သိုၵ်းယၢင်းၽိူၵ်ႇ DKBA ဢွၵ်ႇၶေႃႈပူင် ၸီႉသင်ႇႁႂ်ႈၵူၼ်းႁဵတ်းၵၢၼ်ၵျႃႊၽျႅၼ်ႉ လႄႈ ႁူင်းၵၢၼ်ၵျႃႊၽျႅၼ်ႉ ၸိူဝ်းမီးယူႇၼႂ်းဝၢၼ်ႈၵျွၵ်ႉၶတ်ႉ ၾၢႆႇၸၢၼ်းဝဵင်းမျႃႉဝတီႇၼၼ်ႉ ဢွၵ်ႇၼႂ်း ပိုၼ်ႉတီႈၵႂႃႇတင်းသဵင်ႈ ႁႂ်ႈယဝ်ႉတူဝ်ႈ ႁၢင်လိူၼ်ၵျူႊလၢႆႊၼႆႉ ဝႃႈၼႆ။

ၽွင်းလူင်ပွင်ၸိုင်ႈမိူင်းဢမေႊရိၵၼ်ႊ ပၼ်ငိုၼ်းသူး ၵူၼ်းၸိူဝ်းပၼ်ၶၢဝ်ႇ လွင်ႈႁူင်းၵၢၼ်ၵျႃႊၽျႅၼ်ႉ 10 လၢၼ်ႉတေႃႊလႃႊယူႇၼၼ်ႉ ၾၢႆႇၸုမ်းသိုၵ်းယၢင်းၽိူၵ်ႇ DKBA ၵေႃႈ ဢွၵ်ႇ ၶေႃႈၸီႉသင်ႇ ႁႂ်ႈၸုမ်းၵျႃႊၽျႅၼ်ႉ ၶၢႆႉဢွၵ်ႇၼႂ်းၼႃႈတီႈၶဝ်ၵုမ်းၵမ် ႁႂ်ႈယဝ်ႉတူဝ်ႈ ၼႂ်းၶၢဝ်းတၢင်း 10 ဝၼ်း ၼႆယဝ်ႉ။

ယၢမ်းလဵဝ် သိုၵ်းမၢၼ်ႈယိုတ်းမိူင်းၼႆ ၶတ်းၸႂ်ယႃႉၵူၼ်ႇပႅတ်ႈ ႁူင်းၵေႃႇၵၢႆႇ ဢွင်ႈတီႈယူႇ ၵူၼ်းႁဵတ်းၵၢၼ်ၵျႃႊၽျႅၼ်ႉ လႄႈ ႁူင်းၵၢၼ်ၵျႃႊၽျႅၼ်ႉ တီႈသူၺ်ႇၵူၵ်ႉၵူဝ်ႇ (ဝဵင်းမႂ်ႇ) ၾၢႆႇႁွင်ႇ ဝဵင်းမျႃႉဝတီႇ ၼႃႈတီႈတပ်ႉပႂ်ႉလႅၼ်လိၼ်ယၢင်းၽိူၵ်ႇ BGF ၵုမ်းၵမ်ဝႆႉၼၼ်ႉယူႇ ၶိူဝ်းၶိူဝ်းယႆးယႆး။

ၾၢႆႇၸုမ်းသိုၵ်းယၢင်းၽိူၵ်ႇ ဢွၵ်ႇၶေႃႈပူင် ႁႂ်ႈႁူင်းၵၢၼ်ၵျႃႊၽျႅၼ်ႉ တီႈဝၢၼ်ႈၵျွၵ်ႉၶတ်ႉၼႆႉ ဢွၼ်ၵၼ်ၶၢႆႉဢွၵ်ႇ ဝႃႈၼႆသေတႃႉ ၼႂ်းပိုၼ်ႉတီႈတေႉတေႉတႄႉ တိုၵ်ႉလႆႈႁၼ် သၢင်ႈႁူင်း ၵေႃႇၵၢႆႇမႂ်ႇမႂ်ႇထႅင်ႈတင်းၼမ်ယူႇၼႆ ၵူၼ်းၵေႃႉၵႆႉလႆႈၶဝ်ႈဢွၵ်ႇၵႂႃႇမႃး တၢင်းဝၢၼ်ႈၵျွၵ်ႉၶတ်ႉ လၢတ်ႈၼင်ႇၼႆ။

