ဝၼ်းတီႈ 18/08/2026 ပလိၵ်ႈထႆး ၼႂ်းၸႄႈဝဵင်းႁၢင်လူင်း ၸႄႈတွၼ်ႈၵဵင်းမႂ်ႇ မိူင်းထႆး လႆႈၶၢဝ်ႇၵူၼ်းဝၢၼ်ႈၸႅင်ႈဝႃႈမီးၵူၼ်းလၵ်ႉသၢႆၾႆးၼႂ်းဝၢၼ်ႈၼႆလႄႈ ၵႂႃႇပႂ်ႉတူၺ်းတီႈႁၢၼ်ႉၶၢႆၶူဝ်းၶွင်ၵဝ်ႇ လႄႈတီႉလႆႈ လုၵ်ႈဢွၼ်ႇၸၢႆး 3 ၵေႃႉ မႃးၶၢႆသၢႆၾႆး။

လုၵ်ႈဢွၼ်ႇၸၢႆး 3 ၵေႃႉၼၼ်ႉၽိူဝ်ႇပလိၵ်ႈမႃးတူၺ်းဝတ်းဝႂ်ၸိုင်လႆႈႁူႉဝႃႈပဵၼ် လုၵ်ႈဢွၼ်ႇထႆးၵေႃႉၼိုင်ႈ ၸိုဝ်ႈဢၢႆႈမူ ဢႃယု 21 ပီ ၊ လုၵ်ႈဢွၼ်ႇမၢၼ်ႈၵေႃႉၼိုင်ႈၸိုဝ်ႈဢၢႆႈၶျႆး ဢႃယု 20 ပီ လႄႈလုၵ်ႈဢွၼ်ႇတႆးၵေႃႉၼိုင်ႈ တိုၵ်ႉလႆႈဢႃယု 15 ပီ ။ ယၢမ်းလဵဝ်ပလိၵ်ႈတီႉၸိူဝ်းၶဝ်ဝႆႉတီႈႁူင်းပလိၵ်ႈ ၸၢင်ႉၽိူၵ်ႇဝႆႉယဝ်ႉ ဝႃႈၼႆ။ ၼႂ်း သၢမ်ၵေႃႉၼႆႉ ဢၼ်ပဵၼ်လုၵ်ႈဢွၼ်ႇမၢၼ်ႈ ၼၼ်ႉပဵၼ်ႁူဝ်ၼႃႈၸုမ်းၶဝ်။ မၼ်းၸၢႆးထုၵ်ႇပလိၵ်ႈပိုၼ်ၽၢဝ်ႇႁႃတီႉဝႆႉၸဵမ်လႂ် လူၺ်ႈတၢင်းၽိတ်း လၵ်ႉၶူဝ်းၶွင်ၵူၺ်းၼင်ႇၵဝ်ႇ- ၼႆ ဢိင်ၼိူဝ်ပလိၵ်ႈလၢတ်ႈသေ သိုဝ်ႇၶၢဝ်ႇထႆးၼႂ်းၵဵင်းမႂ်ႇ တႅမ်ႈဢွၵ်ႇပိုၼ်ၽၢဝ်ႇဝႆႉၼင်ႇၼႆ။

