သိုၵ်းမၢၼ်ႈယိုတ်းမိူင်း ၸိူဝ်းတူင်ႉၼိုင်ယူႇသဝ်းၸွမ်း ၼႂ်းၸႄႈဝဵင်းယွင်ႁူၺ်ႈ မိူင်းတႆးပွတ်းၸၢၼ်း ႁွင်ႉဢဵၼ်ႁႅင်းၵူၼ်းသေ ၶဝ်ႈသွၵ်ႈၸွမ်းတီႉၺွပ်းဢဝ် ၵူၼ်းၸိူဝ်းႁဵတ်းၵၢၼ်တူင်ႇ ဝူင်းၵူၼ်း ၼႂ်းဝဵင်းယွင်ႁူၺ်ႈ လႄႈ ၼႂ်းထုင်ႉၼွင်ႁၢႆးယႃႈ တီႈမိူင်းတႆးပွတ်းၸၢၼ်း ၼႆယဝ်ႉ။
ပၵ်းပိူင်ၾိင်ႈမိူင်းတွၼ်ႈ 419 ဢၼ်လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း မၵ်းမၼ်ႈၵႂႃႇ မိူဝ်ႈဝၼ်းတီႈ 28 လိူၼ်ဢွၵ်ႉထူဝ်ႊပိူဝ်ႊ ပီ 2022 ၼၼ်ႉ ပႃးဝႆႉဝႃႈ – ၸုမ်းႁဵတ်းၵၢၼ် တူင်ႇဝူင်း ၵူၼ်း ၸိူဝ်းဢမ်ႇၶဝ်ႈပႃးၼႂ်း ႁွင်ႈၵၢၼ်လူင်ပွင်ၸိုင်ႈၼၼ်ႉ တေလႆႈတၢင်ႇမၢႆၾၢင်တၢင်းသဵင်ႈ သင်ဢမ်ႇမီးမၢႆၾၢင်ပဵၼ်တၢင်းၵၢၼ်ၸိုင် တေၺႃးဢဝ်တၢင်းၽိတ်း၊ ပေႃးႁဵတ်းၵၢၼ်ၵဵဝ်ႇ ၵွင်ႉၸွမ်း ၸုမ်းႁဵတ်းၵၢၼ်မိူင်းၵေႃႈ တေၺႃးတူတ်ႈတၢမ်ႇ – ဝႃႈၼႆ။
သိုၵ်းမၢၼ်ႈယိုတ်းမိူင်းၼႆႉ ၸႂ်ႉတိုဝ်းပၵ်းပိူင်ၾိင်ႈမိူင်းတွၼ်ႈၼၼ်ႉသေ ၸွမ်းပၼ်ႁႅင်းဢီး တီႉၺွပ်းဢဝ် ၵူၼ်း လႄႈ ၸုမ်းႁဵတ်းၵၢၼ်တူင်ႇဝူင်းၵူၼ်းႁၢဝ်ႈႁႅင်းယူႇ ၼႂ်းၸႄႈဝဵင်းယွင် ႁူၺ်ႈၼႆ ၵူၼ်းမိူင်းပိုၼ်ႉတီႈ လၢတ်ႈၼင်ႇၼႆ။
ၼုမ်ႇၸၢႆးၵေႃႉႁဵတ်းၵၢၼ်တူင်ႉၼိုင်ယူႇၼႂ်းၸုမ်းတူင်ႇဝူင်းၵူၼ်း လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် ၶဝ်ၸွမ်းတီႉၺွပ်းဢဝ် ၵူၼ်းႁဵတ်းၵၢၼ်တူင်ႇဝူင်းၵူၼ်း CSO တၢင်းယွင်ႁူၺ်ႈ၊ တၢင်းၼႂ်းၼွင်ၼၼ်ႉယူႇ။ တၢင်းၼႂ်းၼွင်တႄႉ မၢင်ၸိူဝ်းၶဝ်ဢဝ်ႁႅင်းသိုၵ်းႁႄ ၵႂႃႇၶဝ်ႈတီႉၺွပ်း။ တၢင်းယွင်ႁူၺ်ႈၼႆႉတႄႉ ၶဝ်ႈၺွပ်းပႃး ၼႂ်းႁူင်းႁႅမ်းၵွၼ်ႇ။ ၵူၼ်းႁူႉၸၵ်းၶႃႈၵေႃႉၼိုင်ႈ ၺႃးၺွပ်းၵႂႃႇယဝ်ႉၶႃႈဢေႃႈ” ဝႃႈၼႆ။
