သိုၵ်းမၢၼ်ႈ ထူဝ်းသိုၵ်းထႅမ်ႁႅင်းသိုၵ်းႁၢဝ်ႈႁႅင်း ၶဝ်ႈၼႂ်းဝၢၼ်ႈၼပၢၼ်းၵျီး ၊ ဝၢၼ်ႈပူၺ်းၼၽႃး ၼႂ်းၸႄႈဝဵင်းဝၢၼ်ႈငႂ်ႈ (ယႂႃႇငၢၼ်ႇ) ၸိုင်ႈတႆးပွတ်းၸၢၼ်း  လမ်းတီႉၺွပ်းၵူၼ်းမိူင်း  ။  

ၼႂ်းဝၼ်းတီႈ 20 လိူၼ်ၵျူႊလၢႆႊယၢမ်းၵၢင်ၶမ်ႈ 10 မူင်းၼႆႉ မီးၵူၼ်းဢမ်ႇႁူႉၾၢႆႇ 5 ၵေႃႉ ပႃးၵွင်ႈ ၸေးမိုဝ်း ၶဝ်ႈမႃးလၢတ်ႈဝႃႈ မီးလွင်ႈလူဝ်ႇတွင်ႈထၢမ် ၼႆသေႁွင်ႉဢဝ် ၸဝ်ႈၸၢင်းဝိလႃႇသ တီႈၵျွင်းမုၼ်ႇၸဝ်ႈ မျႃႉတဵင်းတၢၼ်ႇ တီႈဝၢၼ်ႈပူၺ်းၼၽႃးၵႂႃႇ ။ ထိုင်မႃးဝၼ်းတီႈ 21 ယၢမ်း ၵၢင်ၼႂ် ၵူၼ်းဝၢၼ်ႈၵႂႃႇထူပ်းႁၼ်တူဝ်တၢႆ ၸဝ်ႈၸၢင်း တီႈၼိူဝ်သဵၼ်ႈတၢင်း ပူၺ်းၼၽႃး- ၼပၢၼ်းၵျီး မီးႁွႆးမၢတ်ႇၸဵပ်းဝႆႉတင်းတူဝ် ။

ဝၢႆးၼၼ်ႉ သိုၵ်းမၢၼ်ႈဢဝ်ဢဵၼ်ႁႅင်း ထူဝ်းသိုၵ်းၶဝ်ႈ ပၵ်းတပ်ႉ ၼႂ်းဝၢၼ်ႈၼပၢၼ်းၵျီးလႄႈ ပူၺ်းၼၽႃး ႁၢဝ်ႈႁႅင်း ႁဵတ်းႁႂ်ႈ ၵူၼ်းဝၢၼ်ႈယူႇသဝ်းဢမ်ႇမီးလွင်ႈထၢင်ႇႁၢင်ႈလွတ်ႈလႅဝ်း ။

ၼၢင်းယိင်းယူႇဝၢၼ်ႈၼပၢၼ်းၵျီး လၢတ်ႈၽူႈတွႆႇႁွၵ်ႈဝႃႈ -“ပေႃးသိုၵ်းမၢၼ်ႈမႃးၼိုင်ႈပွၵ်ႈၼႆႉ မီးမွၵ်ႈ 100 ၼႆႉ ၊ ၶဝ်ထူဝ်းသိုၵ်းၶဝ်ႈၵႂႃႇတၢင်းၼႂ်းထိူၼ်ႇၵူႈဝၼ်း ၊ ပေႃးသိုၵ်းမၢၼ်ႈ ထူဝ်းသိုၵ်း ၶဝ်ႈဝၢၼ်ႈၼႆႉ ၽႂ်ၵေႃႈဢမ်ႇႁတ်းၵႂႃႇသူၼ်ၵႂႃႇႁႆႈ ၊ ယဝ်ႉၵေႃႈၶဝ်လႄႇတီႉၺွပ်းၵူၼ်းဝၢၼ်ႈပႃး ”- ဝႃႈၼႆ ။

လႆႈႁူႉဝႃႈ သိုၵ်းမၢၼ်ႈတီႉၺွပ်းၵႂႃႇ ၼၢင်းယိင်း 4 ၵေႃႉ ၼႂ်းဝဵင်းယႂႃႇငၢၼ်ႇ ။ လိူဝ်ၼၼ်ႉ သိုၵ်းမၢၼ်ႈ တီႉၺွပ်းၵႂႃႇထႅင်ႈ သွင်ၽူဝ်မေး ယူႇဝၢၼ်ႈယေႇဢူး ( ရေဦး ) ထိုင်ဝၼ်းမိူဝ်ႈၼႆႉ ပႆႇလႆႈတၢင်းၵပ်းသိုပ်ႇၵၼ်တင်းၵူၼ်းတီႈႁိူၼ်း ဝႃႈၼႆ ။

မိူၼ်ၼင်ႇၼႆ ဝၼ်းတီႈ 24 လိူၼ်ၵျူႊလၢႆႊ ၼႆႉၵေႃႈ သိုၵ်းမၢၼ်ႈထူဝ်းသိုၵ်းၶဝ်ႈၼႂ်း ဝၢၼ်ႈၵျွၵ်ႉငႅတ်ႉယဝ်ႉ တီႉၺွပ်းပေႃႉထုပ်ႉၵူၼ်းၸၢႆးၵေႃႉၼိုင်ႈ ထိုင်တီႈ လူႉတၢႆ ၼႆယဝ်ႉ ။

