သိုၵ်းမၢၼ်ႈၼႄၶေႃႈဢၢင်ႈလွင်ႈႁူမ်ႇလူမ်ႈပိုၼ်ႉတီႈ ၼႂ်းၸႄႈဝဵင်းယႂႃႇငၢၼ်ႇ ၼႆသေ ထႅမ်ႁႅင်းသိုၵ်း ၶဝ်ႈပၵ်းတပ်ႉၼႂ်းဝၢၼ်ႈ ၼႂ်းဢိူင်ႇ၊ ၸႂ်ႉၵူၼ်းဝၢၼ်ႈ ပၢႆႈဢွၵ်ႇဝၢၼ်ႈ ၊ လၼ်ႇၵွင်ႈ ၼႂ်းဝၢၼ်ႈၵုင်းသိမ်ႇ တိူဝ်ႉၺႃးၵူၼ်းဝၢၼ်ႈ လႆႈႁၢမ်သူင်ႇႁူင်းယႃ ။
ၼႂ်းဝၼ်းတီႈ 17/8/2026 ယၢမ်းၵၢင်ၶမ်ႈ သိုၵ်းမၢၼ်ႈၶဝ်ႈလိုပ်ႈ ၵူၼ်းဝၢၼ်ႈ ဝၢၼ်ႈယေႇဢူး ႁႂ်ႈဢွၼ်ၵၼ်ပၢႆႈဢွၵ်ႇဝၢၼ်ႈ၊ ၽွင်းၵူၼ်းဝၢၼ်ႈဢွၼ်ၵၼ်ဢဝ်ၶူဝ်းဢဝ်လဵင်း ပၢႆႈဢွၵ်ႇဝၢၼ်ႈယူႇၼၼ်ႉ သိုၵ်းမၢၼ်ႈလၼ်ႇၵွင်ႈၵႂႃႇ သီႇႁူးႁႃႈတၢင်း ၊ မၢၵ်ႇၵွင်ႈတိူဝ်ႉၺႃးၵူၼ်းဝၢၼ်ႈ ၵူၼ်းၸၢႆးၼုမ်ႇ ၵေႃႉၼိုင်ႈ မၢတ်ႇၸဵပ်းႁႅင်း ထိုင်တီႈလႆႈႁၢမ်သူင်ႇႁူင်းယႃ။ ၽွင်းၵူၼ်းဝၢၼ်ႈတိုၵ်ႉၸွႆႈၵၼ်ယူႇၼၼ်ႉ သိုၵ်းမၢၼ်ႈ ၵႂႃႇပေႃႉထုပ်ႉပိတ်ႉႁႅမ်လႄႈ မၢတ်ႇၸဵပ်းမၢၼ်ႉလိူတ်ႈထႅင်ႈ 4 ၵေႃႉ ပဵၼ်ၵူၼ်းၸၢႆးလွၼ်ႉလွၼ်ႉ။ ယၢမ်းလဵဝ် လႆႈဢဝ်တူဝ်ၵူၼ်းဝၢၼ်ႈ 5 ၵေႃႉၼၼ်ႉသူင်ႇယူတ်းယႃတူဝ်ဝႆႉယဝ်ႉဝႃႈၼႆ ။
ၵူၼ်းပိုၼ်ႉတီႈ ၽူႈၸၢႆးၼုမ်ႇသႅၼ်းပၢၼ်ၵၢင် ၵေႃႉဢၼ်ႁၼ်ပိူင်ပဵၼ်သိုဝ်ႈၼႃႈတၼ်းတႃၼၼ်ႉ လၢတ်ႈၽူႈတွႆႇႁွၵ်ႈဝႃႈ -“ ၶဝ်(သိုၵ်းမၢၼ်ႈ) ဝႃႈ ၶဝ်ပဵၼ်ၵူၼ်းၼုမ်ႇလႄႈ တင်ႈၸႂ်ယိုဝ်းဝႃႇ ၊ ၵူၼ်းမၢတ်ႇၸဵပ်းၸိူဝ်းၼၼ်ႉ လႆႈႁၢမ်သူင်ႇယူတ်းယႃတီႈႁူင်းယႃမျၢႆႇ ဝႆႉယဝ်ႉဢေႃႈ၊ 4 ၵေႃႉဢၼ်ၺႃးပေႃႉထုပ်ႉၼၼ်ႉၵေႃႈ သမ်ႉပေႃး မၢၼ်ႉၵမ်ႇၵႂႃႇမူတ်း “- ဝႃႈၼႆ ။
ယၢမ်းလဵဝ် ၵူၼ်းဝၢၼ်ႈ ၼႂ်းဢိူင်ႇ ၵုင်းသိမ်ႇ လႄႈ ယေႇဢူး ဢမ်ႇမီးလွင်ႈႁူမ်ႇလူမ်ႈသေဢိတ်းယဝ်ႉလႄႈ ဢွၼ်ၵၼ်ပၢႆႈဢွၵ်ႇဝၢၼ်ႈဝႆႉ ၊ ၵိုတ်းၵူၼ်းၶၢဝ်ႉၵူၼ်းၵႄႇ ၸိူဝ်းဢၼ်မႆႈၸႂ် ၶိူဝ်းၶွင်ႁိူၼ်းယေးၸဝ်ႈၵဝ်ႇၼၼ်ႉတႄႉ ပႂ်ႉႁိူၼ်းဝႆႉယူႇၽွင်ႈ – ၵူၼ်းပိုၼ်ႉတီႈလၢတ်ႈ ၼင်ႇၼႆ ။
