မိူဝ်ႈဝၼ်းတီႈ 24/6/2026 Dark Web Informer ၽူႈပၵ်းတႃပႂ်ႉတူၺ်းလွၵ်းၵၢတ်ႇတႂ်ႈလိၼ်ၶွင် Dark Web တႅမ်ႈတၢင်ႇၼိူဝ်သိုဝ်ႇတူင်ႇဝူင်းၵူၼ်း X သုၼ်ႇတူဝ်မၼ်းဝႆႉဝႃႈ ၸုမ်းႁႅၵ်ႊၵႃႊ Lapsus$ လၵ်ႉဢဝ်ၶေႃႈမုၼ်းသုၼ်ႇတူဝ် ၵူၼ်းၸိူဝ်းၸႂ်ႉတိုဝ်းယေးငိုၼ်း AYA သေ လွၵ်ႇငိုတ်ႈယွၼ်းငိုၼ်းတီႈၽူႈမီးပုၼ်ႈၽွၼ်းယေးငိုၼ်း ဝႃႈၼႆ။

ၵူၼ်းၵေႃႉၸမ်ၸႂ်ၵၼ်တင်း ၽူႈမီးၸၼ်ႉၼႂ်းယေးငိုၼ်း AYA ၵေႃႉၼိုင်ႈၵေႃႈ ယိုၼ်ယၼ်လၢတ်ႈတီႈသိုဝ်ႇၶၢဝ်ႇဝႆႉဝႃႈ “လွင်ႈၸုမ်းႁႅၵ်ႊၵႃႊလွၵ်ႇငိုတ်ႈမႃးၼၼ်ႉ ၾၢႆႇတၢင်းယေးငိုၼ်း ၵေႃႈ လႆႈႁပ်ႉႁူႉၸွမ်းလီငၢမ်းယဝ်ႉ” ဝႃႈၼႆ။

လွၵ်ႇငိုတ်ႈဝႃႈ လႆႈဝႆႉၶေႃႈမုလ်းသုၼ်ႇတူဝ် ၵူၼ်းၸိူဝ်း ၸႂ်ႉတိုဝ်းယေးငိုၼ်း AYA Bank ၼႂ်းမိူင်းမၢၼ်ႈ၊ သင်ဢမ်ႇဢဝ်ငိုၼ်း ထုတ်ႇဢဝ်ၶိုၼ်း ၼႂ်းၶၢဝ်းတၢင်း ဢၼ်မၵ်းမၼ်ႈဝႆႉၼၼ်ႉ ၸိုင် တေဢဝ်ၶေႃႈမုလ်းၸိူဝ်းၼၼ်ႉ ၵႂႃႇၶၢႆၼႂ်းတူင်ႇဝူင်း Dark Web ဢွင်ႈတီႈ မီးလွင်ႈႁဵတ်းၽိတ်းရႃႇၸဝၢတ်ႈၸိူဝ်းၼၼ်ႉ။

ၽူႈလူင်ႉလႅၼ်ႇဢၢႆႇထီႇ ၵဵဝ်ႇလူၺ်ႈၾၢႆႇယေးငိုၼ်း ၵေႃႉၼိုင်ႈတႄႉ လၢတ်ႈဝႃႈ – ၸွမ်းၼင်ႇၶေႃႈမုလ်း ဢၼ်ၸုမ်းႁႅၵ်ႉၵႃႊၶဝ် ဢဝ်ဢွၵ်ႇၼႄဝႆႉၵမ်ႈၽွင်ႈသေ ၸုမ်းၶဝ်လႅပ်ႈတေလႆႈၵႂႃႇ သဵၼ်ႈမၢႆငိုၼ်းလိူၼ် ၽူႈႁၢပ်ႇၵၢၼ်၊ ၶေႃႈမုလ်းသုၼ်ႇတူဝ် ၵူၼ်းၸိူဝ်းၸႂ်ႉတိုဝ်းယေးငိုၼ်း AYA Bank လႄႈ မၢႆတွင်းလွင်ႈ သူင်ႇ ငိုၼ်း ၶဝ်ႈဢွၵ်ႇၸိူဝ်းၼႆႉ ဝႃႈၼႆ။

ၵူၼ်းၸိူဝ်းၸႂ်ႉတိုဝ်းဝႆႉ ယေးငိုၼ်း AYA Bank ၼၼ်ႉ ႁႂ်ႈဢွၼ်ၵၼ်ၾၢင်ႉတူၺ်း လွင်ႈတူင်ႉၼိုင် ငိုၼ်းၶဝ်ႈဢွၵ်ႇၽႂ်မၼ်း၊ ႁႂ်ႈဢိုတ်းဝႆႉ Credit Card ၸူဝ်ႈၶၢဝ်း၊ သင်မီးလွင်ႈသိုပ်ႇ ၾူၼ်းယွၼ်း OTP လႄႈ သူင်ႇလိင်ႉၶ်ဢၼ်ပွမ်၊ မီးလိၵ်ႈၶဝ်ႈမႃးဝႃႈ ႁႂ်ႈပိၼ်ႇလႅၵ်ႈမၢႆလပ်ႉ Password ၸိူဝ်းၼႆႉၸိုင် ယႃႇပေႁဵတ်းၸွမ်းလႃးလႃး – ၽူႈလူင်ႉလႅၼ်ႇၾၢႆႇဢၢႆႇထီႇၶဝ် တိုၵ်းသူၼ်းပၼ်ၾၢင်ႉဝႆႉ ၼင်ႇၼႆ။

ၼႂ်းဝၼ်းတီႈ 25 မိူဝ်ႈၼႆႉ ၶၢဝ်းယၢမ်းၵၢင်ဝၼ်း 1 မူင်းပၢႆၼႆႉ ၾၢႆႇယေးငိုၼ်း AYA Bank ၵေႃႈ ယိုၼ်ယၼ်ပိုၼ်ၽၢဝ်ႇဝႆႉ တီႈၼိူဝ်သိုဝ်ႇတူင်ႇဝူင်းၶဝ်ဝႃႈ ၶေႃႈမုလ်း ၸိူဝ်းၵဵဝ်ႇၶွင်ႈၸွမ်းယေးငိုၼ်း ထုၵ်ႇၺႃးလၵ်ႉ ၼႆယဝ်ႉ။

မိူၼ်ၼႆ မိူဝ်ႈလိူၼ်ဢေႊပရိူဝ်ႊပူၼ်ႉမႃးၼႆႉၵေႃႈ ၶေႃႈမုလ်း ၵူၼ်းၸိူဝ်းၸႂ်ႉတိုဝ်း Credit Card ၶွင်ယေးငိုၼ်း AYA Bank လုတ်ႈဢွၵ်ႇၵႂႃႇယဝ်ႉၵမ်းၼိုင်ႈ။

ယေးငိုၼ်းဢေႊရႃႇဝတီႇ (AYA Bank) ၼႆႉ မီးၵူၼ်းၸႂ်ႉတိုဝ်းဝႆႉ 3 လၢၼ်ႉပၢႆ။ AYA Bank ၼႆႉ ၸဝ်ႈၶွင်ပဵၼ် ၽူႈမၢၵ်ႈမီးလူင် ဢူးသေႃႇသေႃႇ ၼႆယဝ်ႉ။

တႅမ်ႈ – ၼၢင်းငိုၼ်းႁွမ်