ဢမေႊရိၵၼ်ႊ တင်း ဢီႊရၼ်ႊ ဢဝ်မၢၵ်ႇၼူၾႆး တင်း ၶိူင်ႈတရူၼ်းသေ ပိုတ်းယိုဝ်းၵၼ်ၵႂႃႇမႃးဝႆႉ ႁၢဝ်ႈႁႅင်း၊ ၵဵဝ်ႇလူၺ်ႈ လွင်ႈပိုတ်ႇ/ဢိုတ်း သဵၼ်ႈတၢင်းၼမ်ႉႁေႃႊမူၵ်ႉသ်ၼၼ်ႉၵေႃႈ သွင်ၾၢႆႇၶႅင်ႇၵၼ် ပိုၼ်ၽၢဝ်ႇဝႆႉ။

ယွၼ်ႉဢီႊရၼ်ႊ တိုၵ်းတေႃးႁိူဝ်းတၢင်ႇၵုၼ်ႇ လမ်းၼိုင်ႈၼႆသေ ဢမေႊရိၵၼ်ႊ တင်ႈပဝ်ႉမၢႆၵၢၼ်သိုၵ်း တိုၵ်းတေႃးသႂ်ႇဢီႊရၼ်ႊ 140 တီႈပၢႆ။

ထိုင်မႃး ၼႂ်းဝၼ်းတီႈ 12 လိူၼ်ၵျူႊလၢႆႊၼႆႉ ဢီႊရၼ်ႊလၢတ်ႈဝႃႈ လႆႈပိုတ်းယိုဝ်းတိုၵ်းတေႃးသႂ်ႇ တပ်ႉပၢင်သဝ်း သိုၵ်းဢမေႊရိၵၼ်ႊ ၸိူဝ်းမီးဝႆႉၼႂ်းမိူင်းဢူၺ်းလီ ဢမေႊရိၵၼ်ႊ မိူၼ်ၼင်ႇ ၼႂ်းမိူင်း ၵျေႃႊတၼ်ႊ၊ ယူႊဢေႊဢီး၊ ၵႃႊတႃႊ၊ ၵူႇဝိတ်ႉ လႄႈ ပႃႊရိၼ်း ၸိူဝ်းၼႆႉ။

ၾၢႆႇၼိုင်ႈ ဢီႊရၼ်ႊ ပိုၼ်ၽၢဝ်ႇဝႃႈ ပိၵ်ႉဢိုတ်းဝႆႉ သဵၼ်ႈတၢင်းၼမ်ႉႁေႃႊမူၵ်ႉသ်ၼႆသေတႃႉ ငဝ်ႈငုၼ်းတိူင်းသိုၵ်း ပွတ်းၵၢင် ဢမေႊရိၵၼ်ႊတႄႉ တုမ်ႉတွပ်ႇလၢတ်ႈဝႃႈ သဵၼ်ႈတၢင်း ၼမ်ႉႁေႃႊမူၵ်ႉသ် တိုၵ်ႉပိုတ်ႇဝႆႉယူႇ ဝႃႈၼႆ။

ယွၼ်ႉႁိူဝ်းတၢင်ႇၵုၼ်ႇ ၺႃးတိုၵ်းတေႃး တီႈႁိမ်းၾင်ႇၼမ်ႉလိုၵ်ႉ ဢူဝ်ႊမၢၼ်ႊသေ ၽူႈၸွမ်းႁိူဝ်း ၵူၼ်းမိူင်း ဢိၼ်ႊတီႊယိူဝ်ႊ ၵေႃႉၼိုင်ႈ ႁၢႆလၢႆဝႆႉ။

ၼႂ်းဝၼ်းတီႈ 13 လိူၼ်ၵျူႊလၢႆႊၼႆႉ ငဝ်ႈငုၼ်းတိူင်းသိုၵ်းပွတ်းၵၢင် ဢမေႊရိၵၼ်ႊ ၽႅၼ်ၵၢၼ်တိုၵ်းတေႃးသႂ်ႇ ဢီႊရၼ်ႊထႅင်ႈ။ ယွၼ်ႉပၼ်ႁႃပတိၵ်ႈၶၢတ်ႈၸိူဝ်းၼႆႉသေ တီႈမိူင်းၵႃႊတႃႊ မီးၵူၼ်းမၢတ်ႇၸဵပ်း 3 ၵေႃႉ ပႃးလုၵ်ႈဢွၼ်ႇၵေႃႉၼိုင်ႈ၊ ၵႃႈၶၼ်ႁႅင်းထၢတ်ႈလုမ်ႈၾႃႉၵေႃႈ ပုင်ႈၶိုၼ်ႈသုင်မႃး။

ယွၼ်ႉသွင်ၾၢႆႇ တိုၵ်းတေႃးၵၼ်ၶိုၼ်းလႄႈ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ လၢတ်ႈဝႃႈ ၶေႃႈတူၵ်းလူင်းၵိုတ်းတိုၵ်းၵၼ် ၼႂ်းလိူၼ်ပူၼ်ႉမႃးၼႆႉ လူႉလႅဝ်ၵႂႃႇယဝ်ႉ ဝႃႈၼႆ။

မိူၼ်ၼႆ ၽူႈငူပ်ႉငီႉၸၼ်ႉသုင် မိူင်းဢီႊရၼ်ႊၵေႃႈ တႅမ်ႈတၢင်ႇဝႆႉၼိူဝ်သိုဝ်ႇတူင်ႇဝူင်းမၼ်းဝႃႈ ၶေႃႈတူၵ်းလူင်းၵၼ် လူႉလႅဝ်ၵႂႃႇယဝ်ႉ ဝႃႈၼႆ။