တႄႇႁူဝ်လိူၼ် မတ်ၶျ်ႉၼႆႉ ၼႆႉမႃး ယွၼ်ႉၼမ်ႉမၼ်းၸိူဝ်ႉၾႆး ႁႃသိုဝ်ႉယၢပ်ႇ ၵႃႈၶၼ်ပုင်ႈၶိုၼ်ႈသုင်ႇႁႅင်း  မိူၼ်ၼင်ႇ ၶၼ်ၵုၼ်ႇ ၊ ၵႃႈၵႃး ၼႂ်းမိူင်းတႆးပွတ်းၸၢၼ်း လၢႆလၢႆဝဵင်း ပုင်ႈၶိုၼ်ႈၸွမ်း ၵူၼ်းမိူင်းယၢပ်ႇၽိုတ်ႇတႃႇၵႂႃႇမႃး ဝႆႉဝႃႈၼႆ ။

ၵူၼ်းၵႃႉၶူဝ်းၵုၼ်ႇဝဵင်းၼမ်ႉၸၢင်ႇလၢတ်ႈၽူႈတွႆႇႁွၵ်ႈဝႃႈ -“ ဢမ်ႇၸႂ်ႈဝႃႈ ၼမ်ႉမၼ်းၵူၺ်း ၊ တလဵဝ်ၼႆႉ ၶူဝ်းၵုၼ်ႇၸိူဝ်းၼၼ်ႉၵေႃႈ ဢွၼ်ၵၼ် ႁိမ်ၵၼ်သိုဝ်ႉဝႆႉၼမ်ၼႃႇ ၊ မၢင်မဵဝ်းၼႆႉ ႁႃသိုဝ်ႉ ဢမ်ႇလႆႈယဝ်ႉ ။ ၸဵမ်မိူဝ်ႈ ၶိူဝ်းၵုၼ်ႇမိူင်းထႆးဢမ်ႇၶဝ်ႈၼၼ်ႉၵႃႈၶၼ်ၶိူဝ်းၵုၼ် ပေႃးပုင်ႈၶိုၼ်ႈယူႇယဝ်ႉ ၊ ၵမ်းၼႆႉ ၶႅၼ်းၶိုၼ်ႈ ၊ ႁဵတ်းၵိၼ်ၵၢၼ်သင်ၵေႃႈယၢပ်ႇၼႃႇ”- ဝႃႈၼႆ ။

ယွၼ်ႉၼမ်ႉမၼ်းၸိူဝ်ႉၾႆးၶၢတ်ႇလႄႈ ၵႃႈၵႃး ပုင်ႈၶိုၼ်ႈ မိူၼ်ၼင်ႇ တူၼ်ႈတီး – ၼမ်ႉၸၢင်ႇ ဢွၼ်တၢင်း ၵႃႈၵႃး 4 မိုၼ်ႇပျႃးၼၼ်ႉ ယၢမ်းလဵဝ်ပုင်ႈၶိုၼ်ႈထိုင် 6 မိုၼ်ႇ ပျႃး ၊ မိူၼ်ၼင်ႇ လုၵ်ႉတၢင်းမိူင်းတႆးပွတ်းၸၢၼ်း ၵႂႃႇတင်း မိူင်းတႆးပွတ်းဢွၵ်ႇ မိူၼ်ၼင်ႇ မိူင်းသူႈ – တႃႈၶီႈလဵၵ်း ၸိူဝ်းၼၼ်ႉၵေႃႈ ဢွၼ်တၢင်း 2 သႅၼ်ပျႃး  ယၢမ်းလဵဝ် ပုင်ႈၶိုၼ်ႈထိုင် 2သႅၼ် 5 မိုၼ်ႇပျႃး  ။

ယၢမ်းလဵဝ် ၼမ်ႉမၼ်းၸိူဝ်ႉၾႆး  တီႈဝဵင်းတူၼ်ႈတီး ၼိုင်ႈလဵတ်ႉ 4000 ပျႃး ၊ ဝဵင်းၼမ်ႉၸၢင် ၼိုင်ႈလဵတ်ႉ 8000 ပျႃး ၊ ဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) 8000 ပျႃး လႄႈ ဝဵင်းလၢင်းၶိူဝ်း ၶိုၼ်ႈထိုင် 12000 ပျႃး ဝႃႈၼႆ ။  

