တႄႇၼႂ်းႁူဝ်လိူၼ် ဢေႃးၵၢတ်ႉသ် ၼႆႉမႃး ၾူၼ်တူၵ်းထပ်းၵၼ်လၢႆဝၼ်း ႁဵတ်းႁႂ်ႈ ၼမ်ႉထူမ်ႈသူၼ်ၼႃးလႄႈ ႁိူၼ်းၵူၼ်းမိူင်း ၼႂ်းထုင်ႉပူင်း ၸိုင်ႈတႆးပွတ်းၸၢၼ်း  ။

ထိုင်မိူဝ်ႈၼႆႉ ဝၼ်းတီႈ 18/8/2026 ၼမ်ႉပႆႇယွမ်းလူင်းသဵင်ႈ ယိုင်ႈဝႆႉႁိုင်မႃး 10 ဝၼ်းပၢႆယဝ်ႉ  ၊ ၽွင်းၶၢဝ်းၼႆႉသမ်ႉ ပဵၼ်ၽွင်းၶဝ်ႈသုၵ်းလီငၢမ်း ၽွမ်ႉတႃႇပၢတ်ႇၵဵပ်းယဝ်ႉလႄႈ ၸဝ်ႈၼႃး ထူပ်းတၢင်းယၢပ်ႇၽိုတ်ႇ မီးလွင်ႈလူႉသုမ်းၼမ်  ဝႃႈၼႆ ။

ၸဝ်ႈၼႃးၼႂ်းထုင်ႉပူင်းၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ၼမ်ႉၼႆႉၵႆႉထူမ်ႈ  ၽွင်းၶဝ်ႈသုၵ်းလိူင် ၊ ၽွင်းတေပၢတ်ႇၶဝ်ႈၸိူင်ႉၼႆ ၵူႈပီပီယဝ်ႉ ၊ မီး 4-5 ပီယဝ်ႉမိူၼ်ၼႆ ၊ ၶဝ်ႈၼႆႉ ပေႃးၽုၵ်ႇၸဝ်ႉၵေႃႈၼူၵ်ႉယႃႉ ၊ ၼူယႃႉ ၊ ပေႃးၽုၵ်ႇလႃႈသမ်ႉ ၺႃးၼမ်ႉထူမ်ႈ ၸိူင်ႉၼႆ ၸဝ်ႈၼႃးတႄႉ ပေႃးဢမ်ႇၸၢင်ႈႁဵတ်းၵိၼ်ၸိူင်ႉႁိုဝ်ယဝ်ႉ“- ဝႃႈၼႆ ။

ယၢမ်းလဵဝ် ၼမ်ႉထူမ်ႈသူၼ်ၼႃး ႁိူၼ်းယေးၵူၼ်းမိူင်းၼႂ်းပူင်းၼႆႉပဵၼ်  ဝၢၼ်ႈပၢင်လူၼ်ႇ ၊ ဝဵင်းၵဝ်ႇ ၊ ဝၢၼ်ႈပူင်း ၊ သၢႆလႄး ၊ ၼွင်ၸၢင်ႉ ၊ ၽၵ်းၵုမ်ႇ ၊ ၵၢင်ၼႃး ၸိူဝ်းၼႆႉဝႆႉ   ။

ၸဝ်ႈၼႃးထုင်ႉပူင်းလၢတ်ႈၽူႈတွႆႇႁွၵ်ႈဝႃႈ- ꧦၶဝ်ႈၸိူဝ်းၺႃးၼမ်ႉထူမ်ႈ ၼမ်ႉၼွင်းၼၼ်ႉ ပေႃးမီးငူင်း  ၵိၼ်ဢမ်ႇၶႅမ်ႉ ၶၢႆဢမ်ႇလႆႈယဝ်ႉၶႃႈ ၊ ၸဝ်ႈၼႃးလႆႈလူင်းတိုၼ်းလၢင်းၼမ်ၼႃႇ ၼႃးၼိုင်ႈတူင်းၼႆႉ ဢၢၼ်ႁူဝ်သိပ်းသႅၼ်မၼ်းဝႆႉဢေႃႈꧦ- ဝႃႈၼႆ ။ 

ပွတ်းထုင်ႉပူင်းၼႆႉ ၵူၼ်းမိူင်းႁဵတ်းၵိၼ်ၵၢၼ်သူၼ်ၵၢၼ်ၼႃး ပဵၼ်ပိူင်လူင်။ ၵူၺ်းၵႃႈ ၸဝ်ႈၼႃး သုမ်းတိုၼ်းလၢင်း ဢမ်ႇလႆႈၼမ်ႉတွၼ်း တင်ႈတႄႇၺႃးၼမ်ႉၼွင်းထူမ်ႈႁၢဝ်ႈႁႅင်းပီ 2024 မႃး။

ၾၢႆႇၼိုင်ႈတၢင်းၼိုင်ႈၵေႃႈ ယွၼ်ႉၼမ်ႉၼွင်းထူမ်ႈၵႂႃႇ သွင်ပီယဝ်ႉလႄႈ ႁွင်ႈၼမ်ႉမိူင်ၼမ်ႉ ပဵၼ်ၶႅၵ်ႉပဵၼ်ယုၵ်းယၢၵ်းၶၢင်ႉၶမ်တဵမ် ထိုင်တီႈၽဵဝ်ႈဢမ်ႇၶိုတ်းတၼ်း လႄႈၸဝ်ႈၼႃးလႆႈပွႆႇတူင်ႈၼႃး 3 ႁဵင် ဢေႊၶိူဝ်ႊႁၢမ်းလၢႆ – လႆႈႁူႉၼင်ႇၼႆ ။

