ပလိၵ်ႈမၢၼ်ႈ ထၢႆႇႁၢင်ႈၵူၼ်းလၵ်ႉသေ ပူၵ်းတင်ႈပၢႆႉ ၼႄၵူၼ်းမိူင်းဝႃႈ တီႉၺွပ်းလႆႈၵူၼ်းလၵ်ႉၼမ် တီႈၵဵင်းတုင် ။

ၼႂ်းလိူၼ်ၵျူႊလၢႆႊၼႆႉ ပလိၵ်ႈမၢၼ်ႈ တင်ႈၸႂ် ႁဵတ်းပၢႆႉဢၼ်ပႃးၶႅပ်းႁၢင်ႈၵူၼ်းလၵ်ႉလၢႆၵေႃႉ ပူၵ်းဝႆႉတီႈၼႃႈၵၢတ်ႇလူင်ၵဵင်းတုင် ၼႄဝႃႈ တီႉၺွပ်းလႆႈ ၵူၼ်းလၵ်ႉၼမ် ၊ ၵူၺ်းၵႃႈ ၵူၼ်းလၵ်ႉတိုၵ်ႉလိူင်ႇၼမ်ယူႇ ဝႃႈၼႆ။

ၼၢင်းယိင်းၵူၼ်းၵဵင်းတုင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ဝႃႈ တီႉၺွပ်းလႆႈ ၵူၼ်းလၵ်ႉၼမ်ၼႃႇၼႆဝႃႈ ။ ၵူၼ်းလၵ်ႉၵေႃႈတိုၵ်ႉလိူင်ႇယူႇ ။ ၶဝ်မႃးတင်ႈပၢႆႉဝႆႉၼႄဝႃႈ ၶဝ်ၺွပ်းလႆႈၵူၼ်းလၵ်ႉၼႆၼၼ်ႉၵေႃႈ လႅပ်ႈပဵၼ်ႁၢင်ႈ ၸဵမ်မိူဝ်ႈလႂ်ဢမ်ႇႁူႉ။ ဢၼ်ၵဝ်ႇဢၼ်မႂ်ႇၽႂ်တေႁူႉၼေႃႈ ။ ၸူဝ်ႈၶဝ်ဝႃႈ ၵႂၢတ်ႇလၢင်ႉၵူၼ်းလၵ်ႉၼႆမႃး ဢမ်ႇႁၼ်ၶဝ်လူင်းပိုၼ်ႉတီႈႁဵတ်းသင်ပၼ်တေႉတေႉ ” – ဝႃႈၼႆ။

ၸဵမ်မိူဝ်ႈႁူဝ် ပီ 2026 ၼၼ်ႉမႃး ၾၢႆႇပလိၵ်ႈမၢၼ်ႈ ယၢမ်ႈလၢတ်ႈၵူၼ်းပိုၼ်ႉတီႈဝႃႈ တေပႂ်ႉတူၺ်း ၸုမ်းၵူၼ်းလၵ်ႉ ၵူၼ်းၸူၼ် ၸွမ်းႁိူၼ်းၸွမ်းယေးလႄႈ ၸိူဝ်းလၵ်ႉရူတ်ႉၶိူင်ႈၸိူဝ်းၼႆႉ ။ ဝႃႈၼႆသေတႃႉ ဢမ်ႇႁၼ် တူင်ႉၼိုင်သင် တႄႉတႄႉလႄႈ ၵူၼ်းဝၢၼ်ႈၵူၼ်းမိူင်း ဢွၼ်ၵၼ်ၸီႉၸမ်ႈဝႃႈ ဢမ်ႇႁဵတ်းၸွမ်းၼင်ႇၵႂၢမ်ႈလၢတ်ႈ ။ ဝၢႆးၼၼ်ႉ ပလိၵ်ႈမၢၼ်ႈ ၸင်ႇဢဝ်ပၢႆႉႁၢင်ႈၵူၼ်းလၵ်ႉၸိူဝ်းၼႆႉ မႃးပူၵ်းၼႄ  ဝႃႈၼႆ။

ၼႂ်းပၢႆႉ ဢၼ်ပလိၵ်ႈမၢၼ်ႈမႃးပူၵ်းတင်ႈၼႆႉ မီးႁၢင်ႈ ၵူၼ်းဢၼ်ၶဝ်မၵ်းမၼ်ႈဝႃႈ ပဵၼ်ၽူႈလၵ်ႉ 10 ပၢႆ ၼႂ်းၼၼ်ႉ ပႃးႁၢင်ႈၼၢင်းယိင်းၵေႃႉၼိုင်ႈ  လႄႈ ရူတ်ႉၶိူင်ႈ 13 လမ်း ။ ႁၢင်ႈၵူၼ်းလၵ်ႉမၢင်ၵေႃႉ ထၢႆႇဢွၵ်ႇပဵၼ် 2 ၶႅပ်း ၵေႃႈမီး ။ တင်ႈၸႂ်ႁဵတ်းၼႄပိူင်ၾၢင်ဝႃႈ တီႉၺွပ်းၵူၼ်းလၵ်ႉၼမ်ၼႆၵူၺ်း ၊ ပိူင်ပဵၼ်တေႉ ဢမ်ႇႁၼ်ပိူင်ႈသင်မႃး ၵူၼ်းပိုၼ်ႉတီႈ သိုပ်ႇလၢတ်ႈၼင်ႇၼႆ။

ႁၢင်ႈၵူၼ်းလၵ်ႉဢၼ် ပလိၵ်ႈမၢၼ်ႈမႃး တင်ႈပၢႆႉဝႆႉၼၼ်ႉ ၵမ်ႈၼမ် ၶဝ်တႅမ်ႈဝႆႉ ပဵၼ်ၵူၼ်းၵဵင်းတုင် ၊ မၢင်ၸိူဝ်း ပဵၼ်ၵူၼ်းပွတ်းတၢင်းမိူင်းတႆးပွတ်းၸၢၼ်း မိူၼ်ၼင်ႇ ယွင်ႁူၺ်ႈ တူၼ်ႈတီးၸိူဝ်းၼႆႉ ။

ၵူၼ်းလၵ်ႉရူတ်ႉၶိူင်ႈၼႆႉ ဢမ်ႇၵွမ်ႉ မီးပွတ်းတၢင်းၵဵင်းတုင်ၵူၺ်း ပွတ်းဢွၵ်ႇၶူင်းၼႆႉ ၶႂ်ႈမီးၸွတ်ႇၵူႈတီႈ ပႃးၸဵမ် တႃႈၶီႈလဵၵ်း မိူင်းၽျၢၵ်ႈ မိူင်းသၢတ်ႇ  မိူင်းယွင်း ၸိူဝ်းၼႆႉ ။ ဝၼ်းတီႈ 31/7/2026 ၼႆႉ ၼႂ်လဵဝ်ၵူၺ်း   မီးၵူၼ်းလၵ်ႉရူတ်ႉၶိူင်ႈၵူၼ်းမိူင်းသၢတ်ႇ သႅၼ်း Wave 2 လမ်းလူးၵွၼ်ႇ ဝႃႈၼႆ ။