သိုဝ်ႇၶၢဝ်ႇတႆးလွတ်ႈလႅဝ်း ႁၢႆးငၢၼ်းဝႆႉဝႃႈ ဝၼ်းတီႈ 27/08/2026 ၵေႃႉသိုၵ်းၵေႃႉႁၢၼ် တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO/PNLA ) ဢွၼ်ဢဝ်လုၵ်ႈလၢင်းၼၢင်းမေး ႁူမ်ႈႁႅင်းၵူၼ်း 78 ၵေႃႉ ပၢႆႈၶဝ်ႈၸူး တပ်ႉသိုၵ်းၸိုင်ႈတႆး RCSS/SSA ၼႂ်းၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း ဝႃႈၼႆ။

လွင်ႈၼႆႉ ယူႇတီႈ ၽူႈမီးပုၼ်ႈၽွၼ်း တပ်ႉသိုၵ်းၸိုင်ႈတႆး RCSS/SSA လႆႈႁပ်ႉတွၼ်ႈသေ ၶိုၼ်းဢဝ်ငိုၼ်းၸွႆႈထႅမ်ပၼ်ၸိူဝ်းၶဝ် ၼိုင်ႈၵေႃႈ 5 သႅၼ်ပျႃး ဝႃႈၼႆ။

ယွၼ်ႉလွင်ႈသင်တႄႉတႄႉလႄႈ သိုၵ်း PNLA လႆႈၶဝ်ႈၸူး ၼႆ ၾၢႆႇတၢင်းသိုဝ်ႇၶၢဝ်ႇတႆးလွတ်ႈလႅဝ်းဢမ်ႇလႆႈတႅမ်ႈဝႆႉပႃး။ သိုဝ်ႇၶၢဝ်ႇ ပဢူဝ်း ပဢူဝ်းမီႊတီႊယႃႊ တႄႉတႅမ်ႈဢွၵ်ႇဝႆႉလွင်ႈၼႆႉဝႆႉဝႃႈ – ပဵၼ်ယွၼ်ႉၸၢဝ်းပဢူဝ်းၼင်ႇၵၼ် ဢမ်ႇထုၵ်ႇၵၼ်ဢမ်ႇၶဝ်ႈၵၼ်သေ ၵူၼ်းသိုၵ်းဢၼ်ဝႃႈတေၵႅတ်ႇၶႄတႃႇၵူၼ်းပဢူဝ်းၼၼ်ႉ ၸင်ႇလႆႈၵႂႃႇၶဝ်ႈႁူမ်ႈၸူး သိုၵ်းတႆး။ ၸၢဝ်းပဢူဝ်းတင်းသဵင်ႈ ထုၵ်ႇလီဢဝ်ႁဵတ်းတွၼ်ႈသွၼ်သေ ထုၵ်ႇလီႁၵ်ႉၵၼ် ႁူမ်ႈၵၼ် ၸွႆႈထႅမ်ၵၼ်ၵႂႃႇ ယဝ်ႉ – ဝႃႈၼႆဝႆႉ။

ၵွၼ်ႇၼႃႈၼႆႉ မိူဝ်ႈဝၼ်းတီႈ 24/08/2026 ၼၼ်ႉၵေႃႈ သိုၵ်း PNLA ဢၼ်မီးၸၼ်ႉၸဝ်ႈႁၢၼ်ၵေႃႉၼိုင်ႈ ဢဝ်ပႃးတင်းလုၵ်ႈၼွင်ႉမၼ်း 3 ၵေႃႉ လုၵ်ႈယိင်းမၼ်းၵေႃႉၼိုင်ႈသေ ၶဝ်ႈႁူမ်ႈဝၢင်းၶိူင်ႈတီႈ ပျီႇတူႉၸိတ်ႉ ပဢူဝ်း PNO ။

ပဵၼ်ၸဝ်ႈႁၢၼ် ပၢင်ၵိဝ်ႇ လႄႈ လုၵ်ႈယိင်းမၼ်း ၼၢင်းဝူဝ်ၵဝ်း။ ဢဝ်ပႃးၶိူင်ႈၵွင်ႈၵၢင်ႇၸေးမိုဝ်းသေ ၵႂႃႇဝၢင်းၶိူင်ႈတီႈ PNO တီႈဝၢၼ်ႈၵွင်းၽြႃး ဝၢၼ်ႈလူင်ပၢင်မၢၵ်ႇ ဢိူင်ႇၵိူၼ်ႇတူလူင် ၸႄႈဝဵင်းမွၵ်ႇမႆႇ ၼင်ႇၵဝ်ႇ။

ၵူၼ်းသိုၵ်းၼႂ်းတပ်ႉသိုၵ်း PNLA ယိုၼ်ယၼ်လၢတ်ႈဝႆႉ တီႈသိုဝ်ႇၶၢဝ်ႇ ၶမ်းသႃးငဝ်း ဝႃႈ – ၼႂ်းမူႇၸုမ်းဢမ်ႇလႆႈဝၢင်းၶပ်း။ ၶဝ်ၵႂႃႇဝၢင်းၶိူင်ႈလူၺ်ႈၵၢင်ၸႂ်ၶဝ်ၵူၺ်း လႅပ်ႈမီးပၼ်ႁႃသုၼ်ႇတူဝ် ။- ဝႃႈၼႆ။

လွင်ႈၼႆႉ ၵူၼ်းၼုမ်ႇပဢူဝ်း ၽူႈၶဝ်ႈၸုမ်း PNLA ၵမ်ႈၽွင်ႈၵေႃႈဢွၼ်ၵၼ်ထတ်းသၢင်ဝႆႉဝႃႈ ဢၼ်မီးၵူၼ်းၼႂ်းၸုမ်းၵမ်းၵမ်းဝၢင်းၶိူင်ႈၸိူင်ႉၼႆၼႆႉ လႅပ်ႈပဵၼ်လွင်ႈၸတ်းၵၢၼ်ၼႂ်းမူႇၸုမ်းဢမ်ႇၵႅၼ်ႇၶႅင် လႄႈ ပဵၼ်လွင်ႈပၼ်ႁႃသုၼ်ႇတူဝ်ၵူၺ်းဝႃႈၼႆ။

ယူႇတီႈ ၽူႈတွႆႇႁွၵ်ႈ ၶတ်းၸႂ်တိတ်းတေႃႇၸူး PNLA ယူႇၵေႃႈ တိတ်းတေႃႇဢမ်ႇလႆႈ။