ၸဝ်ႈၸၢႆးလိုၼ်း ဢႃယု 76 ပီ ႁူဝ်ပဝ်ႈ ၼႃႈလိၼ်ၶိုၵ်ႉတွၼ်းမၢႆ 4 NDAA မိူင်းလႃး လူႉသဵင်ႈယွၼ်ႉတၢင်းပဵၼ်ၶႅၼ်ႊသိူဝ်ႊၽွင်းၵႂႃႇယူတ်းယႃတူဝ် တီႈႁူင်းယႃၾင်ႇမိူင်းၶႄႇ ။
လူႉသဵင်ႈမိူဝ်ႈဝႃးဝၼ်းတီႈ 8/8/2024 ယၢမ်းၵၢင်ၶမ်ႈသေ ဝၼ်းတီႈ 9/8/2024 မိူဝ်ႈၼႆႉလုၵ်ႈလၢင်းၵူၼ်းႁိူၼ်း တေဢဝ်ၶၢပ်ႈတူဝ်ပွၵ်ႈၶိုၼ်း မိူင်းလႃး တႃႇလုမ်းလႃးသၢင်းၵဵဝ်ႇ။
ၸဝ်ႈၸၢႆးလိုၼ်းၼႆႉ ပဵၼ်ႁူဝ်ပဝ်ႈ တပ်ႉၸုမ်း NDAA ၊ ၵႅမ်ႁူဝ်ပဝ်ႈပဵၼ် ဢူးသၢၼ်းပိူဝ်ႇ လႄႈ ၸဝ်ႈၶုၼ်သၢင်ႇလူႇ။ယၢမ်းလဵဝ်ဢၼ်ၵွၼ်းတပ်ႉသိုၵ်းမိူင်းလႃးဝႆႉတႄႉပဵၼ်လုၵ်ႈၸၢႆးမၼ်းၸဝ်ႈ ဢူးထဵင်ႇလိၼ်း။
ပႃႈၼၢင်းယဵၼ်ႇမေးၼၢင်းမၼ်းၸဝ်ႈၸၢႆးလိုၼ်းၼႆႉပဵၼ်လုၵ်ႈယိင်း ၽိူင်ၵျႃးသိူင်း ၽူႈၼမ်းၸုမ်းသိုၵ်းၵဝ်ႈၵၢင်ႉ MNDAA ။
1989 ၸဝ်ႈၸၢႆးလိုၼ်းဢွၼ်ႁူဝ် ၽိုၼ်ႉဝၢႆႇၽၢတ်ႇဢွၵ်ႇ ပႃႇတီႇၶွမ်ႊမိဝ်ႊၼိတ်ႉမိူင်းမၢၼ်ႈသေ ၵိုတ်းသိုၵ်းၵၼ်တင်းၸုမ်းသိုၵ်းမၢၼ်ႈ ၵေႃႇတင်ႈၼႃႈလိၼ်ၶိုၵ်ႉတွၼ်းမၢႆ 4 ႁိူဝ်ႈႁိူင်းၶိုၼ်ႈယႂ်ႇမႃး ။
မိူဝ်ႈပီ 1989 လိူၼ်ၵျုၼ်ႊဝၼ်းတီႈ 30 လူင်းလၢႆးမိုဝ်းၵိုတ်းတိုၵ်းလွင်ႈငမ်းယဵၼ်ၵၼ်တင်း ၸုမ်းသိုၵ်းမၢၼ်ႈ ၼဢၽ။ ထိုင်မႃးၼႂ်းပီ 2011 သႅပ်ႉထႅမ်ႊပိူဝ်ႊ ဝၼ်းတီႈ 7 လူင်းလၢႆးမိုဝ်းလွင်ႈငမ်းယဵၼ်ၸၼ်ႉၸႄႈမိူင်း တင်းလူင်ပွင်ၸိုင်ႈဢူးတဵင်းၸဵင်ႇဢွၼ်ႁူဝ် သေ ၼႂ်းပီၼၼ်ႉ လိူၼ်တီႊသႅမ်ႊပိူဝ်ႊဝၼ်းတီႈ 2 လူင်းလၢႆးမိုဝ်းလွင်ႈငမ်းယဵၼ်ၸၼ်ႉမိူင်းႁူမ်ႈတုမ် ။
NDAA ၼႆႉ ပဵၼ်ပႃးလုၵ်ႈၸုမ်း FPNCC ၶွမ်ႊမတီႊဢုပ်ႇဢူဝ်းလွင်ႈငမ်းယဵၼ်ၸၼ်ႉမိူင်းႁူမ်ႈတုမ် ဢၼ်ၸုမ်းသိုၵ်းဝႃႉ UWSA ဢွၼ်ႁူဝ်ဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