ၽဵင်းၵႂၢမ်းၼႆႉ သင်ပဵၼ်ၵေႃႉဢၼ်မေႃႁွင်ႉ ႁႂ်ႈဝၢၼ်ႁူထိုင်ၸႂ်ၼႆၸိုင် ၽူႈလႂ်ၽႂ်ထွမ်ႇၵေႃႈ ၶႂ်ႈသိုပ်ႇထွမ်ႇထႅင်ႈ ၊ ၵေႃႉလႂ်ထွမ်ႇမႅၼ်ႈၵေႃႈ တေၶႂ်ႈႁွင်ႉၸပ်းသူပ်းတိတ်းပၢၵ်ႇၶၢၼ်ပၢဝ်ႇႁွင်ႉၸွမ်းယူႇတႃႇသေႇ။ မိူၼ်ၼင်ႇ ၽဵင်းၵႂၢမ်း ၸၢႆးၸိူင်းႁၢၼ်ၵေႃႈ တေႃႈၼင်ႇၼၼ်-  ၽႂ်လႆႈထွမ်ႇငိၼ်းၵေႃႈ တိုၼ်းႁပ်ႉႁူႉလႆႈဝႃႈ မၼ်းထိုင်ဢူၵ်းထိုင်ၸႂ် ။ မိူဝ်ႈလဵဝ်တႄႉ ဢိင်ၼိူဝ် သင်ၶႃႇရ သၽေႃးတြႃးသေ မၼ်းၸၢႆး သဵင်ႈၵၢမ်ႇသုတ်းမုၼ်ယဝ်ႉ ဢမ်ႇမီးၼႂ်းၶူင်းၵၢင်ယဝ်ႉ။  သင်ပဵၼ်မွၵ်ႇၵေႃႈ လႆႈဝႃႈၶဝ်ႈပႃးၼႂ်းသႅၼ်းမွၵ်ႇဢၼ်ၸဵဝ်းႁူင်ႈၸဵဝ်းႁဵဝ်ႇ လူႉသဵင်ႈၵႂႃႇၽွင်းၵူၼ်းတင်းၼမ် သေးလၢႆလူင်လၢင်။ ၽူႈပၼ်ႁႅင်းမၼ်းၸၢႆးၵမ်ႈၼမ် လၢတ်ႈဝႃႈ သင်ဢမ်ႇၸဵဝ်းႁူင်ႈတႄႉ မၼ်းၸၢႆးတေၵႂႃႇလႆႈၵႆ ယၢင်ႈပႆလႆႈသုင်လိူဝ်သေၼႆႉလူးၵွၼ်ႇ ဝႃႈၼႆ။  

ၵေႃႉဢၼ် သဵင်ဝၢၼ် ၶၢၼ်ႁွင်ႉလႆႈသဵင်သုင် Key သုင်သေ ၽဵင်းၵႂၢမ်းၶဝ်ႈႁူၵူၼ်းၵူႈသႅၼ်းပၢၼ်လႆႈၼႆႉ ပႃးၽူႈႁွင်ႉၵႂၢမ်းတႆးၸိုဝ်ႈလိုဝ်း ၸၢႆးၸိူင်းႁၢၼ်ၵေႃႉၼိုင်ႈ။

ၸွမ်းလူၺ်ႈ ၽူႈပၼ်ႁႅင်းမၼ်းၸၢႆးလၢတ်ႈတႄႉ လႆႈတႄႇထွမ်ႇၵႂၢမ်းၸၢႆးၸိူင်းႁၢၼ်မႃး ၸဵမ်မိူဝ်ႈ 2003-2004  ။ မိူၼ်ၼင်ႇ ၶႅပ်းၵႂၢမ်း တူၼ်ႈႁႅင်ႈဢမ်ႇမီးႁူမ်ႈ ၊ ပေႉၸႂ်ၵွပ်ႈၼမ်ႉယၢတ်ႇ ၊ သၢဝ်သၢမ်ၸဵင်ႇၶမ်း ၊ ၵၢင်ၸႂ်ၶႃႈႁွင်ႉၵႂၢမ်း လႄႈ ၽဵင်းၵႂၢမ်း ယွၼ်းႁၵ်ႉၼႂ်းၾၼ် ၊ ယႃႇၸူႇႁူဝ်ၸႂ် ၊ ၾိင်ႈငႄႈလႄႈပီမႂ်ႇ ၸိူဝ်းၼႆႉတႄႇၵႂႃႇ မီးထႅင်ႈၽဵင်းတင်းၼမ်တင်းလၢႆ ဢၼ်ၽူႈထွမ်ႇငိၼ်းသူင်မိုတ်ႇထွမ်ႇမႃးယူႇၶၢဝ်းႁိုင် တေႃႇထိုင်ဝၼ်းမိူဝ်ႈၼႆႉ။

