ၾူၼ်တူၵ်းႁၢဝ်ႈႁႅင်း ထပ်းၵၼ်သွင်သၢမ်ဝၼ်းၼႂ်းမိူင်းတႆးပွတ်းၸၢၼ်း ႁဵတ်းႁႂ်ႈၼမ်ႉႁူၺ်ႈၼမ်ႉလွႆ လုပ်ႇၼွင်းထူမ်ႈႁိူၼ်းယေးၵူၼ်းမိူင်း တီႈၸႄႈဝဵင်းၵၢတ်ႇလေႃႉ၊ ၸႄႈဝဵင်းႁူဝ်ပူင်း ၸိူဝ်းတူၵ်းယူႇၸွမ်း ဢွင်ႈတီႈၶူင်ႈႁႅင်းၼၼ်ႉ ဝႃႈၼႆ။
တႄႇဝၼ်းတီႈ 9 လိူၼ်ဢေႃးၵၢတ်ႉ ၾူၼ်တူၵ်းႁၢဝ်ႈႁႅင်းသေ ၼမ်ႉၼႂ်းၵႄး လႄႈ ၼမ်ႉႁူၺ်ႈၼမ်ႉလွႆ ၵိုင်ႉၵၢင်ႉ လုပ်ႇၼွင်းလူင်းမႃးႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းဢမ်ႇတၼ်းၾၢင်ႉသေ ႁူပ်ႉတၢင်းယၢပ်ႇ လႆႈၶၢႆႉၶူဝ်းၶွင်ႁိူၼ်းယေးၵႂႃႇယူႇဝႆႉ ၼႂ်းဢွင်ႈတီႈလွတ်ႈၽေး ၼႆယဝ်ႉ။
ၵူၼ်းမိူင်းၵေႃႉယူႇၼႂ်းႁူဝ်ပူင်းၵေႃႉၼိုင်ႈ လၢတ်ႈဝႃႈ “ၼမ်ႉၵိုင်ႉၵၢင်ႉလေႃႇၶဝ်ႈထူမ်ႈၼႂ်းပွၵ်ႉၸိူဝ်းဢၼ်တႅမ်ႇၼၼ်ႉမႃး။ မၢင်ၸိူဝ်းၵေႃႈ တၼ်းၶၢႆႉၶူဝ်း။ မၢင်ၸိူဝ်းၵေႃႈ ဢမ်ႇပႆႇတၼ်းၶၢႆႉ ၶူဝ်း” ဝႃႈၼႆ။
လႆႈႁူႉဝႃႈ ယွၼ်ႉၵႄးၼမ်ႉတီႈၵၢတ်ႇလေႃႉ ၵိုင်ႉၵၢင်ႉၼွင်းၶိုၼ်ႈလူၼ်ႉၾင်ႇလႄႈ ၼမ်ႉလုပ်ႇၶဝ်ႈၼႂ်းပွၵ်ႉ 2၊ ပွၵ်ႉ 3၊ ပွၵ်ႉ 4 ၼႆသေတႃႉ သင်တႅၵ်ႈၵၼ်တင်း မိူဝ်ႈပီပူၼ်ႉမႃးၸိုင် တိုၵ်ႉ ၶႅၼ်းယူႇ။ ၵွပ်ႈဝႃႈ ယၢမ်းလဵဝ် ပႆႇပႃး ၼမ်ႉႁူၺ်ႈၼမ်ႉလွႆၼွင်းမႃးပႃး ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