သိုၵ်းမၢၼ်ႈပွႆႇမၢၵ်ႇ တီႈၼႂ်းဢိူင်ႇသႃးတေႃး ၸႄႈဝဵင်းလွႆၶေႃ မိူင်းယၢင်းလႅင်  ႁဵတ်းႁႂ်ႈလုၵ်ႈဢွၼ်ႇလႄႈ ၵူၼ်းမိူင်းတၢႆ 5 ၵေႃႉ    ။

ၼႂ်းလိူၼ် သႅပ်ႉထႅမ်ႊပိူဝ်ႊ ဝၼ်းတီႈ 5 ယၢမ်းဝၢႆးဝၼ်း သိုၵ်းမၢၼ်ႈဢဝ်ႁိူဝ်းမိၼ်သိုၵ်းပွႆႇမၢၵ်ႇတီႈၼႂ်းဢိူင်ႇ သႃးတေႃး ၾၢႆႇဢွၵ်ႇဝဵင်းလွႆၶေႃ  ၊ ၸၢၵ်ႇမၢၵ်ႇတူၵ်းသႂ်ႇ လုၵ်ႈဢွၼ်ႇ 3 ၵေႃႉ ၊ ၼၢင်းယိင်း 2 ၵေႃႉလူႉတၢႆ ထင်တီႈ လႄႈ ၵူၼ်းပိုၼ်ႉတီႈလၢႆလၢႆၵေႃႉမၢတ်ႇၸဵပ်းဝႃႈၼႆ ။

ၼၢင်းယိင်းၵူၼ်းမိူင်းဝဵင်းလွႆၶေႃလၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈမႃးပွႆႇမၢၵ်ႇၼႆႉမီး 2-3 ဝၼ်းထပ်းၵၼ်ယဝ်ႉ ၊ မႃးပွႆႇတင်း ၾၢႆႇႁွင်ႇဝဵင်းလႄႈ ၾၢႆႇဢွၵ်ႇဝဵင်း  ၊ လုၵ်ႈဢွၼ်ႇလႄႈ ၵူၼ်းမိူင်းတၢႆ 5 ၵေႃႉ ၊ မီးၵူၼ်းမၢတ်ႇၸဵပ်းထႅင်ႈ ၊ ပၢင်တိုၵ်းတင်းပုၼ်ႉတႄႉဢမ်ႇမီး ႁဵတ်းသင်လႄႈ မႃးပွႆႇမၢၵ်ႇတႄႉဢမ်ႇႁူႉ”- ဝႃႈၼႆ ။

ၵူၼ်းၸိူဝ်းမၢတ်ႇၸဵပ်းတၢႆထင်တီႈၼၼ်ႉပဵၼ် လုၵ်ႈဢွၼ်ႇၸၢႆး ဢႃယု 11ၶူပ်ႇ ၼိုင်ႈၵေႃႉ ၊ ဢႃယု 13 ၶူပ်ႇ ၼိုင်ႈၵေႃႉ ၊ ဢွၼ်ႇယိင်းဢႃယု 14ၶူပ်ႇ ၼိုင်ႈၵေႃႉလႄႈ ၼၢင်းယိင်း ဢႃယု 40 ပၢႆ သွင်ၵေႃႉ ႁူမ်ႈသဵင်ႈ 5  ၊ လိူဝ်ၼၼ်ႉ ဢၼ်မၢတ်ႇၸဵပ်းႁႅင်းမီး 10 ပၢႆၼႆ  သိုဝ်ၶၢဝ်ႇၼႂ်းပိုၼ်ႉတီႈ တႅမ်ႈတၢင်ႇဝႆႉၼင်ႇၼႆ ။

