မိူဝ်ႈဝႃးဝၼ်းတီႈ 19 လိူၼ်ဢေႃးၵၢတ်ႉသ် ၸွမ်သိုၵ်းလူင်ယႄးဝိၼ်းဢူး ၸွမ်ၸိၵ်းသိုၵ်းမၢၼ်ႈ ၵေႃႉမႂ်ႇ ဢၼ်မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ယုၵ်ႉတၢင်ႇၸၼ်ႉဝႆႉၼၼ်ႉ ႁွတ်ႈ ထိုင်မိူင်းထႆးသေ ႁူပ်ႉထူပ်းၸွမ်း ၸွမ်သိုၵ်း ဢၻုၼ်ႊ ပုၼ်ႊထမ်ႊၵျရိူၼ်ႊ ၽွင်းလူင်ႁွင်ႈၵၢၼ်ၾၢႆႇၵႅတ်ႇၶႄမိူင်းထႆး တင်းသွင်ၾၢႆႇ ဢုပ်ႇဢူဝ်းၵၼ်ၵႂႃႇ လွင်ႈငမ်းယဵၼ် ၵၢၼ်ၼိမ်တဵင်ႈ ၸွမ်းလႅၼ်လိၼ် လႄႈ လွင်ႈတေႁူမ်ႈၵၼ်ႁဵတ်းသၢင်ႈ ၽဵဝ်ႈမူၺ်ႉ ၵၢၼ်တေႃႉၶိူင်ႈၵွင်ႈၵၢင်ႇ လႄႈ ၶူဝ်းၶွင်းၽိတ်းပၵ်းပိူင်မၢႆမီႈ ၶၢမ်ႈလႅၼ်လိၼ်ၸိုင်ႈမိူင်း ၼႆယဝ်ႉ။

ၸွမ်ၸိၵ်းသိုၵ်းမၢၼ်ႈ ၸွမ်သိုၵ်းလူင်ယႄးဝိၼ်းဢူးၼႆႉ ၶဝ်ႈႁူမ်ႈၸွမ်း ပၢင်ၵုမ်ၵေႃႇမတီႇၸၼ်ႉသုင် မိူင်း မၢၼ်ႈ – မိူင်းထႆး (HLC) ၵမ်းထူၼ်ႈ 9 သေ ၽူႈမီးပုၼ်ႈၽွၼ်းတင်းသွင်ၸိုင်ႈမိူင်း လႆႈဢုပ်ႇဢူဝ်းၵၼ်ၵႂႃႇ ၼႂ်း ပၢင်ၵုမ် လွင်ႈတႃႇယုၵ်ႉမုၼ်း ၵၢၼ်ႁူမ်ႇလူမ်ႈ လႄႈ ႁူမ်ႈၵၼ်ႁဵတ်းသၢင်ႈ ၵၢၼ်ငၢၼ်းၸၼ်ႉၸိုင်ႈမိူင်းၵႂႃႇ ၸွမ်းၵၼ် ထႅင်ႈ ၼႆယဝ်ႉ။

မိူင်းမၢၼ်ႈ တင်း မိူင်းထႆးၼႆႉ ပဵၼ်ဢူၺ်းလီၵၼ်သေ ႁူမ်ႈၵၼ်ႁဵတ်းသၢင်ႈ ၵၢၼ်ငၢၼ်းၸၼ်ႉၸိုင်ႈမိူင်းၸွမ်း ၵၼ်မႃး ႁိုင်ၼၢၼ်း 78 ပီ ယဝ်ႉ- ဝႃႈၼႆ။

ၼင်ႇႁိုဝ် တင်းသွင်ၸိုင်ႈမိူင်း တေမီးလွင်ႈယုမ်ႇယမ်ၼိူဝ်ၵၼ်မၼ်ႈၵိုမ်းလိူဝ်ၵဝ်ႇၼၼ်ႉ ၽူႈမီးပုၼ်ႈၽွၼ်း တင်းသွင်ၸိုင်ႈမိူင်း ဝႆႉၼၵ်း ပၵ်းၸႂ်ၼိူဝ် လွင်ႈၼိမ်တဵင်ႈ လႄႈ ၵၢၼ်ႁူမ်ႇ လူမ်ႈ ၸွမ်းလႅၼ်လိၼ်သေ ဢုပ်ႇ ဢူဝ်းၵၼ်ၵႂႃႇ- ၼႆယဝ်ႉ။

ၽူႈမီးပုၼ်ႈၽွၼ်းၾၢႆႇမိူင်းထႆးလၢတ်ႈၵႂႃႇဝႃႈ “တေပွႆႇၽူႈၵွၼ်းတပ်ႉၵွင်၊ ၽူႈၵွၼ်းတပ်ႉၸုမ်း ပၼ်ႇပုတ်ႈၵၼ် ၵႂႃႇ ပႂ်ႉတူၺ်းလွင်ႈႁူမ်ႇလူမ်ႈ၊ ထႆးတင်းမၢၼ်ႈ တေႁူမ်ႈၵၼ်ႁဵတ်းၵၢၼ် ႁူမ်ႇလူမ်ႈ၊ တႃႇႁူမ်ႈၵၼ်ၵႄႈလိတ်ႈပၼ်ႁႃၸွမ်းလႅၼ်လိၼ် မိူင်းမၢၼ်ႈ- မိူင်းထႆး လႆႈၼၼ်ႉ မီးၽႅၼ်ႁဵတ်းသၢင်ႈၸွမ်း ၵေႃႇမတီႇႁပ်ႉပုၼ်ႈၽွၼ်းႁဵတ်းၵၢၼ်ၸွမ်းလႅၼ်လိၼ် HLC၊ RBC လႄႈ TBC ၸိူဝ်းၼႆႉသေ တပ်းသိုၵ်းတင်းသွင်မိူင်း တေယုၵ်ႉမုၼ်းၼမ်ႉၵတ်ႉႁဵတ်းသၢင်ႈၵႂႃႇ။ တႃႇႁဵတ်းသၢင်ႈၽေႃႇၼမ်ႉၼႄတူဝ်လႆႈၼၼ်ႉၵေႃႈ ၾၢႆႇမိူင်းထႆး တူဝ်ႈတၼ်းဝႆႉယဝ်ႉ” ဝႃႈၼႆ။