ၵူၼ်းၸၢႆးၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တလဵဝ်ၼႆႉ တၢင်းၵျွၵ်ႉငႅတ်ႉၼႆႉတႄႉ ငဝ်းလၢႆး မၼ်းၼိမ်ဝႆႉ ၊ သိုၵ်းမၢၼ်ႈတႄႉ တိုၵ်ႉမီးယူႇ ၊ ၵူၼ်းဝၢၼ်ႈဢၼ်ပၢႆႈၵေႃႈပၢႆႈ ၊ မိူဝ်ႈသိုၵ်းမၢၼ်ႈ ထူဝ်းသိုၵ်းၶဝ်ႈမႃးၼၼ်ႉ ပေႃႉထုပ်ႉၵူၼ်းဝၢၼ်ႈ တၢႆၵႂႃႇၵေႃႉၼိုင်ႈ ဢမ်ႇဢဝ် ပုၼ်ႈၽွၼ်း ပၼ်သင် တူဝ်တၢႆမၼ်းၵေႃႈၾင်တီႈၼၼ်ႈၵမ်းလဵဝ်  ၊ ၶၢဝ်ႇၵေႃႈဢမ်ႇပၼ်ဢွၵ်ႇ”- ဝႃႈၼႆ ။

ၵူၼ်းၸၢႆးဢၼ်လႆႈလူႉတၢႆၵႂႃႇၼၼ်ႉ ပဵၼ်ၵူၼ်းဝၢၼ်ႈၵျွၵ်ႉငႅတ်ႉ ဢႃယႃ 40 ပီ မၼ်းၸၢႆး ဢမ်ႇမီးလွင်ႈၵွင်ႉၵၢႆႇၵၼ်တင်းၸုမ်းယိပ်းၵွင်ႈၵၢင်ႇၸုမ်းလႂ်  ပဵၼ်ၵူၼ်းႁဵတ်းၵၢၼ်ၽုၵ်ႇသွမ်ႈ ႁႃၸဝ်ႉၵိၼ်ၶမ်ႈၵေႃႉၼိုင်ႈၵူၺ်း – ၵူၼ်းပိုၼ်ႉတီႈလၢတ်ႈ ။  

မိူၼ်ၼင်ႇၼႆ ဝၼ်းတီႈ 24 လိူၼ်ၵျူႊလၢႆႊ ထိုင် ဝၼ်းတီႈ 27 ၼႆႉ သိုၵ်းမၢၼ်ႈထႅမ်ႁႅင်းသိုၵ်း ထူဝ်းသိုၵ်းၶဝ်ႈၼႂ်းဝၢၼ်ႈ ၵျွၵ်ႉငႅတ်ႉ(ကျောက်ငှက်)  လႄႈ ဝၢၼ်ႈသိၼ်ႇသႃႇပျႃး (ဆင်ဆာပြား) တီႉၺွပ်းထုပ်ႉပေႃႉၵူၼ်းဝၢၼ်ႈ 20 ပၢႆ ၊ ၵမ်ႈၽွင်ႈ ပွႆႇလွတ်ႈမႃးၶိုၼ်းသေတႃႉ ၸိူဝ်းၺႃးတီႉၺွပ်းဝႆႉ တိုၵ်ႉမီးယူႇတင်းၼမ် ဝႃႈၼႆ။

လွင်ႈၵူၼ်းမိူင်းယႂႃႇငၢၼ်ႇ ၵမ်းၵမ်းၺႃးတီႉၺွပ်းၵုမ်းၶင်ယူႇၸိူင်ႉၼႆၼႆႉ ၶႂ်ႈႁႂ်ႈၸုမ်းၸွႆႈထႅမ်ၾၢႆႇသုၼ်ႇလႆႈၵူၼ်းၶဝ် ၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈ ဢၼ်ဝႃႈႁဵတ်းတႃႇၵူၼ်းမိူင်းၼႆၸိူဝ်းၼၼ်ႉ ၸွႆႈထႅမ်ပၼ်ၽွင်ႈ- တုၵ်းယွၼ်းၼင်ႇၼႆ။

ၼႂ်းၸႄႈဝဵင်းယႂႃႇငၢၼ်ႇၼၼ်ႉ ၸုမ်းလုၵ်ႉၽိုၼ်ႉ မီးလၢႆလၢႆၸုမ်း တူင်ႉၼိုင်ယူႇသဝ်းဝႆႉ။ မိူၼ်ၼင်ႇ တပ်ႉသိုၵ်းပူတ်းပွႆႇၵူၼ်းမိူင်းထၼူႉ DPLA ၊ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈထၼု DSNDA လႄႈ တပ်ႉၵွင် 1003 ၸုမ်း PDF ဢၼ်ယူႇတႂ်ႈ NUG ၸိူဝ်းၼႆႉ တူင်ႉၼိုင်ယူႇသဝ်းဝႆႉ။ၼွၵ်ႈလိူဝ်ၼၼ်ႉ တေမီးတပ်ႉသိုၵ်းမၢၼ်ႈ ၸုမ်းပျူႇသေႃးထီး လႄႈ ပျီႇတူႉၸိတ်ႉၸိူဝ်းၼႆႉၵေႃႈ တူင်ႉၼိုင်ၵႂႃႇမႃးဝႆႉ။

ႁၢင်ႈ – ဝဵင်းယႂႃႇငၢၼ်ႇ