ဝၼ်းတီႈ 8/9/2026 တွၼ်ႈၵၢင်ၼႂ် 10 မူင်း တေႃႇ 12 မူင်း လုၵ်ႈလၢင်း လႄႈ ၵူၼ်းၵိုတ်းတၢင်းလင် ႁဵတ်းပၢင်တၢင်းလီ ပၼ်ၸဝ်ႈႁတ်းႁၢၼ် တီႈဝတ်ႉ ၽရၼွၼ်းၶွၼ်တၢၼ်ႊ ဝဵင်းမႄႈရိမ်း ၵဵင်းမႂ်ႇ

တီႈပၢင် ၸႃႇပၼ ပူၼ်ႉၶၢပ်ႈတူဝ် ၸဝ်ႈႁၢၼ် ႁတ်းႁၢၼ်ၼၼ်ႉ ၽူႈယၢမ်ႈႁူမ်ႈၽၢၵ်ႈ ၵၢၼ်မၼ်းၸဝ်ႈ မိူၼ်ၼင်ႇ ၸဝ်ႈၶမ်းႁၢၼ်ၾႃႉ (ၶိူဝ်းၸဝ်ႈၾႃႉသႅၼ်ဝီ)၊  ၸဝ်ႈသိူဝ်ဢွၼ်ႇ ၸဝ်ႈသၢႆမိူင်း ၸဝ်ႈၸၢႆးယီႈ(ယၢဝ်း) ၸဝ်ႈၶိုၼ်းသႂ် ၸႂ်ယဵၼ် ပႃးၸဵမ် ႁူဝ်ပဝ်ႈၵေႃလိၵ်ႈလၢႆး ၵဵင်းမႂ်ႇ ပေႃႈၸၢင်းၽူဝ်းဢွင်ႇ ၽူႈတူင်ႉၼိုင် ၵၢၼ်ၸိူဝ်ႉၶိူဝ်းတႆး ၼႂ်းမိူင်းထႆး ၼၢင်းသႅင်မိူင်းလီ ၸုမ်းတူင်ႉၼိုင်သုၼ်ႇလႆႈၼၢင်းယိင်းတႆး ၸိူဝ်းၼႆႉ ၶဝ်ႈႁူမ်ႈလၢႆလၢႆၸဝ်ႈ။

ၸဝ်ႈႁတ်းႁၢၼ် ဢႃယု 77 ယဵပ်ႇၶဝ်ႈၼႂ်းပီ 78 ၽူႈယၢမ်ႈႁၢပ်ႇၵၢၼ် ၾၢႆႇသၢႆလူမ်း ၵိုၵ်းပိုၼ်းတႆး ၵိုၵ်းပိုၼ်း SSA ၼၼ်ႉ လႆႈလူႉသဵင်ႈသုတ်းမုၼ်ၵႂႃႇတီႈ ႁူင်းယႃလူင်   တီႈဝဵင်းၵဵင်းမႂ်ႇ ၸိုင်ႈထႆး။

ၸဝ်ႈႁၢၼ် ႁတ်းႁၢၼ်ၼႆႉ ၵိူတ်ႇ လိူၼ်မေႊ 1 ဝၼ်း ပီ 1949 ။  ပေႃႈပဵၼ်လုင်းၸၢႆးၺုၼ်ႉ မႄႈၸိုဝ်ႈ ပႃႈၼၢင်းသႂ် ၸႃႇတိ တီႈၵိူတ်ႇ ဝၢၼ်ႈၸွႆးၵုင်း ဢိူင်ႇၸွႆးၵုင်း ၸႄႈဝဵင်းၵျွၵ်ႉမႄး။ ၸိုဝ်ႈမိူဝ်ႈလဵၵ်ႉ ႁွင်ႉ ၸၢႆးၵျေႃႇၺုၼ်ႉ ဢွင်ႇပူၼ်ႉၸၼ်ႉ 10 တီႈႁူင်းႁဵၼ်း ၸၼ်ႉသုင် မၢႆ 2 ဝဵင်းၵျွၵ်ႉမႄး။

1974 တႄႇၼႃႈႁိူၼ်း ၵိုၵ်း ၼၢင်းသႅင်ၼူၼ်း ဝၢၼ်ႈပုင်ႇလႅၼ်း ဢိူင်ႇဝၢၼ်ႈပၢၼ်း ၸႄႈဝဵင်းသီႇပေႃႉ။ မီးလုၵ်ႈယိင်းႁူမ်ႈၵၼ်ၵေႃႉၼိုင်ႈ။

