ၼႂ်းလိူၼ်ဢေႃးၵၢတ်ႉသ် ဝူင်ႈတီႈၼိုင်ႈၼႆႉ ၾူၼ်တူၵ်းႁၢဝ်ႈႁႅင်းပတ်းပိုၼ်ႉၸိုင်ႈမိူင်း ႁဵတ်းႁႂ်ႈလိၼ်ၵူၼ်ႇ၊ ၼမ်ႉလုပ်ႇၼွင်းထူမ်ႈႁိူၼ်းယေးၵူၼ်းမိူင်းတႆး ထိုင်တိူၵ်ႇႁႆႈလွၵ်းၼႃး လႄႈ ႁိူၼ်းယေး ဢိၵ်ႇပႃးသဵၼ်ႈတၢင်းလူႉၵွႆၵႂႃႇႁၢဝ်ႈႁႅင်း။
ဝၼ်းတီႈ 5 ထိုင် ဝၼ်းတီႈ 9 လိူၼ်ဢေႃးၵၢတ်ႉသ်ၼႆႉ လိၼ်ႇၵူၼ်ႇၼႂ်းပွၵ်ႉဢၼ်မီးၵူၼ်းမိူင်းယူႇသဝ်းဝႆႉၼၼ်ႉ ၵမ်ႈၼမ်ပဵၼ်တၢင်း ၾၢႆႇတၢင်းဢွၵ်ႇဝဵင်းမိူင်းၵုတ်ႈ ဝူင်ႈလဵဝ်ၵူၺ်း လိၼ်ၵူၼ်ႇဢမ်ႇယွမ်း 15 ပွၵ်ႈ လႄႈ ႁဵတ်းႁႂ်ႈၵူၼ်းမိူင်းတိူဝ်ႉမၢတ်ႇၸဵပ်းၵႂႃႇၵေႃႉၼိုင်ႈသေ ႁိူၼ်းယေးလူႉၵွႆၵႂႃႇ 40 လင်ပၢႆ ၼႆယဝ်ႉ။
သဵၼ်ႈတၢင်း ဢၼ်ၵပ်းသိုပ်ႇသၢၼ်ၵၼ်ဝႆႉ ပွတ်းဢွၵ်ႇ မိူင်းၵုတ်ႈ လႄႈ ပွတ်းတူၵ်းမိူင်းၵုတ်ႈၼၼ်ႉၵေႃႈ လူႉၵွႆ တႅၵ်ႇဢႃႈၵႂႃႇယွၼ်ႉလိၼ် ၾင်ႇႁိုၵ်း ၵူၼ်ႇၵူၺ်းဢမ်ႇၵႃး ၸွမ်းပိုၼ်ႉတီႈ တၢင်းၶိုၼ်ႈၽြႃးၽွင်ႇတေႃႇဢူးၸိူဝ်းၼၼ်ႉၵေႃႈ လူႉၵွႆၵႂႃႇၸွမ်း ၼႆယဝ်ႉ။
ၵူၼ်းမိူင်းၵုတ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ပီၼႆႉ ၾူၼ်တူၵ်းႁႄ လိၼ်ၵူၼ်ႇၼမ်ႁႅင်းလိူဝ်ၵူႈပီ။ ၸွမ်းၼင်ႇဢၼ်ပီႈႁူႉၼႆႉ ၼႂ်းဝဵင်းၵူၺ်းၵွၼ်ႇ လိၼ်ၵူၼ်ႇတဵင်ၺႃးႁိူၼ်းႁႄ ႁိူၼ်းၵွႆၵႂႃႇ မွၵ်ႈ 20 လင်ပၢႆယဝ်ႉ။ ၼႆႉပႆႇပႃးတၢင်းပွတ်းတူၵ်းမိူင်းၵုတ်ႈ တင်း ၼိူဝ်လွႆၸိူဝ်းၼၼ်ႉ” ဝႃႈၼႆ။
လႆႈႁူႉဝႃႈ လိၼ်ၵူၼ်ႇၵႂႃႇ ဢေႇသုတ်း မွၵ်ႈ 15 ထိုင် 20 ပွၵ်ႈသေ လိၼ်ၵူၼ်ႇလူင်းတဵင်သႂ်ႇၺႃးႁိူၼ်း၊ ၸွမ်းၼႂ်းဝၢင်းႁိူၼ်း ႁိုဝ် ပိုၼ်ႉႁိူၼ်းလိၼ်တႅၵ်ႇၵႂႃႇၸိူဝ်းၼႆႉၵေႃႈမီး။ ၸွမ်းပွတ်း ဢွၵ်ႇမိူင်းၵုတ်ႈၼႆႉၵေႃႈ ၾူၼ်တူၵ်းႁၢဝ်ႈႁႅင်းသေ ႁဵတ်းႁႂ်ႈၼမ်ႉၼွင်းလူၼ်ႉၾင်ႇ လုပ်ႇဢဝ်ၶူဝ်ၵွႆၵႂႃႇ လင်ၼိုင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