တွၼ်ႈတႃႇ တေလႆႈၼမ်ႉမၼ်းၸိူဝ်ႉၾႆး ( ၼမ်ႉမၼ်းၸၢၵ်ႈ) ယၢမ်းလဵဝ် တီႈဝဵင်းတူၼ်ႈတီး  မီးၵူၼ်းၵိၼ်ၸၢင်ႈ ၵႂႃႇၶဝ်ႈထႅဝ် ၵိၼ်ၸၢင်ႈလၢႆးဝၼ်းပၼ်  တီႈပၢၼ်ႉၼမ်ႉမၼ်း ၊ ၼိုင်ႈပွၵ်ႈၼႆႉ လႆႈငိုၼ်းၵိၼ်ၸၢင်ႈ 3 မိုၼ်ႇပျႃး ၼႆယဝ်ႉ ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပေႃးၵႂႃႇၶဝ်ႈထႅဝ် ၼိုင်ႈပွၵ်ႈၼႆႉ ႁိုင် ၶိုင်ႈဝၼ်း ၊ ၼႆႉတင်း ၼမ်ႉမၼ်းၼႆႉ မၢင်ပွၵ်ႈ မူတ်းပႅတ်ႈ ဢမ်ႇလႆႈသိုဝ်ႉ  လႆႈပႂ်ႉသုမ်းၶၢဝ်းယၢမ်းလၢႆလၢႆ ၊ ယွၼ်ႉၼၼ် တီႈတူၼ်ႈတီးၼႆႉ တလဵဝ် ဢွၼ်ၵၼ်ၵိၼ်ၸၢင်ႈၵၼ် ၵႂႃႇၶဝ်ႈထႅဝ်ပႂ်ႉသိုဝ်ႉၼမ်ႉမၼ်း ၊ ၼိုင်ႈပွၵ်ႈၼႆႉ လႆႈငိုၼ်း သၢမ်မိုၼ်ပျႃး ၊ ပေႃးၵူၼ်းႁူႉၸၵ်း ပေႃးၸႂ်ႉၵႂႃႇသိုဝ်ႉတိၵ်းတိၵ်းတႄႉ ၼိုင်ႈပွၵ်ႈၼႆႉ 1မိုၼ်လႆႈယူႇ”- ဝႃႈၼႆ ။

လိူဝ်ၼၼ်ႉ ၵူၼ်းၸိူဝ်းၵႂႃႇပႂ်ႉၶဝ်ႈထႅဝ်ႁိမ် ၵၼ်သိုဝ်ႉၼမ်ႉမၼ်းဝႆႉၼၼ်ႉၵေႃႈ ပိုၼ်ၽၢဝ်ႇ ၶၢႆၼိူဝ် သိုဝ်ႇတူင်ႇဝူင်းသုၼ်တူဝ် ။  တီႈဝဵင်းတူၼ်ႈတီးၼႆႉ ၵူၼ်းသိုဝ်ႉၶၢႆၼိူဝ်သိုဝ်ႇသုၼ်တူဝ်  ၼၼ်ႉ ၶၢႆၼိုင်ႈလိတ်ႉ 5000 ပျႃး ၼႆယဝ်ႉ ။

ယွၼ်ႉပၢင်တိုၵ်း ဢမေႊရိၵၼ်ႊ၊ ဢိတ်ႉသ်ရေးလ် တင်း ဢီႊရၼ်ႊ တီႈထုင်ႉဝၼ်းဢွၵ်ႇၵၢင်  သေ တုမ်ႉယွၼ်ႈပႃး ၸိုင်ႈမိူင်း ၼႂ်းလုမ်ႈၾႃႉ  ဢိၵ်ႇပႃး မိူင်းမၢၼ်ႈ မိူင်းထႆး။   