မိူၼ်ၼင်ႇ ၽူႈႁွင်ႉၵႂၢမ်းၼင်ႇၵၼ် ဢၼ်ယၢမ်ႈတူင်ႉၼိုင်ၸွမ်းၵၼ်မႃးၸိူဝ်းၼႆႉၵေႃႈ ႁၼ်ထိုင်ဝႃႈ မၼ်းၸၢႆးပဵၼ်ၵူၼ်း ၶဝ်ႈဢွၵ်ႇငၢႆႈ ၊ မေႃလၢတ်ႈမေႃယွၵ်ႇ မေႃမွၵ်ႇမေႃၶူၼ်ႉ ႁႂ်ႈၵူၼ်းယူႇၸမ် သိူဝ်းၵျေႃႇလူၺ်ႈမၼ်းၸၢႆးတႃႇသေႇ ဝႃႈၼႆ။

ဢိင်ၼိူဝ်လွင်ႈၼႆႉ ၼၢင်းမွၵ်ႇၸၢမ်ၶမ်း  ၽူႈႁွင်ႉၵႂၢမ်းၸိုဝ်ႈလိုဝ်းၼႂ်းမိူင်းတႆးလၢတ်ႈၼႄဝႆႉၼင်ႇၼႆ – “မိူဝ်ႈႁဝ်းၶႃႈ ၵႂႃႇပွႆးတီႈမိူင်းယၢင်း(ပွတ်းဢွၵ်ႇၶူင်း) တီႈလၢဝ်လၢဝ်(ၽူႈႁွင်ႉၵႂၢမ်း)ၶဝ်ယူႇသေ ၶီႇၵႃး ပွၵ်ႈၶိုၼ်းတႃႈၶီႈလဵၵ်း ယၢမ်းၶမ်ႈၶိုၼ်းၼၼ်ႉ မၼ်းမေႃၶႆႈဢပုမ်ႇပိတ်းပွတ်း ယဝ်ႉယဝ်ႉယွၵ်ႇယွၵ်ႇ လႆႈႁုၼ်ႉလႆႈၶူဝ်ၼႃႇ ။ မၼ်းပဵၼ်တီႈ မၢႆတွင်း ဢမ်ႇလိုမ်းလႆႈၶႃႈ ။ပေႃးဝႃႈၺႃးၵၼ်ၼႆ မိူၼ်ပီႈၼွင်ႉၵၼ် ယူႇၸွမ်းၵၼ်မႃးၵေႃႈ မီးတၢင်းသိူဝ်းၸႂ် ယူႇၵူႈၶၢဝ်းယၢမ်းၶႃႈဢေႃႈ။”

ၼၢင်းမွၵ်ႇၸၢမ်ၶမ်း သိုပ်ႇလၢတ်ႈဝႃႈ – မိူဝ်ႈ 1999 ၼၼ်ႉ လႆႈထူပ်းၸၢႆးၸိူင်းႁၢၼ် တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၊ ႁၼ်မၼ်းၸၢႆးမေႃလၢတ်ႈမေႃဢုပ်ႇ ။ ပႆႇမိုတ်ႈၵၼ်တႄႉတႄႉသေတႃႉ ႁပ်ႉႁူႉလႆႈဝႃႈ မၼ်းပဵၼ်ၵူၼ်း ၵတ်ႉၵူၼ်းၵႃႈၵေႃႉၼိုင်ႈဝႃႈၼႆ။

