ၸၢႆးၵေႃႉယူႇၼႂ်းၸႄႈတွၼ်ႈၶျူၼ်ႊပူႊရီႊ မိူင်းထႆး ၵေႃႉယၢမ်ႈၺႃးတၢင်းၽိတ်းၵၼ်ႉၸၼ်လူလၢႆလုၵ်ႈဢွၼ်ႇ၊ ၶႃႈႁႅမ်ၵူၼ်းတၢႆ လႄႈ ယိပ်းၵွင်ႈလူၺ်ႈဢမ်ႇမီးဝႂ်ၶႂၢင်ႉၼၼ်ႉ ၸင်ႇႁႃလႆႈဢွၵ်ႇၶွၵ်ႈၶင်မႃးပႆႇႁိုင် 2 လိူၼ် ပေႃးၶိုၼ်းၶႃႈႁႅမ်ၵူၼ်းတၢႆထႅင်ႈ 5 ၵေႃႉယဝ်ႉလႄႈ ၸဝ်ႈၼႃႈတီႈပလိၵ်ႈၶဝ် တီႉၺွပ်းယဵတ်ႈသႂ်ႇၶွၵ်ႈၶိုၼ်း ဝႃႈၼႆ။

လႆႈႁူႉဝႃႈ ၸၢႆးၵေႃႉၼႆႉ ၸိုဝ်ႈႁွင်ႉဢၢႆႈပွင်ထၼႃး ဢႃယု 39 ပီ ယၢမ်ႈတူၵ်းၶွင်ႈၶင်မႃးယဝ်ႉ 3 ၵမ်း။ မၼ်းၸၢႆးႁူမ်ႈၵၼ်တင်း ဢၢႆႈထူင်း ထူင်းၶျႆး ဢႃယု 46 ပီသေ ပွမ်တူဝ်ပဵၼ်ပလိၵ်ႈထႆးယဝ်ႉ ႁႄႉရူတ်ႉၶိူင်ႈလုၵ်ႈဢွၼ်ႇၸၢဝ်းရတ်ႉသျႃႊ 2 ပီႈၼွင်ႉ တီႈမိူင်းၽတ်ႉထယႃး (ပိုၼ်ႉတီႈၶႅၵ်ႇၵူၼ်းၼွၵ်ႈမိူင်းၵႂႃႇဢႅဝ်ႇယဵမ်ႈတွင်ႈတဵဝ်း) သေ ႁွင်ႉဢဝ်ၵႂႃႇၶႃႈႁႅမ်တၢႆ ၾင်ပႅတ်ႈ ၼႂ်းပႃႇသၢၵ်ႈငႅဝ်ႉ ၼႂ်းၸႄႈတွၼ်ႈၶျူၼ်ႊပူႊရီႊ ၼႆယဝ်ႉ။

ၸၢဝ်းရတ်ႉသျႃႊ 2 ပီႈၼွင်ႉ ဢၼ်ၺႃးၶႃႈႁႅမ်တၢႆၵႂႃႇၼၼ်ႉ ၵေႃႉပဵၼ်ပီႈၼၢင်း ၸိုဝ်ႈႁွင်ႉ -တၢႆႊယႃႊယႃႊ ၼႃႊသီႊမူဝ်ႊဝႃႊ ဢႃယု 22 ပီ လႄႈ ၼွင်ႉၸၢႆး ၸိုဝ်ႈႁွင်ႉ- ရူဝ်ႊမႅၼ်ႊၼႃႊသီႊမူဝ်ႊဝႃႊ ဢႃယု 17 ပီ။

