မိူဝ်ႈပူၼ်ႉမႃး 30 ပီ တပ်ႉသိုၵ်းမိူင်းတႆးMTA ဢၼ်ႁႅင်းယႂ်ႇလိူဝ်ပိူၼ်ႈၵူႈၸုမ်းၸၢဝ်းၶိူဝ်းၼၼ်ႉ လုၵွႆတႅၵ်ႇယၢႆႈ ပဵၼ်လၢႆၵိင်ႇ လၢႆၵွၼ်း၊ ၵူၼ်းမိူင်းတႆးၺႃးသိုၵ်းမၢၼ်ႊ လူလၢႆၶႃႈတၢႆလိုပ်ႈႁေႃႈႁႅတ်ႉႁိပ်ႇ လူၺ်ႈလၢႆး တႅပ်းသီႇ တႅပ်းလႄႈ ဝၢၼ်ႈၵဝ်ႇလဝ်ႇႁၢမ်းၶၢမ်းႁၢႆ၊ မၢင်ၸိူဝ်းပၢႆႈပၢႆႈပေႃးဢမ်ႇၸၢင်ႈပွၵ်ႈၶိုၼ်းႁိူၼ်း တေႃႇဝၼ်းမိူဝ်ႈလဵဝ်။ ၼႂ်းၵႄႈမုင်ႉႁေႃတေႃႁိူၼ်းလုယၢတ်ႇၽၢတ်ႇၽေၵၼ်ၼၼ်ႉ ႁၢႆႉၸႃႉသုတ်းသၼ် တႄႉပဵၼ်လွင်ႈၵူၼ်းမိူင်း ၸပ်းၸႂ်ၵူဝ် လႄႈ လွင်ႈၶၢတ်ႇႁၢင်ႇပႅတ်ႈၵၢၼ်သွၼ်ႁဵၼ်းယဝ်ႉ။ ၸႂ်ၵူဝ်ဢၼ်ၸိုမ်းၶဝ်ႈၼႂ်းလုပ်ႇၼႂ်းဢဵၼ်ၵႂႃႇၼ ၼ်ႉ ယွၼ်ႉဢမ်ႇလႆႈၶုၺ်ႉႁၼ်ႁပ်ႉပူၺ်ႈ လွင်ႈယူတ်းယႃလုမ်းလႃးၵမ်းသိုဝ်ႈလႄႈ ၵၢၼ်သွၼ်ၵၢၼ်ႁဵၼ်း ဢၼ်ပဵၼ်သၢႆၸႂ်ႁဵတ်းႁႂ်ႈၸိူဝ်ႉၶိူဝ်း ၶီးၸိုၼ်ႈၶိုၼ်ႈသင်ႉၼၼ်ႉၵေႃႈ လႆႈလိပ်ႈၽၢင်းမၼ်တိုင်ၵႂႃႇၸွမ်းယဝ်ႉ။ လွင်ႈပဵ ၼ်ပူၼ်ႉမႃး ၸဵမ်မိူဝ်ႈ 1996-97 ပုၼ်ႉၼႆႉ တိုၵ်ႉပေႃႉယွၼ်ႈၸူၵ်ႉသဵပ်ႇသႂ်ႇ ၽဝၵၼ်ၵူၼ်းႁဝ်းႁႃးယူႇ ဢၼ်ဝႃႈ ၼၼ်ႉ ၸႅင်ႈလႅင်းလီၼႃႇ။
ထိုင်မႃးၼႂ်းဝၼ်းမိူဝ်ႈလဵဝ် ပီ 2026-27ၼႆႉ ၼမ်ႉၸႂ်ၵူဝ်ႁႄ ဢၼ်ဢမ်ႇႁတ်းသူႈႁတ်းၶႅင်ႇၼၼ်ႉ ၸွင်ႇပႃႈႁၢႆၸၢႆႇမူတ်း၊ ဝႃႈလႃး တိုၵ်ႉႁဵတ်းလၢႆးပူဝ်ႇသၢင်ႇႁၢႆႉ ယၢႆႉယွၼ်ႇပၢႆႈၶဵၼ်ယူႇၵွႆးႁိုဝ်။ ဢမ်ႇဝႃႈၼႂ်းၵၢၼ်မိူင်း