ၼႂ်းဝူင်ႈဝၢင်ႈၼႆႉ ၾူၼ်တူၵ်းဢမ်ႇထၢတ်ႇ ၼမ်ႉလူၼ်ႉၾင်ႇႁဵတ်းႁႂ်ႈ တႅၼ်ႈတီႈၾၢႆၼမ်ႉငဝုၼ်ႇၼၼ်ႉတႅၵ်ႇ ႁဵတ်းႁႂ်ႈၼမ်ႉထူမ်ႈဝဵင်း လေးမျႅတ်ႉၼႃႇ တိူင်းၼမ်ႉၵဵဝ် – ၾၢႆႇၸုမ်းၸွႆႈထႅမ်ဢမ်ႇၸၢင်ႈၶဝ်ႈၸွႆႈၵူၼ်းထူပ်းၽေးၼမ်ႉ ယွၼ်ႉၼမ်ႉမၼ်းၸိူဝ်ႉၾႆးၵႃႈယႂ်ႇ ႁႃယၢပ်ႇ။

ဝၼ်းတီႈ 30/07/2026 ၼၼ်ႉ တႅၼ်ႈတီႈၾၢႆၼမ်ႉ ငဝုၼ်ႇ တႅၵ်ႇၵႂႃႇမွၵ်ႈ 20 ပေႇ ၼမ်ႉၼႂ်းၾၢႆလူၼ်ႉဢွၵ်ႇမႃးၼွင်းထူမ်ႈဝၢၼ်ႈဢိူင်ႇလႄႈ ၼႂ်းဝဵင်းလေးမျႅတ်ႉၼႃႇ။ မိူၼ်ၼင်ႇဝၢၼ်ႈ ဢၢႆႇတပိဝ်ႉ၊ ႁိၼ်းတတႃႉ၊ ယေႇၵျီႇ၊ ၵျူင်ႇပျေႃႇ၊ ငတၢႆးၶျွင်း ၸိူဝ်းၼႆႉ ။ ၵူၼ်းထူပ်းၽေးၼမ်ႉ မီးၼပ်ႉႁူဝ်မိုၼ်ႇၵေႃႉ ဝႃႈၼႆ။

ၸုမ်းၸွႆႈထႅမ်ၵူၼ်းထူပ်းၽေးၼမ်ႉ ၼႂ်းတိူင်းၼမ်ႉၵဵဝ်လၢတ်ႈဝႆႉတီႈသိုဝ်ႇၶၢဝ်ႇမၢၼ်ႈ ဢီႇရႃႇဝတီႇဝႃႈ-“ ၼမ်ႉမၼ်းၸၢၵ်ႈႁႃယၢပ်ႇလႄႈ ဢမ်ႇၸၢင်ႈသူင်ႇႁိူဝ်းၶဝ်ႈၵႂႃႇတင်းမူတ်း။ ဢမ်ႇၸၢင်ႈ ၸွႆႈၵူၼ်းဝၢၼ်ႈလႆႈၶိုတ်းတၼ်း။ ဝၢၼ်ႈဢၼ်ပႆႇၵႂႃႇထိုင်ယင်းတိုၵ်ႉမီးၼမ်ဢေႃႈ။ သင်ဝႃႈမီးၵူၼ်းမႃးၸွႆႈၵႃႈၼမ်ႉမၼ်းၸိူဝ်ႉၾႆးတႄႉ ႁိူဝ်းႁဝ်းၶႃႈတေၸၢင်ႈသူင်ႇၶဝ်ႈၵႂႃႇၸွႆႈတင်းမူတ်းယူႇ။ လွင်ႈၸွႆႈထႅမ်ၵၼ်ၵေႃႈတေၸဵဝ်းဝႆးလိူဝ်ၼႆႉထႅင်ႈ” – ဝႃႈၼႆ။

ၵႃႈတေႃႉၶူဝ်းၶွင်ၸွႆႈထႅမ်ၵူၼ်းထူပ်းၽေးၼမ်ႉ လုၵ်ႉတီႈဝဵင်းပတဵင်ႇ(ဝၢၼ်ႈဢၼ်ၼမ်ႉထူမ်ႈ) တေႃႇထိုင်ဝဵင်းလေးမျႅတ်ႉၼႃႇ(တီႈလွတ်ႈၽေးၼမ်ႉ)ၼႆႉ ၼိုင်ႈႁွပ်ႈ တေလႆႈသဵင်ႈယူႇမွၵ်ႈ 8 သႅၼ်ပျႃး ဝႃႈၼႆ။

ၵူၼ်းဝဵင်းႁိၼ်းတတႃႉလၢတ်ႈထႅင်ႈဝႃႈ-“ၼမ်ႉၵေႃႈပႆႇလူတ်းယွမ်း။ တိုၵ်ႉသိုပ်ႇထူမ်ႈယူႇတိၵ်းတိၵ်း။ ပိုၼ်ႉတီႈၼမ်ႉထူမ်ႈၼႆႉ ယိင်ႈၶႅၼ်းၵႂၢင်ႈမႃးထႅင်ႈဢေႃႈ။ မၢင်ဝၢၼ်ႈတီႈဢၼ်မီးတီႈယၢၼ်းတီႈတႅမ်ႇႁႅင်းၼၼ်ႉ ၼမ်ႉၵေႃႈၸႅဝ်ႈႁႅင်းၼႃႇလႄႈ ႁိူဝ်းတႃႇၸွႆႈထႅမ် ဢမ်ႇထိုင်လႆႈ။ လူဝ်ႇႁိပ်ႈၼႅတ်ႈ ၵႂႃႇတေႃႉၵူၼ်းဢွၵ်ႇမႃးဢေႃႈ။ ၽေးငူးၽေးတူဝ်မီးၵွင်ႉၵေႃႈၼမ်ၼႃႇၶႃႈ ႁႂ်ႈလႆႈၾၢင်ႉၵၼ်ၼႆဢေႃႈ။” – ဝႃႈၼႆ။

တႅၼ်ႈၾၢႆတႅၵ်ႇလႄႈ ၼမ်ႉထူမ်ႈၼႂ်းၸႄႈဝဵင်းလေးမျႅတ်ႉၼႃႇၼႆႉႁိုင်ၼၢၼ်းမႃးလႆႈ 6 ဝၼ်းယဝ်ႉသေတႃႉ ၸုမ်းၸွႆႈထႅမ်ပႆႇၸၢင်ႈၶဝ်ႈၸွႆႈဢဝ်ၵူၼ်းထူပ်းၽေးၼမ်ႉဢွၵ်ႇမႃးလႆႈမူတ်း။

ၵွပ်ႈၼႆတိုၵ်ႉလူဝ်ႇတၢင်းၸွႆႈထႅမ်လွင်ႈၶဝ်ႈၼမ်ႉတၢင်းၵိၼ် ၊ ၾႆးထၢတ်ႈ၊ မၢၵ်ႇထၢၼ်ႇ၊ တဵၼ်း၊ ၾႆးၶိတ်ႇ၊ ယႃႈယႃ၊ တၢင်းၵိၼ်တၢင်းယမ်ႉလႄႈ ၶူဝ်းၸႂ်ႉသွႆၼၢင်းယိင်းၸိူဝ်းၼႆႉယူႇထႅင်ႈ ၸုမ်းၸွႆႈထႅမ်လၢတ်ႈၼင်ႇၼႆ။