လွင်ႈတၢင်းပိူင်ပဵၼ်တႄႉ မိူဝ်ႈဝၼ်းတီႈ 26 လိူၼ်ၵျူႊလၢႆႊ ယၢမ်းၵၢင်ၼႂ်ၸဝ်ႉ 4 မူင်း ၶႃပီႈၼွင်ႉၶီႇရူတ်ႉၶိူင်ႈတၢင်ႇၵၼ်သေ ဢွၵ်ႇႁိူၼ်းမႃး။ ၽွင်းၽႅဝ်ၼိူဝ်သဵၼ်ႈတၢင်းလူင် ၽတ်ႉထယႃႊ- ၶျူၼ်ႊပူႊရီႊ ၺႃးဢၢႆႈပွင်လႄႈဢၢႆႈထူင်း ၶီႇရူတ်ႉၶိူင်ႈမႃး ပွမ်တူဝ်ပဵၼ် ပလိၵ်ႈထႆးသေ ႁႄႉႁူတ်ႉၶိူင်ႈၶႃပီႈၼွင်ႉၵူတ်ႇထတ်း။ ဝၢႆးၼၼ်ႉတီႉဢဝ်ၶႃပီႈၼွင်ႉၵႂႃႇ။ ၼွင်ႉၸၢႆးမၼ်း ၶိုၼ်းတေႃႇသူႈထုပ်ႉတွႆႇၶႃသွင်ၵေႃႉလႄႈ ဢၢႆႈပွင်ၸင်ႇယိုဝ်းတၢႆပႅတ်ႈ။ ဝၢႆးၼၼ်ႉ ဢၢႆႈပွင်ထုပ်ႉတွႆႇၵေႃႉပဵၼ်ပီႈၼၢင်း ထိုင်မဝ်းမိင်းလိုမ်းတူဝ်ၵႂႃႇ (တၢႆဢမ်ႇတၢႆတႄႉဢမ်ႇႁူႉ)။ ဝၢႆး ၼၼ်ႉဢၢႆႈပွင် ႁႂ်ႈဢၢႆႈထူင်း ၶုတ်းလိၼ်ႁႂ်ႈပဵၼ်လုၵ်းလိုၵ်ႉပဵင်းဢူၵ်းၼႆႉသေၾင်ပႅတ်ႈတႂ်ႈတူၼ်ႈမၢၵ်ႇပၢဝ်ႉ – ဝႃႈၼႆ။

ပေႃႈမႄႈလုၵ်ႈဢွၼ်ႇၸၢဝ်းရတ်ႉသျႃႊ ၵႂႃႇတိူင်ႇလၢတ်ႈတီႈပလိၵ်ႈလႄႈ ၾၢႆႇၸဝ်ႈၼႃႈတီႈထႆးၶဝ် ၸွႆႈၵၼ်ၸွမ်းႁႃႁိုင်ၶၢဝ်းတၢင်း 5 ဝၼ်းသေတႃႉ ဢမ်ႇထူပ်းႁၼ်တီႈလႂ်။ လိုၼ်းသုတ်း ၸင်ႇၸွမ်းတူၺ်းၵွင်ႈထႆႇ CCTV သေ လိုပ်ႈလမ်းတီႉၺွပ်း ဢၢႆႈပွင် တင်း ဢၢႆႈထူင်း။ ၶႃသွင်ၵေႃႉ လႆႈငိၼ်းၶၢဝ်ႇဝႃႈ ပလိၵ်ႈလမ်းတီႉၼႆလႄႈ ၸူဝ်းၵၼ်ပၢႆႈ ဢၢၼ်းၶၢမ်ႈလႅၼ်လိၼ်ၵႂႃႇ မိူင်းၵမ်ႊပေႃႊတီႊယႃႊ ၺႃးပလိၵ်ႈတီႉဢဝ်လႆႈ ၼႂ်းမိူင်းသႃႇၵႅဝ်ႈ တီႈလႅၼ်လိၼ်။

