ဝၼ်းတီႈ 31/07/2026 ဝၼ်းမိူဝ်ႈၼႆႉ ယၢမ်းၵၢင်ၼႂ် မွၵ်ႈ 9 မူင်း ၼမ်ႉသၢႆ ဢၼ်လႆလတ်းၼႂ်းၵႄႈဝဵင်းတႃႈၶီႈလဵၵ်းလႄႈ မႄႈသၢႆၼၼ်ႉ သုင်ၶိုၼ်ႈပူၼ်ႉၶိတ်ႇသုင်သုတ်းဢၼ်ၸဝ်ႈၼႃႈတီႈမၵ်းမၢႆဝႆႉ။

ယွၼ်ႉပိူဝ်ႈၾူၼ်တူၵ်းလူင်းမႃးၸဵမ်ၶမ်ႈဝႃးဝၼ်းသိုၼ်းတေႃႇမႃးထိုင်ၼႂ်ၼႆႉၵေႃႈယင်းတိုၵ်ႉတူၵ်းယူႇပႆႇထၢတ်ႇလႄႈ ႁဵတ်းႁႂ်ႈၼမ်ႉသၢႆၼွင်း။ ၵူၺ်းၵႃႈ တေႃႇထိုင်ယၢမ်းၵၢင်ဝၼ်းၼႆႉတႄႉပႆႇ ၶဝ်ႈထိုင်ၵၢင်ဝဵင်းမႄႈသၢႆ။

ၽူႈၵွၼ်းၸႄႈတွၼ်ႈၵဵင်းႁၢႆးတႄႉ သင်ႇႁႂ်ႈၸဝ်ႈၼႃႈတီႈဢဝ်ရူတ်ႉၵႃး ပႅၵ်ႉႁူဝ်း ၵႂႃႇၶူတ်ႉဢဝ် ၶႅၵ်ႉၸိူဝ်းၶၢင်ႉၶမ်ဝႆႉၸွမ်းၶူဝ်ၶၢမ်ႈၼမ်ႉ မႄႈသၢႆတႃႈၶီႈလဵၵ်းၼၼ်ႉဢွၵ်ႇယူႇ။

 ၵူၼ်းမိူင်းမႄႈသၢႆမႆႈၸႂ် သင်ဝႃႈၾူၼ်တိုၵ်ႉတေတူၵ်းယူႇတိၵ်းတိၵ်းၸိုင်-  ဢၼ်တႃႁၢၼ်ထႆး သိုၵ်းထႆးဢိၵ်ႇၵူၼ်းမိူင်းၵႂႃႇႁဵတ်းဝႆႉၾၢႆႁႄႉၼမ်ႉတွင်ႈၾင်ႇ ၾၢႆႇမႄႈသၢႆၼၼ်ႉ ၵူဝ်မၼ်းဢမ်ႇႁပ်ႉလႆႈႁႅင်းၼမ်ႉတွင်ႈသေ ၵူဝ်မၼ်းလၼ်ႇၵူၼ်ႇလူႉၵွႆ ၵူၺ်းယဝ်ႉ။ ပေႃးထိုင်ၶၵ်ႉတွၼ်ႈၼၼ်ႉတႄႉ ၼမ်ႉတေၶဝ်ႈထူမ်ႈမႄႈသၢႆထႅင်ႈဢမ်ႇႁၢင်ႉဝႃႈၼႆ။

ၼႂ်းဝဵင်းတႃႈၶီႈလဵၵ်းတႄႉ ၼႂ်ၼႆႉ ၸွမ်းပွၵ်ႉၸွမ်းယွမ်ႇ တီႈၶူင်ႈတီႈယၢၼ်းၼၼ်ႉ ၼမ်ႉထူမ်ႈ ၸွမ်းႁိူၼ်းယေး ၸွမ်းတႃႈၸွမ်းတၢင်းယူႇယဝ်ႉ ႁဵတ်းႁႂ်ႈၵူၼ်းမိူင်းၵႂႃႇမႃးႁႃၵိၼ်လဵင်ႉတွင်ႉယၢပ်ႇၽိုတ်ႇ ။