ဢီႊရၼ်ႊ လၢတ်ႈဝႃႈ သင်ဢမေႊရိၵၼ်ႊ ပၼ်ငိုၼ်းသၢႆႈတႅၼ်း၊ ယုၵ်ႉလိူၵ်ႈၶိုၼ်း လွင်ႈဢိုတ်းႁႅတ်ႉ ႁၢမ်ႈ၊ လွင်ႈဢဝ်ၵၢၼ်သိုၵ်းသေလွၵ်ႇငိုတ်ႈ ဢိၵ်ႇပႃး ၶေႃႈတုၵ်းယွၼ်းလၢႆလၢႆလွင်ႈယဝ်ႉၵွၼ်ႇ ၸင်ႇတေ ပိုတ်ႇပၼ်ၶိုၼ်း သဵၼ်ႈတၢင်းၼမ်ႉႁေႃႊမူတ်ႉသ် ဝႃႈၼႆ။

ၽွင်းလူင်ၾၢႆႇၼွၵ်ႈမိူင်းဢီႊရၼ်ႊ လၢတ်ႈၵႂႃႇ ၼႂ်းဝၼ်းတီႈ 9 လိူၼ်ဢေႃးၵၢတ်ႉသ်ၼႆႉဝႃႈ ၵဵဝ်ႇလူၺ်ႈ လွင်ႈတေပၼ်ႁိူဝ်း လတ်းၶၢမ်ႈၵႂႃႇမႃး ၸွမ်းသဵၼ်ႈတၢင်းမႂ်ႇ ၼႂ်းၵိဝ်ႇၼမ်ႉႁေႃႊမူတ်ႉသ်ၼၼ်ႉ လႆႈ ဢုပ်ႇဢူဝ်းၵၼ်ဝႆႉတၢင်း မိူင်းဢူဝ်ႊမၢၼ်ႊ ထိုင်ၶၵ်ႉတွၼ်ႈၵမ်းလိုၼ်းသုတ်းယဝ်ႉ ဝႃႈၼႆ။

ၵူၺ်းၵႃႈ သမ်ႉဝႃႈလႆႈၶေႃႈတူၵ်းလူင်းၵၼ်တၢင်း မိူင်းဢူဝ်ႊမၢၼ်ႊသေတႃႉ သင်ဢမေႊရိၵၼ်ႊ ပႆႇ ႁဵတ်းသၢင်ႈၸွမ်းၼင်ႇ ၶေႃႈတုၵ်းယွၼ်းဢီႊရၼ်ႊၸိုင် တိုၼ်းတေပႆႇပိုတ်ႇပၼ် သဵၼ်ႈတၢင်းၼမ်ႉ ႁေႃႊမူတ်ႉသ် ၼႆယဝ်ႉ။

ၼႂ်းၶေႃႈတုၵ်းယွၼ်း ဢီႊရၼ်ႊၼၼ်ႉ ပႃးဝႆႉဝႃႈ – ႁႂ်ႈဢမေႊရိၵၼ်ႊ ပၼ်ၶိုၼ်းငိုၼ်းၵႃႈသၢႆႈတႅၼ်း ၸိူဝ်းၺႃး တိုၵ်းတေႃးသေ လူႉၵွႆၵႂႃႇ၊ ႁႂ်ႈယုၵ်ႉလိူၵ်ႈပၼ်ၶိုၼ်းလွင်ႈပိၵ်ႉဢိုတ်းႁႅတ်ႉႁၢမ်ႈ ၸိူဝ်းၼၼ်ႉ ၼႆယဝ်ႉ။

ဢီႊရၼ်ႊ လၢတ်ႈဝႃႈ – ယၢမ်းလဵဝ် လွင်ႈဢမေႊရိၵၼ်ႊ တင်း ဢီႊရၼ်ႊ ဢုပ်ႇၵုမ်ၵၼ်ၵမ်းသိုဝ်ႈ ၼၼ်ႉ ပႆႇမီး။ မီးမိူင်းယူႇၵႄႈၵၢင်သေ ၵပ်းသၢၼ်ငူပ်ႉငီႉပၼ်ၵႄႈၵၢင်သွင်ၸိုင်ႈမိူင်းၵူၺ်း ဝႃႈၼႆ။

ၵူၺ်းၵႃႈ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉတႄႉ လၢတ်ႈဝႃႈ လႆႈဢုပ်ႇၵုမ်ၵၼ်ဝႆႉ တင်း မိူင်းဢီႊရၼ်ႊ ပဵၼ်ပွတ်းပဵၼ်တွၼ်ႈယဝ်ႉသေ တိုၵ်ႉတေပႂ်ႉတူၺ်းငဝ်းလၢႆးဝႆႉယူႇ ဝႃႈၼႆ။

ဝၢႆးသေ ဢမေႊရိၵၼ်ႊ တင်း ဢီႊရၼ်ႊ တႄႇပဵၼ်ပၢင်တိုၵ်းၵၼ်မႃး ၼႂ်းႁၢင်လိူၼ်ၾႅပ်ႊပိဝ်ႊရီႊ ၼၼ်ႉယဝ်ႉ ဢီႊရၼ်ႊပိၵ်ႉဢိုတ်းပႅတ်ႈသဵၼ်ႈတၢင်းၼမ်ႉႁေႃႊမူၵ်ႉသ် ဢၼ်လမ်ႇလွင်ႈ တႃႇတေတေႃႉ သူင်ႇ ၼမ်ႉမၼ်းမဵၼ် လႄႈ ႁႅင်းထၢတ်ႈသၽႃႇဝ ၼႂ်းလုမ်ႈၾႃႉ။

ၼႂ်းလိူၼ်ၵျုၼ်ႊပူၼ်ႉမႃးၼႆႉ ဢမေႊရိၵၼ်ႊ တင်း ဢီႊရၼ်ႊ လႆႈၶေႃႈတူၵ်းလူင်း ၵိုတ်းတိုၵ်းၵၼ်သေ တႃႉ ထိုင်မႃးၼႂ်းလိူၼ်ၵျူႊလၢႆႊၼၼ်ႉ ဢမေႊရိၵၼ်ႊ သိုပ်ႇပိၵ်ႉဢိုတ်းႁိူဝ်း ဢီႊရၼ်ႊ ၼႂ်းဢၢဝ်ႇပၢင်ႇ လၢႆႇပႃႊသျႅၼ်းလႄႈ ဢီႊရၼ်ႊ ၸင်ႇမၢပ်ႇမႂ်ဢမေႊရိၵၼ်ႊဝႃႈ ပူၼ်ႉပႅၼ်ၶေႃႈတူၵ်းလူင်းၵိုတ်းတိုၵ်း ၵၼ် ၼႆယဝ်ႉ။

ၾၢႆႇၼိုင်ႈၵေႃႈ ၼႂ်းသဵၼ်ႈတၢင်းၼမ်ႉႁေႃႊမူၵ်ႉသ် တင်း ပၢင်ႇလၢႆႇလႅင်ၸိူဝ်းၼႆႉ တိုၵ်ႉမီးလွင်ႈပိုတ်း ယိုဝ်းတိုၵ်းတေႃးၵၼ်ဝႆႉယူႇလႄႈ ႁဵတ်းႁႂ်ႈလွင်ႈမႆႈၸႂ်ၼိူဝ် လွၵ်းၵၢတ်ႇႁႅင်းထၢတ်ႈလုမ်ႈၾႃႉ လႄႈ ၵၢၼ်တေႃႉသူင်ႇၼမ်ႉမၼ်းမဵၼ် ၼမ်ၶိုၼ်ႈမႃး ၼႆယဝ်ႉ။