ၼုမ်ႇၸၢႆး 2 ၵေႃႉ ၽူႈပူၼ်ႉပႅၼ်တၢင်းၽိတ်းၶႃႈႁႅမ်ၵူၼ်းတၢႆ ယွမ်းႁပ်ႉပိုတ်ႇလၢတ်ႈဝႃႈ “လႆႈလူင်းမိုဝ်းၶႃႈႁႅမ်ၶႃပီႈၼွင်ႉတႄႉ။ ဢၢၼ်းၸူၼ်ရူတ်ႉၶိူင်ႈၶႃႈပီႈၼွင်ႉ ။ ၽိူဝ်ႇၶႃႈႁႅမ်တၢႆၾင်ယဝ်ႉယႃႇဢၢၼ်းမႃးယႃႉရူတ်ႉၶိူင်ႈသေဢဝ်ၵႂႃႇၶၢႆၵိၼ် ။ သမ်ႉငိၼ်းၶၢဝ်ႇဝႃႈပလိၵ်ႈလိုပ်ႈလမ်းတီႉၺွပ်း ၼႆလႄႈၼႅတ်ႈဢဝ်ရူတ်ႉၶိူင်ႈၼၼ်ႉၵႂႃႇၽဝ်သေၾင်ပႅတ်ႈထႅင်ႈ”- ဝႃႈၼႆ။

မိူဝ်ႈလိူၼ်ၵျုၼ်ႊဝၼ်းတီႈ 27 ၼၼ်ႉၵေႃႈ ဢၢႆႈထူင်း- ဢၢႆႈပွင် ႁူမ်ႈၵၼ်တင်းဢၢႆႈၽရုၵ်း ဢၢႆႈပွၼ်းသေ ၵႂႃႇတီႉၺွပ်း ၸဝ်ႈၶႅပ်ႈမူ (ၼင်ပွင်းမူ) 2 ၽူဝ်မေး ဢိၵ်ႇလုၵ်ႈယိင်း ဢႃယု 18 ပီ (ႁူမ်ႈၵၼ် 3 ၵေႃႉ) ယဝ်ႉၺွပ်းဢဝ်တၢင်ႇရူတ်ႉၵႃး(ၶွင်ၸဝ်ႈၶႅပ်ႈမူ(ၼင်ပွင်းမူ)) ၼၼ်ႉၵႂႃႇယိုဝ်းတၢႆ ၾင်ပႅတ်ႈႁိမ်းဢၼ်ၶဝ်ၾင်ဝႆႉလုၵ်ႈဢွၼ်ႇရတ်ႉသျႃႊ 2 ပီႈၼွင်ႉ ႁၢင်ႇယၢၼ်ၵၼ်မွၵ်ႈ 400 မီႇတႃႇၵူၺ်း- ဝႃႈၼႆ။

ဢိင်ၼိူဝ်ၶေႃႈပိုတ်ႇပၢၵ်ႇၵႂၢမ်းလၢတ်ႈ ဢၢႆႈပွင် တင်း ဢၢႆထူင်းသေ ၸဝ်ႈၼႃႈတီႈပလိၵ်ႈထႆးၶဝ်ၵႂႃႇၶုတ်းတူၺ်းႁိမ်းႁွမ်းပိုၼ်ႉတီႈၼၼ်ႉ လႆႈထူပ်းႁၼ်တူဝ်တၢႆ ၸဝ်ႈၶႅပ်ႈမူ (ၼင်ပွင်းမူ) ၶဝ်ပေႃႈမႄႈလုၵ်ႈ 3 ၵေႃႉထႅင်ႈ။ ယၢမ်းလဵဝ် ၼုမ်ႇၸၢႆး 4 ၵေႃႉ ၸိူဝ်းႁဵတ်းပူၼ်ႉပႅၼ်ပၵ်းပိူင် ၾိင်ႈမိူင်းသေ ၶႃႈႁႅမ်ၵူၼ်းတၢႆဝႆႉၼၼ်ႉ ၺႃးၵုမ်းၶင်တူဝ်ဝႆႉတီႈႁူင်းပလိၵ်ႈ ႁူၺ်ႈယႂ်ႇ ၶျူၼ်ႊပူႊရီႊ တႃႇသိုပ်ႇဢဝ်ၵႂႃႇၶိုၼ်ႈလုမ်းတြႃး ပၼ်တူတ်ႈတၢမ်ႇ – ၼႆယဝ်ႉ။