လိူဝ်သေ ႁွင်ႉၵႂၢမ်းၵတ်ႉၶႅၼ်ႇယဝ်ႉ ၸၢႆးၸိူင်းႁၢၼ်ၼႆႉ မေႃဝူၼ်ႉၶူၼ်ႉၶႆႈတႅမ်ႈၸၢပ်ႈၵႂၢမ်းထႅင်ႈလႄႈ ၵိုင်ႇလီပဵၼ် မေႃၵႂၢမ်းတႆးၸိုဝ်ႈလိုဝ်းၵေႃႉၼိုင်ႈယူႇ ။

ယွၼ်ႉငဝ်းလၢႆးလၢႆလွင်ႈသေ မၼ်းၸၢႆးၵိုတ်းလိုဝ်ႈၵၢၼ်ႁွင်ႉၽဵင်းတႅမ်ႈၽဵင်းဝႆႉ ၼပ်ႉႁူဝ်ပီမၼ်းသေတႃႉ ၽူႈပၼ်ႁႅင်းမၼ်းၸၢႆး တိုၵ်ႉမွင်းပႂ်ႉပၼ်ႁႅင်းမၼ်းၸၢႆးမႃးယူႇတႃႇသေႇ။ မၢင်ၸိူဝ်းလႆႈၸႂ်ၵႂၢမ်းမၼ်းၸၢႆးၼႃႇလႄႈ ထိုင်တီႈ သိုပ်ႇႁွင်ႉဢွၵ်ႇမႂ်ႇမႃးၵေႃႈ မီးတၢင်းၼမ်လူးၵွၼ်ႇ ။

မိူဝ်ႈၽွင်းမၼ်းၸၢႆး တိုၵ်ႉၵႅၼ်ႇၶႅင်ႁႅင်းလီတႄႉ ၵႂႃႇမူၼ်ႈၸႂ်ပၼ်ၽူႈပၼ်ႁႅင်းမၼ်း ပတ်ႉပိုၼ်ႉမိူင်းတႆး ဢမ်ႇၶၢင်းႁိူဝ်ႉၶၢင်းဢူၼ်ႈ ။ ဢမ်ႇၵွမ်ႉၼႂ်မိူင်းတႆးၵူၺ်း ၼႂ်းမိူင်းထႆးၵေႃႈ မၼ်းၸၢႆးယၢမ်ႈၵႂႃႇမူၼ်ႈၸႂ်ပၼ်ပီႈၼွင်ႉႁႅင်းၵၢၼ်ယၢၼ်မိူင်းယူႇလၢႆပီ ။

ယူႇတီႈ ႁူင်းပွႆႇသဵင် သေႃဝေႃႊထေႃႊ ၵဵင်းမႂ်ႇၵေႃႈ ယၢမ်ႈမွၵ်ႇႁွင်ႉမႃးမူၼ်ႈၸႂ်ပၼ်ၽဵင်းၵႂၢမ်းတီႈႁူင်းပွႆႇသဵင် ႁႂ်ႈပေႃးတူဝ်ႈထိုင်လၢႆလၢႆမိူင်းလူးၵွၼ်ႇ ။ ၽွင်းၼၼ်ႉ ပီထႆး 2547 ၽူႈၸတ်းလၢႆးၵၢၼ်ၾၢႆႇတႆးတီႈသေႃဝေႃႊထေႃႊ တိုၵ်ႉပဵꧣ် ပႃႈၼၢင်းသူးသီ  ชูศรี เชาวาทิน ။