လိူဝ်ၼၼ်ႉ တႃႇၵႄႈလိတ်ႈပၼ်ႁႃ ဢၼ်ယုင်ႈယၢင်ႈၵၼ်တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸွမ်းလႅၼ်လိၼ်ၼၼ်ႉၵေႃႈ တပ်ႉသိုၵ်း ထႆး၊ လူင်ပွင်ၸိုင်ႈထႆး တူဝ်ႈတၼ်းတႃႇၸွႆႈထႅမ်ယူႇ။ လမ်ႇလွင်ႈသုတ်းတႄႉ ထႆး တင်း မၢၼ်ႈ တူၵ်းလူင်း ႁဵတ်းလိၵ်ႈၵိၼ်ၵႅၼ်ႇၵၼ်ဝႆႉ လွင်ႈတေႁူမ်ႈၵၼ် တိုၵ်းတေႃးၵူၼ်း/ၸုမ်းႁဵတ်းၽိတ်းပၵ်းပိူင် ၸွမ်းလႅၼ်လိၼ်၊ ၽဵဝ်ႈမူၺ်ႉ ၸုမ်းၵျႃႊၽျႅၼ်ႉ၊ ၵႂၢတ်ႇလၢင်ႉ ၸုမ်း ၵႃႉၶၢႆၵူၼ်း ဢိၵ်ႇပႃး ယႃႈမဝ်းၵမ် လႄႈ ၶူဝ်းၶွင်ထိူၼ်ႇ ၸိူဝ်းဢမ်ႇထုၵ်ႇမႅၼ်ႈၸွမ်းၾိင်ႈမိူင်းၼၼ်ႉၵႂႃႇ ၼႆယဝ်ႉ။

ၼင်ႇႁိုဝ်ၵၢၼ်ပၢႆးမၢၵ်ႈမီးတင်းသွင်ၸိုင်ႈမိူင်း တေၸမ်ၸႂ်ႁုၼ်ႈၶိုၼ်ႈမႃးၶိုၼ်းၼၼ်ႉၵေႃႈ လႆႈဢုပ်ႇဢူဝ်းငူပ်ႉငီႉၵၼ်ၵႂႃႇ လွင်ႈၽႅၼ်ၵၢၼ်ပိုတ်ႇပၼ်ၵဵတ်ႉလၢၼ်ႇ ၸွမ်းလႅၼ်လိၼ် ႁႂ်ႈ ၵိုင်ႇငမ်ႇၸွမ်းငဝ်းလၢႆးပိူင်ပဵၼ်ပိုၼ်ႉတီႈ ၼႆယဝ်ႉ။

လူင်ပွင်ၸိုင်ႈ တပ်ႉသိုၵ်းမိူင်းထႆး ယင်းယိုၼ်ယၼ်လၢတ်ႈထႅင်ႈဝႃႈ – တေၸွႆႈထႅမ်ႁႂ်ႈလူင်ပွင်ၸိုင်ႈသိုၵ်းမၢၼ်ႈ ၶဝ်ႈတူင်ႉၼိုင်မႃးၸွမ်းလႆႈ ၼႂ်းတူင်ႇဝူင်းဢႃႊသီႊယၼ်ႊၶိုၼ်း ၼႆယဝ်ႉ။

ဝၢႆးလင်မိၼ်းဢွင်ႇလၢႆႇ လႆႈၶိုၼ်ႈပဵၼ်ၸွမ်ၸိုင်ႈယိုတ်းမိူင်းပဵၼ်တၢင်းၵၢၼ်ယဝ်ႉ ယႄးဝိၼ်းဢူး ၸွမ်ၸိၵ်းသိုၵ်းမၢၼ်ႈၵေႃႉမႂ်ႇၼႆႉ လႆႈဢွၵ်ႇၶၢဝ်းတၢင်း ဢႅဝ်ႇယဵမ်ႈၶဝ်ႈႁူမ်ႈၸွမ်းပၢင် ၵုမ်ၸၼ်ႉၸိုင်ႈမိူင်း တင်း လူင်ပွင်ၸိုင်ႈမိူင်းထႆး ပဵၼ်ပွၵ်ႈၵမ်းႁႅၵ်ႈ။

ယႄးဝိၼ်းဢူး ၸွမ်ၸိၵ်းသိုၵ်းမၢၼ်ႈယိုတ်းမိူင်းၼႆႉ မိၼ်းဢွင်ႇလၢႆႇ မွပ်ႈဢၢပ်ႈပၼ်ဢႃႇၼႃႇၸၼ်ႉသုင်သုတ်း ၶွင်ၼႂ်းတပ်ႉသိုၵ်းမၢၼ်ႈၵႂႃႇ မိူဝ်ႈလိူၼ်မၢတ်ႉသ် 30 ဝၼ်း ပီ 2026 ၼႆႉ။