ၵူၼ်းမိူင်းၼီႊပေႃႊၸိူဝ်းလူႉတၢႆၵႂႃႇ ယွၼ်ႉၽေးၼမ်ႉလွႆႁူၺ်ႈၼမ်ႉလွႆ ဢၼ်မီးၸွမ်းသၼ်လွႆ ႁိမဝၼ်ႊတႃႊ ၵိုင်ႉၵၢင်ႉဢဝ်ပႃးလိၼ်ၵူမ်ႇဢုင် ပႃးမႆႉပႃးၶႅၵ်ႉသေ ၼွင်းလူင်းမႃးလူၵ်ႈ ဢဝ် ႁိူၼ်းယေးၵူၼ်းမိူင်းၸိူဝ်းယူႇသဝ်း တီႈလႅၼ်လိၼ် ထိပႅတ်ႊမိူင်းၶႄႇ- မိူင်းၼီႊပေႃးၼၼ်ႉ ယၢမ်းလဵဝ် ႁူဝ်ၼပ်ႉၵူၼ်းလူႉတၢႆၽိူမ်ႉထိုင်ၸမ် 500 ၵေႃႉ ႁၢႆဝႆႉမွၵ်ႈ 1500 ၵေႃႉပၢႆ ဝႃႈၼႆ။

ၸုမ်းပလိၵ်ႈမိူင်းၼီႊပေႃႊၶဝ် ဢွၵ်ႇမႃးပိုၼ်ၽၢဝ်ႇႁၢႆးငၢၼ်းဝႆႉဝႃႈ ၵူၼ်းလူႉတၢႆၼႆႉ ယၢမ်းလဵဝ် မီးၵႂႃႇ 469 ၵေႃႉယဝ်ႉ။ တိုၵ်ႉပဵၼ်ၽွင်း သိုပ်ႇသွၵ်ႈႁႃ ၵူၼ်းၸိူဝ်းႁၢႆဝႆႉယူႇၼၼ်ႉလႄႈ ႁူဝ်ၼပ်ႉၵူၼ်းတၢႆ ၸၢင်ႈၽိူမ်ႉၶိုၼ်ႈမႃးထႅင်ႈလိူဝ်ၵဝ်ႇ- ဝႃႈၼႆ။

ၶႅၵ်ႇၵူၼ်းၼွၵ်ႈမိူင်း မိူင်းဢိၼ်ႊတီႊယိူဝ်ႊ၊ မိူင်းဢမေႊရိၵၼ်ႊ၊ မိူင်းပရိတဵင်ႊ၊ မိူင်းဢေႃးသတေးလျႃႊ လႄႈ မိူင်းၵၼေႇတႃႊ ၸိူဝ်းဢွၵ်ႇၶၢဝ်းတၢင်းၵႂႃႇဢႅဝ်ႇယဵမ်ႈတွင်ႈထဵဝ်း ပိုၼ်ႉတီႈၼမ်ႉထူမ်ႈၼၼ်ႉသေ ႁႃတူဝ်ပႆႇ ႁၼ်ၼႆႉ ဢေႇသုတ်း မီးယူႇမွၵ်ႈ 1300 ၵေႃႉ ဝႃႈၼႆ။

ယွၼ်ႉၼမ်ႉၼွင်းထူမ်ႈႁၢဝ်ႈႁႅင်းလႄႈ ၵူၼ်းၸိူဝ်းတိုၵ်ႉၶမ်ယူႇဝႆႉ ၼႂ်းႁူင်းၵၢၼ်ၾႆးၾႃႉ မီးယူႇမွၵ်ႈ 100 ၵေႃႉပၢႆလႄႈ ၾၢႆႇတပ်ႉသိုၵ်းမိူင်းၼီႊပေႃးၶဝ် တိုၵ်ႉၶတ်းၸႂ်ဢဝ်ႁိူဝ်းမိၼ်သေ ၵႂႃႇၸွႆႈဢဝ်ဢွၵ်ႇမႃးယူႇ- ဝႃႈၼႆ။

လႆႈႁူႉဝႃႈ ယွၼ်ႉသဵၼ်ႈတၢင်းၶၢတ်ႇဝႆႉလႄႈ တႃႇၵႂႃႇၸွႆႈထႅမ် ၵူၼ်းၸိူဝ်းႁူပ်ႉၽေးၼမ်ႉႁူၺ်ႈၼမ်ႉလွႆၼွင်း ၼၼ်ႉတပ်ႉသိုၵ်းမိူင်းၼီႊပေႃႊၶဝ် ဢဝ်ႁိူဝ်းမိၼ်ဢွၼ်ႇသေ တေႃႉၵႂႃႇသူင်ႇယူတ်းယႃတူဝ်ဝႆႉတီႈႁူင်းယႃ ဢၼ်ပိုတ်ႇမႂ်ႇဝႆႉၸူဝ်ႈၶၢဝ်းၼၼ်ႉၵူၺ်းဢမ်ႇၵႃး လႆႈတေႃႉဢဝ်ပႃး ၶူဝ်းၶွင်ၵိၼ်ယမ်ႉ ဢၼ်တေၸၢင်ႈၸႂ်ႉတိုဝ်း ၽွင်းတူၵ်းယၢၵ်ႈၵိၼ်းၼႂ်းငဝ်းလၢႆးၶိုၵ်ႉ ၶၵ်ႉၼၼ်ႉၵႂႃႇၸွႆႈထႅမ်ဝႆႉပႃး ဝႃႈၼႆ။

ၾၢႆႇလူင်ပွင်ၸိုင်ႈမိူင်းၼီႊပေႃႊလႄႈ မိူင်းၶႄႇၶဝ် မႆႈၸႂ်လွင်ႈၼိုင်ႈတႄႉ ဢိင်ၼိူဝ်ပိုၼ်ႉလွႆၼမ်ႉၶႅင်ၵူၼ်ႇတူၵ်းမႃးဝႆႉသေ ႁဵတ်းႁႂ်ႈမႃးဢိုတ်းသဵၼ်ႈတၢင်းၵႄးၼမ်ႉဝႆႉလၢႆလၢႆတီႈသေ ၶင်ၼမ်ႉဝႆႉပဵၼ်ဢၢင်ႇ ပဵၼ်ဢၢင်ႇဝႆႉ လၢႆလၢႆတီႈ။ ယွၼ်ႉၼၼ် လီၵူဝ်ၼမ်ႉၵိုင်ႉၵၢင်ႉၼွင်းလူၼ်ႉလူင်းမႃးထႅင်ႈ ၼႆ လႆႈတူၵ်ႇတၵ်ႉပၼ်ၾၢင်ႉဝႆႉ။