ပလိၵ်ႈလႄႈသိုၵ်းမၢၼ်ႈႁူမ်ႈၵၼ်တီႉၼေၸုမ်းၵျႃႊၽျႅၼ်ႉတီႈဝဵင်းလၢႆးၶႃႈ ၵူၼ်းမိူင်းဝႃႈ ၶႂ်ႈႁႂ်ႈတင်ႈၸႂ်တီႉ ၸုမ်းၵျႃႊၽျႅၼ်ႉ ၸိူဝ်းၵိုတ်းယူႇၼၼ်ႉတင်းမူတ်းဝႃႈၼႆ။
မိူဝ်ႈဝႃးဝၼ်းတီႈ 10/08/2026 ၸဝ်ႈၼႃႈတီႈပလိၵ်ႈ လႄႈ သိုၵ်းမၢၼ်ႈယိုတ်းမိူင်း ႁူမ်ႈၵၼ် ၵႂႃႇတီႉၸုမ်းၵျႃႊၽျႅၼ်ႉ ဢၼ်မီးတီႈႁိမ်းဝၢၼ်ႈၸီးၸေႃႉ ၸႄႈဝဵင်းလၢႆးၶႃႈ တီႉလႆႈၵူၼ်းမိူင်း ၶႄႇ 34 ၵေႃႉ တႃႇၶိုင်ႈၼိုင်ႈၼႆႉပဵၼ်ၵူၼ်းဢမ်ႇမီးဝတ်းဝႂ်မၢႆၾၢင်သင်သေလၵ်ႉလွမ်ယူႇသဝ်းႁဵတ်းၵၢၼ်ဝႆႉဝႃႈၼႆ။
ဢွင်ႈတီႈၵူၼ်းမိူင်းၶႄႇ မႃးႁဵတ်းၵၢၼ်ၵျႃႊၽျႅၼ်ႉယူႇၼႆႉ မီးၸဵင်ႇၸၢၼ်းဝၼ်းဢွၵ်ႇ ဝၢၼ်ႈၸီးၸေႃႉ ႁၢင်ႇၵႆၵၼ်မွၵ်ႈ 2500 မီႊတိူဝ်ႊ ။
ၼႂ်းႁူင်းၵၢၼ်ၵျႃႊၽျႅၼ်ႉၶဝ်ၼၼ်ႉ သိုၵ်းမၢၼ်ႈယိုတ်းမိူင်း ၵႂႃႇတီႉၺွပ်းဢဝ်လႆႈပႃး ၶိူင်ႈၵမ်ႉၵႅမ် ၼႂ်းၵၢၼ်လွၵ်ႇလႅၼ်ၵိၼ်ငိုၼ်း တင်းဢွၼ်ႊလၢႆးၼႆႉ ပႃးၶွမ်ႊပိဝ်ႊတိူဝ်း Laptop 25 လုၵ်ႈ၊ သတႃႊလိင်ႉ 10 ၵူႈ၊ Power Station -6 လုၵ်ႈ၊ ၶိူင်ႈဝၢႆႊၾၢႆႊ Wi-Fi U6 Pro – 6 ဢၼ် ၊ ၶိူင်ႈၸၢၵ်ႈၾႆး 2 လုၵ်ႈ လႄႈ သုမ်ႉသွင်း ဢၼ်တင်ႈဝႆႉတႃႇၵူၼ်းႁဵတ်းၵၢၼ်ယူႇသဝ်း ၸဵမ်ၸိူဝ်းၼႆႉ ဝႃႈၼႆ။
ၶႄႇၸိူဝ်းၺႃးတီႉဝႆႉၼၼ်ႉ ယၢမ်းလဵဝ် ၾၢႆႇပလိၵ်ႈ တင်း သိုၵ်းမၢၼ်ႈၶဝ် တီႉၺွပ်းဝႆႉသေ ဝႃႈတေၵူတ်ႇထတ်းပၼ်တူတ်ႈတၢမ်ႇၵႂႃႇဝႃႈၼႆသေတႃႉ – တေသိုပ်ႇဢဝ်လိူင်ႈၸိူင်ႉႁိုဝ်ၼႆတႄႉ ဢမ်ႇပိုၼ်ၽၢဝ်ႇပႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