မိူဝ်ႈဝႃးဝၼ်းတီႈ 27 လိူၼ်ဢေႃးၵၢတ်ႉသ် ၽူႈၼမ်းၼႂ်းလူင် ၶွင်ႇသီႇၵၢၼ်ႁူမ်ႇလူမ်ႈၸိူဝ်ႉၸၢတ်ႈမိူင်းထႆး Mr.Chatchai Bangchuad ၶဝ်ႈမိူဝ်းၼႂ်းမိူင်းမၢၼ်ႈ ႁူပ်ႉၸွမ်း ၸွမ်သိုၵ်းလူင် ယႄးဝိၼ်းဢူး ၸွမ်ၸိၵ်းသိုၵ်းမၢၼ်ႈယိုတ်းမိူင်းၵေႃႉမႂ်ႇသေ ဢုပ်ႇဢူဝ်းလွင်ႈ တႃႇၵုမ်းထိင်း တီႉၺွပ်း ၵၢၼ်လၵ်ႉတေႃႉသူင်ႇ လႄႈ ၵႃႉၶၢႆ ၶိူင်ႈၵွင်ႈၵၢင်ႇ၊ ယႃႈမဝ်းၵမ် ဢိၵ်ႇပႃး သၢၼ် ထၢတ်ႈၶေးမီး ၸိူဝ်းဢမ်ႇၶဝ်ႈတၢင်းၵၢၼ်ၼၼ်ႉ ။
ယင်းဢုပ်ႇဢူဝ်းပႃး လွင်ႈပၼ်ႁႃၸွမ်းလႅၼ်လိၼ် မိူင်းမၢၼ်ႈ-မိူင်းထႆး၊ ငဝ်းလၢႆး ၵၢၼ်ၽဵဝ်ႈမူၺ်ႉၸုမ်းၵျႃႊၽျႅၼ်ႉ၊ ၵူၼ်းၸိူဝ်းၺႃးတီႉၺွပ်ႉ ႁိုဝ် ၵူၼ်းႁဵတ်းၵၢၼ်ၵျႃႊၽျႅၼ်ႉယူႇ မွၵ်ႈ 99 % ၼႆႉ ပဵၼ်ၵူၼ်းၸိူဝ်းလၵ်ႉ ၶၢမ်ႈလႅၼ်လိၼ်သေ ၵႂႃႇႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ ၵူၺ်းလႄႈ တင်းသွင်မိူင်း ထုၵ်ႇလီၽိူမ်ႉထႅမ်ၸတ်းႁဵတ်း ၵၢၼ်ၵႂၢတ်ႇလၢင်ႉ ႁူမ်ႈၵၼ်ထႅင်ႈ ၼႆယဝ်ႉ။
မိူင်းမၢၼ်ႈ တင်း မိူင်းထႆး တူၵ်းလူင်းၵၼ်ၵႂႃႇထႅင်ႈ တႃႇလႅၵ်ႈလၢႆႈၶေႃႈမုလ်းၶၢဝ်ႇသၢၼ်ပၼ်ၵၼ် ႁႂ်ႈၶိုတ်းတၼ်းၵူၺ်းဢမ်ႇၵႃး တပ်ႉသိုၵ်းတင်းသွင်ၸိုင်ႈမိူင်းၵေႃႈ တေႁူမ်ႈၵၼ် ႁဵတ်းသၢင်ႈၼႃႈၵၢၼ်ၵႂႃႇ ႁႂ်ႈၶိုတ်းၸၼ်ႉလႄႈၶိုၼ်ႈယႂ်ႇလိူဝ်ၵဝ်ႇ ဝႃႈၼႆ။
ပူၼ်ႉမႃးမိူဝ်ႈပၢင်ၵုမ်လူင် ၵေႃႇမတီႇၽူႈၼမ်းၸၼ်ႉသုင်သုတ်း (HLC) ၵမ်းထူၼ်ႈ 9 ၼၼ်ႉၵေႃႈ မိူင်းမၢၼ်ႈ တင်း မိူင်းထႆး လႆႈဢုပ်ႇဢူဝ်းတူၵ်းလူင်းၵႂႃႇ တေႁူမ်ႈၵၼ်ၵႂၢတ်ႇလၢင်ႉ ၽဵဝ်ႈမူၺ်ႉၸုမ်းၵျႃႊၽျႅၼ်ႉ ႁႂ်ႈတိူဝ်းယမ်လိူဝ်ၵဝ်ႇ ၊ တေႁဵတ်းသၢင်ႈၸွမ်းပိုၼ်ႉတီႈလႅၼ်လိၼ်မိူင်းထႆး-မိူင်းမၢၼ်ႈ မီးလွင်ႈၵတ်းယဵၼ် ၼိမ်တဵင်ႈသေ ယုၵ်ႉမုၼ်းႁႂ်ႈပဵၼ်ပိုၼ်ႉတီႈၶိုၼ်ႈယႂ်ႇမႂ်ႇသုင်လိူဝ်ၵဝ်ႇ ၊ တေႁူမ်ႈၵၼ်ၸတ်းၵၢၼ် လွင်ႈပၼ်ႁႃ သိင်ႇဝႅတ်ႉလွမ်ႉ လႄႈ ၵၢၼ်ၸွႆႈထႅမ်တူင်ႇဝူင်းၵူၼ်းၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