မိူဝ်ႈၼႆႉ ယၢမ်းဝၢႆးဝၼ်းၾၢႆႇတၢင်း ICRC ၸုမ်းၶႂၢႆႇၶႃပႄလႅင် ဝဵင်းလူင်တႃႈၵုင်ႈ မိူင်းမၢၼ်ႈ ပိုၼ်ၽၢဝ်ႇဢွၵ်ႇမႃးပဵၼ်တၢင်းၵၢၼ်တီႈၼႃႈဝႅပ်ႉသၢႆႉၶဝ်ဝႃႈ – တူဝ်တႅၼ်း ICRC လႆႈႁူပ်ႉဢုပ်ႇတင်း ၻေႃႇဢွင်ႇသၢၼ်းၸူႉၵျီႇ ၼႂ်းဝၼ်းတီႈ 3/8/2026 ။

ပဵၼ်ၶူင်းၵၢၼ် ICRC ဢၼ်ၼိုင်ႈ ၼႂ်းႁူဝ်ၶေႃႈ ဢႅဝ်ႇယဵမ်ႈၵူၼ်းထုၵ်ႇၵုမ်းၶင် ။ လႆႈဢုပ်ႇၵုမ်ၸွမ်း ၻေႃႇဢွင်ႇသၢၼ်းၸူႉၵျီႇ ပဵၼ်သုၼ်ႇတူဝ် ၊ တႃႇႁႂ်ႈၽူႈထုၵ်ႇၵုမ်းၶင် လႆႈႁူႉ လႆႈလႅၵ်ႈလၢႆႈၶၢဝ်ႇငၢဝ်းၸူးထိုင် ၵူၼ်းၼႂ်းမုင်ႉႁေႃႁိူၼ်း – ဝႃႈၼႆ။

ၵူၺ်းၵႃႈ လႆႈတူၵ်းလူင်းၵၼ်တင်း ၸုမ်းၾၢႆႇၵုမ်းၶင်ဝႃႈ ဝႆႉပဵၼ်လွင်ႈလပ်ႉ ၼႆလႄႈ ၶေႃႈမုလ်းၶၢဝ်ႇသၢၼ် ဢမ်ႇၸၢင်ႈပိုတ်ႇၸႅင်ႈပဵၼ်တၢင်းၵၢၼ် ပႃးဝႆႉၼင်ႇၼႆသေ ဢၼ်တၢင်တူဝ်မူႇၸုမ်းသေၵႂႃႇႁူပ်ႉထူပ်းဢွင်ႇသၢၼ်းၸူႉၵျီႇၼႆႉ ပဵၼ်ၽႂ်ၼႆၵေႃႈ ဢမ်ႇပိုၼ်ၽၢဝ်ႇပႃးၸိုဝ်ႈသဵင်ဝႆႉ။

ICRC ၸႅင်ႈၼေပႃးဝႃႈ – ၼႂ်းၵၢၼ်ႁူပ်ႉထူပ်းၵၼ်ၵမ်းၼႆႉ ယိူင်းဢၢၼ်းတႃႇပဵၼ်ၽႅၼ်ၵၢၼ် သိုပ်ႇၶဝ်ႈသူႇဢႅဝ်ႇယဵမ်ႈၸူး ၽူႈထုၵ်ႇၵုမ်းၶင် (ၵူၼ်းတူၵ်းၶွၵ်ႈ) ၸိူဝ်းၶဝ်ႈႁႃယၢပ်ႇ – ဝႃႈၼႆ။

ၵူၺ်းၵႃႈ ၶႅပ်းႁၢင်ႈဢၼ်ၽူႈတၢင်တူဝ် ICRC ၵႂႃႇႁူပ်ႉထူပ်းတင်း ဢွင်ႇသၢၼ်းၸူႉၵျီႇၼၼ်ႉတႄႉ ၶဝ်ဢမ်ႇပိုၼ်ၽႄႈတၢင်ႇၼေပႃး။ ၵူၺ်းဢဝ်ၶႅပ်းႁၢင်ႈ မဵတ်ႇမၢႆ ၶႂၢႆႇၶႃပႄလႅင်ၶဝ်ၼၼ်ႉတၢင်ႇဝႆႉၵူၺ်း။