ဢမ်ႇဝႃႈၼႂ်းၵၢၼ်သိုၵ်း ၵူၼ်းၼုမ်ႇၼေးၵူၼ်းထဝ်ႈ၊ ၸိူဝ်းပဵၼ်ၸဝ်ႈပဵၼ်ၶုၼ် ၼေးလုၵ်ႈၼွင်ႉ၊ ပိၼ်ႇပႆႇပုတ်ႈ ပွင်ႉတေႃႇၵၼ်ယူႇဢုမ်းဢုမ်း။ မႅၼ်ႈတင်းပၢႆးၸၢင်ႊ IT ၶိုၼ်ႈယႂ်ႇၽႄႈၵႆမႃးၼႆႉႁေ ယိုင်ႈၶႅၼ်းထၢင်ႇႁၢင်ႊလပ်ႉ ၸိုဝ်ႈလပ်ႉတူဝ်သေ သေႉသွမ်းႁိၼေးသမ်ႉထိုင်ၵၼ်ယူႇယဝ်ႉ။ ထွမ်ႇၶၢဝ်ႇပၢင်တိုၵ်းၶၢင်၊ ၶျၢင်း၊ ယၢင်း၊ ရၶႅင်ႇ သေ ယိၼ်းဢမ်ႇႁၢၼ်ႉၸႂ်ၼိူဝ်တပ်ႉသိုၵ်းႁဝ်း၊ တူၺ်းႁၼ်တပ်ႉသိုၵ်းၶၢင် ၶျၢင်း ယၢင်း မွၼ်း ၸဵမ်ပလွင်ႈ ၶႄႇ ၵဝ်ႈၵၢင်ႉ ၶဝ် ပူၵ်းတင်ႈၸၼ်ႉၸွမ်လၢႆလင်လၢႆပၢႆးသေ လွမ်လွမ်ၶီႈၵေႉတေႃႇတပ်ႉသိုၵ်းႁဝ်း၊ ငိၼ်းၶၢဝ်ႇ သိုၵ်း ၶိူဝ်းပိူၼ်ႈ လူလၢႆ ပေႉၵိၼ်တေႃႇပေႃႈမႄႈၵူၼ်းမိူင်းႁဝ်းႁေ ယူႇယူႇၶႂ်ႈၸၢၼ်ႈၸင်းတေႃႇတပ်ႉသိုၵ်းႁဝ်း။
တေဝႃႈ ပႃႇတီႇ ပၢႆးမိူင်းၼႆၵေႃႈ ဢမ်ႇၸၢင်ႈဢွၵ်ႇၼႃႈႁဵတ်းၵၢၼ်ငဝ်ႈပိုင်းၶဝ် ဢၼ်လူဝ်ႇလႆႈမူၼ်ႉမႄးပၵ်းပိူင်ၾိင်ႈမိူင်း၊ ၼမ်ၼႃႇၵေႃႈ ၵူၺ်းလႆႈၸွႆႈၵေႈသၢႆႇပၼ် တၢင်းယၢပ်ႇၵူၼ်းမိူင်း ဢၼ်ယူႇတီႈလူင်ပွင်ၸိုင်ႈ လုတ်ႈႁၢမ်းပုၼ်ႈၽွၼ်းလႄႈ ပၢင်ႇပဝ်ႇၸုတ်ႈယွမ်းဝႆႉၼၼ်ႉၵွႆး။ တူၺ်းၾၢႆႇၵေႃလိၵ်ႈလၢႆးၾိင်ႈငႄႈၼႄႇ မၼ်းၵေႃႈဢမ်ႇထိုင်တီႈလႆႈၸႂ်ယႂ်ႇၸႂ်ၵႂ်ႈ ႁႂ်ႈပေႃးထိုင်ၸၼ်ႉလီလႆႈဢဝ်ၵုင်ႇဢဝ်မုၼ်ၸွမ်း တေႉတေႉမီးမီး၊ ၸဵမ်ၸိူဝ်းၼႆႈ မိူၼ်တင်းပိူင်းၼေဝႃႈ ငဝ်းလၢႆးၼႃႈၵၢၼ်ၸိူဝ်ႉၸၢတ်ႈတႆးၼႆႉ ႁၢႆႉၸႃႉမိူၼ်ၶိုၼ်းမိူဝ်ႈသၢမ်သိပ်းပီပူၼ့်မႃးၼၼ်ႉ ၼႆယဝ်ႉ။ ၽိူဝ်ႇပဵၼ်ၼႆမႃး တူၺ်းၽိဝ်မၼ်းသေ ၵဝ်ၵိူဝ်ႉမႂ်းမႂ်းယွႆႈၵဝ်ယူႇ ၼင်ႇႁၢင်ႈၶိူဝ်းတႆးၵူၼ်းတႆးၼႆႉ ပေႃး တေဢမ်ႇမီးႁူးဢွၵ်ႇႁၼ်လႅင်းလႆႈသေပွၵ်ႈသေပၢၼ်ယဝ်ႉယိုင်။
တီႈတေႉမႃး မိူင်းႁူမ်ႈတုမ်လူင်ၼႆႉ ၵူၼ်ႇပင်းဝႆႉယူႇယဝ်ႉ၊ မိူင်းတႆးၵေႃႈ မိူၼ်ၸမ်တႅၵ်ႇယၢႆႈဝႆႉယဝ်ႉ၊ၵူၼ်းၶိူဝ်းတႆးၼႆၵေႃႈ ၸႂ်တူၵ်းၸႂ်ႁူင်ႈဝႆႉယူႇယဝ်ႉ။ ၵူၺ်းၵႃႈ ၵူၼ်းၶိူဝ်းတႆးၼႆႉ ပႆႇထိုင်တီႈဢၼ် ဢမ်ႇၶိုၼ်းလုၵ်ႉၸိုၼ်ႇတင်ႈတူဝ်လႆႈၼၼ်ႉသႄႈ။ ၸႂ်ႈယူႇ ၼႂ်းတႆးၼႆႉ ၾၢႆႇပၢႆးပိင်ႇၺႃႇ၊ ၾၢႆႇပၢႆးၵၢၼ်မိူင်း၊ ၾၢႆႇပၢႆးသိုၵ်း လႄႈ လွင်ႈၽွမ်ႉသဵင်ပဵင်းပၢၵ်ႇၵၼ် လဵၵ်ႉၵေႇဢေႇမၢင်ဝႆႉတေႉယဝ်ႉ။ ယွၼ်ႉၸိူဝ်းၼႆႉသေ ငဝ်းလၢႆးၸိူဝ်ႉၸၢတ်ႈႁဝ်း မွင်သဝ်ႈဝဝ်းလမ်ၵႂႃႇသေတႃႉ ပေႃးတိုၵ်ႉမီးၸႂ်ၶႂ်ႈလုၵ်ႉၸိုၼ်ႇယူႇတႄႉ သၢႆငၢႆတိုဝ်ႉတၢင်းၼႆႉတိုၼ်းမီးတႃႇသေႇၵူႈမိူဝ်ႈယူႇ။
ပေႃးမႃးတူၺ်း လွင်ႈၸုတ်ႈယွမ်း ဢၼ်ႁဵတ်းႁႂ်ႈၸိူဝ်ႉၸၢတ်ႈႁဝ်းႁႅင်းဢေႇမွင်သဝ်ႈၼႆ၊ ထိၼိုင်ႈၼႆႉတႃႈမုင်ႈႁၼ် လႄႈ လွင်ႈဢွၼ်ႁူဝ် ႁၢႆလၢႆဝႆႉၼၼ်ႉယဝ်ႉ။ လွင်ႈဢဵၼ်းဢၢင်ႈၶၢဝ်းၵႆ တႃႇၸိူဝ်ႉၸၢတ်ႈၼႆႉ ပဵၼ်ဢီႈသင်ၼႆ ဢမ်ႇႁူမ်ႈတမ်းလႆႈၼႅၼ်ႈၼႃတႅၵ်ႇလႅင်းသေ ၵူၺ်းၵုမ်ႇလႆလွင်ႈၸွမ်း ၼမ်ႉတွၼ်းၽွၼ်းလီ ၶၢဝ်းပွတ်း၊ ၾၢႆႇၼိုင်ႈၵေႃႈ ၵူၺ်းၵုမ်ႇတူၺ်းထိုင် ၽွၼ်းပၢင်ႈပုၼ်ႈလီၸုမ်းၸၢဝ်းတူဝ်ၵဝ်ႇၼၼ်ႉပဵၼ်ယႂ်ႇ။ ထိ သွင်ၵေႃႈ လွင်ႈဢွၼ်ႁူဝ်တႅၵ်ႇယႅၵ်ႈၵၼ်သေ တင်ႈပဵၼ်ၵိူင်းၵဝ်ၵိူင်းမႂ်းၼၼ်ႉၼမ်မႃး။ ၼႂ်းၶိူဝ်းတႆးဢွၼ်ႇႁဝ်း ၼႆႉ မုၵ်ႉၸုမ်းလိူင်ႇၼမ်ဢမ်ႇၵႃး သမ်ႉပၢႆတႅၵ်ႇယၢႆႈၶႄႉၶႅင်ႇၵၼ်ဝႆႉလႄႈ ဢမ်ႇၸၢင်ႈၶွၼ်ႈပဵၼ် ဢဵၼ်ႁႅင်းၸိူဝ်ႉ ၸၢတ်ႈတေႉတေႉ။ ၶေႃႈထိသၢမ်ၸမ်ႉ ၵွပ်ႈပိူဝ်ႈႁႅင်းဢေႇဝႆႉ ၾၢႆႇပူၵ်းပွင်ၵၢၼ်ႁူႉၵၢၼ်မေႃ တႃႇသႅၼ်းႁုၼ်ႈမႂ်ႇၼေႃႇတႅၼ်းၶိူဝ်း။ လွင်ႈယုၵ်ႉမုၼ်းပၼ် ၾၢႆႇပၢႆးပိင်ႇၺႃႇၶိုတ်းၵၢပ်ႈပၢၼ်ဝႃႇ၊ လွင်ႈတမ်းပိူင်ပူၵ်းပွင်ပၼ် ၾၢႆႇပၢႆးၸၢင်ႊ IT လႄႈ လွင်ႈလဵပ်ႈႁဵၼ်းလူဢၢၼ်ႇလိၵ်ႈလၢႆးဝႃႇ ၸိူဝ်းၼႆႉ လဵၵ်ႉၵေႇဢေႇမၢင်ၼႃႇလႄႈ ၸင်ႇ ႁဵတ်းႁႂ်ႈ ၽူႈဢွၼ်ႁူဝ်မႂ်ႇ၊ ၽူႈႁူႉမေႃမႂ်ႇၶဝ်ယွမ်းလူင်းၵႂႃႇတိၵ်းတိၵ်း။
ၶေႃႈလိုၼ်းသုတ်းတႄႉ ၵွပ်ႈပိူဝ်ႈၸုတ်ႈ ယွမ်း ၾၢႆႇသၢင်ႈၼႃႈၵၢၼ်မၢၵ်ႈမီး လႄႈ လွင်ႈမေႃႁပ်ႉပုၼ်ႈၽွၼ်း၊ လွင်ႈမေႃႁဵတ်းပုၼ်ႈၽွၼ်းၼၼ်ႉယဝ်ႉ။ ဝႃႈသိုဝ်ႈၵေႃႈ ၼႂ်းၼႃႈၵၢၼ်ၸိူဝ်ႉၸၢတ်ႈ လႄႈ ၼႃႈၵၢၼ်ၵေႃႇသၢင်ႈ ၾၢႆႇသိုၵ်းၼၼ်ႉ တိုၵ်ႉၸုတ်ႈယွမ်းဝႆႉပိုၼ်ႉငဝ်ႈ ၾၢႆႇမၢၵ်ႈမီး လႄႈ လွၵ်းပိူင်တႃႇၵမ်ႉၵႅမ် ၵူၼ်းမိူင်းယူႇၼၼ်ႉယဝ်ႉ။ ပေႃးၶိုၼ်းႁုပ်ႈတူၺ်းၼႆ ဢၼ်ႁဝ်းႁႃးတၵ်းတေလႆႈ ဝႆႉၼၵ်းပဵၼ်ၵၢၼ်လူင်သေ ႁူမ်ႈပၵ်းၸႂ်လိုၵ်ႉၼႂ်း
