မိူဝ်ႈဝႃး ဝၼ်းတီႈ 3 လိူၼ်ဢေႃးၵၢတ်ႉၼမ်ႉသၢႆၼွင်းႁႅင်း တႅၼ်ႈမႂ်ႇႁႄႉၾင်ႇ ၾၢႆႇတႃႈၶီႈလဵၵ်း ၵူၼ်ႇပင်း ပႃးၸဵမ်ထူင်လိၼ်ထူင်သၢႆး ၸိူဝ်းၶပ်ႉႁႄႉဝႆႉၸိူဝ်းၼၼ်ႉၵေႃႈလွင်ႈလႆၸွမ်း ၼမ်ႉမူတ်း ႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်ၼမ်ႉလူၼ်ႉၾင်ႇ ၶဝ်ႈထူမ်ႈဝဵင်းထႅင်ႈ ။

တႅၼ်ႈႁႄႉၾင်ႇၼမ်ႉ ၾၢႆႇဝဵင်းတႃႈၶီႈလဵၵ်းၼႆႉ ၶႃႈႁၢပ်ႇၵၢၼ်ၶုၼ်တႂ်ႈသိုၵ်းမၢၼ်ႈၸင်ႇႁႃႁဵတ်းယဝ်ႉၵႂႃႇၵူၺ်း မႃးၵူၼ်ႇလွင်ႈၸွမ်းၼမ်ႉသၢႆၼွင်း။ တႃႇတေၶိုၼ်းႁဵတ်းမႂ်ႇမႂ်ႇႁႄႉၵမ်းလဵဝ် ၼၼ်ႉၵေႃႈ သမ်ႉတေလႆႈတၢင်ႇလိၵ်ႈယွၼ်းငိုၼ်းတီႈၾၢႆႇၵဵဝ်ႇၶွင်ႈထႅင်ႈလၢႆၸၼ်ႉလၢႆၶၵ်ႉလႄႈ တႃႇတေၶိုၼ်း ၵေႃႇသၢင်ႈႁႂ်ႈယဝ်ႉတူဝ်ႈၶိုတ်းၶၢဝ်းတႄႉဢမ်ႇငၢႆႈငၢႆႈ – ၸၢင်ႈႁဵတ်းႁႂ်ႈ ၵၢၼ်မူၼ်ႉမႄးသၢင်ႈၾၢႆႁႄႉ ၼမ်ႉ ၸိူင်ႉထိူင်းၵႂႃႇႁႅင်း -ၼႆယဝ်ႉ။

