ၽွင်း NSPNC ႁွင်ႉဢဝ်ၸုမ်းယိပ်းၵွင်ႈၵၢင်ႇၸုမ်းၼိုင်ႈယဝ်ႉၸုမ်းၼိုင်ႈ ၵႂႃႇၼေႇပျီႇတေႃႇဢုပ်ႇဢူဝ်းတႃႇငမ်းယဵၼ်ယူႇၼၼ်ႉ မိူဝ်ႈဝႃး ဝၼ်းတီႈ 12/8/2026 ယၢမ်းၵၢင်ၼႂ် 10 မူင်း သိုၵ်းမၢၼ်ႈဢဝ် ႁိူဝ်းမိၼ် Jet fighter ပၼ်ႇလဵပ်ႈ ပွႆႇမၢၵ်ႇလူင်း ၾၢႆႇႁွင်ႇဝၢၼ်ႈၺွင်ႇလႅင် ၸႄႈဝဵင်းမိူင်းမိတ်ႈ ။
ၵူၼ်းၸၢႆးဝဵင်းမိူင်းမိတ်ႈ လၢတ်ႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈလႄႇႁႃယႃႉႁိူၼ်းၵူၼ်းမိူင်းယဝ်ႉ ၵႂႃႇၽႃႇၺႃး သိုၵ်းၶၢင်သေ ပဵၼ်ပၢင်တိုၵ်းၵၼ်ဢေႃႈ ၊ သိုၵ်းမၢၼ်ႈဢဝ်ႁိူဝ်းမိၼ် မႃးပွႆႇမၢၵ်ႇ 2 ဝၼ်းယဝ်ႉၶႃႈ ၊ မိူဝ်ႈလဵဝ်ၵေႃႈ သိုၵ်းသွင်ၾၢႆႇၶဵင်ႈၶႅင် ၵၢၼ်သိုၵ်းတေႃႇၵၼ်ဝႆႉၸွမ်း ဝၢၼ်ႈၺွင်ႇ လႅင်ဝႆႉ”- ၼႆယဝ်ႉ ။
လႆႈႁူႉဝႃႈ ၼႂ်းဝၼ်းတီႈ 11/8/2026 ယၢမ်းဝၢႆးဝၼ်း 2 မူင်း သိုၵ်းမၢၼ်ႈ ၶဝ်ႈယႃႉႁိူၼ်းၵူၼ်းမိူင်း တၢင်းဝၢၼ်ႈဢုင်းၵျေႃး ဢိူင်ႇမိူင်းႁူၵ်း လူႉၵွႆ 2 လင် ၊ ဝၢႆးၶိုၼ်းသိုပ်ႇ ထူဝ်းသိုၵ်းၵႂႃႇတၢင်း ဝၢၼ်ႈၺွင်ႇလႅင် ၼၼ်ႉ တုမ်ႉတိူဝ်ႉပဵၼ်ပၢင်တိုၵ်းၵၼ်တင်း သိုၵ်းၶၢင် KIA ႁူမ်ႈ ABSDF / KPDF ၼႆယဝ်ႉ။
ၵူၼ်းပိုၼ်ႉတီႈဝႃႈ – တီႈပၢင်တိုၵ်းၼၼ်ႉ ငိၼ်းဝႃႈ သိုၵ်း SSPP ၵေႃႈႁူမ်ႈၵၼ်တင်း သိုၵ်းၶၢင်သေ ယိုဝ်းသိုၵ်းမၢၼ်ႈပႃး – ဝႃႈၼႆသေတႃႉ ယူႇတီႈၽူႈတွႆႇႁွၵ်ႈသေ တိတ်းတေႃႇၵပ်းသိုပ်ႇၸူး SSPP ဢမ်ႇလႆႈလႄႈ ဢမ်ႇၸၢင်ႈလႆႈၶေႃႈယိုၼ်ယၼ် ဢမ်ႇပႆႇႁူႉလွင်ႈတၢင်းတႅတ်ႈတေႃး။
ၽွင်းပၢင်တိုၵ်းၼၼ်ႉ သိုၵ်းမၢၼ်ႈၸႂ်ႉပႃး ႁိူဝ်းမိၼ် ႁၢႆႊသၵီႊ လမ်းၼိုင်ႈပွႆႇမၢၵ်ႇ ၊ ၸၢၵ်ႇမၢၵ်ႇတူၵ်းတိူဝ်ႉ ႁိူၼ်းသွင်လင် လႄႈ ၵႃး ၵူၼ်းဝၢၼ်ႈသၢႆးလႅင် လူႉၵွႆ ၵူၼ်းပိုၼ်ႉတီႈတႄႉလၢတ်ႈၼင်ႇၼႆ။
ယၢမ်းလဵဝ် ယွၼ်ႉၸုမ်းယိပ်းၵွင်ႈၵၢင်ႇ ၶဵင်ႈၶႅင် ၵၢၼ်သိုၵ်းတေႃႇၵၼ်လႄႈ ႁဵတ်းႁႂ်ႈ ၵူၼ်းမိူင်း မႆႈၸႂ်ၵူဝ်ပဵၼ်ပၢင်တိုၵ်းယႂ်ႇလူင်ၶိုၼ်း – ၼႆယဝ်ႉ ။