လုၵ်ႈဢွၼ်ႇၸၢႆးၸိူဝ်းၼၼ်ႉ လၢတ်ႈတီႈပလိၵ်ႈဝႃႈ – ၸိူဝ်းၶဝ် ဢႅဝ်ႇႁႃလၵ်ႉသၢႆၾႆးၵဝ်ႇၸွမ်းသူၼ် ၸွမ်းဝၢၼ်ႈၼႂ်းၸႄႈဝဵင်းႁၢင်လူင်း၊ ၽွင်းၶဝ်ၵႂႃႇလၵ်ႉသၢႆၾႆးၼႂ်းႁူင်းႁႅမ်းႁၢမ်းလင်ၼိုင်ႈၼၼ်ႉ သမ်ႉၵႂႃႇၺႃး ၵူၼ်းလၵ်ႉၶူဝ်းၶွင်ၵဝ်ႇထႅင်ႈၸုမ်းၼိုင်ႈ ပဵၼ်ၸုမ်း ၵူၼ်းၼုမ်ႇၼင်ႇၵၼ်။ ၸိူဝ်းၶဝ်လႆႈဢုပ်ႇၵုမ်ၵၼ်သေတူၵ်းလူင်းၸႅၵ်ႇမႅင်ႇၼႃႈတီႈၵၼ်ဝႃႈ ၸုမ်း 3 ၵေႃႉၸိူဝ်းထုၵ်ႇတီႉၼႆႉ တေဢႅဝ်ႇႁႃလၵ်ႉၼႂ်းၸႄႈဝဵင်းႁၢင်လူင်း၊ ထႅင်ႈၸုမ်းၼိုင်ႈဢၼ်ပႆႇၺႃးတီႉၼၼ်ႉသမ်ႉ ႁႂ်ႈၵႂႃႇႁႃလၵ်ႉၼႂ်းၸႄႈဝဵင်းၸၢင်ႉၽိူၵ်ႇ – ယႃႇႁႂ်ႈၼႃႈတီႈမႃးသွၼ်ႉၵၼ် – ဝႃႈၼႆ။

ယၢမ်းလဵဝ် ပလိၵ်ႈတိုၵ်ႉၸွမ်းႁႃတူဝ်ထႅင်ႈသၢမ်ၵေႃႉ ဢၼ်ႁပ်ႉပၢၵ်ႇဝႃႈတေဢႅဝ်ႇႁႃလၵ်ႉၼႂ်းၸႄႈဝဵင်းၸၢင်ႉၽိူၵ်ႇၼၼ်ႉယူႇ ယင်းပႆႇတီႉလႆႈ။

လုၵ်ႈဢွၼ်ႇၸၢႆး 3 ၵေႃႉဢၼ်ၺႃးတီႉဝႆႉၼႆႉ လၢတ်ႈၼေပလိၵ်ႈထႅင်ႈဝႃႈ – ၸိူဝ်းၶဝ်လၵ်ႉသၢႆၾႆးၵူၺ်းဢမ်ႇၵႃး လၵ်ႉပႃး ပၢမ်ႉ(မေႃႇတႃႇ) ၼမ်ႉ၊ ၸၢၵ်ႈၾႆး၊ ဢိၵ်ႇၶူဝ်းၶွင်မီးၵႃႈၶၼ်ၸိူဝ်းၼႆႉ။ ဢၼ်ၶဝ်လၵ်ႉလႆႈၼၼ်ႉ ၸိူဝ်းၶဝ်ႁွင်ႉ Grab (ရူတ်ႉၶိူင်ႈႁပ်ႉၸၢင်ႈတေႃႉသူင်ႇၶူဝ်းၶွင်) မႃးႁပ်ႉဢဝ်ၵႂႃႇသူင်ႇတီႈႁၢၼ်ႉသိုဝ်ႉၶူဝ်းၵဝ်ႇ။ မိူဝ်ႈဝၼ်းတီႈ 16/08/2026 ၼၼ်ႉၸင်ႇႁႃ ဢဝ်သၢႆၾႆးသူင်ႇၵႂႃႇၶၢႆတႃႇ 100 ၵီႊလူဝ်ႊၵရမ်ႊၵူၺ်း။ ထိုင်မႃးဝၼ်းတီႈ 18/08/2026 ၶိုၼ်းဢဝ်ၵႂႃႇၶၢႆထႅင်ႈ 40 ၵီႊလူဝ်ႊၵရမ်ႊလႄႈၸင်ႇၺႃးပလိၵ်ႈတီႉဢဝ်လီလီ – ဝႃႈၼႆ။

ပလိၵ်ႈထႆး လၢတ်ႈဝႃႈ – ၽိူဝ်ႇၵူတ်ႇထတ်းတူၺ်းမိုဝ်းထိုဝ်လုၵ်ႈဢွၼ်ႇၸိူဝ်းၼႆႉ လႆႈႁၼ်မႅၼ်ႈ ဢၼ်ထၢႆႇၶလိပ်ႉဝီႊတီႊဢူဝ်ႊဝႆႉ ၽွင်းၶဝ်ၵႂႃႇလၵ်ႉၶူဝ်းၶွင်တီႈႁိူၼ်းႁၢမ်း ႁူင်းႁႅမ်းႁၢမ်းလႄႈ သုမ်ႉဝႆႉၶူဝ်းၶွင်ၼႂ်းသူၼ်ၼႂ်းႁိူၵ်ႈပိူၼ်ႈၸိူဝ်းၼၼ်ႉ ။ ၸိူဝ်းၶဝ်ဢမ်ႇမီးတၢင်းၵူဝ်တၢင်းယၢၼ်ႈသင် ယင်းပၢႆႁွင်ႉၵႂၢမ်း ရႅပ်ႉ ႁိပ်ႉႁွပ်ႉ ၸွမ်းၵၼ်မူၼ်ႈမူၼ်ႈသိူဝ်းသိူဝ်း ၼႂ်းၼႅဝ်းၽဵင်းၵႂၢမ်းဢဝ်ၵုင်ႇမုၼ်တူဝ်ၵဝ်ႇ လူးၵွၼ်ႇဝႃႈၼႆ။

လွင်ႈၼႆႉလႆႈႁၼ်ၵူၼ်းမိူင်းထႆး မႃးတႅမ်ႈပၼ်ၶွမ်ႊမႅၼ်ႉ တီႈတႂ်ႈလၢင်ႈၶၢဝ်ႇထႆး ၼၼ်ႉဝႃႈ – ႁႅင်းၵၢၼ်ၸိူဝ်းမႃးပၼ်တၢင်းတုၵ်ႉၼႂ်းမိူင်းၸိူဝ်းၼႆႉ ႁႂ်ႈလိုပ်ႈဢွၵ်ႇမိူင်း တင်းမူတ်း – ၼႆၼမ်မႃးလိူဝ်ၵဝ်ႇ။

ယွၼ်ႉဝႃႈ ၼႂ်းလိူၼ်ပူၼ်ႉမႃးၼႆႉ မီးၸုမ်းႁၵ်ႉၸိူဝ်ႉၸၢတ်ႈထႆးၸုမ်းၼိုင်ႈ ဢွၼ်ၵၼ်တူင်ႉၼိုင်ႁဵတ်းသၢင်ႈတႃႇတုၵ်းယွၼ်းၼႂ်းသၽႃးၸိုင်ႈမိူင်းဝႃႈ – ႁႅင်းၵၢၼ်ယၢၼ်မိူင်းၸိူဝ်းမႃးပူၼ်ႉပႅၼ်မၢႆမီႈႁႅင်းၵၢၼ်သေ ႁဵတ်းၵၢၼ်ဢၼ်ထုၵ်ႇႁၢမ်ႈဝႆႉၼႆႉ ပဵၼ်ႁႅင်းၵၢၼ်ဢၼ်မႃးႁိမ်ၼႃႈၵၢၼ်ၵူၼ်းပိုၼ်ႉမိူင်း လႄႈ ထုၵ်ႇလီပၼ်တူတ်ႈတၢမ်ႇႁႅင်းၵၢၼ်ၸိူဝ်းၼႆႉ လူၺ်ႈလိုပ်ႈဢွၵ်ႇၸိုင်ႈမိူင်း (ဢမ်ႇပၼ်ၶဝ်ႈႁဵတ်းၵၢၼ်ၼႂ်းမိူင်းထႆးၶိုၼ်းသေပွၵ်ႈ)။ ႁႅင်းၵၢၼ်ယိင်း ၸိူဝ်းပႃးတွင်ႉၵေႃႈ ဢမ်ႇပၼ်ၵိူတ်ႇလုၵ်ႈၼႂ်းမိူင်းထႆး။ ႁႂ်ႈလိုပ်ႈမိူဝ်းၵိူတ်ႇၶိုၼ်းဝၢၼ်ႈၽႂ်မိူင်းမၼ်း – ၼႆယူႇ။