ပႃႈဢၢႆႈပွင် ဢၼ်ယူႇၼႂ်းၸႄႈတွၼ်ႈၶျူၼ်ႊပူႊရီႊ လၢတ်ႈဝႃႈ – “ ဢၢႆႈပွင် မီးပီႈၼွင်ႉႁူမ်ႈတွင်ႉ 3 ၵေႃႉ။ ၶဝ်ပဵၼ်လုၵ်ႈဢွၼ်ႇၽၢၼ်ပေႃႈမႄႈ။ ပေႃႈမႄႈၽၢတ်ႇၵၼ်ၸဵမ်လဵၵ်ႉလႄႈ ၵေႃႉပဵၼ်ပႃႈ လႆႈႁပ်ႉဢၢႆႈပွင်လဵင်ႉလူလုမ်းလႃးမႃးတေႃႇယႂ်ႇ။ ပေႃႈဢၢႆႈပွင်ၼႆႉ ပဵၼ်ၵူၼ်းၸႂ်မိူၵ်ႈၸႂ်ၵျၢမ်း။ သင်ႇသွၼ်လုၵ်ႈဢွၼ်ႇၵေႃႈဢဝ်လၢႆးဢဵၵ်းပွင်ႉထႃႉလႃႇ၊ ပေႃႉႁႅမ် ဢဝ်ဝိုတ်ႉ ၶိုၼ်ႈ ၼိူဝ်လင်ၶႃးႁိူၼ်းၸိူဝ်းၼႆႉ။ လိူဝ်ၼၼ်ႉပေႃႈဢၢႆႈပွင်ၼႆႉ ယၢမ်ႈၵၼ်ႉၸၼ်လုၵ်ႈယိင်းမၼ်းၶိုၼ်းလူးၵွၼ်ႇ။ ၵွပ်ႈၼႆလႄႈပႃႈလႆႈဢဝ်ဢၢႆႈပွင်မႃးလဵင်ႉလူ” ဝႃႈၼႆ။

လႆႈႁူႉဝႃႈ ပလိၵ်ႈႁွင်ႉဢဝ်ပႃႈၵေႃႉလဵင်ႉလူဢၢႆႈပွင်မႃးၸဵမ်လဵၵ်ႉ မႃးပၵၼ်တူဝ် (ဢႃႇမၶၢမ်ႇ) ဢဝ်တူဝ်ဢၢႆႈပွင်မိူဝ်းယူႇၶိုၼ်းႁိူၼ်းသေ ၶိုၼ်ႈလုမ်းတြႃးတေႃႇသူႈလိူင်ႈတၢင်းၽိတ်း (ဢမုၶတီး) ၵႂႃႇ ၼႆယဝ်ႇ။

ၽူႈလူင်ႉလႅၼ်ႇ ၾၢႆႇပၢႆးယူႇလီ ၶူၼ်ႉၶႂႃႉလွင်ႈပၢႆးၸႂ် လႄႈ ၾၢႆႇပူၵ်းပွင်လုၵ်ႈဢွၼ်ႇၶဝ်တႄႉတႅမ်ႈဝႆႉဝႃႈ -ၵၢၼ်တီႈပေႃႈမႄႈသင်ႇသွၼ်လုၵ်ႈလၢင်း လူၺ်ႈလၢႆးပေႃႉထုပ်ႉႁႅမ် ဢဵၵ်းထဵၵ်း ပွင်ႉထႃႉလႃႇ လၢႆးၵျၢမ်းၼႆႉ မီးၽွၼ်းႁၢႆႉၸႃႉလူင် 4 ၶေႃႈ။