မိူဝ်ႈပၢၼ်ၼၼ်ႉ ပႆႇမီးၽႂ်ၸတ်းပၢင်ႁွင်ႉၽဵင်းၵႂၢမ်းတႆးတေႉတေႉဝႃႈဝႃႈ လိူဝ်သေ ႁူင်းပွႆႇသဵင် ။ သိုပ်ႇၼၼ်ႉမႃး​​ၵေႃႈ ႁူမ်ႈၸွႆႈ​​ႁႃငိုၼ်ၵွင်ႈၵၢင်တႃႇၸွႆႈၵူၼ်းထူပ်းၽေးၵူႈလွင်ႈလွင်ႈ( ႁိုဝ်ဢမ်ႇၼၼ်) ၽွင်းၼၼ်ႉ ၵမ်ႈၼမ် တေ ႁွင်ႉၵႂၢမ်း ​​ပျေႃႇမူၼ်ႈ တီႈသူၼ်သတ်းၵဵင်းမႂ်ႇ လႆႈဝႃႈၵိုၼ်းၶွၼ်ႈၼႅၼ်ႈၼႃလီၼႃႇၼႆ  ၼၢင်းမူဝ်ၶၢဝ်ၼူၼ်း  ၽူႈၸတ်းလၢႆးၵၢၼ်ယၢမ်းလဵဝ် လၢတ်ႈၼႄၼင်ႇၼႆ။

တီႈလိၼ်ၵိူတ်ႇမၼ်းၸၢႆးတႄႉ ပဵၼ်ဝၢၼ်ႈၼႃးပၢင်ႇ ဢိူင်ႇႁႃႈဝၢၼ်ႈ ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း ။ ၸိုဝ်ႈမႄႈပဵၼ်ပႃႈၺုၼ်ႉ ၵေႃႉပဵၼ်ပေႃႈ လူႉသဵင်ႈၵႂႃႇၸဵမ်မိူဝ်ႈမၼ်းၸၢႆးလဵၵ်ႉလႄႈ ထိုင်တီႈမၼ်းၸၢႆး ႁွင်ႉမၢၵ်ႇၵႂၢမ်း ၵဵဝ်ႇၵပ်းလွင်ႈဝႃႈ ပဵၼ်လုၵ်ႈမႄႈမၢႆႈၼၼ်ႉမႃးယူႇ။

ၸၢႆးၸိူင်းႁၢၼ်ၼႆႉမီး ပီႈၼွင်ႉႁူမ်ႈတွင်ႉၵၼ် 3 ၵေႃႉ မၼ်ၸၢႆးၵေႃႉယႂ်ႇသုတ်း ပဵၼ်ပီႈဢၢႆႈလူင်ပိူၼ်ႈသေ မီးဝႆႉၼွင်ႉယိင်း ၸိုဝ်ႈ ၼၢင်းမွၼ်းႁွမ် လႄႈၼွင်ႉၸၢႆး ၸိုဝ်ႈ ၸၢႆးၼေႃႇၶိူဝ်း ။

မၼ်းၸၢႆး တႄႇၼႃႈႁိူၼ်းဝႆႉမီးမေးၼၢင်း 2 ၵေႃႉ။ မေးၵေႃႉမၢႆၼိုင်ႈ မီးလုၵ်ႈႁူမ်ႈၵၼ်ဝႆႉ 3 ၵေႃႉလႄႈ မေးၼၢင်းမၼ်းၸၢႆး မၢႆသွင် မီးလုၵ်ႈႁူမ်ႈၵၼ် 4 ၵေႃႉ ။ ႁူမ်ႈသဵင်ႈ ၼေႃႇတႅၼ်းၶိူဝ်းဢွၼ်ႇမၼ်းၸၢႆး မီးဝႆႉ 7 ၵေႃႉ။

ပီ 2014 ၼၼ့် ၸၢႆးၸိူင်းႁၢၼ် ယၢမ်ႈလၢတ်ႈဢွၵ်ႇမွၵ်ႇၼႄ မၢႆတူဝ်ၸဝ်ႈၵဝ်ႇဝႃႈ ပဵၼ်ၶုၼ်သၢမ်လေႃးၼႆသေ ၵႂႃႇယူႇတၢင်းဢိူင်ႇႁႃႈဝၢၼ်ႈ ၸႄႈဝဵင်းၵေးသီး ၵူၼ်းၼႂ်းပိုၼ့်တီႈၵမ်ႈၽွင်ႈယုမ်ႇယမ်ဝႃႈ ပဵၼ်ၸဝ်ႈမျၢတ်ႈ သၢမ်လေႃးတႄႉၼႆသေ ၵႂႃႇလူႇဝႆႈ – တႄႇၼၼ့်မႃး ၵၢၼ်ႁွင့်ၽဵင်းၵႂၢမ်းၵိုတ်းၵႂႃႇပႅတ်ႈၶၢဝ်းႁိုင်။

