ဝၢႆးလင် သိုၵ်းမၢၼ်ႈယိုတ်းမိူင်း တႄႇဝၼ်းတီႈ 01/02/2021 ၼၼ်ႉမႃး တေႃႇထိုင်လိူၼ်မေႊသဵင်ႈ ပီ 2025 ၶၢဝ်းတၢင်း 4 ပီပၢႆမႃးၼႆႉ ၵူၼ်းမိူင်း 3,100 ပၢႆ လူႉတၢႆယွၼ်ႉၶိူင်ႈမိၼ်သိုၵ်းမၢၼ်ႈ  ၼႂ်း ၼၼ်ႉပႃးလုၵ်ႈဢွၼ်ႇ 700 ပၢႆ ဝႃႈၼႆ။

ၸွမ်းၼင်ႇ ႁွင်ႈၵၢၼ်သုၼ်ႇလႆႈၵူၼ်း NUG ၵဵပ်းၶေႃႈမုလ်း ပိုၼ်ၽၢဝ်ႇဝႆႉၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်ယိုဝ်းတိုၵ်း ၸမ် 3,000 ၵမ်း၊ ႁူင်းႁဵၼ်း 250 ပၢႆ၊ ႁူင်းယႃ ႁွင်ႈယႃ မွၵ်ႈ 100 လင်လႄႈ ႁူင်း သဝ်းသႃသၼႃ 440 ပၢႆ လူႉၵွႆ။

ပိုၼ်ႉတီႈ ဢၼ်ၺႃးသိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇ ၼမ်သုတ်းၼႆႉ ပဵၼ်ၼႂ်းမိူင်းတႆး၊ မိူင်းရၶႅင်ႇ၊ တိူင်းၸႄႈၵႅင်း၊ မၵူၺ်းလႄႈ ၼႂ်းတိူင်းဝဵင်းလိူဝ်ႇ (မၼ်းတလေး) ၸိူဝ်းၼႆႉ။

ဢၼ်သိုၵ်းမၢၼ်ႈ ႁႅမ်တၢႆၵူၼ်းမိူင်း ပဵၼ်မူႇပဵၼ်ၸုမ်းသမ်ႉ မီးၸမ် 400 လိူင်ႈ ၵူၼ်းမိူင်းလူႉတၢႆ 4,100 ပၢႆ။ ဢၼ်ၺႃးသိုၵ်းမၢၼ်ႈ တဵၵ်းၶၢၼ်းၵဵပ်းသိုၵ်းၵႂႃႇၼႆႉ မီးဝႆႉ 25,000 ပၢႆ၊ ၵမ်ႈၼမ် ပဵၼ် ၵူၼ်းမိူင်းၼႂ်းတိူင်းပႃႇၵိူဝ်၊ ဢၼ်ၼမ်သုတ်းထီႉသွင်သမ်ႉ ပဵၼ်ၼႂ်းတိူင်းဝဵင်းလိူဝ်ႇ။

ဝၢႆးပဵၼ်လွင်ႈဢိင်ႇသၼ်ႇ (ၽႅၼ်ႇလိၼ်ဝႆ) ႁၢဝ်ႈႁႅင်း သိုၵ်းမၢၼ်ႈပိုၼ်ၽၢဝ်ႇၵိုတ်းတိုၵ်း ပဵၼ်တၢင်း ၵၢၼ်ယူႇသေတႃႉ တိုၵ်ႉၸႂ်ႉၶိူင်ႈမိၼ် ပွႆႇမၢၵ်ႇယိုဝ်းတိုၵ်း ၼႂ်းၼႃႈတီႈသိုၵ်းၸၢဝ်းၶိူဝ်းလႄႈ ၸုမ်း လုၵ်ႉၽိုၼ်ႉၶဝ် ယိုတ်းၵုမ်းဝႆႉ၊ ႁဵတ်းႁႂ်ႈၵူၼ်းမိူင်း လႆႈမၢတ်ႇၸဵပ်းလူႉတၢႆ 800 ပၢႆ – NUG ပိုၼ်ၽၢဝ်ႇႁၢႆးငၢၼ်းဝႆႉ ၼင်ႇၼႆ။