မိူဝ်ႈၼႆႉ ဝၼ်းတီႈ 31 လိူၼ်ၵျူႊလၢႆႊ ၵေႃႇမတီႇၾၢႆႇၵုမ်းၵမ် လွင်ႈပိုၼ်ၽႄၸႅၵ်ႇၶၢႆၼမ်ႉမၼ်းၸၢၵ်ႈ တႂ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇမႃးဝႃႈ – ၼမ်ႉမၼ်းၸၢၵ်ႈ (ထၢတ်ႈသီႇ) သႅၼ်း 92 – 95 ၼႆႉ ပုင်ႈၶိုၼ်ႈမႃး 200 ပျႃးပၢႆ၊ ၼမ်ႉမၼ်းၸၢၵ်ႈ (ၻီႊသႄႊလ်) သမ်ႉ ပုင်ႈၶိုၼ်းမႃး 400 ပျႃးပၢႆ ဝႃႈၼႆ။

ယွၼ်ႉၶၼ်ၼမ်ႉမၼ်းၸၢၵ်ႈ ၶိုၼ်ႈမႃးထႅင်ႈလႄႈ ၵူၼ်းမိူင်းတႆးမိူၼ်ၼင်ႇ ဝဵင်းၼမ်ႉၸၢင် ၊ လွႆလႅမ်၊ ပၢင်လူင်၊ တူၼ်ႈတီး ၸိုင်ႈတႆးပွတ်းၸၢၼ်း   ႁႃသိုဝ်ႉၼမ်ႉမၼ်းယၢပ်ႇ၊ လႆႈၶဝ်ႈထႅဝ်ၵၼ်ပႂ်ႉသိုဝ်ႉ၊ ပေႃးဢမ်ႇမီးဝႂ်သိုဝ်ႉၵေႃႈ ဢမ်ႇသိုဝ်ႉလႆႈ ဝႃႈၼႆ ။

ၼၢင်းယိင်းယူႇဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ – “လႆႈႁႃသိုဝ်ႉယၢပ်ႇၼႃႇ ၊ လႆႈၶဝ်ႈထႅဝ်ပႂ်ႉသိုဝ်ႉဢဝ် ၊ ၶၼ်ၼမ်ႉမၼ်းၵေႃႈၶိုၼ်ႈမႃးထႅင်ႈ ၊ ၶိုင်ႈၵႃႊလၢၼ်ႊၼႆႉဢွၼ်တၢင်း 14000 ပျႃး ၵမ်းၼႆႉ 16000 ပျႃး ၊ ၵႃးၵေႃႈၼိုင်ႈလမ်းၼႆႉ ၶဝ်သႂ်ႇပၼ် 3 မိုၼ်ႇပျႃးၵူၺ်းယဝ်ႉ ၊ ဢၼ်ယၢပ်ႇႁႅင်းၼႆႉပဵၼ်ၵူၼ်းဢမ်ႇမီး   ဝႂ်ၵၢတ်ႉသိုဝ်ႉၼမ်ႉမၼ်း  ၊ ပေႃးမီးဝႂ်လၢႆႊသိၼ်ႊသိုဝ်ႉၼမ်ႉမၼ်းၼႆႉ ၵႂႃႇထႅမ်ၼမ်ႉမၼ်းတီႈပၢမ်ႉယႂ်ႇ ၼႆႉၶႅၼ်းဢိတ်ႉ ၊ ပေႃးဢမ်ႇမီးၼႆႉလႆႈၵႃႇထႅမ်တီႈလၢၼ်ႉတင်းၼွၵ်ႈမၼ်း ၊ ၵႃႈမၼ်းပိူင်ႈၵၼ်မွၵ်ႈ ၼိုင်ႈၶိုင်ႈၼႆႉ”- ဝႃႈၼႆ ။

 (ၵၢတ်ႉသိုဝ်ႉၼမ်ႉမၼ်းဢၼ်ဝႃႈၼၼ်ႉ – ၽွင်းႁူဝ်ပီ 2026 ၼႆႉ ႁွင်ႈၵၢၼ်လူင်ၾၢႆႇႁႅင်းထၢတ်ႈ မိူင်းမၢၼ်ႈ တေတႄႇၸႂ်ႉတိုဝ်း ၻီႊၵျိတ်ႊထႄလ်ႊ သႅၼ်းၼိုင်ႈ ။ ယူႇတီႈႁၢၼ်ႉၶၢႆပမ်ႉၼမ်ႉမၼ်းတၢင်းသဵၼ်ႈ တေလႆႈ လူတ်ႇဢႅပ်ႉ Application ဢၼ်ၸၢင်ႈၵူတ်ႇထတ်း သဵၼ်ႈမၢႆၶေႃႈမုလ်း ရူတ်ႉၵႃးလႆႈႁင်းၵူၺ်း ။