“ယွၼ်ႉသိုၵ်းမၢၼ်ႈၵႆႉတီႉၺွပ်းၵူၼ်းၼုမ်ႇလႄႈ ၵူၼ်းၼုမ်ႇၵမ်ႈၼမ် ဢွၼ်ၵၼ်ပၢႆႈဢွၵ်ႇဝၢၼ်ႈမူတ်းယဝ်ႉ ၊ ၼႂ်းဝၢၼ်ႈတေၵိုတ်းၵူၼ်းထဝ်ႈ ၵူၺ်းယဝ်ႉၶႃႈ ၊ ပေႃးဢမ်ႇပႂ်ႉႁိူၼ်းၵေႃႈ ၵူဝ်ၶိူဝ်းၶွင်ႁိူၼ်းယေးႁၢႆ ၊ ဢမ်ႇၸၢင်ႈတေႃႉပၢႆႈတင်းမူတ်းၶႃႈလူး“- ဝႃႈၼႆ ။
တပ်ႉသိုၵ်းမၢၼ်ႈၼႆႉ လွၵ်ႇငိုတ်ႈၵူၼ်းမိူင်း ႁႂ်ႈၶၢႆႉဢွၵ်ႇယဝ်ႉ တေမူၵ်းသေႃႉယူႇ ၼႂ်းႁိူၼ်းယေးၵူၼ်းဝၢၼ်ႈ၊ ၵႆႉလၵ်ႉဢဝ်ၶူဝ်းၶွင် ဢၼ်မီးၵႃႈၶၼ်လႄႈ လၵ်ႉၵိၼ်မူၵႆႇ လႄႈသတ်းလဵင်ႉၵိုၵ်းႁိူၼ်း။ ယွၼ်ႉၼၼ် သင်ဝႃႈ တေငိူင်ႉပၢႆႈဢွၵ်ႇဝၢၼ်ႈၼႆ ၶတ်းၸႂ်ဢဝ်ပႃးၵႂႃႇ ၶူဝ်းၶွင်ငိုၼ်းၶမ်း၊ ၽိုၼ်လိၵ်ႈလၢႆးဢၼ်လွင်ႈယႂ်ႇ၊ ၸဵမ်ဢဝ်မၢႆၾၢင် ဝႂ်မုင်ႉႁေႃႁိူၼ်းၸိူဝ်းၼႆႉတၢင်းသဵင်ႈသေၵမ်းၼႆ – တပ်ႉသိုၵ်းထၼူႉ တပ်ႉၵွင် 1003 ပိုၼ်ၽၢဝ်ႇတိုၵ်းသူၼ်းဝႆႉ ၼင်ႇၼႆ။
သိုၵ်းမၢၼ်ႈ လၢတ်ႈဝႃႈ – ပၢင်တိုၵ်းၸၢင်ႈပဵၼ်လႆႈၵူႈၶၢဝ်းလႄႈ ႁႂ်ႈၵူၼ်းဝၢၼ်ႈ ဢလႄႇၶျွင်ႇ၊ မျေႇၼီႇၵူင်း ၊ မျၢႆႇ ၸိူဝ်းၼႆႉ ပၢႆႈဢွၵ်ႇဝၢၼ်ႈႁႂ်ႈယဝ်ႉ ၼႂ်းၶၢဝ်းတၢင်း 3 ဝၼ်း ဝႃႈၼႆဝႆႉ ။
ၼႂ်းလိူၼ်ဢေႃးၵတ်ႉသ်ၼႆႉ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ လႆႈပဵၼ်ပၢင်တိုၵ်းၵၼ် ႁိမ်းဝၢၼ်ႈ ဢလႄႇၶျွင်ႇ လႄႈ ၽယႃးၵူင်း ၼႂ်းၸႄႈဝဵင်းယႂႃႇငၢၼ်ႇ၊ ဝၢႆးၼၼ်ႉ သၢႆသိုၵ်းမၢၼ်ႈ ၶဝ်ႈပၵ်းတပ်ႉ ၼႂ်းဝၢၼ်ႈသေ လႄႇလမ်းႁႃ တီႉၺွပ်းၵူၼ်းမိူင်း ႁဵတ်းႁႂ်ႈ ၵူၼ်းမိူင်း ဢမ်ႇၸၢင်ႈယူႇသဝ်းထၢင်ႇႁၢင်ႈလွတ်ႈလႅဝ်း ။
ႁၢင်ႈ – ပၢႆႉယႂႃႇငၢၼ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