ၸဝ်ႈႁတ်းႁၢၼ်ၼႆႉၵတ်ႉၶႅၼ်ႇလိၵ်ႈတႆး လိၵ်ႈမၢၼ်ႈ လိၵ်ႈဢိင်းၵလဵတ်ႈ။ 1969 လိူၼ်ၻီႊသႅမ်ႊပိူဝ်ႊ ဝၢႆးဢွင်ႇပူၼ်ႉၸၼ်ႉသုင်ယဝ်ႉ ၶဝ်ႈႁၢပ်ႇၵၢၼ်သိုၵ်း တီႈၸဝ်ႈသိူဝ်ဝၢႆႇ ႁိုဝ်ၸဝ်ႈၸၢင်ႉယွင်ႁူၺ်ႈ ၼႂ်းတပ်ႉသိုၵ်းၸိုင်ႈတႆး SSA။

1970 ၶိုၼ်ႈပဵၼ်ၸၼ်ႉႁူဝ်ႁၼ် ။ 1971 လႆႈႁပ်ႉပုၼ်ႈၽွၼ်း ၵႅမ်ၽူႈယိပ်းၸၢၵ်ႈ သၢႆလူမ်းတီႈ ငဝ်ႈငုၼ်း တပ်ႉသိုၵ်းၸိုင်ႈတႆး SSA ။ 1976 ၼႂ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်း ၸိုင်ႈတႆး SSA မီးလွင်ႈတႅၵ်ႇၸတ်ႉၵၼ်လႄႈ ၵိုတ်းလိုဝ်ႈၵၢၼ်ၵႂႃႇ။

ဝၢႆးၼၼ်ႉၸွႆႈၵၢၼ်လၢႆၾၢႆႇ မူႇၸုမ်းၸိူဝ်းယူႇလႅၼ်လိၼ်တႆး ထႆး ပႃးၸဵမ်ၸုမ်းတူင်ႉၼိုင် ၼႂ်းမိူင်းတႆး။ 1984 ၸွႆႈၵၢၼ် ၸုမ်းၶၢဝ်ႇၽူႈတွႆႇႁွၵ်ႈ တေႃႇထိုင် ပီ 2011 ။ ဝၢႆးၸဝ်ႈသႅင်ၸိုၼ်ႈ ႁိုဝ် သၶႁ လူႉသဵင်ႈသုတ်းမုၼ်ယဝ်ႉ ၸဝ်ႈႁတ်းႁၢၼ် ပွၵ်ႇၵႂႃႇ ႁၢပ်ႇၵၢၼ် ၼႂ်း SSPP/SSA ၶိုၼ်းသေ လႆႈထုၵ်ႇမွပ်ႈပၼ် ၸၼ်ႉၸဝ်ႈႁၢၼ်။

ဢိင်ၼိူဝ်ပၢႆးယူႇလီဢမ်ႇၶႅမ်ႉသေ တင်ႈတႄႇၶၢဝ်းတၢင်းပဵၼ်ၶူဝ်ႊဝိတ်ႉ 19 ၽႄႈ ဢမ်ႇလႆႈပွၵ်ႈမိူဝ်းၶိုၼ်းငဝ်ႈငုၼ်း။ 

ၸဝ်ႈႁၢၼ် ႁတ်းႁၢၼ်ၼႆႉ မီးတၢင်းပဵၼ်ၵူၼ်းထဝ်ႈ လၢႆလၢႆယၢင်ႇ။ ၼႂ်းပီ 2026 ၼႆႉ လႆႈၶဝ်ႈ လႆႈဢွၵ်ႇ ႁူင်းယႃ ထပ်းၵၼ်လၢႆပွၵ်ႈ။ ၵမ်းလိုၼ်းသုတ်း ယႃဢမ်ႇလႆႈ လႆႈလူႉသဵင်သုတ်းမုၼ်ၵႂႃႇ တီႈႁူင်းယႃ ပႃႇငႄႉ ၵဵင်းမႂ်ႇ မိူဝ်ႈဝၼ်းတီႈ 6 လိူၼ်သႅပ်ႊထိမ်ႊပိူဝ်ႊ 2026 ၼႆႉ ယၢမ်းၵၢင်ၼႂ်။

ၸဝ်ႈႁတ်းႁၢၼ်ၼႆႉ ဢိင်ၼိူဝ်ၵတ်ႉလႅၼ်ႇ ၼႃႈၵၢၼ် ၾၢႆႇၶၢဝ်ႇသၢႆလူမ်း Telegraph / လတ်းဢဝ်ၶၢဝ်ႇသၢႆလူမ်း Intercept ၸိူဝ်းၼႆႉသေ ၸွႆႈထႅမ် ၼႃႈၵၢၼ် လၢႆမူႇ လၢႆၸုမ်း ဢမ်ႇလိုဝ်ႈဢမ်ႇယင်ႉ တေႃႇပေႃးလူႉသဵင်ႈသုတ်းမုၼ်။