ၼင်ႇႁိုဝ်ၵူၼ်းမိူင်း တေဢမ်ႇဢဝ်ရူတ်ႉၶိူင်ႈ လႄႈ ၵႃး ၵႂႃႇသိုဝ်ႉၼမ်ႉမၼ်းၸၢၵ်ႈသႂ်ႇ ၼိုင်ႈလမ်းလႂ် သွင်သၢမ် ပွၵ်ႈၼႆႉ ၾၢႆႇသိုၵ်းမၢၼ်ႈ ၸတ်းပိူင်သိုဝ်ႉၼမ်ႉမၼ်းၸၢၵ်ႈ ႁဵတ်း QR code ဢၼ်ပႃးၶေႃႈမုၼ်းသုၼ်ႇတူဝ် ၸဝ်ႈၶွင်ရူတ်ႉၵႃး ၸိူဝ်းတၢင်ႇမၢႆၾၢင်ဝႆႉ (Wheel Tax) ၼၼ်ႉ သႂ်ႇဝႆႉၼႂ်း Application  သေ တေၵူတ်ႇထတ်း ၸတ်းပိူင်ၵၢၼ်သိုဝ်ႉၶၢႆ ၼမ်ႉမၼ်းၸၢၵ်ႈၵႂႃႇ ။

ရူတ်ႉၶိူင်ႈ လႄႈ ၵႃး ၸိူဝ်းတၢင်ႇမၢႆၾၢင်ဝႆႉပဵၼ်တၢင်းၵၢၼ်ၼၼ်ႉၵူၺ်း မီးသုၼ်ႇၵႂႃႇသိုဝ်ႉ ၼမ်ႉမၼ်းၸၢၵ်ႈသႂ်ႇလႆႈ ၸွမ်းႁၢၼ်ႉၶၢႆၼမ်ႉမၼ်းၸၢၵ်ႈ ဢၼ်ယႂ်ႇဢၼ်လူင်လႄႈ မိူဝ်ႈၵႂႃႇသိုဝ်ႉ ၼမ်ႉမၼ်းၸၢၵ်ႈသႂ်ႇၼၼ်ႉ ၵူၼ်းသိုဝ်ႉတေလႆႈၵႂႃႇ သၵႅၼ်း Scan QR code ယဝ်ႉၸင်ႇသႂ်ႇလႆႈ ။)

ၸွမ်းၼင်ႇ ၵေႃႇမတီႇၾၢႆႇၵုမ်းၵမ် လွင်ႈပိုၼ်ၽႄႈၼမ်ႉမၼ်းၸၢၵ်ႈမိူင်းမၢၼ်ႈ မၵ်းမၼ်ႈဝႆႉၼၼ်ႉ ၼမ်ႉမၼ်းၸၢၵ်ႈ (ဢွၵ်ႉတဵင်း) သႅၼ်း 92 ၼႆႉ ၼိုင်ႈလီႇတႃႇ မီးမွၵ်ႈ 3400 ပျႃး၊ ၼမ်ႉမၼ်းၸၢၵ်ႈ သႅၼ်း 95 ၼႆႉသမ်ႉ ၼိုင်ႈလီႇတႃႇ မွၵ်ႈ 3800 ပျႃး၊ ၼမ်ႉမၼ်းၻီႊသႄႊလ် ယူဝ်းယူဝ်းၼႆႉ ၼိုင်ႈလီႇတႃႇ မွၵ်ႈ 4000 ပျႃး၊ ၼမ်ႉမၼ်းၸၢၵ်ႈ ပရီႊမီႊယမ်ႊ တီႇသႄႇသမ်ႉ ၼိုင်ႈလီႇတႃႇ မွၵ်ႈ 5000 ပျႃး။

ၸိူဝ်းၼႆႉ ပဵၼ်ၵႃႈၶၼ် ဢၼ်သိုၵ်းမၢၼ်ႈ မၵ်းမၼ်ႈဝႆႉပဵၼ် တီႈပၢမ်ႉၼမ်ႉမၼ်း ဢၼ်ယူႇတႂ်ႈၶဝ်ၵုမ်းၵမ်ၵူၺ်း။ တီႈႁၢၼ်ႉၶၢႆၼမ်ႉမၼ်းၸၢၵ်ႈ ႁၢၼ်ႉလဵၵ်ႉ ၼႂ်းပွၵ်ႉၼႂ်းယွမ်ႇလႄႈ ၼႂ်းဝၢၼ်ႈၼွၵ်ႈၼႃးပၢင်ႇၸိူဝ်းၼႆႉ ၼမ်ႉမၼ်းၸၢၵ်ႈၼိုင်ႈလီႇတႃႇ လႆႈပၼ်ထိုင် 1မိုၼ်ႇပျႃး၊ မၢင်တီႈ ၼမ်လိူဝ်ၼၼ်ႉထႅင်ႈ။