ၵူၼ်းမိူင်းၵေႃႉယူႇဝႆႉၼႂ်းဝဵင်းတႃႈၶီႈလဵၵ်းလၢတ်ႈၼႄတီႈၽူႈတွႆႇႁွၵ်ႈဝႃႈ “ၼႂ်းၶၢဝ်းတၢင်းသွင်ဝၼ်းၼႆႉ ၾူၼ်တႄႉဢမ်ႇတူၵ်းၼင်ႇၵဝ်ႇ။ ၵူၺ်းၾႃႉတႄႉငိုပ်းဝႆႉယူႇတင်းဝၼ်း။ လႅတ်ႇ ၵေႃႈဢမ်ႇဢွၵ်ႇ။ ၾၢႆဢၼ်ၵူၼ်ႇလႅဝ်ၵႂႃႇၼၼ်ႉ ဢမ်ႇၸႂ်ႈတၢင်းမၢၵ်ႇၵႃႇႁူဝ်ၶမ်း ပဵၼ်တၢင်းႁိမ်းၶူဝ်မၢႆ 1 ဢၼ် ႁဝ်းၵႆႉလတ်းၶၢမ်ႈၵႂႃႇၶၢမ်ႈမႃးၼၼ်ႉဢေႃႈ။ ၼမ်ႉသၢႆတႄႉ ၼမ်ၶိုၼ်ႈမႃးယူႇတိၵ်းတိၵ်းယဝ်ႉ။ ပေႃးၼမ်မႃးႁႅင်းလိူဝ်ၼႆႉတႄႉ ၵူဝ်ၼမ်ႉသၢႆၼွင်းႁႅင်းႁႄ လူၼ်ႉၾင်ႇမႃးထူမ်ႈသႂ်ႇၼႂ်းပွၵ်ႉတႃႈလေႃႉၵူၺ်း ယဝ်ႉၶႃႈ။ ႁဝ်းယၢမ်ႈၺႃး ၼမ်ႉထူမ်ႈမႃး 2 ပီထပ်းၵၼ်ယဝ်ႉလႄႈ ယၢမ်းလဵဝ်ၵေႃႈ ႁၢင်ႈႁႅၼ်း ၶၢႆႉၶူဝ်းၶွင်ဝႆႉသုင်ၽွင်ႈယူႇဢေႃႈ။ တႃႇမႄးၶိုၼ်းၼၼ်ႉ ၶဝ်သမ်ႉ လူဝ်ႇတၢင်ႇပဵၼ်ၸၼ်ႉပဵၼ်ၸၼ်ႉ သမ်ႉၵူၼ်ႇၾင်ႇၾၢႆႇမၢၼ်ႈၼႆ ႁူႉယူႇၶႃႈႁိုဝ်လႃႇ လၢႆးမၢၼ်ႈႁဵတ်းၵၢၼ်” ဝႃႈၼႆ။

ၶၢဝ်းၾူၼ်ပီလႂ်ၵေႃႈ ၼမ်ႉသၢႆၼွင်းလူၼ်ႉၾင်ႇသေ လုပ်ႇၶဝ်ႈၼႂ်းသဵၼ်ႈတၢင်း ထူမ်ႈပႃးႁိူၼ်းယေး ၵူၼ်းမိူင်း ၸိူဝ်းယူႇၼႂ်းပွၵ်ႉ ပုင်းထုၼ်၊ ပွၵ်ႉတႃႈလေႃႉ ၊ ပွၵ်ႉပုင်ႇလူဝ်ႉ ၊ ပွၵ်ႉမႄႈ ၶၢဝ်၊ သၼ်သၢႆးတႆး၊ သၼ်သၢႆးလိုဝ်ႉ လႄႈ ပွၵ်ႉမၢၵ်ႇၵႃႇႁူဝ်ၶမ်းၸိူဝ်းၼႆႉ ႁၢဝ်ႈႁႅင်းၵူႈပီ ၼႆယဝ်ႉ။