ၾၢႆႇၼိုင်ႈၵေႃႈ ပလိၵ်ႈထႆး ၾၢႆႇၵူတ်ႇထတ်းၵူၼ်းၶဝ်ႈမိူင်း မိူင်းထႆးၼႂ်းၸႄႈတွၼ်ႈၵဵင်းမႂ်ႇ ဢဝ်ႁူဝ်ၶေႃႈဢၼ်ဝႃႈ – တႃႇၽဵဝ်ႈမူၺ်ႉ ၸုမ်းလွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ (သၵႅမ်ႊမိူဝ်ႊ၊ ၵျႃႊၽျႅၼ်ႉ) ၼႆၼၼ်ႉသေ ယၢမ်းလဵဝ် လူင်းပိုၼ်ႉတီႈၵူတ်ႇထတ်းတီႈဢၼ်ႁႅင်းၵၢၼ်ယၢၼ်မိူင်းႁဵတ်းၵၢၼ်ဝႆႉ ယူႇၵူႈဝၼ်း။ ၵူၺ်းၵႃႈ ဢၼ်တီႉလႆႈသမ်ႉပဵၼ်ႁႅင်းၵၢၼ် ၸိူဝ်းႁႃၵိၼ်လဵင်ႉတွင်ႉလူၺ်ႈၼမ်ႉႁိူဝ်ႇၼမ်ႉၶႆးၸဝ်ႈၵဝ်ႇ၊ ၵူၺ်းၵႃႈ ႁဵတ်းၵၢၼ်ဢမ်ႇမႅၼ်ႈတီႈလဵဝ်ၵၼ်တင်းၼႂ်းဝတ်းဝႂ်ႁဵတ်းၵၢၼ်- ၸိူဝ်းၼႆႉ။

ၵဵဝ်ႇၵပ်းလွင်ႈၼႆႉသေ ၸုမ်းၸွႆႈထႅမ်ႁႅင်းၵၢၼ်ယၢၼ်မိူင်း ၼႂ်းၵဵင်းမႂ်ႇတႄႉလၢတ်ႈဝႃႈ -ၼင်ႇႁိုဝ်ႁႅင်းၵၢၼ်ယၢၼ်မိူင်းၸိူဝ်းႁဵတ်းၵိၼ်ၵၢၼ်သိုဝ်ႈသိုဝ်ႈယူဝ်းယူဝ်း တေလႆႈယူႇသႃႇလူမ်ၸႂ် ႁဵတ်းၵၢၼ်ႁႃလဵင်ႉတွင်ႉငၢႆႈၼၼ်ႉ – ၸိူဝ်းမီးလုၵ်ႈမီးလၢၼ် သႅၼ်းပၢၼ်သိၵ်းႁိၵ်း ၊ သႅၼ်းပၢၼ်သၢဝ်းပၢႆၸိူဝ်းၼႆႉ ႁႂ်ႈၵုမ်းတူၺ်းသင်ႇသွၼ်လီလီ ။ ယႃႇႁႂ်ႈလႆႈၵႂႃႇပဵၼ်ၸုမ်းၵေႃႇၵၢၼ်သုၵ်ႉယုင်ႉၼႂ်းတူင်ႇဝူင်းၵူၼ်း- ထိုင်တီႈႁဵတ်းႁႂ်ႈႁႅင်းၵၢၼ်ယၢၼ်မိူင်းလႆႈၸိုဝ်ႈလူႉၸွမ်း၊ ႁဵတ်းၵၢၼ်ႁႃလဵင်ႉတွင်ႉယၢပ်ႇ ယွၼ်ႉၸိူဝ်းၶဝ် – ဝႃႈၼႆ။

