မိူဝ်ႈဝၼ်းတီႈ 26 ၽွင်းလူင်ၼွၵ်ႈမိူင်း တူဝ်တႅၼ်းလူင်ပွင်ၸိုင်ႈမိူင်းဝႅတ်ႉၼၢမ်း H.E. Le Hoai Trung ႁွတ်ႈထိုင်ၼေႇပျီႇတေႃႇသေ ႁူပ်ႉထူပ်းၸွမ်း ဢူးမိၼ်းဢွင်ႇလၢႆႇ ၸွမ်ၸိုင်ႈ ယိုတ်းမိူင်း မိူင်းႁူမ်ႈတုမ်သေ မွၵ်ႇႁႂ်ႈၵႂႃႇ မိူင်းဝႅတ်ႉၼၢမ်း ပဵၼ်တၢင်းၵၢၼ် ၼႆယဝ်ႉ။

ၶၢဝ်းတၢင်းမိူင်းဝႅတ်ႉၼၢမ်းၼႆႉ မိၼ်းဢွင်ႇလၢႆႇၽႅၼ်ဝႆႉတေပဵၼ် ၼႂ်းလိူၼ်ၼူဝ်ႊဝႅမ်ႊပိူဝ်ႊသေ ႁၢင်ႈႁႅၼ်းတေၵႂႃႇဢုပ်ႇဢူဝ်း လွင်ႈၵၢၼ်ပၢႆးမၢၵ်ႈမီး၊ လွင်ႈၵၢၼ်ႁုၼ်ႈမုၼ်းၶိုၼ်ႈယႂ်ႇ လႄႈ လွင်ႈတေႁူမ်ႈၵၼ် ႁဵတ်းသၢင်ႈၼႃႈၵၢၼ်ၵႂႃႇမိူဝ်းၼႃႈ ႁႂ်ႈၵူႈၸိုင်ႈမိူင်း ႁၼ်လီၵမ်ႉထႅမ်ၸွမ်း ၼႆယဝ်ႉ။

ဢူးမိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း မီးၽႅၼ်ၵၢၼ် တေၵႂႃႇၶဝ်ႈႁူမ်ႈၸွမ်း ပၢင်ၵုမ်လူင် ၽူႈၼမ်း မိူင်းၵမ်ႊပူးၶျႃႊ-မိူင်းလၢဝ်း-မိူင်းမၢၼ်ႈ-မိူင်းဝႅတ်ႉၼၢမ်း (CLMV) လႄႈ ပၢင်ၵုမ် လူင်မႁႃႇပိဝ်ႇႁႃႇႁူမ်ႈ သၢင်ႈၵၢၼ်မၢၵ်ႈမီး ဢီႇရႃႇဝတီႇ-ၵျၢဝ်ႉၽယႃး-မႄႈၶွင် (ACMECS) – ဝႃႈၼႆ။

လႆႈႁူႉဝႃႈ ၽွင်းလူင်ၵၢၼ်ၼွၵ်ႈမိူင်း မိူင်းဝႅတ်ႉၼၢမ်း ဢွၵ်ႇၶၢဝ်းတၢင်းၵႂႃႇ ၼေႇပျီႇတေႃႇၼႆႉ ဢုပ်ႇဢူဝ်းလွင်ႈ ၶၵ်ႉၵၢၼ်ၵပ်းသိုပ်ႇတိတ်းတေႃႇၵၼ်၊ လွင်ႈၵၢၼ်လူင်းတိုၼ်း ၼႂ်းမိူင်းမၢၼ်ႈ ၸဵမ်ၸိူဝ်းၼႆႉ ဝႃႈၼႆ။

တႄႇလိူၼ်ဢေႊပရႄႊလ် ဝၢႆးလင်ဢူးမိၼ်းဢွင်ႇလၢႆႇ လႆႈႁပ်ႉပဵၼ်ၸွမ်ၸိုင်ႈယဝ်ႉၼၼ်ႉ လႆႈသိုပ်ႇဢွၵ်ႇၶၢဝ်းတၢင်းၵႂႃႇ မိူင်းဢိၼ်ႊတီႊယိူဝ်ႊ၊ မိူင်းၶႄႇ၊ မိူင်းလၢဝ်း လႄႈ မိူင်းထႆး ၸဵမ် ၸိူဝ်းၼႆႉ ၵူၺ်းဢမ်ႇၵႃး ပေႃးထိုင်မႃး လိူၼ်သႅပ်ႊထႅမ်ႊပိူဝ်ႊၸိုင် မီးၽႅၼ်ၵၢၼ်တေၵႂႃႇ မိူင်းၵမ်ႊပူးၶျႃႊထႅင်ႈ ဝႃႈၼႆ။