ႁူဝ်လိူၼ်မၢတ်ႉၶျ် ပီ 2026 ၼႆႉ ၽူႈၼမ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) လႄႈ ၶွင်ႇသီႇဢဝ်ၶိုၼ်းၸိုင်ႈတႆး၊ တပ်ႉသိုၵ်းၸိုင်ႈတႆး (RCSS/SSA) ႁူပ်ႉထူပ်း ဢုပ်ႇဢူဝ်းၵၼ် ၼႂ်းၸႄႈဝဵင်းၵုၼ် ႁဵင်တီႈၼိုင်ႈ ပိူဝ်ႈတႃႇသၢင်ႈလွင်ႈမိုတ်ႈၵိုဝ်းယုမ်ႇယမ်ၸမ်ၸႂ်ၵၼ်မႃးလိူဝ်ၵဝ်ႇ ၼႆယဝ်ႉ။

မိူဝ်ႈလိူၼ်မၢတ်ႉၶျ် ဝၼ်းတီႈ 2 ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး၊ တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းလူင် ယွတ်ႈသိုၵ်း လႄႈ ၽူႈၼမ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) ၵႅမ်ႁူဝ်ပဝ်ႈ မၢႆ (3) ၸဝ်ႈသိူဝ်ပိူင်ႇၾႃႉ၊ ၽူႈၼမ်းၼႂ်းလူင် မၢႆ (2) ၸဝ်ႈသိုၵ်းလူင် ၸၢႆးသူႉ ႁူပ်ႉၵၼ်တီႈ ပၢင်ပွႆးတၢင်ႇထီး ၵွင်းမူးမူၺ်ႇတေႃႇၼမ်ႉသွမ်ႇ ၼႂ်းၸႄႈဝဵင်းၵုၼ်ႁဵင် ၼႆယဝ်ႉ။

ၽူႈၸမ်ၸႂ်ၵၼ်တင်း ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး (SSPP/SSA) ၵေႃႉၼိုင်ႈတႄႉ လၢတ်ႈတီႈၽူႈတွႆႇႁွၵ်ႈဝႃႈ “တင်းသွင်ၸုမ်းႁူပ်ႉၵၼ်ၼႆႉ ၸႂ်ႈတေႉဢေႃႈ။ ပဵၼ် တၢင်းၵုၼ်ႁဵင်ဢေႃႈ။ ၶဝ်ဢုပ်ႇၵၼ်လွင်ႈသင်တေႉတေႉၼႆတႄႉ ႁူဝ်ယွႆႈမၼ်းဢမ်ႇလႆႈႁူႉၸွမ်းတႅတ်ႈတေႃးၶႃႈ” ဝႃႈၼႆ။

ဝၢႆးလင်ပွႆးတၢင်ႇထီးၵွင်းမူးမူၺ်ႇတေႃႇယဝ်ႉ ၽူႈၼမ်းတင်းသွင်ၸုမ်း ၵိၼ်ၶဝ်ႈႁူမ်ႈမူႇၸွမ်းၵၼ်သေ ႁူပ်ႉဢုပ်ႇဢူဝ်းၵၼ်ၵႂႃႇလွတ်ႈလွတ်ႈလႅဝ်းလႅဝ်း။ ၽွင်းမိူဝ်ႈၸွမ်သိုၵ်းလူင်ယွတ်ႈသိုၵ်း လႄႈ ၸဝ်ႈသိူဝ်ပိူင်ႇၾႃႉ မွၵ်ႇလၢတ်ႈၶေႃႈၵႂၢမ်းၼၼ်ႉၵေႃႈ မီးၵူၼ်းထႆႇငဝ်းႁၢင်ႈသဵင်ပဵၼ်ဝႆႉမၢႆတွင်းသေ သိုပ်ႇၽႄႈၼိူဝ်သိုဝ်ႇတူင်ႇဝူင်းၵူၼ်း။

ၼႂ်းငဝ်းႁၢင်ႈသဵင်ၼၼ်ႉ ၸွမ်သိုၵ်းလူင်ယွတ်ႈသိုၵ်းတႄႉ လၢတ်ႈၵႂႃႇဝႃႈ “မိူင်းတႆးၼႆႉ ဢမ်ႇၸႂ်ႈဝႃႈပဵၼ်ၶွင်တႆးၵူၺ်း။ ပီႈၼွင်ႉတႆး၊ ဝႃႉ၊ ဢႃးၶႃႇ၊ ပလွင်ႈၶဝ်ၵေႃႈ ပဵၼ်ၸဝ်ႈၶွင်မၼ်းမိူၼ်ၵၼ်။ မိူဝ်ႈဢွၼ်တၢင်းၼႆႉ ၸၢဝ်းၶိူဝ်းၼင်ႇၵၼ် ဢမ်ႇတိုၵ်းၵၼ်ၶိုၼ်း။ ႁဝ်းယူႇၸွမ်းၵၼ်မႃးၵတ်းၵတ်းယဵၼ်ယဵၼ်။ ယၢမ်းလဵဝ် ယွၼ်ႉသင်လႄႈႁဝ်းတေမႃးၽိတ်းၽႅၵ်ႇၵၼ် တိုၵ်းၵၼ်ၶိုၼ်းယူႇၼႆ ၵွပ်ႈဝႃႈၾၢႆႇလင်လွင်ႈတၢင်းၸိူဝ်းၼႆႉ မီးၵူၼ်းသေႃႇသူၼ်းႁႂ်ႈႁဝ်းတႅၵ်ႇယၢႆႈၵၼ်ယူႇ” ၼႆယဝ်ႉ။