ယၢမ်းလဵဝ်ႁႅင်းၵၢၼ်ယၢၼ်မိူင်း ၼႂ်းမိူင်းထႆး ၵမ်ႈၼမ်တေပဵၼ်ၵူၼ်းမိူင်းမၢၼ်ႈ မိူင်းလၢဝ်း မိူင်းၵမ်ႊပေႃႊတီႊယႃႊ လႄႈ ဝႅတ်ႉၼၢမ်း။ ႁူဝ်ၼပ်ႉႁႅင်းၵၢၼ်မီးမွၵ်ႈ 5 လၢၼ်ႉ – ၼႆႁွင်ႈၵၢၼ်ၾၢႆႇႁႅင်းၵၢၼ်ၸိုင်ႈမိူင်း ပိုၼ်ၽၢဝ်ႇလၢတ်းၼႂ်း ဢွမ်လူမ်း ရေႇတီႇဢူဝ်ႇဝႆႉၼင်ႇၼႆ။

ၵဵဝ်ႇၵပ်းလွင်ႈလၵ်ႉၶူဝ်းၶွင်ၼႆႉသေ ပၵ်းပိူင်မၢႆမီႈပိုၼ်ႉထၢၼ် မိူင်းထႆးတႄႉမီးဝႆႉဝႃႈ ပေႃးပဵၼ်ၵူၼ်းလူင် တင်ႈၸႂ်လၵ်ႉၶူဝ်းၶွင်ၸိုင် ၽိတ်းမၢႆမီႈလၵ်ႉ ၼႂ်းမတ်ႈတႃ 334 ။ တေလႆႈၺႃးတူတ်ႈတၢမ်ၶွၵ်ႈ 3 ပီ တူတ်ႈတၢမ်ႇငိုၼ်း 6 မိုၼ်ႇဝၢတ်ႇ။ ပေႃးပဵၼ် မူႇပဵၼ်ၸုမ်းသေ တင်ႈၸႂ်လၵ်ႉၶူဝ်းၶွင်ၼႂ်းဝၢၼ်ႈ၊ လၵ်ႉလၢႆလၢႆၵမ်းယဝ်ႉ ဢမ်ႇၼၼ် လၢၵ်ႈၸူၼ်ၶူဝ်းၶွင်ပိူၼ်ႈ ဢမ်ႇၼၼ် လၵ်ႉၶူဝ်းၶွင်ပေႃႈလဵင်ႉမႄႈလဵင်ႉၸဝ်ႈၵဝ်ႇၸိူဝ်းၼႆႉသမ်ႉတေပဵၼ်တၢင်းၽိတ်းၼႂ်းမၢႆမီႈမတ်ႉတႃ 335 တေလႆႈႁပ်ႉတူတ်ႈတၢမ်ႇၶွၵ်ႈ 1 ပီထိုင် 5 ပီ တူတ်ႈတၢမ်ႇငိုၼ်း 2 မိုၼ်ႇဝၢတ်ႇတေႃႇထိုင် ၼိုင်ႈသႅၼ်ဝၢတ်ႇ။

ပေႃးပဵၼ်လုၵ်ႈဢွၼ်ႇဢႃယုပႃႈတႂ်ႈ 18 – လုမ်းတြႃးတေတွင်ႈထၢမ်ထတ်းသၢင်တူၺ်းလီလီသေ တူတ်ႈတၢမ်ႇသုင်သုတ်းတေလႆႈႁပ်ႉ တူတ်ႈတၢမ်ႇ ၼိုင်ႈၶိုင်ႈၶွင် တူတ်ႈတၢမ်ႇၵူၼ်းလူင်၊ တူတ်ႈတၢမ်ႇတႅမ်ႇသုတ်း တေထုၵ်ႇသူင်ႇႁူင်းၾိုၵ်းသွၼ်မူၼ်ႉမႄးတၢင်းယၢမ်ႈ ။ ပေႃးပဵၼ်လုၵ်ႈဢွၼ်ႇ ဢႃယု ပႆႇတဵမ် 7 ၶူပ်ႇတႄႉ တေဢမ်ႇလႆႈႁပ်ႉတူတ်ႈတၢမ်ႇသင် – ဝႃႈၼႆဝႆႉ။