ၼႂ်းဝၼ်းတီႈ 1 လိူၼ်မၢတ်ႉၶျ်ၼႆႉ ၾၢႆႇလူင်ပွင်ၸိုင်ႈမိူင်းထႆး ပိုၼ်ၽၢဝ်ႇဢွၵ်ႇ ႁႂ်ႈၵိုတ်းယင်ႉ ၵၢၼ်တေႃႉၼမ်ႉမၼ်းၸၢၵ်ႈသူင်ႇၸူး မိူင်းမၢၼ်ႈၸူဝ်ႈၶၢဝ်းၼႆလႄႈ ၵူၼ်းမိူင်း ၸိူဝ်းယူႇသဝ်းၸွမ်းလႅၼ်လိၼ် မိူင်းတႆး-မိူင်းထႆး မိူၼ်ၼင်ႇၸႄႈဝဵင်းတႃႈၶီႈလဵၵ်း၊ ၸႄႈဝဵင်းမျႃႉဝတီႇၸိူဝ်းၼႆႉ ၵိုင်ႉၵၢင်ႉႁူပ်ႉတၢင်းယၢပ်ႇ ၵၢၼ်သိုဝ်ႉၼမ်ႉမၼ်းၸၢၵ်ႈ ၼႆယဝ်ႉ။

ထႆးၼႆႉသိုဝ်ႉ ၼမ်ႉမၼ်းၸၢၵ်ႈဢၼ်လိပ်းမၼ်းတီႈ မိူင်းမၢၼ်ႈ မႃးၶိုင်ထွင်ႁုင်ယႅၵ်ႈသႅၼ်းသေၶိုၼ်းၶၢႆတေႃႇမိူင်းမၢၼ်ႈမိူင်းလၢဝ်း။  ၵူၼ်းမိူင်းတႆးပွတ်းဢွၵ်ႇပွတ်းၸၢၼ်းၵမ်ႈၼမ် ၸႂ်ႉၼမ်ႉမၼ်းဢၼ်ဢဝ်မိူင်းထႆးၶဝ်ႈၶၢႆၸူးၶိုၼ်းၵႃႈယႂ်ႇၵႃႈပႅင်း။

ၼမ်ႉမၼ်းၸၢၵ်ႈၵႃႈၶၼ်ယႂ်ႇ လႆႈႁိမ်ၵၼ်သိုဝ်ႉၼင်ႇယၢမ်းလဵဝ်ၼႆႉ ၵူၼ်းမိူင်းၸိူဝ်းယူႇၸွမ်းလႅၼ်လိၼ်ထႆး မိူၼ်ၼင်ႇဝဵင်းတႃႈၶီႈလဵၵ်း မိူင်းတႆးပွတ်းဢွၵ်ႇလႄႈ မိူင်းမျႃႉဝတီႇ ၸိူဝ်းယူႇတိတ်းၸပ်းလႅၼ်လိၼ်ထႆး ၸိူဝ်းၼႆႉဢွၼ်ၵၼ်ၶၢမ်ႈလႅၼ်လိၼ်ၶဝ်ႈထႅမ်ၼမ်ႉမၼ်းၼႂ်းမိူင်းထႆး တၢင်းမႄႈသၢႆ- မႄႈသွတ်ႇ – ၵၢၼ်းၵျၼ ပူႊရီႊ ၸိူဝ်းၼႆႉ ။

ၵဵဝ်ႇၵပ်းၼမ်ႉမၼ်းၸၢၵ်ႈ(ၼမ်ႉမၼ်းၸိူဝ်ႉၾႆး)ၼႆႉ သိုၵ်းမၢၼ်ႈယိုတ်းမိူင်းတႄႉ လၢတ်ႈဝႃႈ မၼ်းမီးၼမ်ႉမၼ်းၸၢၵ်ႈ- ၵုမ်ႇတႃႇ 40 ဝၼ်းယူႇ ဝႃႈၼႆသေတႃႉ ၾၢႆႇၼိုင်ႈသမ်ႉ ဢွၵ်ႇပိူင်မႃးထႅင်ႈ တႃႇတေလူတ်းယွၼ်ႇၵၢၼ်ၸႂ်ႉၼမ်ႉမၼ်းၼၼ်ႉ ႁႂ်ႈၵူၼ်းမိူင်း ယွမ်းၸႂ်ႉရူတ်ႉၵႃးၵႂႃႇမႃး ၼႂ်းမိူင်းမၢၼ်ႈပတ်းပိုၼ်ႉ ဝႃႈၼႆဝႆႉ။