ၼႂ်းမိူင်းတႆးပွတ်းၸၢၼ်းၼႂ်းဝၼ်းမိူဝ်ႈၼႆႉ ၶၼ်ၵုၼ်ႇၶိုၼ်ႈၵူႈဢၼ်ပႃးၸဵမ်ၶူဝ်းၵုၼ်ႇၵိၼ်ယမ်ႉလႄႈ ၶူဝ်းၵုၼ်ႇၶိူင်ႈၸႂ်ႉၼႂ်းသူၼ် ဢိၵ်ႈ တႃႇလဵင်ႉလူတူဝ်သတ်း – ႁဵတ်းႁႂ်ႈၶၼ်ၶႆႇၵႆႇၵေႃႈပုင်ႈၶိုၼ်ႈထႅင်ႈ ယၢမ်းလဵဝ်ၼိုင်ႈလုၵ်ႈ ၶိုၼ်ႈထိုင် 800 ပျႃးယဝ်ႉဝႃႈၼႆ။

ယွၼ်ႉပိူဝ်ႈသိုၵ်းမၢၼ်ႈႁၢမ်ႈဢဝ်ၶူဝ်းၵုၼ်ႇၼွၵ်ႈမိူင်းၶဝ်ႈမႃးၶၢႆၼႂ်းမိူင်းတင်ႈတႄႇႁူဝ်ပီၼႆႉမႃး ႁဵတ်းႁႂ်ႈၶူဝ်းၶွင်ၵိၼ်ယမ်ႉလႄႈၶူဝ်းၶဝ်ႈသူၼ် ႁႃယၢပ်ႇ။ ဢႃးႁၢရ် တၢင်းၵိၼ်ၵႆႇ/မူ၊ ယႃႈယႃတႃႇသတ်း ၸိူဝ်းၼႆႉႁႃသိုဝ်ႉယၢပ်ႇ ၵႃႈၶၼ်သုင်။ ဢမ်ႇလႆႈသမ်း /လဵင်ႉယႃႈယႃၵႆႇလႄႈၵႆႇၵေႃႈတၢႆၼမ်။ ၸင်ႇဝႃႈ ၼိူဝ်ႉၵႆႇ ၶႆႇၵႆႇၵေႃႈၵႃႈၶၼ်သုင် – ၵူၼ်းလဵင်ႉၵႆႇ ယူႇဝဵင်းတူၼ်ႈတီးၵေႃႉၼိုင်ႈလၢတ်ႈၼင်ႇၼႆ။

“ ဢႃးႁၢရ်ၵႆႇ ႁႃယၢပ်ႇဢေႃႈတလဵဝ်။ ၵႃႈၵေႃႈၵႃႈယႂ်ႇ။ ပေႃးသိုပ်ႇပိၵ်ႉၶူဝ်းၵုၼ်ႇၼမ်းၶဝ်ႈၸိူင်ႉၼႆတိၵ်းတိၵ်းတႄႉ ထႅင်ႈဢိၼ်ႉ တေၶၢတ်ႇတႄႉယဝ်ႉၶႃႈ။ ၵွပ်ႈၼႆၸူဝ်ႈသိုၵ်းမၢၼ်ႈယိုတ်း ဢႃႇၼႃႇၸိုင်ႈမိူင်းမႃးၼႆႉၶႆႇၵႆႇၵေႃႈ ဢၼ်ၸဝ်ႈၾၢမ်းၵႆႇၵႂႃႇသူင်ႇတီႈၶွမ်ႊပၼီႊၶၢႆၼႆႉ လုၵ်ႉတီႈ ၼိုင်ႈလုၵ်ႈ 300 ပျႃးႁေ တလဵဝ်တႄႉၶိုၼ်ႈၵႂႃႇထိုင်မွၵ်ႈ 500 ပျႃးယဝ်ႉဢေႃႈ။ ၸင်ႇဝႃႈ ၶဝ်ၵေႃႈပေႃးဢမ်ႇၶၢႆဢွၵ်ႇၶိုၼ်းၼိုင်ႈလုၵ်ႈ 800 ပျႃးၼႆႉ တေၵိုတ်းသင်ယဝ်ႉၶႃႈလႃႇၼမ်ႉတွၼ်းမၼ်း” – ဝႃႈၼႆ။

ယၢမ်းလဵဝ်ၼႂ်းႁၢၼ်ႉၶၢႆၶူဝ်းၶွင်ၵိၼ်ယမ်ႉၼႂ်းပွၵ်ႉၼႂ်းယွမ်ႇ ၼႂ်းဝဵင်းတူၼ်ႈတီးၵေႃႈ ၶႆႇၵႆႇ လုၵ်ႉတီႈ လုၵ်ႈ 500 သေ ၶိုၼ်ႈမႃးၵူႈလိူၼ် ၊ လိူၼ်ၼႆႉထိုင် ၼိုင်ႈလုၵ်ႈ 800 ပျႃးယဝ်ႉ။ တေႃႈၼင်ႇၶၼ်ၶႆႇၵႆႇၵေႃႈပုင်ႈၶိုၼ်ႈၸိူင်ႉၼႆ- တွၼ်ႈတႃႇၼႃႈႁိူၼ်းဢၼ်ႁႃၸဝ်ႉၵိၼ်ၶမ်ႈၼၼ်ႉ ပဵၼ်ဢၼ်ယၢပ်ႇၽိုတ်ႇၼၵ်းၼႃမႃးထႅင်ႈလိူဝ်ၵဝ်ႇၼႆ မႄႈၸဝ်ႈႁိူၼ်း ၵူၼ်းဝဵင်းတူၼ်ႈတီးၵေႃႉၼိုင်ႈၵေႃႈလၢတ်ႈၼင်ႇၼႆ။

သင်ၸိူဝ်ႉသိုၵ်းမၢၼ်ႈသိုပ်ႇပိၵ်ႉၶူဝ်းၵုၼ်ႇမိူင်းထႆး မိူင်းၶႄႇၼမ်းၶဝ်ႈၼၼ်ႉယူႇၸိူင်ႉၼႆတိၵ်းတိၵ်းၸိုင် ၵူၼ်းလဵင်ႉၵႆႇလဵင်ႉမူ ၸၢင်ႈလႆႈပိၵ်ႉၾၢမ်းၵႆႇၾၢမ်းမူပႅတ်ႈလူးၵွၼ်ႇယဝ်ႉ – မႄႈ ၸဝ်ႈႁိူၼ်းၼၼ်ႉလၢတ်ႈၼင်ႇၼႆ။