မိူဝ်ႈဝႃးဝၼ်းတီႈ 14/7/2026 ယၢမ်းႁူဝ်ၶမ်ႈ မီးၸုမ်းဢမ်ႇႁူႉၾၢႆႇၸုမ်းၼိုင်ႈ ၶဝ်ႈတီႈၺွပ်း ၵႅမ်ႁူဝ်ပဝ်ႈ DNDP လႄႈၵူၼ်းၶၢႆမူၵေႃႉၼိုင်ႈ တီႈဝဵင်းယႂႃႇငၢၼ်ႇသေဢဝ်ၵႂႃႇၶႃႈႁႅမ်ပႅတ်ႈ ဝႃႈၼႆ။
ၵႅမ်ႁူဝ်ပဝ်ႈ ပႃႇတီႇထၼူႉ DNDP ပဵၼ် ဢူးသၢၼ်ႇတိၼ်ႉ (ဦးစံတင့်) ယူႇဝၢၼ်ႈမျိၼ်းၵျတူဝ်း ၊ ၵူၼ်းၶၢႆမူပဵၼ် လုင်းဢွင်ႇဝုၼ်းသဵင်ႇ (ဦးအောင်ဝင်းစိန် ) ယူႇ ဝၢၼ်ႈ ၺွင်ႇပိၼ်ႇၶႂႃႉ (ညောင်ပင်ခွ) ၼႂ်းၸႄႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၸိုင်ႈတႆးပွတ်းၸၢၼ်း ။ ၵူၼ်းမႃးတီႉၺွပ်းပဵၼ်ၽႂ်တႄႉဢမ်ႇႁူႉ။
ၵဵဝ်ႇၵပ်းလွင်ႈ ၵႅမ်ႁူဝ်ပဝ်ႈ DNDP ဢူးသၢၼ်ႇတိၼ်ႉ လႆႈလူႉသဵင်ႈၵႂႃႇၼၼ်ႉသေ ဢူးမိၼ်းလုၼ်ႇဢူး ၽူႈၼမ်းၼႂ်း ပႃႇတီႇ တီႇမူဝ်ႇၶရေႇၸီႇ ၸၢဝ်းၶိူဝ်းထၼူႉၵေႃႈ တႅမ်ႈတၢင်ႇ ၶေႃႈၵႂၢမ်းလွင်ႈမွင်ၸႂ်ၸွမ်း ၼိူဝ်ၼႃႈလိၵ်ႈ ဝ်သိုဝ်ႇတူင်ႇဝူင်းမၼ်းၸၢႆးဝႃႈ – “မွင်ၸႂ်ၸွမ်း ဢၼ်လႆႈသုမ်း ၽူႈဢၼ်တူင်ႉၼိုင် ၸွႆႈထႅမ်ၵၢၼ်ၸိူဝ်ႉၸၢတ်ႈထၼူႉ ၵေႃႉၼိုင်ႈၵႂႃႇ”- ၼႆယဝ်ႉ။
ၼႂ်းၵႄႈၵူၼ်းဝၢၼ်ႈတႄႉ မီးၶၢဝ်ႇလိုဝ်းဢွၵ်ႇမႃးဝႃႈ လုင်းဢွင်ႇဝုၼ်းသဵင်ႇၼႆႉ ပဵၼ်ပိဝ်ႇသေႃးထီး တီႈဝၢၼ်ႈမျိၼ်းၵျတူဝ်း သေ လုင်းသၢၼ်ႇတိၼ်ႉ ၵႅမ်ႁူဝ်ပဝ်ႈ ပႃႇတီႇထၼူႉDNDPသမ်ႉ ပဵၼ်ၵူၼ်းၵပ်းၵၢႆၵၼ်တင်းတပ်ႉသိုၵ်းမၢၼ်ႈ – ဝႃႈၼႆသေတႃႉ ယူႇတီႈၽူႈတွႆႇႁွၵ်ႈတႄႉ ဢမ်ႇၸၢင်ႈယိုၼ်ယၼ်ႁင်းၶေႃ ။ ၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇ ၸုမ်းသိုၵ်းထၼူႉ DSNDA ယူႇသေတႃႉ ၵပ်းသိုပ်ႇဢမ်ႇပႆႇလႆႈ။
ၵူၼ်းၸၢႆးၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈဝႃး ဝၢႆးလင်ၵူၼ်းဝၢၼ်ႈတီႈဝၢၼ်ႈ ၺွင်ႇပိၼ်ၶႂႃႉ ၺႃးၶႃႈႁႅမ်တၢႆယဝ်ႉ ၶဝ်ပွႆႇၶၢဝ်ႇလိုဝ်းၼႂ်းဝၢၼ်ႈဝႃႈ ၵေႃႉၺႃးၶႃႈႁႅမ်ၼၼ်ႉပဵၼ်တလၢၼ်ႇ ( ၶွၼ်ႉတဝ်ႉသိုၵ်ႈမၢၼ်ႈ ) ၼႆဝႃႇ။ ပၢႆလၢတ်ႈၵၼ်ဝႃႈ – ၶိင်းၼႆႉမၼ်းၺႃး PDF ၶဝ်ယၢမ်ႈပၼ်ၾၢင်ႉသူင်ႇလိၵ်ႈၸူးလၢႆပွၵ်ႈလၢႆၵမ်းယဝ်ႉၼႆလူးၵွၼ်ႇ။ တီႈတႄႉမၼ်းၵူၼ်းမႃးၶႃႈႁႅမ်ပဵၼ်ၽႂ်တႄႉတႄႉယင်းဢမ်ႇႁူႉ ”- ဝႃႈၼႆ ။