ဢိင်ၼိူဝ်လွင်ႈၼႆႉ ၵူၼ်းၸိူဝ်းယၢမ်ႈပၼ်ႁႅင်းမၼ်းၸၢႆး ႁၼ်ဝႃႈ ၸၢႆးၸိူင်းႁၢၼ် ပႅၵ်ႇပိူင်ႈၵႂႃႇ ဢမ်ႇမိူၼ် ပိူင်ၵဝ်ႇ ပၵ်းၵဝ်ႇ ၊ ယွၼ်ႉပိူဝ်ႈ မၼ်းၸၢႆးၸႂ်ႉယႃႈမဝ်းၵမ်လူၼ်ႉလိူဝ်သေ ၸင်ႇထိုင်တီႈ လၢတ်ႈၵႂႃႇၸွမ်းလူၺ်ႈ ဢႃႇယူင်ႇၸဝ်ႈၵဝ်ႇပဵၼ်မႃး ၼႆယူႇ။

ၽူႈပၼ်ႁႅင်းၸၢႆးၸိူင်းႁၢၼ်ၵေႃႉၼိုင်ႈတႄႉ လၢတ်ႈၼႄတၢင်းႁၼ်ထိုင်ဝႆႉၼင်ႇၼႆ -“မၼ်းပဵၼ်ၵူၼ်းၵတ်ႉၶႅၼ်ႇၵေႃႉၼိုင်ႈ ။ထုၵ်ႇလီပဵၼ်လီလိူဝ်သေၼႆႉ။ ထုၵ်ႇလီလႆႈၽႅဝ်တီႈ သုင်လိူဝ် သေၼႆႉ။ တၼ်းလႆႈၶိုၼ်ႈသုင်ၵႂႃႇယူႇၵူၺ်းၵႃႈမၼ်းဢမ်ႇၽႅဝ် တီႈဢၼ်သုင်ဢၼ်မၼ်းထုၵ်ႇလီလႆႈၽႅဝ်။ သမ်ႉလႆႈ ၶိုၼ်းၵၢၼ်ႉတူၵ်း ၵွပ်ႈပိူဝ်ႈယႃႈ ။ ပေႃးဝႃႈ ဢမ်ႇၽႅဝ်ၵႂႃႇတၢင်းၽိတ်းၸိူင်ႉၼႆတႄႉ မၼ်းၼႆႉတၢင်းၵတ်ႉတၢင်းၶႅၼ်ႇ ပႃႇရမီႇဢၼ်မၼ်းမီးဝႆႉၼႆႉ ဢမ်ႇထိုင် တၢၼ်ႇၸၢႆးမူး ၸၢႆးလၢဝ်သႂ် ၸၢႆးထီးသႅင် ၸၢႆးသၢႆမၢဝ်းၶဝ်သေတႃႉ တေယူႇၾၢႆႇတႂ်ႈၶဝ်ၼၼ်ႉၵူၺ်းလူင်ၼေႃ။”

ၼႂ်းတူင်ႇတႆးၼႆႉ ယွၼ်ႉမီးၾိင်ႈယုမ်ႇယမ်လၢၵ်ႇလၢႆလႄႈ ၽိတ်းႁႃႉထုၵ်ႇၼႆ ထိုင်ဝၼ်းမိူဝ်ႈၼႆႉ ၽႂ်ပႆႇၸီႉၸမ်ႈၼႄလႆႈတေႉတေႉ။   