ၵူၼ်းၸၢႆး ဝဵင်းမိူင်းမိတ်ႈလၢတ်ႈၽူႈတွႆႇႁွၵ်ႈဝႃႈ – “မိူဝ်ႈလဵဝ်တႄႉ ၵူၼ်းမိူင်းဢမ်ႇပၢႆႈ ၊ ပေႃးမၼ်းၸမ်မႃးတိၵ်းတိၵ်းတႄႉ တေလႆႈပၢႆႈထႅင်ႈၵမ်းယဝ်ႉယူဝ်ႉၼႆ ၵူၼ်းမိူင်းၵေႃႈဢွၼ်ၵၼ်မႆႈၸႂ်ၵူဝ်ပဵၼ်ပၢင်တိုၵ်းၶႃႈဢေႃႈ ” – ဝႃႈၼႆ ။
ယၢမ်းလဵဝ် သိုၵ်းမၢၼ်ႈဢၼ်မီးၼႂ်း ၸႄႈဝဵင်းမိူင်းမိတ်ႈ မၢပ်ႇၼႄးၵူၼ်းမိူင်းဝႃႈ ၵဵဝ်ႇၵွင်ႉၵၼ်တင်းၸုမ်းယိပ်းၵွင်ႈၵၢင်ႇၼႆသေ ၵႆႉမိူဝ်းသွၵ်ႈတဝ် ဢဝ်ၵႃးပႅၵ်ႊၽူဝ်ႊ မိူဝ်းၶုတ်းယႃႉႁိူၼ်းယေးၵူၼ်းဝၢၼ်ႈ။
ၼႂ်းဝၼ်းတီႈ 10/8/2026 သိုၵ်းမၼ်ႈမိူဝ်းယႃႉပႅတ်ႈ ႁိူၼ်းၵူၼ်းမိူင်း တီႈဝၢၼ်ႈၵိင်ႇတေႃး 2 လင် ။
ၼႂ်းဝၼ်းတီႈ 7/8/2026 ဝၼ်းဢၼ် သိုၵ်း SSPP ၵႂႃႇဢုပ်ႇ NSPNC တႂ်ႈသိုၵ်းမၢၼ်ႈ တီႈၼေႇပျီႇတေႃႇၼၼ်ႉၵေႃႈ သိုၵ်းမၢၼ်ႈ ၼႄးဝႃႈပဵၼ်တီႈယူႇသိုၵ်း SSPP ၼႆသေ ဢဝ်ဢဵၼ်ႁႅင်း 60 ၵေႃႉ မိူဝ်းသွၵ်ႈတဝ် ဢဝ်ၵႃးပႅၵ်ႊၽူဝ်ႊ ၶုတ်းယႃႉ ႁိူၼ်းၵူၼ်းဝၢၼ်ႈ တီႈဝၢၼ်ႈမိူင်းႁူၵ်းလူႉၵွႆၵႂႃႇ 2 လင် ဝႃႈၼႆ ။ ၵူၼ်းဝၢၼ်ႈတႄႉဝႃႈ ႁိူၼ်းဢၼ်သိုၵ်းမၢၼ်ႈယႃႉၵွႆၵႂႃႇၸိူဝ်းၼၼ်ႉဢမ်ႇၸႂ်ႈႁိူၼ်းၸုမ်းသိုၵ်းၸုမ်းလႂ် မၼ်းပဵၼ်ႁိူၼ်းၵူၼ်းမိူင်းလွၼ်ႉလွၼ်ႉ ဝႃႈၼႆ။
ၼႂ်းပိုၼ်ႉတီႈၼၼ်ႉ ၼွၵ်ႈလိူဝ်တပ်ႉသိုၵ်းမၢၼ်ႈယဝ်ႉ တေမီး သိုၵ်းတႆး SSPP ၊ သိုၵ်းတဢၢင်း TNLA ၊ သိုၵ်းၶၢင် KIA ၸိူဝ်းၼႆႉၵေႃႈ တူင်ႉၼိုင်ယူႇသဝ်းဝႆႉ။
ဝဵင်းမိူင်းမိတ်ႈ တင်း မိူင်းၵုတ်ႈၼႆႉ ၸုမ်းႁူမ်ႈႁွမ်းသိုၵ်းတဢၢင်းၶဝ် ယိုတ်းၵုမ်းလႆႈ မိူဝ်ႈၽႅၼ် ယၼ်ႇသိုၵ်း 1027 သေတႃႉ ၼႂ်းႁၢင်ပီ 2025 ပူၼ်ႉမႃးၼႆႉ သိုၵ်းတဢၢင်း လႆႈထွႆဢွၵ်ႇ၊ ပၼ်သိုၵ်းမၢၼ်ႈ ၶဝ်ႈၽွင်းငမ်းၶိုၼ်း ႁၢၼ်ႉတေႃႇထိုင်ယၢမ်းလဵဝ်။ ၵူၺ်းၵႃႈ တပ်ႉသိုၵ်းမၢၼ်ႈၵေႃႈ ပႆႇၸတ်းၵၢၼ်ၽွင်းငမ်းလႆႈလီငၢမ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