ်ႇ ၶၼ်ပေႃး ၊ ယႃႈမႃႉ ၵူႈပွၵ်ႈ သႅၼ်းသိုဝ်ႉ ၶၢႆ ၼိုင်ႈမဵတ့် 2000 ပျႃးၼၼ်ႉ ယၢမ်းလဵဝ်သိုဝ်ႉၶၢႆၵၼ် 300 ပျႃး ၵူၺ်းယဝ့် လႄႈ ၵူၼ်းၵူႈသႅၼ်း ထၢၼ်ႈ သိုဝ်ႉၵိၼ်သူႇသမ်း ငၢႆႈ၊ သိုဝ်ႉလႆႈၵူႈတီႈ- ၵူၼ်းပိုၼ်ႉတီႈလၢတ်ႈ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈထႅင်ႈဝႃႈ -“ ယႃႈမႃႉၼႆႉ ၵူၼ်းၼုမ်ႇ ၵမ်ႈၼမ် တေဢမ်ႇသွၼ်ႇဝႃႈ မၼ်းပဵၼ်ယႃႈမဝ်းၵမ်။ ၶဝ်တေႁၼ်ဝႃႈ မၼ်းပဵၼ်တၢင်းၵိၼ် ဢၼ်လႆႈၵိၼ်မိူဝ်ႈ လူဝ်ႇမူၼ်ႈလူဝ်ႇၵျေႃႇ – လူဝ်ႇႁဵတ်းၵၢၼ်ၼၵ်း လူဝ်ႇၸႂ်ႉႁႅင်းၸိူဝ်းၼႆႉ ၊ ၼႂ်းသူၼ်ၼႂ်းၼႃးၵေႃႈ ပေႃးဢမ်ႇပႃးတင်းၵိၼ်ၸိူင်ႉၼႆ ၽႂ်ၵေႃႈ ဢမ်ႇၶႆႈႁဵတ်းပၼ် လၢႆးဝၼ်းယဝ်ႉ”- ဝႃႈၼႆ ။
ယွၼ်ႉယႃႈမဝ်းၵမ် လိူင်ႇၼမ် သိုဝ်ႉငၢႆႈၶၢႆပေႃးလႄႈ ၵူၼ်းၵိၼ်ယႃႈၼမ် ႁဵတ်းႁႂ်ႈ ၽူႈလၵ်ႉၵူၼ်းၸူၼ်လိူင်ႇၼမ် ၼႂ်းဝဵင်းၼႂ်းဝၢၼ်ႈ ႁဵတ်းႁႂ်ႈ ၵူၼ်းၼုမ်ႇလူႉသုမ်းၸၢတ်ႈပၢၼ် ယွၼ်ႉယႃႈမဝ်းၵမ် – ၵူၼ်းပိုၼ်ႉတီႈလၢတ်ႈ ။
မိူၼ်ၼင်ႇၼႆ ၽွင်းၵၢင်လိူၼ်မေႊပူၼ်ႉမႃးၼႆႉၵေႃႈ ပျီႇတူႉၸိတ်ႉ တီႉၺွပ်းၵူၼ်းၼုမ်ႇ ၼႂ်းၸႄႈဝဵင်းပၢင်လွင်း ၊ ထုင်ႉပူင်း ၸိုင်ႈတႆးပွတ်းၸၢၼ်း ပေႃႉထုပ်ႉ မႂ်ငိုၼ်း ၼိုင်ႈၵေႃႉ 20- 30 သႅၼ်ပျႃးယဝ်ႉ ၸင်ႇပွႆႇပၼ်ၶိုၼ်း ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