ၵဵဝ်ႇလူၺ်ႈလွင်ႈၼႆႉသေ ၸဝ်ႈၼႃႈတီႈၽူႈမီးပုၼ်ႈၽွၼ်း ၼႂ်းၸုမ်းသိုၵ်းယၢင်းၽိူၵ်ႇ DKBA တႄႉ တွပ်ႇလၢတ်ႈတီႈႁွင်ႈၵၢၼ်သိုဝ်ႇၶၢဝ်ႇ BBC ဝႆႉဝႃႈ – တၢင်းဝၢၼ်ႈၵျွၵ်ႉၶတ်ႉၼႆႉ ဢမ်ႇမီးၵၢၼ်သၢင်ႈတိုၵ်း ႁူင်းၵေႃႇၵၢႆႇသင်မႂ်ႇမႂ်ႇ – ၼႆယဝ်ႉ။

တႃႇတီႉၺွပ်းဢဝ်တၢင်းၽိတ်း ႁူင်းၵၢၼ်ၵျႃႊၽျႅၼ်ႉ တၢႆႊၶျၢၼ်ႊ (Tai Chang) ဢၼ်မီးတီႈဝၢၼ်ႈၵျွၵ်ႉၶတ်ႉ ၾၢႆႇၸၢၼ်းဝဵင်းမျႃႉဝတီႇၼၼ်ႉ ႁွင်ႈၵၢၼ်ၽွင်းလူင်ၼွၵ်ႈမိူင်း မိူင်းဢမေႊရိၵၼ်ႊ လႆႈပၼ်ငိုၼ်းသူး ၵူၼ်း/ၸုမ်းၸိူဝ်းတေႁႃပၼ်ၶေႃႈမုၼ်းၶဝ်လႆႈၼၼ်ႉ 10 လၢၼ်ႉတေႃႊလႃႊ ၼႆ ပိုၼ်ၽၢဝ်ႇဝႆႉၼင်ႇၼႆ။

ၼင်ႇႁိုဝ် တေၵႂၢတ်ႇလၢင်ႉၽဵဝ်ႈမူၺ်ႉလႆႈ ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ (ၵျႃႊၽျႅၼ်ႉ) ၸွမ်းလႅၼ်လိၼ် မိူင်းမၢၼ်ႈ လႄႈ မိူင်းၵမ်ႊပူႊၶျႃႊ ၼၼ်ႉ ၽူႈၼမ်းၾၢႆႇၸွပ်ႇ ၶၢဝ်ႇမိူင်းဢမေႊရိၵၼ်ႊ FBI တင်း ၸွမ်ၽွင်းလူင် မိူင်းထႆး ဢၼုထိၼ်ႊၶျၢၼ်ႊဝီႊရၵုၼ်ႊၶဝ် လႆႈႁူပ်ႉထူပ်း ဢုပ်ႇဢူဝ်းၵၼ် တီႈႁိူၼ်းႁေႃ လူင်ပွင်ၸိုင်ႈမိူင်းထႆး မိူဝ်ႈဝၼ်းတီႈ 21 လိူၼ်ၵျုၼ်ႊ (မိူဝ်ႈဝႃး)။

လႆႈႁူႉဝႃႈ ၸုမ်းၸွပ်ႇၶၢဝ်ႇမိူင်းဢမေႊရိၵၼ်ႊ လႆႈတူၵ်းလူင်းၸွမ်း လူင်ပွင်ၸိုင်ႈမိူင်းထႆး တေႁူမ်ႈၵၼ်ႁဵတ်း သၢင်ႈ ၽဵဝ်ႈမူၺ်ႉ ၵၢၼ်ၵျႃႊၽျႅၼ်ႉ ၸွမ်းလႅၼ်လိၼ်ၾင်ႇမိူင်းမၢၼ်ႈ- မိူင်းထႆးၵႂႃႇ ၼႆယဝ်ႉ။