 လွင်ႈၼမ်ႉထူမ်ႈႁႅင်း ၼႂ်းထုင်ႉပူင်းၼႆႉ  ပဵၼ်ထပ်းၵၼ်မႃး 3-  4 ပွၵ်ႈ  ယဝ်ႉ။  ပဵၼ်မိူဝ်ႈပီ 2021   ၵမ်းၼိုင်ႈ 2024  ၵမ်းၼိုင်ႈလႄႈ 2025 ၼႆႉ ၵမ်းၼိုင်ႈ ။ မိူဝ်ႈပီ 2011 ပုၼ်ႉသမ်ႉ ပဵၼ်ၵမ်းၼိုင်ႈ။ ၼႂ်းၵႃႈ 3-4 ၵမ်းၼႆႉဢၼ်ပဵၼ်ၼႂ်းပီ 2024-2025 ၼႆႉ  ၼမ်ႉထူမ်ႈႁၢႆႉႁႅင်းသုတ်း – ၵူၼ်းပိုၼ်ႉတီႈလၢတ်ႈ ။

ယွၼ်ႉပိူဝ်ႈၼမ်ႉထူမ်ႈၼႂ်းၼႃးႁၢႆႉႁႅင်းမႃးထပ်းၵၼ်ၸိူင်ႉၼႆလႄႈ ၶဝ်ႈထုင်ႉပူင်းလႆႈသုမ်းၼမ် ၊ႁဵတ်းႁႂ်ႈၶဝ်ႈသၢၼ်ၵႃႈယႂ်ႇမႃး။  ၵွၼ်ႇၼႃႈၶူဝ်ႊဝိတ်ႉလၢမ်းၽႄႈၼၼ်ႉၶဝ်ႈသၢၼ်ၼိုင်ႈထူင်မီးယူႇ 7000-8000 ပျႃး။ ယၢမ်းလဵဝ်တႄႉၶဝ်ႈသၢၼ်ၼိုင်ႈထူင် ဢမ်ႇယွမ်း 50000 ပျႃးယဝ်ႉ။

ၵူၼ်းမိူင်းတႆးပွတ်းၸၢၼ်းမႆႈၸႂ်ၵူဝ်ၶဝ်ႈၵိၼ်ဢမ်ႇၵုမ်ႇၵူၺ်းယဝ်ႉဝႃႈၼႆ။  

လွင်ႈၶဝ်ႈသၢၼ်ၵႃႈယႂ်ႇၼႆႉ ၵူၼ်းၵႃႉၶဝ်ႈသၢၼ်မိူင်းမၢၼ်ႈၵေႃႈထတ်းသၢင်ဝႆႉဝႃႈ – “တႄႇဢဝ်လိူၼ်ထူၼ်ႈ 8 ၼႆႉၵႂႃႇ ၶဝ်ႈသၢၼ်တေၵႃႈ ယႂ်ႇထႅင်ႈ။ တေဢမ်ႇၶိုၼ်ႈမွၵ်ႈ ၼိုင်ႈႁဵင် သွင်ႁဵင်ၵူၺ်း – တေၶိုၼ်ႈပဵၼ်ၼပ်ႉႁူဝ်မိုၼ်ႇပျႃး။ ယွၼ်ႉပိူဝ်ႈ ၸဝ်ႈၼႃး ဢမ်ႇလႆႈၽုၵ်ႇၶဝ်ႈလီလီ၊ ဢမ်ႇၸၢင်ႈၽုၵ်ႇလီလီယွၼ်ႉၵႃႈၶၼ်ၶူဝ်းၵုၼ်ႇၶိုၼ်ႈ၊ ယွၼ်ႇပိူဝ်ႈၾိင်ႈၾႃႉရႃႇသီႇဢမ်ႇလီလႄႈၶဝ်ႈလူႉ ဢမ်ႇမီးၶဝ်ႈဢဝ်မႃးၶၢႆထိုင်ဝဵင်း။    ၵွပ်ႈၼႆ ၵူၼ်းၼႂ်းဝဵင်း ဢမ်ႇၼၼ် ၸိူဝ်းဢမ်ႇမီးၼႃးၸိူဝ်းၼၼ်ႉတႄႉ တေဢမ်ႇလႆႈၵိၼ်ၶဝ်ႈလီၶဝ်ႈၶႅမ်ႉ ။ တေလႆႈၵိၼ်ၶဝ်ႈသၢၼ်ဢၼ်ၵျၢမ်း ဢၼ်ဢမ်ႇၶႅမ်ႉၼၼ်ႉၵႂႃႇတိၵ်းတိၵ်းယဝ်ႉ ” – ဝႃႈၼႆ။

ၵဵဝ်ၵပ်းလွင်ႈ ၼမ်ႉထူမ်ႈၼမ်ႉၼွင်းၼႆႉသေ ISP Myanmar ပိုၼ်ၽၢဝ်လၢတ်ႈဝႆႉဝႃႈ တႄႇဢဝ် ဝၼ်းတီႈ 11 လိူၼ်ၵျူႊလၢႆႊ တေႃႇထိုင် ဝၼ်းတီႈ 11 လိူၼ်ဢေႃးၵၢတ်ႉသ်ၼႆႉ ၾူၼ်တူၵ်းႁႅင်း ထပ်းၵၼ် ၵူၼ်းမိူင်းႁူမ်ႈတုမ်မၢၼ်ႈ 13 သႅၼ်ပၢႆ ၼႂ်း 41 ၸႄႈဝဵင်း တီႈၼႂ်းတိူင်း လႄႈ ၸႄႈမိူင်း 5 ဢၼ် လႆႈထူပ်းၽေးၼမ်ႉၼွင်းထူမ်ႈ – ဝႃႈၼႆဝႆႉ ။