ႁဵတ်းသၢင်ႈ ၼႆႉ ပၢႆးပိင်ႇၺႃႇ လႄႈ ၵၢၼ်လိၵ်ႈလၢႆး ဢၼ်ထိုင်ၸၼ်ႉ Professional၊ ပၢႆးၵၢၼ်မိူင်း လႄႈ ၵၢၼ် ၽွမ်ႉႁူမ်ႈ ဢၼ်ယိူင်းထိုင် ၸၼ်ႉၸိူဝ်ႉၸၢတ်ႈ၊ ပၢႆးၵၢၼ်သိုၵ်း လႄႈ ၵၢၼ်ႁူမ်ႇလူမ်ႈ ဢၼ်ထိုင်ၸၼ်ႉ ၸတ်းပွင်ၸွမ်းလွၵ်းပိူင်၊ ၵၢၼ်ပူၵ်းပွင်ၵူၼ်းၼုမ်ႇ လႄႈ ပၢႆးဢွၼ်ႁူဝ် ၾၢႆႇၵၢၼ်မိူင်း၊ ၾၢႆႇၵၢၼ်သိုၵ်း၊ ၾၢႆႇမၢၵ်ႈမီး ႁႂ်ႈသိုပ်ႇၽႄႈလႆႈတီႈ သႅၼ်းႁုၼ်ႈမႂ်ႇၼေႃႇတႅၼ်းၶိူဝ်းၵႂႃႇၸုပ်ႈသိုပ်ႇၸုပ်ႈ ၶႂ်ႈဝႃႈၼႆယူႇယဝ်ႉ။
ပေႃးၼႆ လၢႆးတၢင်းတႄႉၵေႃႈ ဝူၼ်ႉၼေပၢႆးၼေၵၼ်လႆႈငၢႆႈငၢႆႈယူႇ၊ ၵူၺ်းၵႃႈ ၽႂ်သမ်ႉတေလုၵ်ႉႁဵတ်း၊ၽႂ်သမ်ႉတေဢွၼ်ႁဵတ်း။ ၸိူဝ်းႁူႉၸၵ်းႁၼ်ထိုင် ၼႃႈၵၢၼ်ၸိူဝ်ႉၸၢတ်ႈၵူႈၵေႃႉ ၼႂ်းၾၢႆႇသိုၵ်း၊ ၾၢႆႇမိူင်း၊ ၾၢႆႇတူင်ႇဝူင်းၵူၼ်း ဢၼ်ႁဵတ်းယူႇမီးယူႇ လႄႈ ဢၼ်ၶႂ်ႈႁဵတ်းၶႂ်ႈပဵၼ်ယူႇၵူႈၵေႃႉ တေလႆႈႁူမ်ႈမိုဝ်းႁဵတ်းၼႆ ဢမ်ႇလၢတ်ႈၵေႃႈ ႁူႉၵၼ်ယူႇ။ ပိူင်လူင်သုတ်းတႄႉ ယႃႇပေဢဝ်ၵူၼ်း ပဵၼ်သုၼ်ၵၢင်၊ တၵ်းလႆႈဢဝ်ၵၢၼ် ပဵၼ်သုၼ်ၵၢင်သေႁဵတ်းၵႂႃႇၸင်ႇ မိူင်းတႆးဢၼ်ၸမ်တေယၢႆႈၼႆႉၵေႃႈ တေၵွၼ်ႈၶိုၼ်း၊ ၶိူဝ်းတႆးဢၼ်ငႃႇတေၸူမ် ၼႆႉၵေႃႈ ၸင်ႇၸၢင်ႈၶွၼ်ႈလႆႈၶိုၼ်းယဝ်ႉၼႆ တင်းႁွမ်းမိုဝ်းဝႆႈသႃသေ ယွၼ်းပၢႆးၼေတၢင်းႁၼ် မွၵ်ႈၼႆႈၵွၼ်ႇဢေႃႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