1- လုၵ်ႈဢွၼ်ႇတေတုမ်ႉတိူဝ်ႉပၢႆးတူဝ်ပၢႆးၸႂ် ငိူဝ်ႈ/ဢမ်ႇလႅတ်း/ဢမ်ႇမီးလွင်ႈယုမ်ႇတူဝ်/ႁႅင်းၸႂ်တူၵ်း
2- ယိူင်ႈႁဵတ်းၸွမ်းလၢႆးၵျၢမ်းလၢႆးမိူၵ်ႈၵူႈဢၼ် ၸႂ်ႉလၢႆးၵျၢမ်းသေၵႄႈလိတ်ႈပၼ်ႁႃ။ ဢဝ်လၢႆးမိူၵ်ႈတၢင်းၵျၢမ်းၼၼ်ႉၵႂႃႇၸႂ်ႉတေႃႇဢူၺ်းၵေႃႉဢူၺ်းသႄႈတီႈႁူင်းႁဵၼ်း၊ ပေႃးယႂ်ႇမႃးၵေႃႈဢဝ်မႃးၸႂ်ႉၼႂ်းတူင်ႇဝူင်းၵူၼ်းပႃး ယဵၼ်းပဵၼ် ယုၵ်းယၢၵ်း/ၵူၼ်းမီးၵွင်ႉငူၼ်ႉလူင် ၼႂ်းဝၢၼ်ႈၼႂ်း ဢိူင်ႇ ၼႂ်းမိူင်း
3- တုမ်ႉတိူဝ်ႉတေႃႇပၢႆးၸႂ်လႄႈ ပၢႆးဝူၼ်ႉ ႁဵတ်းႁႂ်ႈၸႂ်ဢမ်ႇၼိမ် ၸႂ်ပိတ်းပွတ်း တေႃးသယႂ်ႇ ဢမ်ႇမီးလွင်ႈတင်ႈၸႂ် ၺၢၼ်ႇတွင်းၵိုမ်းၵေႃႈဢမ်ႇမီး ၊ လွင်ႈႁုၼ်ႈမုၼ်းဢွၵ်းဢေႃထိူင်း
4- ႁဵတ်းႁႂ်ႈလွင်ႈသိုဝ်ႇသၢၼ် ၵႄႈၵၢင် ပေႃႈမႄႈလႄႈလုၵ်ႈလၢင်းႁၢင်ႇယၢၼ်ႁႅင်း။ မေႃလၢတ်ႈပႅတ်ႉလႅၼ်တႃႇႁူမ်ႇတၢင်းၽိတ်းၸဝ်ႈၵဝ်ႇ ယွၼ်ႉဢမ်ႇမီးတၢင်းၸမ်ၸႂ်ၵၼ်တင်းပေႃႈမႄႈယဝ်ႉလႄႈ ဢမ်ႇမေႃၸႅၵ်ႇယႅၵ်ႈႁူႉလွင်ႈၽိတ်းထုၵ်ႇ လွင်ႈႁဵတ်းသၢင်ႈဢၼ်ယဝ်ႉၵႂႃႇၼၼ်ႉ ႁဵတ်းၽိတ်းယဝ်ႉႁဵတ်းၽိတ်းထႅင်ႈ — ၸဵမ်ၸိူဝ်းၼႆႉ ဝႃႈၼႆ ။