ဢွင်ႈတီႈဢၼ်သိုၵ်းမၢၼ်ႈမႃးပွႆႇမၢၵ်ႇယၢမ်းလဵဝ်ၼၼ်ႉ ပဵၼ်ပိုၼ်ႉတီႈ သိုၵ်းမၢၼ်ႈ ပၵ်းတပ်ႉယူႇသဝ်းဝႆႉလႄႈ ဢမ်ႇမီးပၢင်တိုၵ်းၸွမ်းၽႂ် ၊ မိူၼ်သိုၵ်းမၢၼ်ႈမႃးတင်ႈၸႂ်ပွႆႇသႂ်ႇၵူၼ်းမိူင်းၵူၺ်း – ၵူၼ်းပိုၼ်ႉတီႈလၢတ်ႈၼင်ႇၼႆ ။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပိုၼ်ႉတီႈဢၼ်သိုၵ်းမၢၼ်ႈမႃးပွႆႇမၢၵ်ႇၼၼ်ႉပဵၼ်ဝၢၼ်ႈ  ပီႈၼွင်ႉပဢူဝ်းယူႇသဝ်း။ ၵူၺ်းၵႃႈ ၽွင်းပၢင်တိုၵ်းၼၼ်ႉ  ၵူၼ်းမိူင်းပၢႆႈၽေးသိုၵ်းလႄႈ သိုၵ်းမၢၼ်ႈဢမ်ႇပၼ်ၵူၼ်းဝၢၼ်ႈပွၵ်ႈမႃးယူႇၶိုၼ်းတီႈဝၢၼ်ႈ။ ၵူၺ်းၵႃႈ ၵူၼ်းဝၢၼ်ႈသမ်ႉဢမ်ႇၸၢင်ႈၵႂႃႇယူႇတီႈလႂ်။ သဵၼ်ႈတၢင်းၵႂႃႇမႃးႁႃၵၼ်ၵေႃႈ သမ်ႉယၢပ်ႇ။ တီႈဝၢၼ်ႈၵေႃႈ ပၢင်တိုၵ်းသမ်ႉဢမ်ႇပဵၼ်လႄႈ သိုၵ်းမၢၼ်ႈႁၢမ်ႈယူႇၵေႃႈ ၶဝ်ၵေႃႈသမ်ႉပွၵ်ႈမႃးယူႇၶိုၼ်း။  ꧦ- ဝႃႈၼႆ ။

ယၢမ်းလဵဝ် ယွၼ်ႉသိုၵ်းမၢၼ်ႈၵႆႉဢဝ်ႁိူဝ်းမိၼ်မႃးပၼ်ႇလဵပ်ႈ  ပွႆႇမၢၵ်ႇထပ်းၵၼ်လၢႆဝၼ်းယဝ်ႉလႄႈ ႁဵတ်းႁႂ်ႈၵူၼ်းမိူင်း လႆႈငိၼ်း သဵင်ၵွင်ႈသဵင်မၢၵ်ႇ ဢွၼ်ၵၼ် မႆႈၸႂ်လွင်ႈႁူမ်ႈလူမ်ႈ ဝႆႉၼႆယဝ်ႉ ။

ယွၼ်ႉၽႅၼ်ယၼ်ႇသိုၵ်း 1111  ပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈ သိုၵ်းယၢင်းလႅင် KNDF- PDF သေ ၵူၼ်းမိူင်းၼႂ်းဝဵင်း ဝဵင်းလွႆ ၶေႃ  ပႃးၸဵမ်တၢင်းဝၢၼ်ႈ လႆႈဢွၼ်ၵၼ် ပၢႆႈၽေးသိုၵ်းၵႂႃႇယူႇသဝ်းဝႆႉ ႁိမ်းႁွမ်းဝဵင်းလွႆၶေႃ ပႃးၸဵမ်ၼႂ်းသူၼ်ၼႂ်းထိူၼ်ႇဝႆႉ ။

ပေႃးသဵင်ၵွင်ႈသဵင်မၢၵ်ႇယဵၼ်ၵေႃႈ ဢွၼ်ၵၼ် ပွၵ်ႈမိူဝ်းတူၺ်း ႁိူၼ်းယေးၽႂ်မၼ်း၊ ပေႃးလႆႈငိၼ်းသဵင်ၵွင်ႈသဵင်မၢၵ်ႇၵေႃႈ ပၢႆႈဢွၵ်ႇၶိုၼ်းထႅင်ႈ တင်ႈတႄႇပီ 2021 မႃး တေႃႇထိုင်ယၢမ်းလဵဝ် ဢွၼ်ၵၼ်ပၢႆႈပၢႆႈပွၵ်ႈပွၵ်ႈ ဢမ်ႇမီးတီႈယူႇတီႈသဝ်းလီလီ-ၵူၼ်းပိုၼ်ႉတီႈလၢတ်ႈ ။

ယၢမ်းလဵဝ် တီႈဝဵင်းလွႆၶေႃ သိုၵ်းမၢၼ်ႈ ၶဝ်ႈဢဝ်တီႈယူႇဝႆႉၼႂ်းဝဵင်း။ ႁိမ်းၶႅပ်ႇၶၢင်ႈဝဵင်း ၸွမ်းဝၢၼ်ႈၸွမ်းသူၼ်ၵေႃႈ သိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈမႃး ဢဝ်တီႈယူႇဝႆႉသေ ၵူတ်ႇထတ်းၵူၼ်းၵႂႃႇမႃးႁၢဝ်ႈႁႅင်းဝႆႉၼႆယဝ်ႉ ။