“ပီၼႆႉတႄႉ ၼမ်ႉသၢႆ ၶိုၼ်ႈဝႆးလူင်းဝႆးဝႆႉၼင်ႇၵဝ်ႇၶႃႈဢေႃႈ။ ၼႂ်းပီၼႆႉၵူၺ်း ၼမ်ႉသၢႆၼွင်းၶိုၼ်ႈယဝ်ႉ သွင်သၢမ်ၵမ်းယဝ်ႉၶႃႈ။ ၾူၼ်ၼႆႉ မၼ်းတူၵ်းၵၢင်ၶိုၼ်းႁႄ ၵၢင်ၼႂ်မႃးသမ်ႉ ၼမ်ႉသၢႆၼွင်းၵမ်းလဵဝ်။ ၵူၺ်းပီၼႆႉ ၾၢႆႇၸဝ်ႈၼႃႈတီႈၶဝ် လၢင်းႁွင်ႈၼမ်ႉမႄႈသၢႆ ၶုတ်းဢဝ်ငႂ်ႈၼႂ်းမၼ်းဢွၵ်ႇပၼ် ၶိုၼ်းလႄႈ လႆႈဝႃႈ ၼမ်ႉထူမ်ႈၼႆႉ ၶႅၼ်းမႃးႁႄၵူႈပီယူႇ။ ၵူႈပီပူၼ်ႉမႃးတႄႉ ၼမ်ႉၼႆႉ ၶဝ်ႈၽႅဝ်ၼႂ်းႁိူၼ်းႁဝ်းၵွၼ်ႇဢေႃႈ။ သႂ်ႇသၢႆးလၢႆထူင်ႁႄ ႁႄႉၵေႃႈ လူၼ်ႉတိၵ်းတိၵ်း။ ပီၼႆႉတႄႉ ၼမ်ႉၼွင်းၶိုၼ်ႈမႃးၵေႃႈ ၽႅဝ်ၼႂ်းႁွင်ႈၵူၺ်း ဢမ်ႇပႆႇၶဝ်ႈမႃးထိုင် ၼႂ်းႁိူၼ်းၼင်ႇၵဝ်ႇၶႃႈ။ ၵူၺ်းဝႃႈၼၼ်ၵေႃႈ ႁဝ်း တႄႉ ႁၢင်ႈႁႅၼ်းၶၢႆႉၶူဝ်းႁႄ ၾၢင်ႉသတိယူႇဝႆႉယူႇ” ၼႆ လုင်းတႆးၵေႃႉယူႇဝႆႉၼႂ်းဝဵင်းတႃႈၶီႈလဵၵ်း လၢတ်ႈၼင်ႇၼႆ။

တႄႇႁၢင်လိူၼ်ၵျူႊလၢႆႊမႃး ၼမ်ႉသၢႆၼွင်းၶိုၼ်ႈသုင်ပူၼ်ႉၶိတ်ႇသုင်သုတ်းဢၼ်ၸဝ်ႈၼႃႈတီႈမၵ်းမၢႆဝႆႉလႄႈ ႁဵတ်းႁႂ်ႈၵူၼ်းမိူင်း ၸိူဝ်းယူႇၼႂ်းၸႄႈဝဵင်းမႄႈသၢႆ လႄႈ ဝဵင်းတႃႈၶီႈလဵၵ်း မႆႈၸႂ်ၵူဝ်ၾၢႆႁႄႉၼမ်ႉတွင်ႈၾင်ႇ လၼ်ႇၵူၼ်ႇလူႉၵွႆသေ မူၼ်ႉမႄးဢမ်ႇၶိုတ်း ၶၢဝ်းယၢမ်း ၼႆယဝ်ႉ။

မိူဝ်ႈပူၼ်ႉမႃးၼႆႉ ယွၼ်ႉၾူၼ်တူၵ်းႁႅင်းသေ ၶၢဝ်းၾူၼ်ပီလႂ်ၵေႃႈ ဝဵင်းတႃႈၶီႈလဵၵ်း ၺႃးၼမ်ႉသၢႆၼွင်းထူမ်ႈ ယူႇသေတႃႉ ဢမ်ႇႁၢႆႉႁႅင်းမိူၼ်ယၢမ်းလဵဝ်။

ဝၢႆးလင်မႃးၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢိၵ်ႇပႃး သိုၵ်းမၢၼ်ႈ ႁူမ်ႈၵၼ်ၵႂႃႇၶုတ်းဢဝ်ၶမ်း လႄႈ ၶူဝ်းႁႄႈတိုၼ်းလၢင်း ၸွမ်းသၢပ်ႇၵႄးမႄႈၼမ်ႉသၢႆ လႅၼ်လိၼ်တႆး-ထႆးမႃးၼမ်ႁႅင်းလႄႈ ႁဵတ်းႁႂ်ႈဢူၼ်ငႂ်ႈၸိူဝ်းၼႆႉ လူင်းမႃးၶမ်ယိုင်ႈဝႆႉၼႂ်းမႄႈၼမ်ႉသၢႆ ထိုင်တီႈႁၢႆႉၸႃႉႁႅင်းတေႉတေႉဝႃႈဝႃႈ ၼႆယဝ်ႉ။