ယွၼ်ႉၸုမ်းသိုၵ်းမၢၼ်ႈယိုတ်းမိူင်းၶဝ် ၸွမ်းတီႉၺွပ်းႁၢဝ်ႈႁႅင်းဝႆႉလႄႈ ၵူၼ်းၸိူဝ်းႁဵတ်းၵၢၼ်ၸုမ်းတူင်ႇဝူင်း ၵူၼ်းၶဝ် လႆႈၵိုတ်းယင်ႉဝႆႉၵၢၼ်ငၢၼ်းၸိူဝ်းလူဝ်ႇတူင်ႉၼိုင်ၼၼ်ႉ – ဝႃႈၼႆ။
လိူဝ်ၼၼ်ႉ ပေႃးထိုင်ၶၢဝ်းၵၢင်ၶမ်ႈၵၢင်ၶိုၼ်းၸိုင် သိုၵ်းမၢၼ်ႈယိုတ်းမိူင်း ပႂ်ႉၸွမ်းသဵၼ်ႈတႃႈသၢႆတၢင်းသေ တီႉၺွပ်းဢဝ် ၵူၼ်းၸိူဝ်းဢွၵ်ႇတၢင်းၼွၵ်ႈၼၼ်ႉ ဝႃႈၼႆ။
ၼၢင်းယိင်းၵေႃႉယူႇၼႂ်းထုင်ႉၼွင်ႁၢႆးယႃႈၵေႃႉၼိုင်ႈ လၢတ်ႈတီႈၽူႈတွႇႇႁွၵ်ႈဝႃႈ “ၶဝ်ၸွမ်းၺွပ်းၵူၼ်းႁဵတ်း ၵၢၼ်တူင်ႇဝူင်းၵူၼ်းၸိူင်ႉၼႆတိၵ်းတိၵ်းတႄႉ မႆႈၸႂ်ၵူဝ်ၵၢၼ်ႁုၼ်ႈမုၼ်းဢမ်ႇ ၸၢင်ႈပၼ်ႇၵၢၼ်ၵူၺ်းယဝ်ႉ။ ၸုမ်းတူင်ႇဝူင်းၵူၼ်းၸိူဝ်းၼႆႉသမ်ႉ လမ်ႇလွင်ႈတႃႇၼႂ်းၵၢၼ်ႁုၼ်ႈမုၼ်းပိုၼ်ႉတီႈ။ ၸုမ်းယိပ်းၵွင်ႈၵၢင်ႇၸိူဝ်း တူင်ႉၼိုင်ယူႇၼႂ်းပိုၼ်ႉတီႈသမ်ႉ ဢမ်ႇၸွႆႈ သင်ၵူၼ်းမိူင်းတေႉတေႉ” ဝႃႈၼႆ။
မိူဝ်ႈႁူဝ်လိူၼ်ဢေႃးၵၢတ်ႉသ်ၼႆႉ ၸုမ်းသိုၵ်းမၢၼ်ႈယိုတ်းမိူင်းၶဝ် တီႉၺွပ်းဢဝ်ၵႂႃႇ ၵူၼ်းၸၢႆးသွင်ၵေႃႉ ဢၼ်လုၵ်ႉတၢင်ႇဝၢၼ်ႈတၢင်ႇဝဵင်းမႃးဢႅဝ်ႇယဵမ်ႈတွင်ႈထဵဝ်းၼႂ်းဝဵင်းယွင်ႁူၺ်ႈၵႂႃႇ ၽွင်းၵၢင်ၼႂ်ၸဝ်ႉၼႆ ၵူၼ်းမိူင်းပိုၼ်ႉတီႈ လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