မိူဝ်ႈဝၼ်းတီႈ 24 လိူၼ်ဢေႃးၵၢတ်ႉသ် ၸုမ်းႁႅၵ်ႊၵႃႊ  Hacker- ” The Crew”  ပိုၼ်ၽၢဝ်ႇဢွၵ်ႇဝႃႈ ႁႅၵ်ႉဢဝ်လႆႈဝႆႉၶေႃႈ မုလ်းသုၼ်ႇတူဝ် ၵူၼ်းမိူင်းမၢၼ်ႈ တႃႇ 6 ၸုမ်းလႄႈ ႁႅၵ်ႉဢဝ်လႆႈဝႆႉပႃး ၶေႃႈမုလ်းလပ်ႉ ၵူၼ်းၸႂ်ႉတိုဝ်းယေးငိုၼ်း KBZ တင်း AYA ဝႆႉ ၼႆယဝ်ႉ။

ၸုမ်းႁႅၵ်ႊၵႃႊၶဝ်ပိုၼ်ၽၢဝ်ႇဢွၵ်ႇဝႆႉတႄႉ- ၼွၵ်ႈလိူဝ် ၶေႃႈမုလ်းၵူၼ်းၸႂ်ႉတိုဝ်းယေးငိုၼ်းသွင်ဢၼ်ၼၼ်ႉယဝ်ႉ ၶွမ်ႊပၼီႊ Htoo Hospitality ၶွင် ဢူးတေႇၸႃႉ လႄႈ ၶေႃႈမုလ်း ႁူင်းႁဵၼ်း Parami University ၊ ၶေႃႈမုလ်းတပ်ႉၸုမ်းပလိၵ်ႈမိူင်းဢိၼ်ႊတူဝ်ႊၼီႊသျႃႊ  တင်း ၶေႃႈမုလ်း သၢႆၵၢၼ်မိၼ် Cyprus Airways ၸိူဝ်းၼႆႉ ႁႅၵ်ႉဢဝ်လႆႈဝႆႉတင်းသဵင်ႈ – ဝႃႈၼႆ။

ၽူႈလူင်ႉလႅၼ်ႇ ၾၢႆႇ IT ၼႂ်းမိူင်းတႆးၵေႃႉၼိုင်ႈတႄႉ လၢတ်ႈတီႈၽူႈတွႆႇႁွၵ်ႈဝႃႈ “တီႈတေႉမၼ်း ႁႅၵ်ႊၵႃႊၶဝ် လႆႈၵႂႃႇ ၶေႃႈမုလ်းၵူၼ်းၸႂ်ႉယေးငိုၼ်း (ပၢၼ်ႇ) ၼၼ်ႉ လီမႆႈၸႂ်တေႉတေႉ။ ၵွပ်ႈဝႃႈ ၶဝ်လႆႈၵႂႃႇပႃး ၸိုဝ်ႈဢၵွင်ႉ username လႄႈ မၢႆလပ်ႉ  password ၵႂႃႇ။  လီမႆႈၸႂ်ႁႅင်းတႄႉ ယွၼ်ႉဝႃႈ ၵူၼ်းမိူင်းၶၢတ်ႇတၢင်းႁူႉၵႅမ်တူဝ် လွင်ႈႁူမ်ႇလူမ်ႈ ၵၢၼ်ၸႂ်ႉ internet လႄႈ ၵၢၼ်ငိုၼ်းၵၢၼ်ပၢၼ်ႇသမ်ႉ ပဵၼ် online ၵမ်ႈၼမ် ၸႂ်ႉ Android ၸၢင်ႈၸပ်းမႅင်းငၢႆႈ။ ၵၢၼ်မီးၶၢဝ်ႇၸိူင်ႉၼႆ ၼႆႉ ပဵၼ်ၶေႃႈပၼ်ၾၢင်ႉ ၵူၼ်းၸႂ်ႉၵေႃႈဝႃႈ ပၢၼ်ႇၶဝ်ၵေႃႈဝႃႈ။ ၵူႈၵေႃႉၸဵမ်ပၢၼ်ႇ ၸဵမ်ၵူၼ်းၸႂ်ႉ ထုၵ်ႇလီႁဵၼ်းႁူႉ ၵၢၼ်ႁူမ်ႇလူမ်ႈ internet ၼမ်ၼမ် ယဝ်ႉၼႆဢေႃႈ” ဝႃႈၼႆ။

လႆႈႁူႉဝႃႈ ယၢမ်းလဵဝ် ၵူၼ်းၸႂ်ႉမၢႆယေးငိုၼ်းမိူင်းမၢၼ်ႈ သေၵႂႃႇယူႇဝႆႉတၢင်ႇၸိုင်ႈမိူင်းၸိူဝ်းၼၼ်ႉ  တႄႇမီးပၼ်ႁႃမႃး။ မၢင်ၸိူဝ်းဢမ်ႇၸၢင်ႈ ၶဝ်ႈဢၵွင်ႉယေးငိုၼ်းၸဝ်ႈၵဝ်ႇလႄႈ လႆႈၸႂ်ႉတိုဝ်း VPN သေ သိုပ်ႇၸႂ်ႉတိုဝ်းၵႂႃႇဝႆႉၼႆသေတႃႉ တွၼ်ႈတႃႇၵူၼ်းၸိူဝ်းယူႇၼႂ်းမိူင်းမၢၼ်ႈ (မိူင်းႁူမ်ႈတုမ်) သေၸႂ်ႉတိုဝ်းတႄႉ ဢမ်ႇပႆႇငိၼ်းဝႃႈ ႁူပ်ႉၺႃးပၼ်ႁႃသင်။

