ၸဝ်ႈႁတ်းႁၢၼ် ဢႃယု 77 ယဵပ်ႇၶဝ်ႈၼႂ်းပီ 78 ၽူႈယၢမ်ႈႁၢပ်ႇၵၢၼ် ၾၢႆႇသၢႆလူမ်း ၵိုၵ်းပိုၼ်းတႆး  ၵိုၵ်းပိုၼ်း SSA ၼၼ်ႉ လႆႈလူႉသဵင်ႈသုတ်းမုၼ်ၵႂႃႇတီႈ ႁူင်းယႃလူင် ၼႂ်းမိူင်းထႆး တီႈၼိုင်ႈ။

ၸဝ်ႈႁၢၼ် ႁတ်းႁၢၼ် ၼႆႉ မီးတၢင်းပဵၼ်ၵူၼ်းထဝ်ႈ ၸပ်းဝႆႉတၢင်းပဵၼ် ႁူဝ်ၸႂ်သေ ၼႂ်းပီ 2026 ၼႆႉ လႆႈၶဝ်ႈ လႆႈဢွၵ်ႇ ႁူင်းယႃ ထပ်းၵၼ်မႃးလၢႆပွၵ်ႈ။ ၵမ်းလိုၼ်းသုတ်းၵေႃႈ လႆႈလူႉသဵင်သုတ်းမုၼ်ၵႂႃႇ မိူဝ်ႈၼႆႉ 6/9/2026 ယၢမ်းၵၢင်ၼႂ်ၸဝ်ႉ ။

ၸဝ်ႈႁၢၼ် ႁတ်းႁၢၼ်ၼႆႉ ၵိူတ်ႇ လိူၼ်မေႊ 1 ဝၼ်း ပီ 1949 ။  ပေႃႈပဵၼ်လုင်းၸၢႆးၺုၼ်ႉ မႄႈၸိုဝ်ႈ ပႃႈၼၢင်းသႂ် ၸႃႇတိ တီႈၵိူတ်ႇ ဝၢၼ်ႈၸွႆးၵုင်း ဢိူင်ႇၸွႆးၵုင်း ၸႄႈဝဵင်းၵျွၵ်ႉမႄး။ ၸိုဝ်ႈမိူဝ်ႈလဵၵ်ႉ ႁွင်ႉ ၸၢႆးၵျေႃႇၺုၼ်ႉ ဢွင်ႇပူၼ်ႉၸၼ်ႉ 10 တီႈႁူင်းႁဵၼ်း ၸၼ်ႉသုင် မၢႆ 2 ဝဵင်းၵျွၵ်ႉမႄး။

1974 တႄႇၼႃႈႁိူၼ်း ၵိုၵ်း ၼၢင်းသႅင်ၼူၼ်း ဝၢၼ်ႈပုင်ႇလႅၼ်း ဢိူင်ႇဝၢၼ်ႈပၢၼ်း ၸႄႈဝဵင်းသီႇပေႃႉ။ မီးလုၵ်ႈႈႁူမ်ႈၵၼ် ယိင်းၵေႃႉၼိုင်ႈ ၸၢႆးၵေႃႉၼိုင်ႈ။

“ၸဝ်ႈႁတ်းႁၢၼ်ၼႆႉ ၸွႆႈၵၢၼ်ၸိူဝ်ႉၸၢတ်ႈလၢႆၾၢႆႇ ။ ဝၢႆးပေႃးၼႃႈၵၢၼ်ယဝ်ႉ  1984 တႄႇ ၸွႆႈၵၢၼ်ႁဝ်းမႃး။ ဝၢႆး ၸဝ်ႈသႅင်ၸိုၼ်ႈ သဵင်ႈ 2011 ယဝ်ႉ မၼ်းၵေႃႈ ၵိုတ်းၵၢၼ်တီႈႁဝ်းၵႂႃႇသေ ပွၵ်ႈၵႂႃႇ ႁၢပ်ႇၵၢၼ် ၼႂ်း SSA ၶိုၼ်းၼၼ်ႉၼႃႇ။ ဢၼ်မၼ်းၸဝ်ႈ လူင်ႉလႅၼ်ႇၵတ်ႉၶႅၼ်ႇ သေ ၸွႆႈၵၢၼ်ႁဝ်းမႃး တႃႇသေ ၼႆႉ ၾၢႆႇၶၢဝ်ႇ သၢႆလူမ်း Telegraph / လတ်းဢဝ်ၶၢဝ်ႇ Intercept  ဢိူဝ်ႈ” – ၸဝ်ႈၶိုၼ်းသႂ် ၸႂ်ယဵၼ် ၽူႈၵေႃႇတင်ႈၸုမ်းၶၢဝ်ႇၽူႈတွႆႇႁွၵ်ႈလၢတ်ႈ။

ၸဝ်ႈႁတ်းႁၢၼ်ၼႆႉၵတ်ႉၶႅၼ်ႇလိၵ်ႈတႆး လိၵ်ႈမၢၼ်ႈ လိၵ်ႈဢိင်းၵလဵတ်ႈ။  1969 လိူၼ်ၻီႊသႅမ်ႊပိူဝ်ႊ ဝၢႆးဢွင်ႇပူၼ်ႉၸၼ်ႉသုင်ယဝ်ႉ ၶဝ်ႈႁၢပ်ႇၵၢၼ်သိုၵ်း တီႈၸဝ်ႈသိူဝ်ဝၢႆႇ ႁိုဝ်ၸဝ်ႈၸၢင်ႉယွင်ႁူၺ်ႈ ၼႂ်းတပ်ႉသိုၵ်းၸိုင်ႈတႆး SSA ။

1970 ၶိုၼ်ႈပဵၼ်ၸၼ်ႉႁူဝ်ႁၼ် ။ 1971 လႆႈႁပ်ႉပုၼ်ႈၽွၼ်း ၵႅမ်ၽူႈယိပ်းၸၢၵ်ႈ သၢႆလူမ်းတီႈ ငဝ်ႈငုၼ်း တပ်ႉသိုၵ်းၸိုင်ႈတႆး SSA ။ 1976 ၼႂ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်း ၸိုင်ႈတႆး SSA မီးလွင်ႈတႅၵ်ႇၸတ်ႉၵၼ်လႄႈ ၵိုတ်းလိုဝ်ႈၵၢၼ်ၵႂႃႇၸူဝ်ႈၶၢဝ်း။

(တေဝႆႉၶၢပ်ႈတူဝ် တီႈဝတ်ႉ လႂ် တေပူၼ်ႉတူဝ်ဝၼ်းလႂ်ၼႆ တေႁၢႆးငၢၼ်း ႁူဝ်ယွႆႈထႅင်ႈယူႇၶႃႈ)