လိူဝ်ၼၼ်ႉ ၼႂ်းဝၼ်းတီႈ 30 လိူၼ်ၵျူႊလၢႆႊၼၼ်ႉ ႁွင်ႈၵၢၼ်ၾၢႆႇၾႆးၾႃႉလႄႈ ႁႅင်းထၢတ်ႈ ပိုၼ်ၽၢဝ်ႇလၢတ်ႈဝႆႉထႅင်ႈဝႃႈ ၸဝ်ႈၵႃးၸိူဝ်းၺႃးထုၵ်ႇဢဝ်မၢႆၾၢင်ၵႃးၸဝ်ႈၵဝ် ဢၼ်မိူၼ်ၵၼ် (ယာဉ်နံပါတ်ပြားပွား) ၸိူဝ်းၼၼ်ႉတင်းသဵင်ႈ တေလႆႈၶိုၼ်းတၢင်ႇယွၼ်းၶိုၼ်း QR Code ဢၼ်မႂ်ႇသေ သိုဝ်ႉၼမ်ႉမၼ်းၸၢၵ်ႈၵႂႃႇ ၼႆယဝ်ႉ။

 ဢၼ် ႁွင်ႈၵၢၼ်ၾၢႆႇၾႆးၾႃႉလႄႈ ႁႅင်းထၢတ်ႈၸႂ်ႉဢဝ်ၼႆႉတႄႉပဵၼ်  လိၵ်ႈၵမ်ႉ တီႈၽူႈမီးပုၼ်ႈၽွၼ်း ၾၢႆႇၵဵဝ်ႇၶွင်ႈ ယိုၼ်ယၼ်ပၼ် ဝႂ်မၢႆၾၢင်ရူတ်ႉၵႃးႁဝ်း ပဵၼ်ဝႂ်ဢၼ်တႄႉမၼ်း၊ မၢႆၾၢင်ၸဝ်ႈၶွင်ရူတ်ႉၵႃး ၽိုၼ်မိူၼ်   (မိတ္တူ ) တီႈယူႇၸဝ်ႈၶွင်ရူတ်ႉၵႃး မၢႆၾူၼ်းၵပ်းသိုပ်ႇ ၸိူဝ်းၼႆႉ သေႁႂ်ႈမႃးယိုၼ်ႈယွၼ်း။ လိူဝ်ၼၼ်ႉ တေလႆႈပၼ်ၶေႃႈမုလ်းတဵမ်  မိူၼ်ၼင်ႇ ဝႂ်သဵတ်ႇ ဢၼ်ယၢမ်ႈဢဝ် မၢႆၾၢင်ရူတ်ႉၸဝ်ႈၵဝ်ႇသေ  သိုဝ်ႉၼမ်ႉမၼ်းရူတ်ႉမႃးမိူဝ်ႈၵွၼ်ႇ ၸိူဝ်းၼႆႉတၢင်းသဵင်ႈသေ ဢဝ်မႃးတၢင်ႇယွၼ်း QR Code မႂ်ႇၼႆယဝ်ႉ ။

ၼၢင်းယိင်းဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ၵူႈပွၵ်ႈၼႆႉ ဢဝ် QR Code ရူတ်ႉတၢင်ႇဢၼ်သေ ၵႂႃႇႁႃသိုဝ်ႉၼမ်ႉမၼ်းတီႈပၢမ်ႉၼမ်ႉမၼ်းသႂ်ႇလႆႈယူႇ ၊ ၵမ်းၼႆႉတႄႉ ဢမ်ႇလႆႈယဝ်ႉ ၶဝ်ၵမ်ၵိၼ်းမႃးၼႃႇယဝ်ႉၶႃႈ ၊ မၢႆၾၢင်ရူတ်ႉ  (ယာဉ်နံပါတ်ပြားပွား )မၼ်းၼမ်ၼႃႇ”- ဝႃႈၼႆ ။

ဢိင်ၼိူဝ် ပၼ်ႁႃၵၢၼ်သိုၵ်းၵၢၼ်မိူင်း ပွတ်းတၢင်းမိူင်းဝၼ်းဢွၵ်ႇၵၢင်ၼၼ်ႉသေ ႁဵတ်းႁႂ်ႈ သၢႆသဵၼ်ႈတၢင်းၵႃႉၶၢႆ ၼမ်ႉမၼ်းၸိူဝ်ႉၾႆး ႁိုဝ် ၼမ်ႉမၼ်းၸၢၵ်ႈ ၵပ်ႉၵိၼ်းမႃး ။ တုမ်ႉယွၼ်ႈထိုင် ၵူႈမိူင်းမိူင်း ပႃးၸဵမ်မိူင်းမၢၼ်ႈ မိူင်းတႆး ။ ထိုင်မိူဝ်ႈလဵဝ်ၵေႃႈ ၵၢၼ်ၵႃႉၶၢႆၼမ်ႉမၼ်း ပႆႇၼိမ် ။ မိူဝ်ႈၼႆႉၵႃႈၶၼ်ၼမ်ႉမၼ်းၻီႊသႄႊလ်လုမ်ႈၾႃႉ ၼိုင်ႈပေႇပႃႇ မီးမွၵ်ႈ 345 ၻေႃႊလႃႊ၊ ၼႂ်းမိူင်းမၢၼ်ႈသမ်ႉၶၢႆ ၼိုင်ႈပေႇပႃႇ 1,200,000 ပျႃး ၼႆၾၢႆႇၵၢၼ်ၵႃႉၶၢႆၼမ်ႉမၼ်းၸၢၵ်ႈ ပိုၼ်ၽၢဝ်ႇဝႆႉၼင်ႇၼႆ။