ဢၼ်ယိၼ်းလီသေလၢႆၸွမ်းတႄႉ တႄႇၼၼ်ႉမႃး မၼ်းၸၢႆး ဢမ်ႇၶဝ်ႈၼႂ်းတူင်ႇၵူၼ်းမိူၼ်ၵဝ်ႇ ။ မၼ်းၸၢႆးပဵၼ် ၸပ်းမႆႈၶႆႈၼၢဝ် တၢင်းပဵၼ်ၼမ်။ တေၵဵဝ်ႇၵပ်းယႃႈတႄႉယူႇႁိုဝ်ဢမ်ႇၵဵဝ်ႇ ၼႆၼၼ်ႉတႄႉ ယူႇတီႈၸုမ်းၶၢဝ်ႇ ႁဝ်းၶႃႈၵေႃႈဢမ်ႇၸၢင်ႈယိုၼ်ယၼ်။

ဢၼ်ၵမ်ႈၼမ်ႁၼ်ထိုင်သေလၢတ်ႈဝႃႈ မၼ်းၸၢႆးလူႉယွၼ်ႉယႃႈမဝ်းၵမ်ၼႆၵေႃႈ ၸၢင်ႈပဵၼ်လႆႈယူႇ ယွၼ်ႉဝႃႈ ပွႆးၼႂ်းမိူင်းတႆးၼႆႉ ထၢင်ႇႁၢင်ႈၸႂ်ႉ/ၵိၼ်ယႃႈမဝ်းၵမ်လႆႈလိူင်ႇလိူဝ်လွတ်ႈလႅဝ်းၼႆ ၽူႈႁွင်ႉၵႂၢမ်းတႆးသႅၼ်းႁုၼ်ႈမႂ်ႇ ၵေႃႉၼိုင်ႈလၢတ်ႈၼႄၼင်ႇၼႆ -“ၵၢပ်ႈယၢမ်းလဵဝ် ၶႂ်ႈႁဵတ်းသင်ၵေႃႈငၢႆႈ ပေႃးၵႂႃႇလႄႈ ဢူၺ်းၵေႃႉဢူၺ်းသႄႈၵေႃႈ မၢင်ပွၵ်ႈလႆႈၵိၼ် ၊ ႁဝ်းဢမ်ႇၶႂ်ႈၵိၼ်ၵေႃႈ ပိူၼ်ႈတေလဵင်ႉ မိူင်းႁဝ်းမၼ်းလိူင်ႇလူး ။ ယႃႇဝႃႈ ၽူႈႁွင်ႉၵႂၢမ်းလႃႈ တေႃႈၼင်ႇ ၵူၼ်းယူဝ်းယူဝ်းၼင်ႇၵၼ် တင်းဢဝ်ယႃႈမဝ်းၵမ်မႃးလဵင်ႉၵၼ်ယူႇယဝ်ႉၼႃႇ”

ၸဵမ်မိူဝ်ႈပီ 2018 တၢင်းပဵၼ်မၼ်းၸၢႆးမီးလၢႆလွင်ႈလၢႆဢၼ် မိူၼ်ၼင်ႇ ၼမ်ႉထူမ်ႈပွတ်ႇ၊ လိူတ်ႈလူမ်းၼႂ်းတူဝ်ဢမ်ႇၽဵင်ႇလႄႈ တိၼ်မိုဝ်းဢမ်ႇတူင်ႉလႆႈမိူၼ်ၵဝ်ႇ လႄႈ သဵၼ်ႈလိူတ်ႈဢွၵ်းဢေႃးတႅၵ်ႇ  ၸိူဝ်းၼႆႉလႄႈ လႆႈယူတ်းယႃပဵၼ်လၢႆပွၵ်ႈ။

တႄႇဢဝ် ဝၼ်းတီႈ 18/06/2025 ၼၼ်ႉမႃး မၼ်းၸၢႆးပဵၼ်ၵိၼ်းႁႅင်းဝႆႉလႄႈ လႆႈသူင်ႇယူတ်းယႃတူဝ် တီႈႁူင်းယႃသျေႉသွင်ႇ (ရှေ့ဆောင်) ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး။ ၽွင်းၼၼ်ႉ မၼ်းၸၢႆး ဢမ်ႇလၢတ်ႈၵႂၢမ်းသင်လႆႈယဝ်ႉၼႆ ၵေႃႉပဵၼ်ၼွင်ႉယိင်းမၼ်းၸၢႆး ၼၢင်းမွၼ်းႁွမ် လၢတ်ႈတီႈၽူႈတွႆႇႁွၵ်ႈၼင်ႇၼႆ။