လုင်းသၢၼ်ႇတိၼ်ႉၼႆႉ ၵႆႉဢဝ်ႇၵႃးၵူၼ်းဝၢၼ်ႈသူင်ႇပၼ်တီႈသိုၵ်းမၢၼ်ႈ တႃႇသိုၵ်းမၢၼ်ႈၸႂ်ႉတိုဝ်း ။ ယူႇတီႈ တပ်ႉသိုၵ်းၵႅတ်ႇၶႄၵူၼ်းမိူင်း (PDF) ၼႂ်းပိုၼ်ႉတီႈၶဝ် သူင်ႇလိၵ်ႈပၼ်ၾၢင်ႉ ပၼ်မၼ်းသေ ဝၢႆးမႃး မၼ်းၸၢႆးၵေႃႈ ၾၢင်ႉသတိ လွင်ႈတူင်ႉၼိုင်မၼ်းသေတႃႉ မိူဝ်ႈလဵဝ် ထုၵ်ႇတီႉၺွပ်းၶႃႈတၢႆယဝ်ႉၼႆ ၵူၼ်းပိုၼ်ႉတီႈတႄႉလၢတ်ႈၼင်ႇၼႆ ။
ဝၢႆးသွင်ၵေႃႉ ထုၵ်ႇႁဵတ်းႁၢႆႉၶႃႈႁႅမ်ယဝ်ႉ သိုၵ်းမၢၼ်ႈၶဝ်ႈဢဝ်ႁူမ်ႇလူမ်ႈ ၵူတ်ႇထတ်းၵူၼ်းပိုၼ်ႉတီႈႁၢဝ်ႈႁႅင်း ႁဵတ်းႁႂ်ႈ ၵူၼ်းပိုၼ်ႉတီႈဢမ်ႇၸၢင်ႈၵႂႃႇမႃးထၢင်ႇႁၢင်ႈလွတ်ႈလႅဝ်းၼႆယဝ်ႉ ။
ၵူၼ်းၸၢႆးပိုၼ်ႉတီႈသိုပ်ႇလၢတ်ႈထႅင်ႈဝႃႈ -“ တီႈဝၢၼ်ႈမျိၼ်းၵျတူဝ်းလႄႈ ၺွင်ႇပိၼ်ၶႂႃႉၼႆႉ ပဵၼ်ပိုၼ်ႉတီႈသိုၵ်းမၢၼ်ႈပၵ်းတပ်ႉဝႆႉ ၊ သိုၵ်းမၢၼ်ႈၵေႃႈမီးယူႇ ၊ ပိဝ်ႇသေႃးထီး ၊ ၵၢင်ႉၵႄႇၵႆႉထုၵ်ႇၶႃႈႁႅမ်ၼႃႇ ၊ သိုၵ်းမၢၼ်ႈဢၼ်ဢဝ်ႁူမ်ႇလူမ်ႈၵေႃႈ ၵုမ်ႇပႂ်ႉတီႈၵဵတ်ႉလၢၼ် ယွၼ်းငိုၼ်းၵူၺ်း ဢမ်ႇဢဝ်ႁူမ်ႇလူမ်ႈပၼ်ႁႂ်ႈငမ်းယဵၼ်”- ဝႃႈၼႆ ။
မိူဝ်ႈဝၼ်းတီႈ 29/11/2025 (ဦးဝင်းမြင့်) ၵူၼ်းဝၢၼ်ႈဝၢၼ်ႈမျိၼ်းၵျတူဝ်း (မြင်းကျဒိုး) လႄႈ ၵူၼ်းၸၢႆးၵေႃႉၼိုင်ႈ ထုၵ်ႇၼႄးဝႃႈ ပဵၼ်ၽူႈဢွၼ်ႁူဝ် ၸုမ်းပိဝ်ႇသေႃးထီး၊ ၽူႈၸွပ်ႇၶၢဝ်ႇပၼ်သိုၵ်းမၢၼ်ႈယိုတ်းမိူင်း ၺႃးၸုမ်းသိုၵ်းထၼူႉ (DSNDA) ပႂ်ႉငွႆးယိုဝ်းတၢႆတင်းသွင်ၵေႃႉ ၼႂ်းၵႄႈၵၢင်သဵၼ်ႈတၢင်းၵႂႃႇမႃး ဝဵင်းယႂႃႇငၢၼ်ႇ – ဝဵင်းဢွင်ႇပၢၼ်း ၼႆယဝ်ႉ ။
ဝၢႆးလင် တပ်ႉသိုၵ်းမၢၼ်ႈ ယိုတ်းဢဝ်ဢႃႇၼႃႇၸိုင်ႈမိူင်းၼႆႉ ၼႂ်းၸႄႈဝဵင်းယႂႃႇငၢၼ်ႇ ၵူၼ်းမိူင်းထုၵ်ႇႁဵတ်းႁၢႆႉႁႅမ်တၢႆလၢႆလၢႆၵေႃႉ၊ ၸိူဝ်းပဵၼ် ပူႇၵၢင်ႉပူႇၵႄႇၵေႃႈ ထုၵ်ႇၸုမ်းဢမ်ႇႁူႉၾၢႆႇ ႁႅမ်တၢႆ၊ ၵူၼ်းၸိူဝ်း ဢၼ်သိုၵ်းမၢၼ်ႈထၢင်ႇထိူမ်ဝႃႈ ၵဵဝ်ႇၵွင်ႉတင်းၸုမ်းလုၵ်ႉၽိုၼ်ႉၼၼ်ႉၵေႃႈ ထုၵ်ႇတီႉၺွပ်းႁဵတ်းႁၢႆႉလၢႆလၢႆၵေႃႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