မိူဝ်ႈဝႃးဝၼ်းတီႈ 10 လိူၼ်ဢေႃးၵၢတ်ႉသ် တူၵ်းမႅၼ်ႈဝၼ်းၽူႈႁတ်းႁၢၼ်ၸၢဝ်းၶိူဝ်းၶၢင် ၶွပ်ႈတဵမ် 51 ပီတဵမ် ႁူဝ်ပဝ်ႈ ၸုမ်းလွတ်ႈလႅဝ်းသဝ်းၶေႃၶၢင် KIO ၸွမ်သိုၵ်းလူင် ဢႅၼ်ႊပၢၼ်ႊလႃႉ ဢွၵ်ႇမႃးမွၵ်ႇလၢတ်ႈၵႂႃႇဝႃႈ တေသိုပ်ႇယူႇၵႂႃႇတႂ်ႈႁူမ်ႈငဝ်း ၸုမ်း SCEF သေ ႁဵတ်းၵၢၼ်မိူင်း ၵၢၼ်သိုၵ်းၵႂႃႇ ဢမ်ႇၵိုတ်းဢမ်ႇလိုဝ်ႈ ႁႂ်ႈပေႃးလႆႈ ၸွမ်းၼင်ႇတၢင်းယိူင်းဢၢၼ်းဢၼ်မီးဝႆႉ တႃႇၵေႃႇသၢင်ႈ မိူင်းႁူမ်ႈတုမ် ဢၼ်ၸႂ်ႉလၢႆးတၢင်း ၾႅတ်ႇတရႄႇတီႊမူဝ်ႊၶရေႇၸီႇ မီးသုၼ်ႇလႆႈတႅပ်းတတ်းႁင်းၶေႃ လႄႈ ပွင်သၢင်ႈၵၢမ်ႇၵျမႃႇၸၢဝ်းၶိူဝ်း တင်းသဵင်ႈ ႁင်းၶေႃ ၼႆယဝ်ႉ။
ၼႂ်းပၢင်ၶွပ်ႈၶူပ်ႇတဵမ် 51 ပီ ဝၼ်းၽူႈႁတ်းႁၢၼ် ၸၢဝ်းၶိူဝ်းၶၢင်ၼၼ်ႉ မီးၽူႈၶဝ်ႈၸုမ်း ၶွင်ႇသီႇဢွၼ်ၼမ်းႁဵတ်းသၢင်ႈၽေႃႇၼမ်ႉၼႄတူဝ် မိူင်းႁူမ်ႈတုမ် ၾႅတ်ႊတရႄႇတီႇမူဝ်ႊၶရေႇ ၸီႇ SCEF ၊ ၽူႈမီးပုၼ်ႈၽွၼ်းၼႂ်း ၸုမ်းCRPH ၊ ၽွင်းလူင်မိူင်းႁူမ်ႈတုမ် တီႈငဝ်ႈငုၼ်းလုမ်းၽွင်း လူင်မိူင်းႁူမ်ႈတုမ် ၼႂ်းလူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ ၊ တွၵ်ႊတိူဝ်ႊၸေႃႇဝေႇ ၸူဝ်း ၽူႈဢုပ်ႇဢူဝ်းငူပ်ႉငီႉ ၼႂ်းၸုမ်း SCEF လႄႈ ၽူႈမီးပုၼ်ႈၽွၼ်း ၼႂ်းၸုမ်းလူင်ပွင်ၸိုင်ႈၸူဝ်ႈၶၢဝ်းမိူင်းႁူမ်ႈတုမ် NUG ၶဝ် ၶဝ်ႈႁူမ်ႈပႃးၸွမ်း ၼႂ်း ဢွၼ်ႊလၢႆႊၵႂႃႇ။
ၼင်ႇႁိုဝ် တေႁူမ်ႈမိုဝ်းၵၼ်ၵႂႃႇတင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၊ ၸုမ်းလူင်ပွင်ၸိုင်ႈၵူၼ်းမိူင်းၸူဝ်ႈၶၢဝ်း NUG လႄႈ CRPH ၸိူဝ်းၼႆႉ ၼိူဝ်ၽိူၼ်ၵၢၼ်မိူင်းသေ သိုပ်ႇယၢင်ႈပႆၵႂႃႇ ၸွမ်းၵၼ်လႆႈႁႂ်ႈၶိုၵ်ႉၶႅမ်ႉၼၼ်ႉၵေႃႈ တေသိုပ်ႇႁဵတ်းသၢင်ႈၵႂႃႇၼႆ ၸွမ်သိုၵ်းလူင် ဢႅၼ်ႊပၢၼ်ႊလႃႉ လၢတ်ႈ။