လွင်ႈၽူႈၼမ်းသိုၵ်းတႆး တင်းသွင်ၸုမ်းႁူပ်ႉဢုပ်ႇဢူဝ်းၵၼ်ၸိူင်ႉၼႆၼႆႉ ပဵၼ်လွင်ႈလီတႃႇ ဝၢၼ်ႈမိူင်းလႄႈၸိူဝ်ႉၶိူဝ်း ၼႂ်းမိူင်းတႆးတေႉတေႉ၊ ၽိူဝ်ႇတႃႉတႆးတေႃႇတႆးတေတိုၵ်းတေႃး ၵၼ်ၶိုၼ်းၼႆႉ ႁူပ်ႉဢုပ်ႇဢူဝ်းၵၼ်သေ ႁႃၶေႃႈၵႄႈလိတ်ႈပၼ်ႁႃ တႃႇၵေႃႇသၢင်ႈလွင်ႈငမ်းယဵၼ်ၼႆႉ လီတီႈသုတ်းယဝ်ႉၼႆ ၵူၼ်းၼုမ်ႇတႆးၼႂ်းမိူင်းတႆးၵေႃႉၼိုင်ႈလၢတ်ႈၼင်ႇၼႆ။

“လႆႈႁၼ်ၽူႈၼမ်းသိုၵ်းတႆးႁဝ်းတင်းသွင်ၸုမ်းႁူပ်ႉဢုပ်ႇၵၼ်ၸိူင်ႉၼႆ ပဵၼ်ဢၼ်ယိၼ်းလီၸူမ်းသိူဝ်းတေႉတေႉၶႃႈဢေႃႈ။ ၽႃႇသႃႇၵႂၢမ်းလၢတ်ႈ၊ ၾိင်ႈငႄႈၾိင်ႈထုင်း၊ ၼိူဝ်ႉလိူတ်ႈ ႁဝ်းၵေႃႈမိူၼ်ၵၼ် ပဵၼ်ဢၼ်လဵဝ်ၵၼ်ယူႇ ႁဝ်းတေမႃးတိုၵ်းၵၼ် ၽၼ်းၵၼ်ၶိုၼ်းၼႆႉ ဢမ်ႇၶႂ်ႈႁႂ်ႈပဵၼ်။ ပေႃးၵုမ်ႇတိုၵ်းၵၼ်ၽိတ်းၵၼ်တိၵ်းတိၵ်း တေလူႉသုမ်းတင်းသွင်ၾၢႆႇ။ ပေႃးသိုၵ်းတႆးႁဝ်း ၵုမ်ႇတိုၵ်းၵၼ်ယိုဝ်းၵၼ်တိၵ်းတိၵ်း ၵူၼ်းၼုမ်ႇႁဝ်းၵမ်ႈၼမ်ၵေႃႈ တေၸၢင်ၸႂ်သေ ႁၢင်ႇၵႆၵၼ်ၵႂႃႇ ၼႂ်းလွင်ႈၵၢၼ်မိူင်း၊ ၵၢၼ်သိုၵ်းၼႆႉ တင်းၼမ်ထႅင်ႈ” ၼႆယဝ်ႉ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃးၼႆႉ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး တင်း ၶွင်ႇသီႇဢဝ်ၶိုၼ်းၸိုင်ႈတႆး၊ တပ်ႉသိုၵ်းၸိုင်ႈတႆး လႆႈႁူပ်ႉထူပ်းဢုပ်ႇဢူဝ်း ၵၼ်ၵႂႃႇ မိူဝ်ႈဝၼ်းတီႈ 29 လိူၼ်ၼူဝ်ႊဝႅမ်ႊပိူဝ်ႊ ပီ 2023 ၼၼ်ႉသေ လႆႈၶေႃႈတူၵ်းလူင်းၵၼ်လွင်ႈတႃႇၵိုတ်းတိုၵ်းၼႆႉမႃးသေ တင်းသွင်ၾၢႆႇ လူတ်းယွမ်းလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်မႃး ၼႆယဝ်ႉ။