လူင်ပွင်ၸိုင်ႈမိူင်းဢမေႊရိၵၼ်ႊ ၶိုင်တႃႇယိုတ်းဝီႊသႃႊဢႅဝ်ႇယဵမ်ႈ လႄႈ ဝီႊသႃႊပၢႆးမၢၵ်ႈမီးၶွင်ၵူၼ်းၸိူဝ်းယွၼ်းပိုင်ႈယွၼ်းယူႇယွၼ်းပဵၼ်ၵူၼ်းမိူင်းဢမေႊရိၵၼ်ႊ(asylum) တႃႇ 2 သႅၼ်ၵေႃႉ ဝႃႈၼႆ ။

သိုဝ်ႇၶၢဝ်ႇယႂ်ႇ AP ဢိင်ဢဝ်ၶေႃႈဢုပ်ႇဢူဝ်း ၽွင်းလူင်ၾၢႆႇၼွၵ်ႈမိူင်းမိူင်းဢမေႊရိၵၼ်ႊလႄႈ ၽူႈမီးၸၼ်ႉၼႂ်းၸုမ်းလူင်ပွင်ၸိုင်ႈ ၸိုင်ႈမိူင်း ဢမေႊရိၵၼ်ႊ 2 ၵေႃႉ ဢုၵ်ႇၵၼ်ၼၼ်ႉသေမႃးတႅမ်ႈတၢင်ႇပိုၼ်ၽၢဝ်ႇဝႆႉ မိူဝ်ႈဝၼ်းၸၼ်ပူၼ်ႉမႃးၼႆႉ။

ၽူႈမီးၸၼ်ႉ လူင်ပွင်ၸိုင်ႈမိူင်းဢမေႊရိၵၼ်ႊလၢတ်ႈဝႃႈ ၵူၼ်းၸိူဝ်းၼႆႉ ယိပ်းဝီႊသႃႊ ဢႅဝ်ႇယဵမ်ႈ ဝီႊသႃႊပၢႆးမၢၵ်ႈမီး သေမႃးယွၼ်းယူႇသဝ်းၼႂ်းၸိုင်ႈမိူင်းႁဝ်း။ ၶဝ်ဢမ်ႇလႆႈထူပ်းတၢင်းယၢပ်ႇၽိုတ်ႇတႄႉတႄႉ။ ၶဝ်ၶႆႈဝႄႈၶွၼ်ႇလႄႈ ပၵ်းပိူင်မၢႆမီႈ ႁွင်ႈၵၢၼ်ၵူၼ်းၶဝ်ႈမိူင်းၵူၺ်း။ ၵွပ်ႈၼႆ တေႁူမ်ႈမိုဝ်းၵၼ်တင်း ႁွင်ႈၵၢၼ်ၽွင်းလူင်ၾၢႆႇႁူမ်ႇလူမ်ႈၽႅၼ်ႇလိၼ်ၸိုင်ႈမိူင်း DHS သေ တေတႄႇလူင်းမိုဝ်းႁဵတ်းသၢင်ႈၵႂႃႇၼႂ်းဢမ်ႇႁိုင်ဢမ်ႇၼၢၼ်းၼႆႉယဝ်ႉၼႆလႄႈ သိုဝ်ႇၶၢဝ်ႇယႂ်ႇၼႂ်းလုမ်ႈၾႃႉလၢႆလၢႆဢၼ်ထတ်းသၢင်ဝႃႈ – ဢမေႊရိၵၼ်ႊ တေယိုဝ်းဝီႊသႃႊၵူၼ်းမႃးမိူင်းၶဝ် ၼမ်သုတ်းၼႂ်းပိုၼ်းယဝ်ႉ – ဝႃႈၼႆ။

လူင်ပွင်ၸိုင်ႈဢမေႊရိၵၼ်ႊၼႆႉ ယိူင်းဢၢၼ်းတႃႇထတ်းလႄႈယိုတ်းဝီႊသႃႊၵူၼ်းၸိူဝ်းယိပ်းဝီႊသႃႊသႅၼ်း B1 လႄႈ B2 (ဢၼ်ၶဝ်ဢွၵ်ႇပၼ် ၼႂ်းၶၢဝ်းတၢင်း 10 ပီ 2016 ထိုင် 2026) သေယွၼ်းပိုင်ႈယူႇသဝ်း မိူင်းဢမေႊရိၵၼ်ႊ ဝႆႉၸိူဝ်းၼၼ်ႉ – ၶၢဝ်ႇ AP ႁၢႆးငၢၼ်းဝႆႉၼင်ႇၼႆ။

ၶၢဝ်ႇ Aljazeera News ၵေႃႈပိုၼ်ၽၢဝ်ႇဝႆႉဝႃႈ ဢမေႊရိၵၼ်ႊၼႆႉ ပူၼ်ႉမႃး 18 လိူၼ်(ၼႂ်းၶၢဝ်းတၢင်းပီပၢႆၶိုင်ႈ)ၼႆႉၵေႃႈ လႆႈယိုတ်းဝီႊသႃႊ ၵူၼ်း (175000) ၵေႃႉပၢႆ – ၸိူဝ်းပူၼ်ႉပႅၼ်ပၵ်းပိူင်ၸိုင်ႈမိူင်းမိူၼ်ၼင်ႇ မဝ်းလဝ်ႈသေ ႁေႃႈရူတ်ႉၵႃး ပဵၼ်ၽေးၵိုင်ႉၵၢင်ႉ၊ ပူၼ်ႉပႅၼ်သုၼ်ႇလႆႈၵူၼ်း မိူၼ်ၼင်ႇ ၵၼ်ႉၸၼ် – ၸူၼ် ၸိူဝ်းၼႆႉ၊ ၵူၼ်းၸိူဝ်းထတ်းသၢင်ႈလၢတ်ႈၸႃ ၵဵဝ်ႇၵပ်းလွင်ႈမူႇပိူင်ပေႃႊလသီႊ ဢမေႊရိၵၼ်ႊ ဝႆႉၼိူဝ် ဝၼ်းဢွၵ်ႇၵၢင် – လၢတ်ႈၸႃႇဢွၵ်ႇသိုဝ်ႇလႄႈ တၢင်းဢွၼ်ႊလၢႆႊ ၸိူဝ်းၼႆႉ- ဝႃႈၼႆ ။

Ref; Aljazeera News