ဢၢႆႈပွင်ၼႆႉ ၸဵမ်မိူဝ်ႈဢႃယုလႆႈ 20 ၶူပ်ႇ ၽွင်းပဵၼ်ပၢၼ်သိၵ်းႁိၵ်းၼၼ်ႉ သမ်ႉပေႃးၵႂႃႇဝၵ်ႉၵႂႃႇတၢဝ်း ၵႂႃႇၵၼ်ႉၸၼ်လုၵ်ႈဢွၼ်ႇယိင်းၼႂ်းဝၢၼ်ႈၼႂ်းဢိူင်ႇသေ ထိုင်တီႈပလိၵ်ႈတီႉၺွပ်း ၶင်ၶွၵ်ႈ၊ ဝၢႆးလင်ပူၼ်ႉတၢမ်ႇၶွၵ်ႈယဝ်ႉ ဢွၵ်ႇမႃးယူႇတၢင်းၼွၵ်ႈၶိုၼ်း သမ်ႉယိပ်းၵွင်ႈယိပ်းၵၢင်ႇသေ ၵႂႃႇလွၵ်ႇငိုတ်ႈပေႉၵိၼ်လူလၢႆ ၸူၼ်ႁိမ်ၶူဝ်းၶွင်ပိူၼ်ႈထႅင်ႈလႄႈၺႃးတီႉယဵတ်ႈၶွၵ်ႈထႅင်ႈ။ လိုၼ်းသုတ်း မိူဝ်ႈပူၼ်ႉမႃး 5 ပီၼၼ်ႉၵေႃႈ တူၵ်းၶွၵ်ႈယွၼ်ႉယိပ်းၵွင်ႈယိပ်းၵၢင်ႇထႅင်ႈ။ လုမ်းတြႃးတႅပ်းတတ်း ၺႃးတူတ်ႈၶွၵ်ႈ 7 ပီ။ ၵူၺ်းၵႃႈ ၾၢႆႇလုမ်းတြႃး လူတ်းယွၼ်ႇပၼ်တၢင်းၽိတ်းလႄႈ ပူၼ်ႉလွတ်ႈဢွၵ်ႇၶွၵ်ႈမႃးမိူဝ်ႈႁူဝ်လိူၼ်ၵျုၼ်ႊ (လိူၼ်ထူၼ်ႈ 6) ပီ 2026 ၼႆႉၵူၺ်း ယူႇတၢင်းၼွၵ်ႈၶွၵ်ႈၶင် ယင်းပႆႇႁိုင်ထိုင် 2 လိူၼ် သမ်ႉပေႃးႁဵတ်းလွင်ႈႁၢႆႉၸႃႉ ၶႃႈ ႁႅမ်ၵူၼ်းတၢႆထႅင်ႈ 5 ၵေႃႉယဝ်ႉ- ဝႃႈၼႆ။

တူတ်ႈတၢမ်ႇဢၼ်မၼ်းၸၢႆးႁဵတ်းၵမ်းၼႆႉ ၵူၼ်းမိူင်းထႆးဢွၼ်ၵၼ်တုၵ်းယွၼ်းၸူးလုမ်းတြႃးဝႃႈ – ႁႂ်ႈပဵၼ်တူတ်ႈတၢမ်ႇတၢႆ -ဝႃႈၼႆသေတႃႉ တေပဵၼ်ႁိုဝ်မႃးတႄႉပႆႇႁူႉၸွမ်း။

ၵေႃႉပဵၼ်ပႃႈ ဢၢႆႈပွင်ၵေႃႈလၢတ်ႈဝႃႈ – တေဢမ်ႇပၵၼ်တူဝ် (ဢႃႇမၶၢမ်ႇ) ဢဝ်ဢွၵ်ႇမႃးၶိုၼ်းယဝ်ႉ။ ယွၼ်ႉဝႃႈ ၵူဝ်မၼ်းၸၢႆးႁဵတ်းလွင်ႈႁၢႆႉၸႃႉ မိူၵ်ႈမႂ်ႈတေႃႇတၢင်ႇၵေႃႉထႅင်ႈ။ ၵွပ်ႈၼႆလႄႈ လုမ်းတြႃးတႅပ်းတတ်းဝႃႈႁိုဝ်ၵေႃႈတေယွမ်းႁပ်ႉလႆႈၵူႈလွင်ႈ – ဝႃႈၼႆ။