ယွၼ်ႉဢိင်ႇသၼ်ႇႁႅင်းယႂ်ႇ ဢၼ်တူင်ႉၼိုင်သၼ်ႇၶွၼ်းၵႂႃႇတီႈမိူင်းဝႅၼ်ႊၼီႊသွႆႊလႃႊ ၼႂ်းလိူၼ်ၵျုၼ်ႊ ပူၼ်ႉမႃးၼၼ်ႉသေ ထိုင်မႃးယၢမ်ႈလဵဝ် မီးၵူၼ်းလူႉတၢႆၵႂႃႇထိုင် 6000 ပၢႆယဝ်ႉ ဝႃႈၼႆ။
မိူဝ်ႈဝၼ်းတီႈ 24 လိူၼ်ၵျုၼ်ႊပူၼ်ႉမႃးၼၼ်ႉ ဢိင်ႇသၼ်ႇ တၢင်းႁႅင်း 7.2 လႄႈ 7.5 မႅၵ်ႊၼီႊၵျုတ်ႊ ၶႅၼ်ႈၵၼ် မွၵ်ႈ 40 ၸႅၵ်ႉၵၢၼ်ႉသေ သၼ်ႇၶွၼ်းၵႂႃႇ တီႈမိူင်းဝႅၼ်ႊၼီႊၸွႆႊလႃႊ။ ၼႂ်းၸႄႈတွၼ်ႈ ၾင်ႇပၢင်ႇလၢႆႇ လႃႊၵႂႃႊရႃႊ (La Guaira) မီးလွင်ႈတုမ်ႉတိူဝ်ႉၼမ်ႁႅင်းသုတ်း၊ တၢင်ႇပိုၼ်ႉတီႈၵေႃႈ လႆႈႁူပ်ႉလွင်ႈလူႉသုမ်း ၼမ်လႄႈဢေႇ မိူၼ်ၵၼ်။
ယွၼ်ႉဢိင်ႇသၼ်ႇသေ ႁူင်းၵေႃႇၵၢႆႇ ႁိူၼ်းယေးတီႈယူႇသဝ်း ၵူၼ်ႇပင်းလူႉၵွႆၵႂႃႇမွၵ်ႈ 200 ပၢႆ။ မိူဝ်ႈဢွၼ်တၢင်း ၽူႈမီးပုၼ်ႈၽွၼ်းၶဝ်ပိုၼ်ၽၢဝ်ႇသဵၼ်ႈၸိုဝ်ႈၵူၼ်းလူႉတၢႆ မီး 5546 ၵေႃႉ ၼႆသေတႃႉ ယၢမ်းလဵဝ် ႁူဝ်ၼပ်ႉၵူၼ်းလူႉတၢႆ တိူဝ်းၼမ်ၶိုၼ်ႈမႃးထိုင် 6000 ပၢႆ။
လူင်ပွင်ၸိုင်ႈ မိူင်းဝႅၼ်ႊၼီႊသွႆႊလႃႊ ပႆႇပိုၼ်ၽၢဝ်ႇဝႆႉ ႁူဝ်ၼပ်ႉၵူၼ်းႁၢႆလၢႆတႅတ်ႈတေႃးသေတႃႉ တူဝ်ႈမိူင်းပတ်းပိုၼ်ႉ ၶၢတ်ႈလၢမ်းဝႃႈ မီးၵူၼ်းႁၢႆဝႆႉ မွၵ်ႈ 1 မိုၼ်ႇၵေႃႉ ဝႃႈၼႆ။
ယၢမ်းလဵဝ် ၵူၼ်းမိူင်းၸိူဝ်းယူႇသဝ်း ၼႂ်းဝဵင်း ၵရႃႊၵႅတ်ႉသ် (Caracas) လႄႈ လႃႊၵႂႃႊရႃႊ မွၵ်ႈ 24000 ၵေႃႉၼႆႉ လႆႈဢွၼ်ၵၼ်ယူႇသဝ်း ၼႂ်းသုမ်ႉသွင်းၸူဝ်ႈၶၢဝ်းဝႆႉ။
လူင်ပွင်ၸိုင်ႈၸူဝ်ႈၶၢဝ်း မိူင်းဝႅၼ်ႊၼီႊၸွႆႊလႃႊ လၢတ်ႈဝႃႈ – လႆႈႁၢင်ႈႁႅၼ်းႁိူၼ်းယေးတီႈယူႇဝႆႉပၼ် တႃႇၵူၼ်းထူပ်းၽေးဢိင်ႇသၼ်ႇ မွၵ်ႈ 4000 လင်။ တေႃႇထိုင်ပီ 2027 သဵင်ႈ တေဢၢၼ်းႁၢင်ႈႁႅၼ်း ၵမ်ႉၸွႆႈထႅမ်ပၼ်ၵႂႃႇ တႃႇ 1 မိုၼ်ႇလင် ဝႃႈၼႆ။
ၾၢႆႇၼိုင်ႈၵေႃႈ ဝၢႆးသေ တပ်ႉၶိုၵ်ႉတွၼ်းဢမေႊရိၵၼ်ႊ ၶဝ်ႈလူမ်ႇတိုၵ်း တီႉၺွပ်းဢဝ် တူဝ်ၸွမ်ၸိုင်ႈ မိူင်းဝႅၼ်ႊၼီႊၸွႆႊလႃႊ ၼိတ်ႉၵူဝ်လႅတ်ႉ မႃႊတူႊရူဝ်ႊ ၵႂႃႇ ၼႂ်းႁူဝ်ပီ 2026 ၼႆႉယဝ်ႉ ယၢမ်းလဵဝ် ရူဝ်ႊတရီႊၵတ်ႉသ် ႁပ်ႉပဵၼ်ၸွမ်ၸိုင်ႈၸူဝ်ႈၶၢဝ်းသေ ဢွၼ်ႁူဝ်မိူင်းဝႅၼ်ႊၼီႊၸွႆႊလႃႊဝႆႉ။
တႅမ်ႈ – ၼၢင်းငိုၼ်းႁွမ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