ၶေႃႈမုလ်းဢၼ်ၸုမ်းႁႅၵ်ႊၵႃႊၶဝ် လၵ်ႉဢဝ်ၵႂႃႇလႆႈၼၼ်ႉ တင်းသဵင်ႈ ႁူဝ်ၼပ်ႉမၼ်း မီးၵႃႈႁိုဝ်ၼႆတေႉတေႉတႄႉ ဢမ်ႇလႆႈပိုၼ်ၽၢဝ်ႇဝႆႉတႅတ်ႈတေႃး။

ဢိင်ၼိူဝ်ယေးငိုၼ်းၼႂ်းမိူင်းမၢၼ်ႈ ၺႃးၸုမ်းႁႅၵ်ႊၵႃႊ လၵ်ႉဢဝ်ၶေႃႈမုလ်းၵႂႃႇၼၼ်ႉသေ ၵူၼ်းၸိူဝ်းၸႂ်ႉတိုဝ်း ယေးငိုၼ်းမိူင်းမၢၼ်ႈၵမ်ႈၼမ် ၸၢင်ႈႁူပ်ႉၺႃးၽေး ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၼမ် တိူဝ်း ၶိုၼ်ႈမႃး၊ ၾၢႆႇယေးငိုၼ်းၸၢင်ႈၺႃးလွၵ်ႇငိုတ်ႈ ယွၼ်းငိုၼ်းၼႆ ၵူၼ်းၼုမ်ႇတႆး ၽူႈလူင်ႉလႅၼ်ႇၾၢႆႇဢၢႆႊထီႊ လၢတ်ႈဝႆႉၼင်ႇၼႆ။

မိူဝ်ႈပူၼ်ႉမႃးလိူၼ်ၵျုၼ်ႊၼႆႉ ယေးငိုၼ်း AYA ယၢမ်ႈၺႃးၸုမ်းႁႅၵ်ႊၵႃႊ LAPSUS$ လၵ်ႉဢဝ်ၶေႃႈမုလ်း ၵႂႃႇ တႃႇ 120 GB ယဝ်ႉပွၵ်ႈၼိုင်ႈ။

ၶေႃႈမုလ်းယေးငိုၼ်း AYA ဢၼ်ၸုမ်းႁႅၵ်ႊၵႃႊ The Crew လႆႈၵႂႃႇပွၵ်ႈၼႆႉ ၸွင်ႇမိူၼ်ၵၼ်တင်း ၶေႃႈမုလ်း ဢၼ်ၵဝ်ႇ၊ ဢမ်ႇၼၼ် လၵ်ႉဢဝ်ၵႂႃႇလႆႈၶေႃႈမုလ်းဢၼ်မႂ်ႇႁိုဝ်ၼႆတႄႉ ပႆႇယိုၼ်ယၼ်လႆႈသေတႃႉ ၵွပ်ႈဝႃႈ ၶေႃႈမုလ်းၵူၼ်းၸႂ်ႉတိုဝ်းယေးငိုၼ်း (ပၢၼ်ႇ) ၸိူဝ်းပဵၼ် မၢႆၾၢင်၊ ဝၼ်းလိူၼ်ပီၵိူတ်ႇ၊ မၢႆၾူၼ်း၊ တီႈၵပ်းသိုပ်ႇ ဢီးမေးလ် ၸိုဝ်ႈၸိူဝ်းၼႆႉ ၺႃးလၵ်ႉဢဝ်ၵႂႃႇယဝ်ႉတင်းသဵင်ႈလႄႈ ၵူၼ်းၸႂ်ႉတိုဝ်းယေးငိုၼ်းၶဝ် ထုၵ်ႇလီၾၢင်ႉၵၼ်ၵူႈၵေႃႉ ၽူႈလူင်ႉလႅၼ်ႇၾၢႆႇ ဢၢႆႊထီႊ လၢတ်ႈၼင်ႇၼႆ။ 

ၾၢႆႇယေးငိုၼ်း KBZ တႄႉ ဢွၵ်ႇမႃးပိုၼ်ၽၢဝ်ႇ ယိုၼ်ယၼ်ဝႆႉဝႃႈ ဢမ်ႇမီးလွင်ႈမႆႈၸႂ်သင်ၼႆယူႇ။

သင်မီးမၢႆၾူၼ်းပႅၵ်ႇလၢၵ်ႇ ဢၼ်ၸဝ်ႈၵဝ်ႇဢမ်ႇႁူႉၸၵ်းၼၼ်ႉ သူင်ႇလိၵ်ႈ၊ ၵပ်းသိုပ်ႇၶဝ်ႈမႃးႁႃ၊ သူင်ႇလိင်ႉ Link မႃးၸိုင် ယႃႇပေတဵၵ်းလႃးလႃး ႁႂ်ႈၾၢင်ႉသတိၵၼ်ဝႆႉလီလီၼႆ ၽူႈလူင်ႉလႅၼ်ႇဢၢႆႊတီႊ IT တႆး ပၼ်ၾၢင်ႉဝႆႉၼင်ႇၼႆ။