တႃႇႁဵတ်းၵၢၼ်ၵႃႉၶၢႆတင်းဢွၼ်ႊလၢႆႊ ၸၼ်ႉၸိုင်ႈမိူင်း ၵႄႈၵၢင်မိူင်းမၢၼ်ႈ တင်း ရတ်ႉသျႃႊၼၼ်ႉ သိုၵ်းမၢၼ်ႈယိုတ်းမိူင်း လူင်းလၢႆးမိုဝ်းႁဵတ်းလိၵ်ႈၵိၼ်ၵႅၼ်ႇၵၼ်တင်း ၶွမ်ႊပၼီႊ Astra Group ဢၼ်ပၵ်းသဝ်းငဝ်ႈငုၼ်းဝႆႉယူႇၼႂ်းမိူင်းရတ်ႉသျႃႊ။ Astra Group ၼႆႉ လူင်ပွင်ၸိုင်ႈမိူင်းဢမေႊရိၵၼ်ႊ လႄႈ မိူင်းၵၼေႊတႃႊၶဝ် ဢိုတ်းႁပ်းသဵၼ်ႈတၢင်းၵၢၼ်မၢၵ်ႈမီးၶဝ်သေ ဢဝ်လိူင်ႈဝႆႉ။ ယၢမ်းလဵဝ် တႃႇယူႇၵၢင်ႁဵတ်းသၢင်ႈၵၢၼ်တေႃႉသူင်ႇၶူဝ်းၵုၼ်ႇ ၶဝ်ႈဢွၵ်ႇမိူင်းႁူမ်ႈတုမ် တင်းဢွၼ်းလၢႆႊၼၼ်ႉ ၶွမ်ႊပၼီႊ Astra Group လႆႈတိုဝ်ႉတၢင်း မီးသုၼ်ႇလႆႈ တေသိုပ်ႇသၢင်ႈပိူင် “National Single Window” ၵႂႃႇ ဝႃႈၼႆ။

ၸုမ်းႁဵတ်းၵၢၼ်သုၼ်ႇလႆႈတႃႇမိူင်းႁူမ်ႈတုမ် Justice For Myanmar ႁၢႆးငၢၼ်းဢွၵ်ႇဝႆႉဝႃႈ – Astra Group ၼႆႉ ပဵၼ်ၸုမ်းဢၼ်ၵမ်ႉထႅမ် လွၵ်းလၢႆးပၢႆးပၺ်ႇၺႃႇ IT ပၼ် ၸုမ်းၽူႈၸွပ်ႇ FSB လႄႈ တပ်ႉသိုၵ်းရတ်ႉသျႃႊ။ ၶဝ်ႁဵတ်းဢွၵ်ႇ ပိူင် Astra Linux ဢၼ်ၸႂ်ႉတိုဝ်းၼႂ်းပၢင်တိုၵ်း ယူႊၶရဵၼ်ႊၼၼ်ႉ ႁႂ်ႈတပ်ႉသိုၵ်းရတ်ႉသျႃႊၶဝ်ၸႂ်ႉတိုဝ်းၵုမ်းထိင်းဝႆႉပိူင် IT ငဝ်ႈငုၼ်းဝႆႉ။ ယွၼ်ႉၼၼ် သင်ႁဵတ်းသၢင်ႈၶိုၼ်ႈမႃးလႆႈ ပိူင် “National Single Window” ဢၼ်မႂ်ႇၼႆႉၸိုင် တေလႆႈၵွင်ႉၵၢႆႇသိုဝ်ႇသၢၼ်ၵၼ်တင်း ASEAN Single Window ဢၼ်ပဵၼ်ၼႅင်ႈသၢၼ်ၵၢၼ်ၵႃႉၶၢႆ ၼႂ်းဢႃႊသီႊယၼ်ႊၼၼ်ႉလႄႈ ၸုမ်းရတ်ႉသျႃႊဢၼ်ၺႃးဢိုတ်းသဵၼ်ႈတၢင်းၵၢၼ်မၢၵ်ႈမီးသေ ထုၵ်ႇပၼ်တၢမ်ႇဢဝ်လိူင်ႈဝႆႉၼၼ်ႉ တေၸၢင်ႈၶဝ်ႈတူၺ်းလႆႈ ၶေႃႈမုလ်းလပ်ႉ ၵၢၼ်ၵဵပ်းၶွၼ်ႇ လႄႈ ၵၢၼ်ၵႃႉၶၢႆ ၸိုင်ႈမိူင်းဢႃႊသီႊယၼ်ႊၶဝ်လႆႈမႃး။ ပေႃးၼၼ်ၸိုင်ၸၢင်ႈမီးၽေးယႂ်ႇၼမ်တေႉတေႉ – ဝႃႈၼႆ။

မိူဝ်ႈဝၼ်းတီႈ 12 လိူၼ်ဢေႃးၵၢတ်ႉသ် ပီ 2026 ၼႆႉ ႁွင်ႈၵၢၼ်ၾၢႆႇၸတ်းၵၢၼ်လွင်ႈၵဵပ်းၶွၼ်ႇ တႂ်ႈသိုၵ်းမၢၼ်ႈယိုတ်းမိူင်း လႆႈလူင်းလၢႆးမိုဝ်း ႁဵတ်းလိၵ်ႈၵိၼ်ၵႅၼ်ႇၸွမ်း ၶွမ်ႊပၼီႊ Astra Consulting LLC ဢၼ်ယူႇၾၢႆႇတႂ်ႈ ၸုမ်း Astra Group ၼၼ်ႉ။ ပိူင်ဢၼ်သိုၵ်းမၢၼ်ႈ တင်း ၶွမ်ႊပၼီႊရတ်ႉသျႃႊ တေႁူမ်ႈၵၼ်ႁဵတ်းသၢင်ႈၼႆႉ တေလႆႈၸႂ်ႉတိုဝ်းၽိုၼ်လိၵ်ႈၽိုၼ်လၢႆး ၶေႃႈမုလ်းၵၢၼ်ၵႃႉၶၢႆ ဢၼ်ႁွင်ႈၵၢၼ်ၽွင်းလူင်ၶဝ်မီးၼၼ်ႉတင်းသဵင်ႈ – ဝႃႈၼႆ။

လိူဝ်ၼၼ်ႉ ၸုမ်းႁဵတ်းၵၢၼ်သုၼ်ႇလႆႈတႃႇမိူင်းႁူမ်ႈတုမ် လႆႈတုၵ်းယွၼ်းဝႆႉတီႈ လူင်ပွင်ၸိုင်ႈယူႊရူပ်ႊ (EU) ၊ ပရဵတ်ႉသ်တဵၼ်ႊ လႄႈ ဢေႃႊသတေႊလျႃႊၶဝ် ၸွႆႈဢဝ်လိူင်ႈပၼ် ၸုမ်း Astra Group ၵူၺ်းဢမ်ႇၵႃး ၸွႆႈႁၢမ်ႈပၼ်ပႃး ၵၢၼ်တေႃႉဢဝ်ၶိူင်ႈၵွင်ႈၵၢင်ႇ လႄႈ ၼမ်ႉမၼ်းၶိူင်ႈမိၼ်သူင်ႇၸူး သိုၵ်းမၢၼ်ႈယိုတ်းမိူင်းထႅင်ႈ ၼႆယဝ်ႉ။