ၽွင်းမိူင်းထႆး တိုၵ်ႉပိုၼ်ၽၢဝ်ႇ ယုၵ်ႉလိူၵ်ႈ ၾရီႊဝီႊသႃႊ တႃႇ 60 ၸိုင်ႈမိူင်းယူႇၼႆႉ သိုၵ်းမၢၼ်ႈယိုတ်းမိူင်း သမ်ႉၶိုင်ပွင်တႃႇပၼ် ၵူၼ်းမိူင်းတၢင်းၾင်ႇမိူင်းထႆး ၶၢမ်ႈၶူဝ်ဢႅဝ်ႇယဵမ်ႈလႆႈထိုင်ၵဵင်းတုင်တႃႇၶၢဝ်းတၢင်း 14 ဝၼ်း လူၺ်ႈယိပ်းပပ်ႉၶၢမ်ႈလႅၼ်လိၼ် Border Pass ပပ်ႉသီၶဵဝ် ။

ၶၢဝ်ႇ မႄႈသၢႆၽရႅတ်ႉသ် ဢွၵ်ႇၶၢဝ်ႇဝႆႉဝႃႈ – ၾၢႆႇတၢင်းႁွင်ႈၵၢၼ် ၾၢႆႇႁူမ်ႇလူမ်ႈ ၊ ၾၢႆႇၽွင်းငမ်းလႄႈ ၾၢႆႇၵူတ်ႇထတ်းၵူၼ်းၶဝ်ႈမိူင်း ၾၢႆႇမိူင်းမၢၼ်ႈတိုၵ်ႉဢုပ်ႇၵၼ်ယူႇ။ ၵူၺ်းၵႃႈ ဢိင်ၼိူဝ်ငဝ်းလၢႆးသေ ပၵ်းပိူင်မၢႆမီႈၵေႃႈၸၢင်ႈလႅၵ်ႈလၢႆႈယူႇၵူႈၶၢဝ်းယၢမ်း လႄႈႁႂ်ႈလႆႈၾၢင်ႉတူၺ်းၶၢဝ်ႇငၢဝ်းယူႇတႃႇသေႇ ဝႃႈၼႆ။

ၵူၼ်းမိူင်းဝဵင်းမႄႈသၢႆၵေႃႉၼိုင်ႈတႄႉလၢတ်ႈဝႃႈ -“ ၾၢႆႇမၢၼ်ႈဝႃႈတေပၼ်ၶႂၢင်ႉၵူၼ်း ၵဵင်းႁၢႆး ဢႅဝ်ႇထိုင် တႃႈၶီႈလဵၵ်း – ၵဵင်းတုင်ၼႆလႄႈ ၵူၼ်းမိူင်းတၢင်းတႃႈၶီႈလဵၵ်းၵေႃႈ ၶိုၼ်းယွၼ်းဝႃႈ ႁႂ်ႈဢုပ်ႇပၼ်ပႃးတီႈထႆး – ႁႂ်ႈပၼ်ၶႂၢင်ႉၵူၼ်း တႃႈၶီႈလဵၵ်း – ၵဵင်းတုင် လႆႈယိပ်းပပ်ႉၶၢမ်ႈလႅၼ်လိၼ် သီသွမ်ႇၼၼ်ႉသေ ၶဝ်ႈဢႅဝ်ႇထိုင်ၵဵင်းႁၢႆးၼႆယူႇ။ ”- ဝႃႈၼႆ။

ပေႃးၵူၼ်းတၢင်းမိူင်းထႆးၶဝ်ႈဢႅဝ်ႇယဵမ်ႈထိုင်ၵဵင်းတုင်တႄႉ ၵူၼ်းမိူင်းၵဵင်းတုင်ၸိူဝ်းယူႇႁိမ်းႁွမ်း ၼွင်တုင်၊ ဝတ်ႉၽၵႅဝ်ႈလူင်၊ ၵျွင်းၶမ်း၊ လွႆထၢတ်ႈၸွမ်မူၼ်း၊ ၵၢတ်ႇလူင်၊ လွႆမူၺ်ၸိူဝ်းၼႆႉ တေမီးၵၢၼ် မီးငိုၼ်းၶဝ်ႈ လိူင်ႇၼမ်မႃး။ လွင်ႈႁၵ်ႉသႃ ၶူဝ်းၶွင်ၵဝ်ႇၵႄႇလႄႈ ၾိင်ႈထုင်းၵေႃႈတေၶိုၼ်းႁိူဝ်ႈႁိူင်းမႃး ၊ လိူဝ်ၼၼ်ႉ ၽူႈဢႅဝ်ႇယဵမ်ႈတွင်ႈတဵဝ်းၶဝ်တေၸၢင်ႈလဵပ်ႈႁဵၼ်းပႃး လွင်ႈတၢင်းၵိၼ်တၢင်းယမ်ႉ ၵူၼ်းပိုၼ်ႉတီႈ ။ ၵၢၼ်ႁူင်းႁႅမ်း၊ ႁၢၼ်ႉတၢင်းၵိၼ်၊ ၵၢၼ်တေႃႉသူင်ႇၶူဝ်းၵုၼ်ႇ လႄႈ ၵၢၼ်သိုဝ်ႉၶၢႆၼႂ်းပိုၼ်ႉတီႈၵေႃႈတေၶႅမ်ႉလႅပ်ႈႁုၼ်ႈမုၼ်းမႃးၶိုၼ်းလိူဝ်ၵဝ်ႇယူႇ ၵူၼ်းၵဵင်းတုင်လၢတ်ႈၼင်ႇၼႆ။

ယၢမ်းလဵဝ် ၸူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ဝဵင်းတႃႈၶီႈလဵၵ်းၼႆႉ လွင်ႈၵျႃႊၽျႅၼ်ႉ၊ ၵၢၼ်တေႃႇလွင်း ၵႃႊသီႊၼူဝ်ႊ ၊ ၵၢၼ်လွၵ်ႇလႅၼ်ၵိၼ်ဢၼ်လႄႈ ၵၢၼ်ၵႃႉၶၢႆၵၢတ်ႇမိုတ်ႉ (မွင်ႇၶူဝ်ႇ) ဢိၵ်ႇလွင်ႈၵေႃႇၵၢၼ်ႁၢႆႉၵေႃႈၼမ်၊ ႁဵတ်းႁႂ်ႈသလေႇၾၢင်ႁၢင်ႈဝဵင်းတူၵ်းဝႆႉလႄႈ ၽူႈၼမ်းသိုၵ်းမၢၼ်ႈဢၢၼ်းၶႂ်ႈႁဵတ်း ႁႂ်ႈပဵၼ်သဵၼ်ႈတၢင်းၵၢၼ်ၵႃႉၶၢႆ၊ ၵၢၼ်ဢႅဝ်ႇယဵမ်ႈတွင်ႈတဵဝ်း ႁႂ်ႈပဵၼ်တၢင်းၵၢၼ်သေ ယုၵ်ႉမုၼ်းၶိုၼ်းၾၢင်ႁၢင်ႈဝဵင်းႁႂ်ႈလီၶိုၼ်ႈမႃးၶိုၼ်း ၵူၺ်း- ၵူၼ်းပိုၼ်ႉတီႈလၢတ်ႈၼင်ႇၼႆ။

Photo -Maesaipress