လိူဝ်ၼၼ်ႉ ယင်းပၼ်ၾၢင်ႉတူၵ်ႇတၵ်ႉပႃးတီႈ လူင်ပွင်ၸိုင်ႈၼေႇပျီႇတေႃႇ ဢၼ်သိုၵ်းမၢၼ်ႈယိုတ်းမိူင်းၵုမ်း ၵမ်ၼၼ်ႉဝႃႈ ၶႂ်ႈႁႂ်ႈၵႄႈလိတ်ႈပၼ်ႁႃၵၢၼ်မိူင်း လူၺ်ႈလၢႆးတၢင်းၼိူဝ် ၽိူၼ်ၵၢၼ်မိူင်း၊ ႁႂ်ႈၶိုၼ်းထတ်းသၢင် ပၼ် တၢင်းႁဵတ်းသၢင်ႈ ဢၼ်ၵူၼ်းမိူင်းဢမ်ႇယွမ်းႁပ်ႉလႆႈၼၼ်ႉသေ ၶတ်းၸႂ်မူၼ်ႉမႄးၵႂႃႇ ယႃႇႁႂ်ႈတူၵ်း လိုၼ်းၶၢဝ်းယၢမ်း၊ ၶႂ်ႈႁႂ်ႈငိူင်ႉဝႄႈၵၢၼ်တီႈဢဝ်ၵူၼ်းမိူင်း ႁဵတ်းပဵၼ်ပဝ်ႉမၢႆ ႁဵတ်းတူဝ်ယိူဝ်ႇသေ ၶႂ်ႈႁႂ်ႈဝႆႉၼမ်ႉၼၵ်း သၢႆၸႂ်ၵူၼ်းမိူင်းပဵၼ်ပိူင်ယႂ်ႇ၊ ႁဵတ်းသၢင်ႈၵႂႃႇၸွမ်းၼင်ႇ ပိူင်တိုဝ်းၵမ်သိုၵ်းလီလီ ဝႃႈၼႆ။
ၶွင်ႇသီႇဢွၼ်ၼမ်းႁဵတ်းသၢင်ႈၽေႃႇၼမ်ႉၼႄတူဝ် မိူင်းႁူမ်ႈတုမ် ၾႅတ်ႊတရႄႇတီႇမူဝ်ႊၶရေႇၸီႇ SCEF ၼၼ်ႉ ယိူင်းၸူးတႃႇၵေႃႇသၢင်ႈမိူင်းႁူမ်ႈတုမ် ဢၼ်ပႆၸွမ်းသဵၼ်ႈတၢင်း ၾႅတ်ႇတရႄႇတီႇမူဝ်ႊၶရေႇၸီႇ လႄႈ ႁႂ်ႈပဵၼ်ၶူဝ်ၵၢႆႇတႃႇ ၸုမ်းယိပ်းၵွင်ႈၵၢင်ႇၸိူဝ်းႁဵတ်းၵၢၼ်လုၵ်ႉၽိုၼ်ႉၶဝ် မႃးဢုပ်ႇဢူဝ်းၶဝ်ႈႁႃၵၼ်လႆႈၼႆသေ ၶွတ်ႇၽွတ်ႈဝႆႉမိူဝ်ႈဝၼ်းတီႈ 30 လိူၼ်မၢတ်ႉသ် ပီ 2026 ၼႆႉ။
ၼႂ်းလုၵ်ႈၸုမ်း SCEF ၼႆႉ ပႃးဝႆၸုမ်းယိပ်းၵွင်ႈၵၢင်ႇၸၢဝ်းၶိူဝ်း ယၢင်းၽိူၵ်ႇ KNU၊ ၸုမ်းသိုၵ်းၶၢင် KIO၊ ပႃႇတီႇၸိူဝ်ႉၸၢတ်ႈယၢင်းလႅင် KNPP လႄႈ တပ်ႉသိုၵ်းၸိူဝ်ႉၸၢတ်ႈၶျၢင်း CNF လႄႈ ၸုမ်းလူင်ပွင်ၸိုင်ႈၵူၼ်းမိူင်းၸူဝ်ႈၶၢဝ်း NUG လႄႈ CRPH ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