ယူတ်းယႃယူႇသေတႃႉ ဢမ်ႇမုင်ႈမွင်းၵေႃႈ  ၸူဝ်ႈပၢၼ်ဢွၼ်ႇၸၢႆးၸိူင်းႁၢၼ်လႆႈလူႉသဵင်ႈၵႂႃး ၼႂ်းဝၼ်းတီႈ 28/7/2025 တီႈႁိူၼ်းမၼ်းၸၢႆး ပွၵ်ႉသိူဝ်ၶမ်း ဢိူင်ႇႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း ။

ၽွင်းမၼ်းၸၢႆးလူႉသဵင်ႈၼႆႉ ဢႃယုၸူဝ်ႈၶူပ်ႇမၼ်းၸၢႆး ထူၼ်ႈထိုင် 51 ပီ။ ဢိင်ၼိူဝ်ငဝ်းလၢႆးၾိင်ႈၾႃႉရႃႇသီႇ ၼမ်ႉထူမ်ႈၼမ်ႉၼွင်းသေ ၼင်ႇႁိုဝ်ၶႅၵ်ႇတီႈၸမ်တီႈၵႆတေမႃးလႆႈငၢႆႈလူမ်ၸႂ်ၼၼ်ႉ ဢဝ်ၶၢပ်ႇတူဝ်မၼ်းၸၢႆး ၵႂႃႇဝႆႉတီႈ ဝတ်ႉဝၢၼ်ႈႁွင်ႇ ဝၢၼ်ႈႁွင်ႈလိုၵ်ႉ ပွၵ်ႉသိူဝ်ၶမ်း ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။

ဝၼ်းတီႈ 31/7/2025 ယၢမ်းၶမ်ႈ 7 မူင်း ထိုင် 11 မူင်းၵၢင်ၶိုၼ်းၼၼ်ႉ ၸုမ်းပၢႆးမွၼ်းတီႈၸမ်တီႈၵႆ တေမႃးၸတ်းပၢင်ႁွင်ႉၵႂၢမ်းတွၼ်ႈ သူင်ႇသင်ႇၸၢႆးၸိူင်းႁၢၼ်သေ ၊ ထိုင်မႃး ဝၼ်းတီႈ 1/8/2025 ၼႆႉ ယူႇတီႈမူႇပီႈၸုမ်းၼွင်ႉလႄႈ ၸုမ်းပၢႆးမွၼ်း ၶႅၵ်ႇတီႈၸမ်တီႈၵႆ တေႁူမ်ႈၵၼ် ပူၼ်ႉၶၢပ်ႈတူဝ်မၼ်းၸၢႆး။ ၽွင်းၼၼ်ႉၵေႃႈ ၸုမ်းပၢႆးမွၼ်း တေႁွင်ႉၵႂၢမ်းသူင်ႇသင်ႇပဵၼ်ပွၵ်ႈလိုၼ်း ၼႆ ၼႂ်းလိၵ်ႈၽိတ်ႈမွၵ်ႇမွင်ၸႂ်ၼၼ်ႉ ပႃးဝႆႉၼင်ႇၼႆ။

ယူႇတီႈၸုမ်းၶၢဝ်ႇၽူႈတွႆႇႁွၵ်ႈသေ  ပဵၼ်ဢၼ်သေးလၢႆမွင်ၸႂ်ၸွမ်း လုၵ်ႈလၢင်းမေးၼၢင်းလႄႈၽူႈႁၵ်ႉၽဵင်းၵႂၢမ်းပၢႆးမွၼ်းၸၢႆးၸိူင်းႁၢၼ်တႄႉတႄႉၶႃႈဢေႃႈ။