ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ လၢတ်ႈဝႃႈ – ယၢမ်းလဵဝ်လႆႈဢုပ်ႇၵုမ်ၵၼ်ဝႆႉတင်း မိူင်းဢီႊရၼ်ႊယူႇလႄႈ ပဵၼ်တိုဝ်ႉတၢင်းၵမ်းလိုၼ်းသုတ်း တႃႇဢီႊရၼ်ႊယဝ်ႉ ဝႃႈၼႆ။
လွင်ႈၼႆႉ ၸွမ်ၸိုင်ႈထရမ်ႉ တွပ်ႇလၢတ်ႈၵႂႃႇတီႈသိုဝ်ႇၶၢဝ်ႇ ၼႂ်းဝၼ်းတီႈ 3 လိူၼ်ဢေႃးၵၢတ်ႉသ် တီႈ ႁိူၼ်းႁေႃၶၢဝ် မိူင်းဢမေႊရိၵၼ်ႊ။ မၼ်းၸၢႆးလၢတ်ႈဝႃႈ ယွၼ်ႉ မိူင်းသေႃႊတီႊဢႃႊရေးပျႃႉ၊ ယူႇဢေႇဢီး တင်း ၵႃႊတႃႊ ၶဝ်သၢမ်မိူင်း တုၵ်းယွၼ်းလႄႈ ၸင်ႇလႆႈတူၵ်းလူင်း တေသိုပ်ႇဢုပ်ႇၵုမ်ၵၼ်တင်း ဢီႊရၼ်ႊ ဝႃႈၼႆ။
ၶႅပ်းႁၢင်ႈၵဝ်ႇ – ႁိူဝ်းတၢင်ႇၶူဝ်းၵုၼ်ႇ မိူင်းထႆး ထုၵ်ႇၸုမ်းသိုၵ်း ဢီႊရၼ်ႊ ယိုဝ်းတိုၵ်း ၾႆးမႆႈ (Crd – Photo)
ၵူၺ်းၵႃႈ ၵဵဝ်ႇလူၺ်ႈလွင်ႈၼႆႉသေ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း ဢီႊရၼ်ႊတႄႉ တွပ်ႇထဵင်ဝႆႉဝႃႈ ဢမ်ႇမီးလွင်ႈလႆႈဢုပ်ႇၵုမ်ၵၼ်တင်း ဢမေႊရိၵၼ်ႊ။ တႃႇႁိူဝ်းတေႃႉတၢင်ႇၶူဝ်း ၵုၼ်ႇ တေၸၢင်ႈ လတ်းၶၢမ်ႈ ၵႂႃႇမႃးလႆႈ ၼႂ်းသဵၼ်ႈတၢင်းၼမ်ႉႁေႃႊမူၵ်ႊသ်ၼ်ႉၼၼ်ႉ ဢီႊရၼ်ႊ လႆႈဢုပ်ႇၵၼ်ဝႆႉတင်း မိူင်းဢူဝ်ႊမၢၼ်ႊၵူၺ်း ၼႆယဝ်ႉ။
ပၢင်တိုၵ်း ဢမေႊရိၵၼ်ႊ၊ ဢိတ်ႉသရေး တင်း ဢီႊရၼ်ႊ ဢၼ်တႄႇပဵၼ်မႃး ၼႂ်းဝၼ်းတီႈ 28 လိူၼ်ၾႅပ်ႊပိဝ်ႊရီႊၼၼ်ႉ သွင်ၾၢႆႇဢုပ်ႇၵုမ် လႆႈၶေႃႈတူၵ်းလူင်းၵိုတ်းတိုၵ်းၵၼ်သေတႃႉ ဝၢႆးလင်ၼႆႉ ၶေႃႈတူၵ်းလူင်းၵိုတ်းတိုၵ်း လႆႈလူႉလႅဝ်ၵႂႃႇၶိုၼ်း။
ပၢင်တိုၵ်းၼႆႉ ႁိုင်မႃးၶၢဝ်းတၢင်း 5 လိူၼ်ပၢႆယဝ်ႉသေတႃႉ ဢီႊရၼ်ႊ ယင်းတိုၵ်ႉၸႂ်ႉ မၢၵ်ႇၼူၾႆး ပိုတ်း ယိုဝ်းၶိုၼ်းလႄႈ ၵဵပ်းသိမ်း ယူႊရေႊၼီႊယမ်ႊဝႆႉယူႇ။
ၾၢႆႇၼိုင်ႈၵေႃႈ ဢီႊရၼ်ႊ ၺႃးမၢပ်ႇမႂ်ဝႆႉဝႃႈ ဢၢၼ်းၶတ်းၸႂ်ႁဵတ်းဢွၵ်ႇ ၶိူင်ႈၼိဝ်ႊၶလီႊယိူဝ်ႊၼႆသေတႃႉ ၶဝ်တုမ်ႉတွပ်ႇဝႆႉဝႃႈ ပဵၼ်တႃႇၸႂ်ႉတိုဝ်းၼႂ်းသုၼ်ႇ ၶွင်ၾၢႆႇၵၼ်ၵူၼ်းၵူၺ်း ၼႆယဝ်ႉ။
တႅမ်ႈ – ၼၢင်းငိုၼ်းႁွမ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